Go Neelwa ga Diofisi Tsa Makala

BAITHAOPI ba kwa Kyrgyzstan le ba kwa dinageng tse dingwe, ba ne ba fetsa ngwaga le halofo ba bereka bosigo le motshegare, ba tlhabolola le go oketsa dikago tsa lekala le le kwa Bishkek e leng motsemogolo wa Kyrgyzstan. Thulaganyo ya go neela lefelo leo e ne ya tshwarwa ka October 24, 2015, kgwedi morago ga gore tiro ya go aga e wediwe. Batho ba ba fetang 3 000 ba ne ba itumelela go reetsa thulaganyo eno kwa Diholong Tsa Bogosi di le 18 le kwa mafelong a mangwe a le 5. Mokaulengwe Stephen Lett wa Setlhopha se se Laolang o ne a neela puo ya setlhogo se se reng, “Direla Jehofa ka Pelo e e Feletseng.” Letsatsi le le latelang, baboledi ba le bantsi mo nageng eo ba ne ba itumelela go reetsa thulaganyo e nngwe e e kgothatsang thata.

Fa go ne go neelwa ofisi ya lekala ya kwa Armenia ka Matlhatso, May 14, 2016, batho ba le 6 435 ba ne ba tladitse matlhatlhaganyane a le marataro a moago ono o montle o mogolo. Holo ya Dikopano le mafelo a go tshwarelwang Sekolo sa Baboledi ba Bogosi gone le one a ne a neelwa. Dipuo tse di neng tsa neelwa mo thulaganyong eo di ne di tlhalosa hisitori ya batlhanka ba ga Jehofa kwa Armenia. Mo tshimologong ya lekgolo la bo20 la dingwaga, batho ba ntlha ba Armenia ba ba neng ba utlwa boammaaruri e ne e le ba ba neng ba fudugetse kwa United States mme molaetsa oo o ne wa ya kwa Armenia mo bogareng jwa bo1970 fa naga eo e ne e sa ntse e le karolo ya Soviet Union. Bosheng jaana, phuthego ya Basupi ba ga Jehofa e ne ya kwadisiwa semolao mme go ne ga bulwa ofisi ya lekala. Bontsi jwa batho ba ba neng ba le teng kwa thulaganyong eo, ba ne ba sa akanye gore ba tla tsamaya ba bona diphetogo tse di itumedisang jaana mo phuthegong ya Modimo. Se se neng se tlhomologile thata ka thulaganyo eo e ne e le fa botlhe ba ba neng ba le teng ba dumela gore Mokaulengwe David Splane wa Setlhopha se se Laolang a neele dikago tseo tse dintle kwa go Jehofa.