Tsayang Baporofeti e le Sekao—Habakuke
1. Ke eng fa re kgona go tlhaloganya tsela e moporofeti Habakuke a neng a ikutlwa ka yone?
1 Tsela e lefatshe leno le ntseng le nna maswe le go feta ka yone e ka nna ya dira gore re ikutlwe jaaka Habakuke fa a ne a botsa Jehofa a re: “Ke ka ntlha yang fa o dira gore ke bone se se utlwisang botlhoko, mme o nnela go leba a e leng matshwenyego fela?” (Hab. 1:3; 2 Tim. 3:1, 13) Fa re tlhatlhanya ka molaetsa wa ga Habakuke le ka sekao sa gagwe sa go ikanyega, re ka kgona go nna re nitame fa re ntse re letetse letsatsi la fa Jehofa a tla go atlhola lefatshe leno.—2 Pet. 3:7.
2. Re ka bontsha jang gore re ikanya Modimo?
2 Nna o Ikanyega mo Modimong: Go na le gore Habakuke a nnele go akanya ka maemo a a bosula a nako ya gagwe, o ne a nna a nonofile mo tumelong e bile a tshwaregile ka tiro ya Modimo. (Hab. 2:1) Jehofa o ne a mo tlhomamisetsa gore lefoko la Gagwe le tla diragadiwa ka nako e e tshwanetseng le gore “mosiami ene, o tla nna a tshela ka boikanyegi jwa gagwe.” (Hab. 2:2-4) Mafoko ao a tshwanetse go re ama jang rona Bakeresete ba re tshelang mo metlheng eno ya bofelo? Selo sa botlhokwa ga se go itse gore bokhutlo bo tla tla leng go na le moo, ke go tlhomamisega gore bo tla tla. Tumelo e re thusa gore re nne re ntshitse matlho dinameng le go tshwarega mo tirong ya go rera.—Baheb. 10:38, 39.
3. Ke ka ntlha yang fa re tshwanetse go tswelela re itumelela go direla Jehofa?
3 Itumelele go Direla Jehofa: Tumelo ya rona e tlile go lekwa fa Gogo wa Magogo a re tlhasela. (Esek. 38:2, 10-12) Fa go nna le ntwa, botshelo bo nna thata, tota le mo go ba ba fentseng ntwa eo. Go ka nna le tlhaelo ya dijo, batho ba ka latlhegelwa ke dithoto tsa bone mme botshelo bo nne thata. Re tla dira eng fa go ka nna le maemo a a ntseng jalo? Habakuke o ne a lebeletse gore dilo tse di ntseng jalo di tlile go direga ke ka moo a neng a tswelela a itumelela go direla Jehofa. (Hab. 3:16-19) “Boipelo jwa ga Jehofa” bo tla re thusa gore re itshokele diteko tse di larileng kwa pele.—Neh. 8:10; Baheb. 12:2.
4. Ke eng se re ka itumelelang go se dira gone jaanong le mo nakong e e tlang?
4 Batho ba ba tla falolang fa Jehofa a tla go atlhola lefatshe leno, ba tla tswelela ba ntse ba rutiwa go tshela ka tsela e Modimo a e batlang. (Hab. 2:14) Ba ba tla tsosiwang le bone ba tla tlhoka go rutiwa ka Jehofa. Gone jaanong, a re diriseng tshono nngwe le nngwe go bua ka Jehofa le ka ditiro tsa gagwe tse di gakgamatsang!—Pes. 34:1; 71:17.