Se Lebale go Rapelela ba Bangwe

1. Re itse jang gore dithapelo tsa rona di botlhokwa mo go Jehofa?

THAPELO ke mpho e e tlhwatlhwakgolo. Akanya ka seno: Jehofa o neile baengele ditiro dingwe. (Pes. 91:11) Gape o neile Morwawe maikarabelo a a botlhokwa thata. (Math. 28:18) Le fa go ntse jalo, a o neile mongwe maikarabelo a go reetsa dithapelo tsa rona? Nnyaa, o dirile tshwetso ya gore e nne ene a reetsang dithapelo tsa rona. Jehofa, “Moutlwi wa thapelo” o reetsa dithapelo tsa rona ka boene.​—Pes. 65:2.

2. Moaposetoloi Paulo o ile a re tlhomela sekao sefe sa go rapelela ba bangwe?

² Re ka bolelela Jehofa sengwe le sengwe se se re tshwenyang, mme gape re tshwanetse go rapelela ba bangwe. Moaposetoloi Paulo o ile a dira jalo. Ka sekai, o ile a raya phuthego ya Efeso a re: “Ke nna ke lo umaka mo dithapelong tsa me.” (Baef. 1:16) Mme gape, Paulo o ne a rapelela ba bangwe a sa ba akaretse e le setlhopha. Ka sekai, o ile a raya Timotheo a re: “Ke leboga Modimo, . . . le ka motlha ke sa lebale go go umaka mo dithapelong tsa me tse ke di dirang ka tlhoafalo bosigo le motshegare.” (2 Tim. 1:3) Paulo o ne a na le mathata a a neng a ka bolelela Jehofa ka one. (2 Bakor. 11:23; 12:7, 8) Le fa go ntse jalo, o ile a ipha nako ya go rapelela ba bangwe.

3. Ke eng se se ka dirang gore re lebale go rapelela ba bangwe?

³ Ka dinako dingwe re ka nna ra lebala go rapelela ba bangwe. Goreng? Kgaitsadi mongwe yo o bidiwang Sabrinaa o re naya lengwe la mabaka a go bo seo se direga. A re: “Re nna fela re le mo lebelong. Ka jalo, re ka tlhoma mogopolo mo mathateng a rona re bo re rapelela fela dilo tse re di tlhokang.” A seno se a tle se go diragalele? Fa go ntse jalo, setlhogo seno se tla go thusa. Se tla tlhalosa gore (1) goreng go le botlhokwa go rapelela ba bangwe, le gore (2) re ka dira seo jang.

GORENG RE TSHWANETSE GO RAPELELA BA BANGWE?

4-5. Go rapelela ba bangwe go ka nna “le maatla a magolo” ka tsela efe? (Jakobe 5:16)

⁴ Go rapelela ba bangwe go “na le maatla a magolo.” (Bala Jakobe 5:16.) A tota go rapelela ba bangwe go ka fetola maemo a ba leng mo go one? Ee. E re ka Jesu a ne a itse gore moaposetoloi Petere o ne a tlile go mo itatola o ile a mo raya a re: “Ke go rapeletse ka tlhoafalo gore o se ka wa felelwa ke tumelo.” (Luke 22:32) Paulo le ene o ne a itse gore thapelo e ka fetola se se diragalelang motho. Fa a ne a isitswe kwa kgolegelong a sena molato, o ile a raya Filemone a re: “Ke solofela gore ka ntlha ya dithapelo tsa lona ke tla gololwa ke bo ke kgona go lo etela.” (File. 22; bona ntlha ya go ithuta “for I am hoping that through your prayers” mo Baebeleng ya Seesemane.) Go ile ga nna fela jalo. Moragonyana Paulo o ile a gololwa a bo a tswelela ka tiro ya gagwe ya go rera.

⁵ Ke boammaaruri gore ga re ka ke ra pateletsa Jehofa gore a arabe dithapelo tsa rona. O a bona fa batlhanka ba gagwe ba tshwenyegile ka sengwe e bile a ka tlhopha go ba naya se ba se kopang. Go itse seno go tla re thusa gore re bolelele Jehofa ka mathata ape fela a re nang le one, go tswa foo re bo re tlogelela sengwe le sengwe mo go ene.​—Pes. 37:5; bona 2 Bakorintha 1:11 le dintlha tsa go ithuta mo Baebeleng ya Seesemane.

