“O Mongwe yo o Botlhokwa Thata”!

1-2. Ke eng se se ka re thusang go dumela gore re botlhokwa mo go Jehofa?

JEHOFA o tsaya batlhanka ba gagwe ba le botlhokwa thata. Mme gone, bangwe ba bone ga ba dumele gore Jehofa o a ba rata. Gongwe ba ikutlwa jalo ka gonne mongwe a ile a dira gore ba ikutlwe e se batho ba sepe. A le wena o kile wa ikutlwa jalo? Fa go ntse jalo, ke eng se se ka go thusang go dumela gore Jehofa o go tsaya o le botlhokwa?

² O ka thusiwa ke go bala dipego tse di bontshang gore Jehofa o batla gore batho ba tshwarwe jang. Morwawe e bong Jesu, o ne a tlotla batho e bile a ba tshwara sentle. Seo se ne se bontsha gore ene le Rraagwe ba tsaya batho ba ba itsayang e se ba sepe ba le botlhokwa. (Joh. 5:19; Baheb. 1:3) Mo setlhogong seno, re tla bona gore: (1) Jesu o ne a thusa jang batho gore ba lemoge gore ba botlhokwa le gore (2) re ka itlhatswa pelo jang gore le rona Jehofa o re tsaya re le botlhokwa.​—Hag. 2:7.

JESU O NE A THUSA BATHO JANG GORE BA LEMOGE GORE BA BOTLHOKWA?

3. Jesu o ile a tshwara jang Bagalalea ba ba neng ba ya kwa go ene gore a ba thuse?

³ Fa Jesu a ne a rera kwa Galalea, batho ba le bantsi ba ne ba ya kwa go ene gore ba mo reetse le gore a ba fodise. O ne a lemoga gore “ba ne ba sotlegile e bile ba gasame jaaka dinku tse di se nang modisa.” (Math. 9:36; bona le dintlha tsa go ithuta mo Baebeleng ya Seesemane.) Baeteledipele ba bone ba bodumedi ba ne ba sa ba tseye ba le botlhokwa e bile ba ne ba re ba ‘hutsegile.’ (Joh. 7:47-49; ntlha ya go ithuta mo Baebeleng ya Seesemane.) Mme Jesu ene o ne a ipha nako ya go ba ruta le go ba fodisa. Seo se ne se bontsha gore o ne a le pelonomi mo go bone e bile a ba tlotla. (Math. 9:35) Mo godimo ga moo, gore a kgone go thusa batho ba ba oketsegileng, o ile a katisa baaposetoloi ba gagwe gore ba dire tiro ya go rera a bo a ba naya maatla a go fodisa balwetse.​—Math. 10:5-8.

4. Re ithuta eng mo tseleng e Jesu a neng a dirisana ka yone le batho ba ba neng ba mo reeditse?

⁴ Tsela e Jesu a neng a tlotla batho ba ba neng ba mo reeditse ka yone e bile a le pelonomi mo go bone, e ne e bontsha gore ene le Rraagwe ba tsaya batho ba ba tseelwang kwa tlase ba le botlhokwa. Fa e le gore o direla Jehofa mme o itsaya o se motho wa sepe, akanya kafa Jesu a neng a dirisana ka gone le batho ba ba neng ba batla go ithuta mo go ene. Go dira jalo go ka go thusa go lemoga gore o botlhokwa go le kana kang mo go Jehofa.

5. Tlhalosa gore mosadi yo Jesu a ileng a kopana le ene kwa Galalea o ne a le mo boemong jo bo ntse jang.

⁵ Jesu o ne a sa rute batho fela e le setlhopha, gape o ne a ruta le go thusa batho ka bongwe. Ka sekai, fa a ne a rera kwa Galalea, o ile a kopana le mosadi yo o neng a feditse dingwaga di le 12 a na le kelelo ya madi. (Mar. 5:25) Go ya ka Molao, o ne a itshekologile e bile ope fela yo o neng a tla mo kgoma le ene o ne a tla itshekologa. Seo se tshwanetse sa bo se ne se dira gore a fetse nako e ntsi a le nosi. Mo godimo ga moo, o ne a sa kgone go obamela Jehofa a na le ba bangwe kwa Sinagogeng le ka nako ya meletlo ya kobamelo. (Lefi. 15:19, 25) Ka jalo, mosadi yono o ne a lwala e bile a ikutlwa a sa ratiwe.​—Mar. 5:26.

