Dipotso Tse di Tswang Kwa Babading
Tiro ya go rera dikgang tse di molemo e tla fela leng?
Jesu o ne a re: “Dikgang tseno tse di molemo tsa Bogosi di tla rerelwa batho ba ba mo lefatsheng lotlhe gore e nne bosupi mo ditšhabeng tsotlhe, mme go tswa foo bokhutlo bo tla tla.” (Math. 24:14) Lefoko la Segerika e leng teʹlos le le ranotsweng e le “bokhutlo” mo temaneng eno mmogo le mo go temana 6 le 13, le kaya bokhutlo jwa lefatshe la ga Satane ka ntwa ya Aramagedona. (Tshen. 16:14, 16) Seno se raya gore re tla tswelela re rera dikgang tse di molemo go fitlha Aramagedona e tloga e simologa. Eno ke tsela e e tokafaditsweng e re tlhaloganyang dilo ka yone.
Mo nakong e e fetileng, re ne re tlhaloganya gore re tla emisa go rera dikgang tse di molemo fa pitlagano e kgolo e simologa, ka nako ya fa Babelona yo Mogolo a fedisiwa. (Tshen. 17:3, 5, 15, 16) Re ne re dumela gore tiragalo eno e ne e tla bontsha gore “ngwaga wa fa Jehofa a tla bo a amogela batho” o fitlhile kwa bokhutlong. (Isa. 61:2) Gape re ne re dumela gore batho ba ba tla falolang pitlagano e kgolo, ba ne ba tla bontsha gore ba ikanyega mo go Jehofa pele pitlagano e kgolo e simologa. Re ne re ba tshwantsha le Bajuda ba ba ileng ba falola fa Jerusalema e ne e senngwa ka 607 B.C.E. Bajuda bao ba tshwailwe pele Jerusalema e senngwa ka gonne ba ne ba direla Jehofa e bile ba tlhoile se se bosula. (Esek. 5:11; 9:4) Mme gone, seo ga se tsamaisane le mafoko a Jesu a ileng a a bua mo go Mathaio 24:14. Mafoko ao a bontsha gore batho ba ka nna le tshono ya go amogela dikgang tse di molemo go fitlha kwa bokhutlong, fa Aramagedona e tloga e simologa.
Tsela e re tlhaloganyang Mathaio 24:14 ka yone, e dira gore re tokafatse tsela e re tlhaloganyang ka yone molaetsa o o jaaka sefako o go buiwang ka one mo go Tshenolo 16:21. Fa go dirwa dipatlisiso tse di oketsegileng, go ile ga lemogiwa gore ditemana tseno tse pedi di a tsamaisana. Di tsamaisana jang? Re bona karabo mo tseleng e batho ba ikutlwang ka yone ka molaetsa wa Bogosi. Moaposetoloi Paulo o ile a re molaetsa ono ke dikgang tse di itumedisang kgotsa “lonko lo lo tswang mo botshelong” mo go “ba ba bolokwang.” Mme ke dikgang tse di sa itumediseng kgotsa “lonko lo lo tswang mo losong” mo babeng ba Modimo. (2 Bakor. 2:15, 16) Ba tlhoile molaetsa wa Bogosi ka gonne o senola gore lefatshe leno le boikepo, le busiwa ke Satane e bile go ise go ye kae le tla senngwa.—Joh. 7:7; 1 Joh. 2:17; 5:19.
Ela tlhoko gore sefako se go buiwang ka sone mo go Tshenolo 16:21 se tla bo se le segolo “ka tsela e e sa tlwaelegang.” Seno se raya gore molaetsa wa Bogosi o tla nna maatla le go feta e bile o tla fitlhelela batho ba le bantsi thata go feta le fa e le leng pele. (Esek. 39:7) Ka nako eo, fa Babelona yo Mogolo a sena go fedisiwa, a bangwe ba tla itumelela molaetsa oo fela jaaka ba ka itumelela lonko lo lo monate? Go ka direga. Gongwe ba tla gopola kgotsa ba tla bolelelwa gore Basupi ba ga Jehofa ba ile ba fetsa dingwaga di le dintsi ba bolelela batho gore bodumedi jwa maaka bo tla senngwa, e bile ba tla bona seo se direga.
Seno se tshwana le se se ileng sa direga bogologolo kwa Egepeto morago ga Dipetso di le Lesome. Fa Jehofa a sena go “atlhola medimo yotlhe ya Egepeto,” “setlhopha se segolo sa batho ba ba farologaneng” ba e neng e se Baiseraele ba ile ba tlhopha go tsamaya le Baiseraele. (Ekes. 12:12, 37, 38) Batho bano ba ka tswa ba ile ba tlhopha go tsamaya le Baiseraele fa ba bona Dipetso di le Lesome tse Moshe a ileng a re di tla direga, di direga.
Ope fela yo o tla bong a direla Jehofa fa Babelona yo Mogolo a sena go fedisiwa, o tla nna le tshono ya go bontsha gore o tshegetsa bomorwarraagwe Keresete ba ba tla bong ba le mo lefatsheng. (Math. 25:34-36, 40) Boammaaruri ke gore tshono ya gore batho ba atlholwe e le dinku e tla fela nakwana pele ga Aramagedona fa batlodiwa ba ba tla bong ba sa ntse ba le mo lefatsheng ba amogela tuelo ya bone ya go ya kwa legodimong.
Tsela eno e e tokafaditsweng e re tlhaloganyang dilo ka yone, e gatelela gore Jehofa o rata batho fela thata e bile o ba utlwela botlhoko. Ruri ga a “eletse gore motho ope a senngwe mme o eletsa gore botlhe ba ikwatlhaye.”—2 Pet. 3:9.