O ka Kgona go Fenya Dikeletso Tse di sa Siamang

1. Rotlhe re lwantshana le eng?

A O KILE wa eletsa go dira sengwe se Jehofa a reng re se ka ra se dira? Fa go le jalo, o se ka wa kgobega marapo. Baebele e a re: “Diteko tse di lo welang di wela batho botlhe.” (1 Bakor. 10:13) Seo se raya gore batho ba bangwe le bone, ba lwantshana le keletso e e sa siamang e o lwantshanang le yone, ka jalo ga o nosi. Mme gone, Jehofa a ka go thusa go lwantsha dikeletso tseo tse di sa siamang.

2. Ke dikeletso dife tse di sa siamang tse Bakeresete le batho bangwe ba ba ithutang Baebele ba ka tswang ba lwantshana le tsone? (Bona le ditshwantsho.)

² Gape Baebele e a re: “Mongwe le mongwe o lekwa ka go gogelwa ke keletso ya gagwe e bo e mo raela.” (Jak. 1:14) Temana eno e re thusa go tlhaloganya gore batho ba ba farologaneng ba ka raelwa ke dilo tse di sa tshwaneng. Ka sekai, Bakeresete bangwe ba ka tswa ba raelesega go dira boitsholo jo bo sa siamang le batho ba bong jo bo sa tshwaneng le jwa bone, mme ba bangwe ba ka tswa ba raelesega go dira boitsholo jo bo sa siamang le batho ba bong jo bo tshwanang le jwa bone. Bangwe ba ba tlogetseng go lebelela ditshwantsho le dibidio tse di tsosang keletso ya tlhakanelodikobo, ba ka nna le keletso e e maatla ya go boa ba di lebelela gape. Mme ka dinako dingwe ba ba tlogetseng go dirisa diokobatsi, ba ka nna le keletso e e maatla ya go di dirisa gape. Kgotsa ba ba tlogetseng go nwa bojalwa ka tsela e e feteletseng, ba ka raelesega go boela mo mokgweng ono. Tseo ke dikeletso di le mmalwa fela tse Bakeresete bangwe le batho bangwe ba ba ithutang Baebele ba ka tswang ba lwantshana le tsone. Rotlhe fela re ka tswa re ile ra ikutlwa ka tsela e moaposetoloi Paulo a ileng a ikutlwa ka yone. O ile a re: “Fa ke batla go dira se se siameng, se se bosula se gone mo go nna.”​—Bar. 7:21.

3. Motho yo o nnang a lwantsha keletso nngwe e e sa siamang a ka akanya eng?

³ Fa e le gore o nna o lwantsha keletso nngwe e e sa siamang, o ka nna wa akanya gore o ka se kgone go e fenya. Gape o ka akanya gore Jehofa ga a go amogele fela ka gonne o na le keletso eo. Mme gone, itse gore seo ga se boammaaruri. Gore re bone lebaka la seo, setlhogo seno se tla araba dipotso tse pedi: (1) Maikutlo a gore ga o ka ke wa kgona go lwantsha keletso e e sa siamang le a gore Jehofa ga a go amogele a tswa kae? (2) Ke eng se se ka go thusang go fenya dikeletso tse di sa siamang?

SE “SATANE” A BATLANG GORE RE SE AKANYE

4. (a) Goreng Satane a akanya gore re ka se kgone go lwantsha dikeletso tse di sa siamang? (b) Goreng re ka tlhomamisega gore re ka kgona go lwantsha dikeletso tse di sa siamang?

⁴ Satane o batla gore re akanye gore ga re ka ke ra kgona go lwantsha dikeletso tse di sa siamang. Fa Jesu a ne a ruta balatedi ba gagwe go rapela, o ile a dira gore go bonale sentle gore Satane o tla leka go re raela. O ile a re ba rapele ba re: “O se ka wa re tsenya mo thaelong, mme o re golole mo go Satane.” (Math. 6:13) Satane a re batho ga ba ka ke ba ikobela Jehofa fa ba raelesega go dira dilo tse di sa siamang. (Jobe 2:4, 5) Mme boammaaruri ke gore Satane ke ene a ileng a raelwa ke keletso ya gagwe e bile o ne a sa ikemisetsa go ikanyega mo go Jehofa. Ka jalo, o akanya gore le rona re tla tlogela go direla Jehofa jaaka ene fa re raelwa. Gape o ne a akanya gore Morwa Modimo yo o se nang boleo o ne a ka raelesega go dira sengwe se se sa siamang. (Math. 4:8, 9) A mme re ka se kgone go lwantsha dikeletso tse di sa siamang? Nnyaa re ka kgona! Re dumalana le se moaposetoloi Paulo a ileng a se bua. O ile a re: “Ke kgona go dira dilo tsotlhe ka ntlha ya yo o nnayang maatla.”​—Bafil. 4:13.