6. Go rapelela ba bangwe go dira gore re ikutlwe jang ka bone? (1 Petere 3:8)

⁶ Go rapelela ba bangwe go re thusa gore re “nne pelotlhomogi.” (Bala 1 Petere 3:8.) Motho yo o pelotlhomogi o a lemoga fa ba bangwe ba boga e bile o batla go dira sengwe go ba thusa. (Mar. 1:40, 41) Mogolwane mongwe yo o bidiwang Michael a re: “Go rapelela ba bangwe go nthusa go tlhaloganya mathata a bone botoka le gore ke ba rate thata. Ke ikutlwa ke atamalane le bone, tota le fa bone ba sa lemoge seo.” Mogolwane mongwe yo o bidiwang Richard o tlhalosa gore go rapelela ba bangwe go nna le mosola ofe gape. A re: “Fa re rapelela mongwe, re batla go dira sengwe go mo thusa. Mme fa re thusa motho yo re mo rapeletseng, ka tsela nngwe re a bo re thusa gore thapelo eo e arabiwe.”

7. Go rapelela ba bangwe go ka re thusa jang gore re se ka ra nna fela re akantse ka mathata a rona? (Bafilipi 2:3, 4) (Bona le ditshwantsho.)

⁷ Go rapelela ba bangwe go re thusa gore re lebe mathata a rona ka tsela e e siameng. (Bala Bafilipi 2:3, 4.) E re ka Satane a laola lefatshe, mongwe le mongwe wa rona o na le mathata. (1 Joh. 5:19; Tshen. 12:12) Fa re itlwaetsa go rapelela ba bangwe, seo se tla re gopotsa gore “bakaulengwe botlhe ba [rona] mo lefatsheng ba boga jaaka [re] boga.” (1 Pet. 5:9) Mmulatsela mongwe yo o bidiwang Katherine a re: “Go rapelela ba bangwe go nthusa go gopola gore ba bangwe le bone ba na le mathata. Seo se nthusa gore ke se ka ka nna fela ke akantse ka mathata a me.”

BA TLHOKA GORE RE BA RAPELELE

8. Naya dikai tsa gore re ka rapelela bomang.

⁸ Re ka rapelela bomang? Re ka rapelela ba ba lwalang, basha ba ba sotliwang ke ba bangwe kwa sekolong e bile ba ba raela go dira dilo tse di sa siamang kgotsa bagodi ba ba lebaneng le dikgwetlho tsa botsofe. Bakaulengwe le bokgaitsadi ba le bantsi ba bogisiwa ke ba malapa a bone kgotsa ke dipuso. (Math. 10:18, 36; Dit. 12:5) Bangwe ba bakaulengwe le bokgaitsadi ba ile ba tshwanelwa ke go tswa mo magaeng a bone ka ntlha ya dikhuduego tsa dipolotiki. Bangwe ba ile ba amiwa ke masetlapelo a tlholego. Re ka tswa re sa itse bakaulengwe le bokgaitsadi bano. Mme fa re ba rapelela, re a bo re bontsha gore re ikobela taelo e Jesu a re neileng yone ya gore re “ratane.”​—Joh. 13:34.

9. Goreng re tshwanetse go rapelela bakaulengwe ba ba eteletseng pele mo phuthegong ya ga Jehofa mmogo le basadi ba bone?

