Batla Dithuto Tsa Botlhokwa Tse O ka Di Dirisang

Fa re ithuta Baebele re ka dira dipatlisiso gore re bone dithuto tsa botlhokwa tse re ka di dirisang. Re ka dira eng gore dithuto tseo di re tswele mosola?

Ela tlhoko dintlha tsa botlhokwa mo pegong e o e balang. Ka sekai, ipotse gore ke mang yo o kwadileng pego eo, o ne a e kwalela mang le gore o e kwadile leng. Maemo a ne a ntse jang, go ne go direga eng pele ga foo le morago ga moo?

Leka go bona gore o ka ithuta eng ka go ipotsa dipotso tseno: ‘Batho ba ke ithutang ka bone ba ne ba ikutlwa jang? Ba ne ba na le dinonofo kgotsa mekgwa efe? Goreng ke tshwanetse go etsa dinonofo tseo kgotsa go tila mekgwa eo?’

Dirisa se o se ithutang fa o le kwa tshimong le fa o dirisana le batho ba bangwe. Fa o dira jalo o tla nna botlhale ka gonne Baebele e a re: “Fa lo itse dilo tseno, lo tla itumela fa lo di dira.”​—Joh. 13:17.

• Kakantsho: Leka go bona gore karolo ya Matlotlo A a Mo Lefokong la Modimo mo dipokanong tsa mo gare ga beke e re thusa jang go dirisa se re se ithutang. Karolo eno e na le dipotso tse re ka di ipotsang, dintlha tse re ka akanyetsang kwa teng ka tsone le ditshwantsho.