5. Re itse jang gore Jehofa o tlhomamisegile gore re ka kgona go fenya dikeletso tse di sa siamang?

⁵ Go farologana le Satane, Jehofa o tlhomamisegile gore re ka kgona go lwantsha dikeletso tse di sa siamang. Re itse seo jang? Jehofa o ile a bolelela pele gore ba boidiidi jo bogolo ba tla tswelela ba ikanyega mo go ene, le gore ba tlile go falola pitlagano e kgolo. Leka go akanya gore seo se kaya eng. Jehofa yo o ka se kang a aka, a re batho ba le bantsintsi, e seng ba le mmalwa fela, ba tla tsena mo lefatsheng le lesha ba “tlhatswitse diaparo tsa bone tse ditelele” e bile ‘ba di sweufaditse mo mading a Kwana,’ mo go rayang gore o ba tsaya ba le phepa. (Tshen. 7:9, 13, 14) Go a bonala gore Jehofa o tlhomamisegile gore re ka kgona go fenya dikeletso tse di sa siamang.

6-7. Ke eng gape se Satane a batlang gore re se akanye?

⁶ Satane o batla gore re dumele gore re ka se kgone go lwantsha dikeletso tse di sa siamang. Gape o batla gore re dumele gore Jehofa ga a kitla a re amogela fela ka gonne re na le dikeletso tse di sa siamang. Mme boammaaruri ke gore Satane ke ene yo Jehofa a ka se kang a mo amogela e bile ga a kitla a tshelela ruri ka gonne Jehofa o tlile go mo fedisa. (Gen. 3:15; Tshen. 20:10) Ga go pelaelo gore Satane o galefisiwa ke gore ga a na tsholofelo ya go tshelela ruri. Ka jalo, o dira sotlhe se a ka se kgonang go dira gore re akanye gore re tshwana le ene le gore ga re na tsholofelo. Mme gone, ga re tshwane le ene gotlhelele. Tota e bile, Baebele e re tlhomamisetsa gore Jehofa o batla go re thusa gore re kgone go tshelela ruri. Ga a “eletse gore motho ope a senngwe mme o eletsa gore botlhe ba ikwatlhaye.”​—2 Pet. 3:9.

⁷ Fa re akanya gore re ka se kgone go lwantsha dikeletso tse di sa siamang le gore Jehofa a ka se re amogele, re a bo re akanya se Satane a batlang gore re se akanye. Go lemoga seo go tla re thusa gore re ikemisetse go mo lwantsha.​—1 Pet. 5:8, 9.

BOLEO BO KA DIRA GORE RE IKUTLWE JANG?

8. Kwantle ga go dira dilo tse di sa siamang, gape boleo bo akaretsa eng? (Pesalema 51:5) (Bona le “Tlhaloso.”)

⁸ Satane ga se ene fela yo o dirang gore re akanye gore re ka se kgone go lwantsha dikeletso tse di sa siamang le gore Jehofa a ka se re amogele. Go na le sengwe gape. Selo seo ke boleo jo re bo gotsitseng mo batsading ba rona ba ntlha.a​—Jobe 14:4; bala Pesalema 51:5.

9-10. (a) Adame le Efa ba ile ba ikutlwa jang fa ba sena go leofa? (Bona le setshwantsho.) (b) Boleo bo dira gore re ikutlwe jang?