⁹ Gape re ka rapelela bakaulengwe ba ba eteletseng pele mo phuthegong. Bakaulengwe bano ba akaretsa Setlhopha se se Laolang le bathusi ba bone, Dikomiti Tsa Makala, balebedi ba ba mo diofising tsa makala, balebedi ba potologo, bagolwane le batlhanka ba bodiredi. Bontsi jwa bakaulengwe bano ba na le mathata a bone, le fa go ntse jalo ba dira ka natla go re thusa. (2 Bakor. 12:15) Ka sekai, molebedi mongwe wa potologo yo o bidiwang Mark a re: “Nngwe ya dikgwetlho tse dikgolo tse ke nang le tsone ke gore ke kgakala le batsadi ba me ba ba godileng. Boobabedi ba a lwala. Le fa gone kgaitsadiake le monna wa gagwe ba ba tlhokometse, ke utlwisiwa botlhoko ke gore ga ke kgone go dira mo go oketsegileng go ba thusa.” Re ka tswa re sa itse dilo tsotlhe tse bakaulengwe bano ba ba dirang ka natla ba tshwenyegileng ka tsone, mme gone re tshwanetse go gopola go ba rapelela. (1 Bathes. 5:12, 13) Gape re ka rapelela basadi ba bakaulengwe bano ka gonne ba dira ka natla go ema banna ba bone nôkeng gore ba tswelele ba dira dikabelo tsa bone.

10-11. A Jehofa o amogela dithapelo tsa rona fa re rapelela bakaulengwe le bokgaitsadi e le setlhopha? Tlhalosa.

¹⁰ Jaaka re bone mo dirapeng tse di fetileng, gantsi re rapelela bakaulengwe le bokgaitsadi e le setlhopha. Ka sekai, fa go se na mongwe yo re mo akantseng, re ka kopa Jehofa gore a thuse bakaulengwe le bokgaitsadi ba ba mo dikgolegelong kgotsa gore a gomotse botlhe ba ba tlhokafaletsweng. Mogolwane mongwe yo o bidiwang Donald a re: “Bakaulengwe le bokgaitsadi ba le bantsi ba na le mathata. Ka jalo, ka dinako dingwe fa re rapela, re ba akaretsa botlhe.”

¹¹ A Jehofa o amogela dithapelo tseo? Ee. Gone ga re itse se mongwe le mongwe wa bakaulengwe le bokgaitsadi ba se tlhokang. Ka jalo, go a tshwanela gore re ba rapelele e le setlhopha. (Joh. 17:20; Baef. 6:18) Dithapelo tseo di bontsha gore re ‘rata bakaulengwe botlhe.’​—1 Pet. 2:17.

BA BITSE KA MAINA FA O BA RAPELELA

12. Go ela tlhoko maemo a ba bangwe ba leng mo go one go ka re thusa jang fa re ba rapelela?

¹² Nna kelotlhoko. Kwantle ga go rapelela bakaulengwe le bokgaitsadi e le setlhopha, gape re tshwanetse go ba rapelela re ba bitsa ka maina. A go na le mongwe yo o lwalang mo phuthegong ya lona? A mosha mongwe o kgobegile marapo ka gonne bana ba a tsenang sekolo le bone ba mo raela go dira dilo tse di sa siamang? A motsadi mongwe o godisa ngwana a le nosi e bile o tshwere ka thata go mo ‘otlhaya le go mo kaela ka tsela e Jehofa a batlang ka yone’? (Baef. 6:4) Fa re le kelotlhoko, re tla ba rata e bile re tla ba utlwela botlhoko, mme seo se tla dira gore re batle go ba rapelela.b​—Bar. 12:15.

13. Re ka rapelela jang bakaulengwe le bokgaitsadi ba re sa ba itseng?

¹³ Ba umake ka maina. Re ka dira jalo tota le fa re sa ba itse. Ka sekai, akanya ka bakaulengwe le bokgaitsadi ba ba kwa kgolegelong kwa Crimea, Eritrea, Russia, le kwa Singapore. O ka bona maina a bone mo jw.org.c Molebedi mongwe wa potologo yo o bidiwang Brian a re: “Ke lemogile gore go kwala maina a bakaulengwe le bokgaitsadi ba ba kwa kgolegelong le go a buela kwa godimo go nthusa gore ke a gopole fa ke rapela.”

14-15. Ke eng se se ka re thusang gore re itse gore re rapelele eng?