6. Mosadi yo o neng a na le kelelo ya madi o ile a dira eng gore a fole?

⁶ Mosadi yono yo o neng a boga thata, o ne a batla gore Jesu a mo fodise. Mme gone, ga a a ka a mo kopa gore a mo fodise. Goreng? Gongwe boemo jwa gagwe bo ne bo mo tlhabisa ditlhong. Kgotsa a ka tswa a ne a tshaba gore Jesu o tla mo omanya ka gonne a ile a tsena mo gare ga batho a itse gore o itshekologile. Ka jalo, o ile a kgoma seaparo sa gagwe sa kafa ntle ka gonne a ne a dumela gore o tla fola. (Mar. 5:27, 28) Go ile ga nna fela jalo, o ile a fola. Jesu o ile a botsa gore ke mang yo o mo kgomileng. Mosadi yono o ile a mmolelela gore ke ene. Jesu o ile a dira eng?

7. Jesu o ile a dirisana jang le mosadi yo o neng a boga thata? (Mareko 5:34)

⁷ Jesu o ne a bontsha gore o tlotla mosadi yono le gore o pelonomi mo go ene. O ile a lemoga gore o ne a “tshogile e bile a roroma.” (Mar. 5:33) E re ka a ne a itse gore o ne a ikutlwa jang, o ile a bua le ene ka bonolo. Tota e bile, o ne a mmitsa “morwadiaka.” Jesu o ne a sa mmitse jalo fela ka gonne a mo tlotla, gape o ne a dira jalo ka gonne a ne a mo rata e bile a le pelonomi mo go ene. (Bala Mareko 5:34.) Fa ntlha ya go ithuta e e mo Baebeleng ya Seesemane e tlhalosa lefoko leno, e a re “leno ke lone fela lekgetlo le Jesu a ileng a bitsa mosadi a re ‘morwadiaka’ mo Baebeleng. Gongwe o ne a mmitsa jalo ka ntlha ya boemo jwa gagwe le gore o ne a ‘roroma.’” Ruri mosadi yoo o tshwanetse a bo a ile a imologa! Fa Jesu a ka bo a sa mo kgothatsa, o ne a tla boela gae a fodile mme gone a ikutlwa molato. Ka jalo, Jesu o ne a batla gore a itse gore o botlhokwa mo go Jehofa.

8. Ke dikgwetlho dife tse kgaitsadi mongwe wa kwa Brazil a ileng a tshwanelwa ke go di itshokela?

⁸ Gompieno bangwe ba batlhanka ba ga Jehofa le bone ba a lwala, mme seo se dira gore ba tshwenyege thata mo maikutlong le gore ba ikutlwe e se batho ba sepe. Kgaitsadi Mariaa wa kwa Brazil yo e leng mmulatsela wa ka metlha, o tshotswe a se na maoto le seatla sa molema. A re: “Bana ba ke neng ke tsena sekolo le bone, ba ne ba nna fela ba nkgerisa ka ntlha ya tsela e ke lebegang ka yone. Ba ne ba mpitsa ka maina a a utlwisang botlhoko. Tota le ba lelapa la gaetsho ba ne ba sa ntshware sentle.”

9. Maria o thusitswe ke eng gore a lemoge gore o botlhokwa mo go Jehofa?

⁹ Maria o ile a bona thuso kae? Fa a sena go amogela boammaaruri, bakaulengwe le bokgaitsadi ba ile ba mo kgothatsa le go mo thusa go lemoga gore o botlhokwa mo go Jehofa. A re: “Buka e ka tlala fa nka kwala maina a batho botlhe ba ba nthusitseng. Ke leboga Jehofa thata go bo ke le mo phuthegong ya gagwe e e lorato.” Bakaulengwe le bokgaitsadi ba ile ba thusa Maria gore a lemoge gore o botlhokwa mo go Jehofa.

10. Tlhalosa boemo jo Marea Magadalena a neng a le mo go jone. (Bona le ditshwantsho.)

¹⁰ Akanya ka motho yo mongwe gape yo Jesu a ileng a mo thusa e bong Marea Magadalena. O ne a tsenwe ke madimona a le supa. (Luke 8:2) Madimona ao a tshwanetse a bo a ne a dira gore a itshware ka tsela e e sa tlwaelegang, mme seo se bo se dira gore batho ba tsamaele kgakala le ene. Mo nakong eo e e thata, o tshwanetse a bo a ne a tshogile, a ikutlwa a sa ratiwe e bile go se na ope yo o ka mo thusang. E tshwanetse e a bo e ne e le Jesu yo o ileng a ntsha madimona ao mo go ene, e bile Marea o ile a nna morutwa wa gagwe. Ke eng gape se Jesu a ileng a se dira go thusa Marea Magadalena gore a lemoge gore o botlhokwa mo go Jehofa?