⁹ Akanya gore Adame le Efa ba ile ba ikutlwa jang fa ba sena go leofa. Fa ba sena go tlola molao wa Modimo, ba ile ba iphitlha ba bo ba leka go pipa mebele ya bone. Fa buka ya Insight on the Scriptures e tlhalosa se ba ileng ba se dira fa ba sena go tlola molao wa Modimo, e a re: “Boleo bo dirile gore ba ikutlwe ba le molato, ba sa nnisege, ba sa sireletsega e bile ba tlhabilwe ke ditlhong.” Go ne go ntse jaaka e kete Adame le Efa ba ne ba lotleletswe mo ntlong e e nang le dikamore tseo tse nnê fela. Ba ne ba ka kgona go tswa mo kamoreng e nngwe ba ya kwa go e nngwe, mme gone ba ne ba ka se kgone go tswa mo ntlong eo. Ba ne ba ka se tshabele boleo joo gope.

¹⁰ Ke boammaaruri gore maemo a rona ga a tshwane kgo le a ga Adame le Efa. Seno ke ka gonne bone ba sa tswelwe mosola ke setlhabelo sa thekololo. Mme rona thekololo e re thusa gore re itshwarelwe maleo le gore re atamalane le Jehofa. (1 Bakor. 6:11) Le fa go ntse jalo, re na le boleo. Ka jalo, ga go gakgamatse go bo le rona re ikutlwa molato, re sa nnisege, re sa sireletsega e bile re tlhabiwa ke ditlhong. Tota e bile, Baebele e a re boleo bo sa ntse bo laola batho. Bo dira jalo tota “le mo bathong ba ba neng ba sa leofa ka tsela e Adame a leofileng ka yone.” (Bar. 5:14) Mme seo ga se a tshwanela go dira gore re kgobege marapo re bo re akanya gore ga re ka ke ra kgona go lwantsha dikeletso tse di sa siamang, le gore Jehofa ga a kitla a re amogela. Re ka kgona go lwantsha maikutlo ao a a sa siamang. Jang?

11. Re tshwanetse go dira eng fa re na le maikutlo a gore re ka se kgone go lwantsha dikeletso tse di sa siamang, mme ka ntlha ya eng? (Baroma 6:12)

¹¹ E re ka re na le boleo, ka dinako dingwe re ka ikutlwa e kete ga re ka ke ra kgona go lwantsha dikeletso tse di sa siamang. Go nna jaaka e kete re utlwa lentswe le re bolelela gore re ka se kgone go lwantsha dikeletso tse di sa siamang. Ga re a tshwanela go reetsa lentswe leo. Goreng? Ka gonne Baebele e a re ga re a tshwanela go letlelela boleo gore bo tswelele bo re ‘laola.’ (Bala Baroma 6:12.) Seno se raya gore re ka tlhopha go sa ineele mo dikeletsong tse di sa siamang. (Bagal. 5:16) Jehofa o ne a ka se re re lwantshe dikeletso tse di sa siamang fa e le gore o ne a sa tshepe gore re ka kgona go di lwantsha. (Dute. 30:11-14; Bar. 6:6; 1 Bathes. 4:3) Go a bonala gore re ka kgona go lwantsha dikeletso tse di sa siamang.

12. Re tshwanetse go dira eng fa re akanya gore Jehofa a ka se re amogele, mme ka ntlha ya eng?

¹² Ka tsela e e tshwanang, fa re akanya gore Jehofa a ka se re amogele fela ka gonne re na le dikeletso tse di sa siamang, go nna jaaka e kete boleo bo “bua” le rona, mme ga re a tshwanela go bo reetsa. Goreng? Ka gonne Baebele e a re Jehofa o a itse gore re na le boleo. (Pes. 103:13, 14) “O itse dilo tsotlhe” ka rona, go akaretsa le gore mongwe le mongwe wa rona o amiwa jang ke boleo jo re bo gotsitseng. (1 Joh. 3:19, 20) Fa re lwantsha keletso ya go dira se se sa siamang e bile re sa ineele, Jehofa o tla re tsaya re le phepa. Goreng re tlhomamisegile ka seo?

13-14. A fela ka gore o na le dikeletso tse di sa siamang go raya gore Jehofa ga a go amogele? Tlhalosa.