¹⁴ Ba kopele sengwe se ba se tlhokang. Michael yo re buileng ka ene mo dirapeng tse di fetileng, a re: “Fa ke bala dipego tsa bakaulengwe ba ba kwa kgolegelong mo jw.org, ke leka go itsenya mo ditlhakong tsa bone. Ke a itse gore ke ne nka tshwenyega ka mosadi wa me e bile ke ne ke tla batla gore a nne le se a se tlhokang. Ka jalo seno se nthusa gore ke itse gore fa ke rapelela bakaulengwe ba ba nyetseng ba ba kwa kgolegelong, ke ba kopele eng.”​—Baheb. 13:3, ntlh.

¹⁵ Fa re leka go akanya gore maemo a bakaulengwe le bokgaitsadi a ntse jang kwa kgolegelong, re ka kgona go itse gore re ka rapelela eng. Ka sekai, re ka rapelela gore batlhokomedi ba kwa kgolegelong ba ba tshware sentle le gore balaodi ba ba letle go obamela Jehofa. (1 Tim. 2:1, 2) Gape re ka rapelela gore sekao sa bone se kgothatse bakaulengwe le bokgaitsadi ba phuthego ya bone kgotsa gore batho ba ba sa direleng Jehofa ba lemoge tsela e ntle e ba itshwarang ka yone le gore ba reetse molaetsa wa rona. (1 Pet. 2:12) Gape re ka dira se se tshwanang fa re rapelela bakaulengwe le bokgaitsadi ba ba nang le mathata. Fa re le kelotlhoko, re umaka ba bangwe ka maina fa re rapela, e bile re itse gore re ka rapelela eng, seo se tla bontsha gore ‘ratana thata’.​—1 Bathes. 3:12.

NNA BOINGOTLO FA O RAPELA

16. Re ka bontsha jang gore re boingotlo fa re rapela? (Mathaio 6:8)

¹⁶ Re ithutile gore go rapela go ka fetola maemo a motho a leng mo go one. Le fa go ntse jalo, re tshwanetse go nna tekatekano. Re tshwanetse go gopola gore fa re rapela, re a bo re bolelela Jehofa se a setseng a se itse, e bile ga re a tshwanela go mmolelela gore a rarabolole jang mathata a re mmoleletseng one. Jehofa o itse se batlhanka ba gagwe ba se tlhokang pele bone kgotsa ope wa rona a itse gore ba tlhoka eng. (Bala Mathaio 6:8.) Mme gone, goreng re tshwanetse go rapelela ba bangwe? Kwantle ga mabaka a re setseng re tlotlile ka one mo setlhogong seno, go rapelela ba bangwe go bontsha gore re a ba kgathalela. Lorato lo re tlhotlheletsa go rapelela ba bangwe. Gape Jehofa o a itumela fa a bona batlhanka ba gagwe ba etsa tsela e a leng lorato ka yone.

17-18. Naya sekai se se bontshang gore Jehofa o ikutlwa jang fa re rapelela ba bangwe.

¹⁷ Le fa maemo a bakaulengwe le bokgaitsadi a sa fetoge fa re sena go ba rapela, go ba rapelela go bontsha gore re a ba rata e bile Jehofa o bona seo. Ka sekai, a re re lelapa le na le bana ba babedi, wa mosimane le wa mosetsana. Mosimane o a lwala e bile o mo bolaong. Wa mosetsana o raya rraagwe a re: “Papa thusa abuti tlhe, o a lwala.” Rraagwe o setse a dirile sengwe go thusa morwawe ka gonne o a mo rata e bile o a mo tlhokomela. Le fa go ntse jalo, rre yoo o tshwanetse a bo a itumelela go bona morwadie a kgathalela abutiagwe le go mmona a mo kopa gore a mo thuse.

¹⁸ Jehofa o re kgothaletsa go bontsha gore re rata ba bangwe le go ba rapelela. Fa re dira jalo re bontsha gore ga re ikakanyetse re le nosi e bile re rata bakaulengwe le bokgaitsadi, mme Jehofa o bona seno. (2 Bathes. 1:3; Baheb. 6:10) Gape re ithutile gore fa re rapelela ba bangwe maemo a bone a ka fetoga. Ka jalo, a re direng ka natla go rapelela ba bangwe.