Potso e ka Thusa Batho ba le Bantsi

Mary le monna wa gagwe yo o bidiwang John,a ba nna mo nageng nngwe e batho ba le bantsi ba ba tswang kwa Philippines ba fudugelang mo go yone ka ntlha ya tiro. Ka nako ya bolwetse jwa COVID-19, Mary o ile a simolola dithuto tsa Baebele e seng fela mo nageng e a nnang mo go yone, mme le kwa dinageng tse dingwe. O ile a dira seo jang?

Mary o ne a tle a botse batho ba a ithutang Baebele le bone a re: “A go na le mongwe yo o mo itseng yo a ka ratang go ithuta Baebele?” Fa a re ee, o ne a mo kopa gore a mo kopanye le ene. Gantsi go botsa potso eno go nna le diphelelo tse dintle. Goreng re rialo? Ka gonne batho ba ba ratang go ithuta Lefoko la Modimo ba batla go bolelela ba malapa a bone le ditsala ka se ba se ithutileng. Go botsa potso eo go ile ga felela jang?

Mosadi mongwe yo Mary a neng a ithuta Baebele le ene yo o bidiwang Jasmin, o ile a mo kopanya le batho ba le banê ba le bone ba neng ba batla go ithuta Baebele. Mongwe wa bone e ne e le Kristine. O ne a itumelela go ithuta Baebele thata mo a ileng a kopa Mary gore ba ithute gabedi ka beke. Mary o ile a mmotsa jaana: “A go na le mongwe yo o mo itseng yo le ene a ka ratang go ithuta Baebele?” Kristine o ile a re: “Ee, ke tla go kopanya le ditsala tsa me.” Mo dibekeng di le mmalwa, Kristine o ile a kopanya Mary le ditsala tsa gagwe di le nnê tse di neng di batla go ithuta Baebele. Moragonyana Kristine o ile a kopanya Mary le ditsala tse dingwe gape tsa gagwe. Bangwe ba bone ba ile ba dira se se tshwanang.

Gape Kristine o ne a batla gore ba lelapa la gagwe ba ba kwa Philippines le bone ba ithute Baebele. Ka jalo, o ile a bua le morwadie e bong Andrea. Kwa tshimologong, Andrea o ne a akanya gore Basupi ba ga Jehofa ke bodumedi jo bo sa tlwaelegang, ga ba dumele mo go Jesu le gore ba dirisa Tesetamente e Kgologolo fela. Mme fa a sena go ithuta Baebele lekgetlo la ntlha, o ile a lemoga gore se a neng a se akanya e ne e se boammaaruri. Fa ba ntse ba tsweletse ba ithuta o ne a tle a re: “Fa Baebele e rialo, go raya gore ke nnete.”

Fa nako e ntse e tsamaya, Andrea o ile a kopanya Mary le ditsala tsa gagwe tse pedi le mongwe yo a berekang le ene. Mary o ne a sa itse gore fa a ntse a ithuta Baebele le Andrea, rakgadiagwe Andrea yo o sa boneng yo o bidiwang Angela o ne a tle a ba reetse. Letsatsi lengwe Angela o ile a kopa Andrea gore a ithute Baebele le ene. Angela o ne a rata se a neng a se ithuta. Mo kgweding e le nngwe fela, o ile a kgona go tshwarelela ditemana di le dintsi ka tlhogo e bile o ne a batla gore ba ithute ganê mo bekeng. Andrea o ile a mo thusa gore a kgone go ya dipokanong ka metlha a dirisa videoconference.

Fa Mary a ntse a ithuta le Kristine o ile a lemoga gore monna wa ga Kristine yo o bidiwang Joshua, o ne a rata go ba reetsa. Mary o ile a mo kopa gore a nne le bone. Joshua o ile a mo raya a re: “Ke tla nna le lona ke bo ke reetsa fela, mme o se ka wa mpotsa dipotso. Fa o ka mpotsa dipotso, ke tlile go tsamaya.” Mo metsotsong e le metlhano ba ntse ba ithuta, Joshua o ile a botsa dipotso go feta Kristine e bile le ene o ne a batla go ithuta Baebele.

Potso e Mary a ileng a e botsa e ile ya dira gore batho ba le bantsi ba simolole go ithute Baebele. O ile a dira dithulaganyo tsa gore bakaulengwe le bokgaitsadi ba ithute le bangwe ba bone. Mary o ile a ithuta Baebele le batho ba le 28 ba ba tswang mo dinageng di le nnê tse di farologaneng.

Motho wa ntlha yo Mary a ileng a ithuta le ene yo o bidiwang Jasmin o ile a kolobediwa ka April, 2021. Kristine ene o ile a kolobediwa ka May 2022 e bile o ile a boela kwa Philippines gore a ye go nna le ba lelapa la gagwe. Batho ba le babedi ba Kristine a ileng a ba kopanya le Mary le bone ba ile ba kolobediwa. Angela o ile a kolobediwa dikgwedi di se kae moragonyana e bile gone jaanong ke mmulatsela wa ka metlha. Monna wa ga Kristine e bong Joshua le morwadie e bong Andrea le batho ba bangwe ba ba neng ba ithuta Baebele, ba gatela pele.

Ka motlha wa ga Jesu le baaposetoloi, batho ba le bantsi ba ne ba rata go tlotlela ba malapa a bone le ditsala ka se ba se ithutileng ka Jesu. (Joh. 1:41, 42a; Dit. 10:24, 27, 48; 16:25-33) Goreng o sa botse motho yo o ithutang Baebele le ene kgotsa mongwe yo o kgatlhegang jaana: “A go na le mongwe yo o mo itseng yo a ka ratang go ithuta Baebele?” Gongwe potso eo e ka dira gore o bone batho ba bangwe ba o ka ithutang Baebele le bone.