O ka Kgona go Itlhophela Bokamoso Jwa Gago

Dingwaga di feta 3 500 tse di fetileng, Jehofa o ne a bolelela batho ba ba neng ba mo obamela gore ba tshwanetse go dira eng gore ba nne le bokamoso jo bo itumedisang. O ne a re: “Ke beile fa pele ga lona botshelo le loso, tshegofatso le phutso; mme lo tshwanetse go tlhopha botshelo gore lo tshele, lona le ditlogolwana tsa lona.”​—Duteronome 30:19.

Gore batho bao ba nne le bokamoso jo bo itumedisang, ba ne ba tshwanetse go dira ditshwetso tse di siameng. Le gompieno go ntse fela jalo. Baebele e re bolelela gore re ka nna le bokamoso jo bo itumedisang fa re “rata Jehofa, Modimo  . . , ka go reetsa lentswe la gagwe.”​—Duteronome 30:20.

RE KA RATA JEHOFA JANG RE BO RE MO REETSA?

ITHUTE GORE BAEBELE E A RENG: Gore o rate Jehofa o tshwanetse go ithuta ka ene pele mo Baebeleng. Fa o ntse o ithuta ka ene o tla lemoga gore ke Modimo yo o lorato le gore o go batlela dilo tse di molemo. O kopa gore o mo rapele ‘ka gonne o a go kgathalela.’ (1 Petere 5:7) Baebele e re solofetsa gore fa re dira maiteko a go atamalana le Modimo, ‘o tla re atamela.’​—Jakobe 4:8.

DIRISA SE O SE ITHUTANG: Go reetsa Modimo go kaya go dira se a reng re se dire mo Baebeleng. Fa o dira jalo, “tsela ya gago e tla atlega e bile o tla dira ka botlhale.”​—Joshua 1:8.