11. Jesu o ile a bontsha jang Marea Magadalena gore o botlhokwa mo go Jehofa? (Bona le ditshwantsho.)

¹¹ Jesu o ile a naya Marea Magadalena tshiamelo ya gore a tsamaye le ene le barutwa ba gagwe fa ba rera mo metseng le mo metsaneng.b Seo se ile sa dira gore a nne le tshono ya go utlwa Jesu a ruta batho ba bangwe. Gape Jesu o ne a iponatsa kwa go ene mo letsatsing le a tsositsweng ka lone. Marea Magadalena e ne e le mongwe wa barutwa ba ntlha ba Jesu a ileng a bua le bone mo letsatsing leo. Mo godimo ga moo, Jesu o ile a mo laela gore a ye go bolelela baaposetoloi ba gagwe gore o tsositswe. Dilo tseo tsotlhe di bontsha gore Marea Magadalena o ne a le botlhokwa thata mo go Jehofa.​—Joh. 20:11-18.

12. Ke eng se se dirileng gore Lidia a ikutlwe a sa ratiwe?

¹² Fela jaaka Marea Magadalena, batho ba le bantsi gompieno ba ikutlwa ba sa ratiwe. Kgaitsadi mongwe wa kwa Spain yo o bidiwang Lidia a re fa mmaagwe a mo imile, o ne a akanyetsa go ntsha mpa. Lidia o gopola gore tota le fa a ne a le monnye mmaagwe o ne a mo tlhokomologa e bile a mo tlhaba ka mafoko. A re: “Ke ne ke batla gore batho ba bangwe ba nkamogele le gore ba nthate. Mme ke ne ke tsaya gore ga ke tshwanelwe ke lorato loo, ka gonne Mama o ne a dirile gore ke dumele gore ke motho yo o bosula.”

13. Ke eng se se ileng sa thusa Lidia go lemoga gore o botlhokwa mo go Jehofa?

¹³ Fa Lidia a simolola go ithuta Baebele, dilo di ne tsa fetoga. Go rapela, go ithuta Baebele le tsela e bakaulengwe le bokgaitsadi ba neng ba mo kgothatsa ka yone le e ba neng ba mo tshwara ka yone, e ile ya mo thusa gore a lemoge gore o botlhokwa mo go Jehofa. A re: “Monna wa me o nna a mpolelela gore o a nthata. Nako le nako o nkgopotsa dinonofo tse dintle tse ke nang le tsone. Ditsala tsa me le tsone di dira se se tshwanang.” A go na le mongwe yo o mo itseng yo o tlhokang go thusiwa go lemoga gore o botlhokwa mo go Jehofa?

ITEBE KA TSELA E JEHOFA A GO LEBANG KA YONE

14. Go ya ka 1 Samuele 16:7, Jehofa o leba batho jang? (Bona le lebokoso le le reng, “Goreng Jehofa a Tsaya Batho ba Gagwe ba le Botlhokwa?”)

¹⁴ Gopola gore Jehofa ga a go lebe ka tsela e batho mo lefatsheng ba go lebang ka yone. (Bala 1 Samuele 16:7.) Gore motho o lebega jang, o na le madi a a kana kang kgotsa o rutegile go le kana kang, tseo ga se dilo tse di dirang gore Jehofa a mo tseye a le botlhokwa. (Isa. 55:8, 9) Ka jalo, leka go iteba ka tsela e Jehofa a go lebang ka yone, e seng ka tsela e batho mo lefatsheng ba go lebang ka yone. O ka bala ka dipego tsa Baebele tse di bontshang gore Jehofa o ne a tsaya batho ba ka dinako dingwe ba neng ba itsaya e se ba sepe ba le botlhokwa. Bangwe ba bone ke Elija, Naomi le Hana. Gape o ka kwala ka dilo tse di go diragaletseng tse di go bontshitseng gore Jehofa o go rata thata. Mo godimo ga moo, o ka batla tshedimosetso mo dikgatisong tsa rona e e buang ka go inyatsa kgotsa go ikutlwa o se motho wa sepe.c

