BOTSHELO JWA BOKERESETE
Jehofa o re Thusa Gore re Kgone go Itshokela Mathata
Re lebana le mathata a mantsi mo malatsing ano a bofelo. Ka dinako dingwe, re ka ikutlwa e kete re ka se kgone go itshokela mathata a re nang le one. Le fa go ntse jalo, fa re tswelela re atamalane le Jehofa o tla re thusa gore re kgone go itshokela mathata a re neng re akanya gore re ka se kgone go a itshokela. (Isa 43:2, 4) Re ka atamalana jang le Jehofa fa re lebane le mathata?
Rapela. Fa re bolelela Jehofa maikutlo a rona o tla re naya kagiso ya mogopolo le maatla a go itshoka.—Baf 4:6, 7; 1Bt 5:17.
Nna gone kwa dipokanong. Gone jaanong re tlhoka go ithuta ka Jehofa le go itsalanya le ba bangwe kwa dipokanong, go feta ka tsela e re neng re dira ka yone mo nakong e e fetileng. (Bah 10:24, 25) Fa re baakanyetsa, re nna gone kwa dipokanong re bo re nna le seabe mo go tsone re a bo re amogela thuso e e tswang kwa go Jehofa.—Tsh 2:29.
Nna le seabe mo bodireding. Go nna le seabe mo bodireding ka metlha go tla re thusa gore re se ka ra tlhoma mogopolo thata mo mathateng a rona. Gape re tla nonotsha botsala jwa rona le Jehofa le badumedimmogo le rona.—1Bk 3:5-10.
LEBANG BIDIO YA JEHOFA O TLA GO TLHOKOMELA, LO BO LO ARABA DIPOTSO TSE DI LATELANG:
Ke eng se se thusitseng Malu gore a tswelele a atamalane le Jehofa fa a ne a lebane le mathata?
Fela jaaka Malu, mafoko a a mo go Pesalema 34:18 a ka re gomotsa jang fa re lebane le mathata?
Maitemogelo a ga Malu a re bontsha jang gore Jehofa o re naya “maatla a a sa tlwaelegang” fa re na le mathata?—2Bk 4:7