2023: Ngwaga wa Matlhotlhapelo​—⁠Baebele e a Reng ka Kgang Eno?

Dilo tse di ileng tsa direga mo ngwageng wa 2023 di bontsha gore re tshela “mo malatsing a bofelo” jaaka Baebele e tlhalosa. (2 Timotheo 3:1) Ela tlhoko gore dilo tse di diregang gone jaanong di tshwana jang le tse Baebele e boleletseng pele gore di tla direga.

Baebele le se se diragalang mo lefatsheng

“Dintwa le dipego tsa dintwa.”—Mathaio 24:6.

•  “Dintwa di a oketsega mo dikarolong tse dintsi mo lefatsheng.”a

“Dithoromo tsa lefatshe mo mafelong ka go latelana.”—Mareko 13:8.

•  “Fa e sa le ngwaga wa 2023 o simologa, go nnile le dithoromo tse di maatla thata tsa lefatshe di ka nna 13.”b

“Ditshupo tse dikgolo.”​—Luke 21:11.

•  “Go mogote thata go feta le e leng pele.”​—António Guterres, motsamaisimogolo wa Lekgotla la Ditshaba Tse di Kopaneng.c

“Ditlhaelo tsa dijo.”​—Mathaio 24:7.

•  “2023: Ngwaga o mongwe o go tla nnang thata gore batho ba tlamele ba malapa a bone.”d

“Dinako tse di thata e bile di le kotsi.”​—2 Timotheo 3:1.

•  “Mo lefatsheng lotlhe, motho a le mongwe mo go ba le robongwe o tshela ka bolwetse jwa tlhaloganyo.”e

Go tla diragala eng ka 2024?

Ga go na ope yo o itseng gore go tla diragala eng ka 2024. Mme gone dilo tse diregang mo lefatsheng di bontsha gore Bogosi jwa Modimo kgotsa puso ya gagwe e e kwa legodimong, e tla busa mo boemong jwa dipuso tsa batho mme e tla fedisa dilo tsotlhe tse di utlwisang batho botlhoko le tse di dirang gore ba tlhobaele.​—Daniele 2:44; Tshenolo 21:4.

Fa re ntse re letetse seno gore se direge, re ka ikaega ka Modimo gore a re thuse. Baebele e a re:

“Fa ke boifa, ke a go ikanya.”​—Pesalema 56:3.

O ka bontsha jang gore o ikanya Modimo? Re kopa gore o ithute mo go oketsegileng ka tsholofetso e e mo Baebeleng e e ka ga bokamoso jo bo se nang kutlobotlhoko. Ithute Baebele mahala le mongwe go bona gore wena le ba lelapa la gago lo ka solegelwa molemo jang ke ditsholofetso tse di mo Baebeleng.