¹³ Baebele e bontsha gore go na le pharologano e kgolo fa gare ga go nna le keletso e e sa siamang, le go ineela mo keletsong e e sa siamang. Ga se ka metlha re ka kgonang go ithiba gore re se ka ra nna le keletso e e sa siamang. Mme re ka kgona go ithiba gore re se ka ra ineela mo go yone. Ka sekai, pele Bakeresete bangwe ba kwa Korintha e nna Bakeresete, ba ne ba tlhakanela dikobo le batho ba bong jo bo tshwanang le jwa bone. Paulo o ile a re: “Bangwe ba lona ba ne ba ntse jalo.” A seno se ne se raya gore ba ne ba se kitla ba nna le keletso ya go tlhakanela dikobo le batho ba bong jo bo tshwanang le jwa bone gape? Go akanya jalo ga go utlwale ka gonne gantsi go thata gore motho a se ka a tlhola a nna le dikeletso tseo. Mme gone, Jehofa o ne a amogela Bakeresete ba ba neng ba le boikgapo e bile ba sa ineele mo dikeletsong tse di sa siamang. O ne a ba tsaya ba ‘tlhapisitswe ba bo ba nna phepa.’ (1 Bakor. 6:9-11) Go ntse jalo le ka wena.

¹⁴ O ka kgona go lwantsha dikeletso dipe fela tse di sa siamang tse o nang le tsone. Tota le fa o sa kgone go di thibela, o ka kgona go nna le boikgapo le go tila go “dira dilo go dumalana le dikeletso tsa [gago] tse di sa siamang, le go dira dilo tse di ratwang ke dikakanyo tsa [gago].” (Baef. 2:3) Ka jalo, ke eng se se ka go thusang go fenya dikeletso tse di sa siamang.

KE ENG SE SE KA GO THUSANG GO FENYA DIKELETSO TSE DI SA SIAMANG?

15. Gore o kgone go fenya dikeletso tse di sa siamang, goreng o tshwanetse go itse makoa a o nang le one?

¹⁵ Gore o kgone go fenya dikeletso tse di sa siamang, o tshwanetse go itse makoa a o nang le one. O se ka wa itsietsa ka go “akanya ka tsela e e phoso.” (Jak. 1:22) Ka sekai, motho yo o nwang bojalwa thata a ka nna a akanya gore bothata jono ga bo maswe go le kalo ka gonne a ipolelela gore batho ba bangwe ba nwa go mo feta. Kgotsa motho yo o nang le bothata jwa go lebelela ditshwantsho le dibidio tse di tsosang keletso ya tlhakanelodikobo, a ka nna a leka go pega ba bangwe molato a bo a re, ‘Ke ne nka se lebelele ditshwantsho le dibidio tse di tsosang keletso ya tlhakanelodikobo fa mosadi wa me a ne a ka bo a mpontsha gore o a nthata.’ Fa o simolola go akanya jalo, go tla nna motlhofo gore o ineele fa o raelesega. Ka jalo, o se ka wa ipeela mabaka a go dira selo se se sa siamang. O ikarabelela mo go se o se dirang.​—Bagal. 6:7.

16. O ka dira eng gore o se ka wa raelesega go dira sengwe se se sa siamang?

¹⁶ Fa o sena go lemoga makoa a o nang le one, dira dilo tse di tla go thusang gore o se ka wa ineela mo dikeletsong tse di sa siamang. (1 Bakor. 9:26, 27; 1 Bathes. 4:4; 1 Pet. 1:15, 16) Leka go bona gore ke eng se se go raelang le gore se go raela leng. Go ka direga gore mofuta mongwe wa keletso e e sa siamang kgotsa nako e e diregang ka yone e dire gore o raelesege thata. Ka sekai, a go thata gore o lwantshe keletso e e sa siamang fa o lapile kgotsa go le bosigo? Ipaakanye mme o dire tshwetso ya gore o tla dira eng fa o raelesega. Nako e e siameng ya go dira jalo, ke pele o dira sengwe se se sa siamang.​—Diane 22:3.

17. Re ithuta eng mo go se se diragaletseng Josefa? (Genesise 39:7-9) (Bona le ditshwantsho.)

¹⁷ Akanya ka se Josefa a ileng a se dira fa mosadi wa ga Potifaro a ne a mo raela. Ka yone nako eo, o ile a gana. (Bala Genesise 39:7-9.) Re ithuta eng? Josefa o ne a setse a ikemiseditse go dira se se siameng pele mosadi wa ga Potifaro a leka go mo raela. Ka tsela e e tshwanang, le wena o ka ikemisetsa go dira se se siameng pele o raelesega go dira sengwe se se sa siamang. Seo se tla dira gore fa o raelwa, go nne motlhofo go dira se o neng o ikemiseditse go se dira.