15. Goreng Jehofa a ne a tsaya Daniele e le “mongwe yo o botlhokwa thata”? (Daniele 9:23)

¹⁵ Nna o gopotse gore o botlhokwa mo go Jehofa ka gonne o ikanyega. Moporofeti Daniele a ka tswa a ne a tloga a tshwara dingwaga di le 100 fa a ne a ikutlwa a “lapile thata” e bile a kgobegile marapo. (Dan. 9:20, 21) Jehofa o ile a mo kgothatsa jang? O ile a romela moengele Gabariele gore a mo gopotse gore ke “mongwe yo o botlhokwa thata” le gore o utlwile dithapelo tsa gagwe. (Bala Daniele 9:23.) Ke eng se se neng se dira gore Daniele a nne botlhokwa thata jaana mo go Jehofa? O ne a na le dinonofo tse dintsi tse dintle. Dingwe tsa tsone ke gore o ne a rata tshiamiso e bile a ikanyega. (Esek. 14:14) Jehofa o ile a dira gore pego ya gagwe e kwalwe mo Baebeleng gore e re gomotse. (Bar. 15:4) Gape Jehofa o reetsa dithapelo tsa gago e bile o a go rata ka gonne o dira se se siameng e bile o ikanyega mo go ene.​—Mika 6:8, dintlh.; Baheb. 6:10.

16. Ke eng se se ka go thusang go leba Jehofa e le Rre yo o lorato?

¹⁶ Leba Jehofa e le Rre yo o go ratang. O batla go go thusa, e seng go go tshwayatshwaya diphoso. (Pes. 130:3; Math. 7:11; Luke 12:6, 7) Go akanyetsa kwa teng ka kgang eo go thusitse batho ba le bantsi ba ba itsayang e se batho ba sepe. Ka sekai, akanya ka kgaitsadi mongwe wa kwa Spain yo o bidiwang Michelle yo monna wa gagwe a feditseng dingwaga di le dintsi a mo tlhaba ka mafoko. A re: “Fa ke ikutlwa ke se motho wa sepe, ke leka go ipona ke le mo matsogong a ga Jehofa a nkukile, a mpontsha lorato e bile a ntshireleditse.” (Pes. 28:9) Kgaitsadi mongwe wa kwa South Africa yo o bidiwang Lauren o nna a ipolelela go re, “Fa e le gore Jehofa o ne a nkgogela kwa go ene ka megala ya lorato, a nthusa mo dingwageng tseno tsotlhe a bo a ntetla go ruta ba bangwe ka ene, ga go pelaelo gore o ntsaya ke le botlhokwa.”​—Hos. 11:4.

17. Ke eng se se ka go tlhomamisetsang gore Jehofa o a go amogela? (Pesalema 5:12) (Bona le setshwantsho.)

¹⁷ Tlhomamisega gore Jehofa o a go amogela. (Bala Pesalema 5:12.) Dafide o ile a tshwantsha go amogelwa ke Jehofa le “thebe e kgolo” e e sireletsang batho ba ba siameng. Go itse gore Jehofa o a go amogela e bile o go ema nôkeng, go tla go thusa gore o se ka wa nnela go akanya gore ga o motho wa sepe. O ka itse jang gore Jehofa o a go amogela? Fela jaaka re bone, Jehofa o go tlhomamisetsa seo mo Lefokong la gagwe. Mo godimo ga moo, o dirisa bagolwane, ditsala le batho ba bangwe go go gopotsa gore o botlhokwa mo go ene. O tshwanetse go ikutlwa jang ka seo?

18. Goreng o tshwanetse go amogela se ba bangwe ba se buang fa ba go akgola?

¹⁸ Fa batho ba ba go itseng e bile ba go rata ba go akgolela dilo tse dintle tse o di dirang, o se ka wa akanya gore ga ba bue boammaaruri. Nna o gopotse gore Jehofa a ka ba dirisa go go thusa go lemoga gore o a go amogela. Michelle yo re tlotlileng ka ene mo dirapeng tse di fetileng a re: “Ka iketlo ka iketlo, ke ithuta go amogela se ba bangwe ba se buang fa ba nkakgola. Ga go motlhofo, mme ke a itse gore ke se Jehofa a batlang gore ke se dire.” Bagolwane le bone ba thusitse Michelle gore a lemoge gore Jehofa o a mo amogela. Gone jaanong ke mmulatsela wa ka metlha e bile o thusa ka tiro nngwe ya Bethele a le kwa gae.

19. Goreng o ka tlhatswega pelo gore o botlhokwa mo go Jehofa?

¹⁹ Jesu o re gopotsa gore re botlhokwa thata mo go Rraarona yo o kwa legodimong. (Luke 12:24) Ka jalo, re ka tlhomamisega gore Jehofa o re tsaya re le botlhokwa. A re se kang ra lebala seo. Gape a re direng sotlhe se re ka se kgonang go thusa ba bangwe go lemoga gore ba botlhokwa thata mo go Jehofa.