“NNANG LO ITLHATLHOBE”

18. Ke eng gape se o ka se dirang gore o fenye dikeletso tse di sa siamang? (2 Bakorintha 13:5)

¹⁸ Gore o kgone go lwantsha dikeletso tse di sa siamang, o tshwanetse go ‘nna o itlhatlhoba.’ Seo se raya gore ka metlha o tla nna o itshekatsheka go bona gore o ntse o dira jang. (Bala 2 Bakorintha 13:5.) Nako le nako, leka go bona gore o tlhoka go dira diphetogo dife mo tseleng e o akanyang ka yone le e o dirang dilo ka yone, go tswa foo o bo o di dira. Ka sekai, tota le fa o kgonne go lwantsha dikeletso tse di sa siamang, o ka ipotsa go re: ‘Go ntsere lobaka lo lokae gore ke gane?’ Fa o lemoga gore o ile wa diega, o se ka wa ikgalefela. Go na le moo, dira dilo tse di tla go thusang gore o dire botoka mo nakong e e tlang. Ipotse dipotso tseno: ‘Fa ke akanya ka sengwe se se sa siamang, a ke kgona go se ntsha ka bonako mo mogopolong? A boitlosobodutu jo ke bo tlhophang bo dira gore go nne thata gore ke lwantshe dikeletso tse di sa siamang? A ke faposa matlho a me ka bonako gore ke se ka ka bona ditshwantsho tse di sa siamang? A ke lemoga gore ka metlha melao ya ga Jehofa e ntswela mosola, tota le fa e tlhoka gore ke nne boikgapo?’​—Pes. 101:3.

19. Ditshwetso tse di sa siamang tse di lebegang di le dinnye, di ka dira jang gore go nne thata gore o fenye dikeletso tse di sa siamang?

¹⁹ Fa o ntse o itlhatlhoba, netefatsa gore ga o itirele diipato tsa go dira sengwe se se sa siamang. Ka sekai, Baebele e a re: “Pelo e boferefere go gaisa sengwe le sengwe e bile e gagamalela se e se batlang.” (Jer. 17:9) Jesu o ile a re mo go yone “go tswa dikakanyo tse di bosula.” (Math. 15:19) Ka sekai, motho yo o nang le lobakanyana a tlogetse go lebelela ditshwantsho le dibidio tse di tsosang keletso ya tlhakanelodikobo, a ka akanya gore “ga go kotsi” go lebelela ditshwantsho dingwe tse di tsogang keletso ya tlhakanelodikobo ka gonne tsone di sa bontshe batho ba ba sa aparang. Kgotsa a ka nna a re, ‘Ga go phoso go akanya ka dilo tse di sa siamang fa fela ke sa di dire.’ Fa motho a akanya jalo, go nna jaaka e kete o ‘rulaganya go sa le gale gore a kgotsofatse dikeletso tsa gagwe tse di bosula.’ (Bar. 13:14) Ke eng se se ka go thusang gore o se ka wa dira jalo? Itse gore ditshwetso tse dinnye tse di sa siamang di ka dira gore motho a feleletse a dirile ditshwetso tse dikgolo tse di sa siamang tse di jaaka go ineela fa a raelesega go dira se se sa siamang.b Tila “dikakanyo tse di bosula” tse di ka dirang gore o dire diipato tsa go dira se se sa siamang.

20. Re na le tsholofelo efe ka bokamoso, mme ke thuso efe e re e newang gone jaanong?

²⁰ Re ithutile gore Jehofa o re naya maatla a go lwantsha dikeletso tse di sa siamang. Gape e re ka a re neile thekololo, o a re itshwarela e bile o re neile tsholofelo ya go tshelela ruri kwa lefatsheng le lesha. Ka nako eo, re tla bo re direla Jehofa re itumetse e bile re sa tlhoke go lwantsha dikeletso tse di sa siamang. Mme fa nako eo e ise e goroge, re ka tlhatswega pelo gore re ka kgona go lwantsha dikeletso tse di sa siamang le gore Jehofa o a re amogela. Jehofa o tla segofatsa matsapa a re a tsayang mme re tla kgona go fenya.