Bokao Jwa 666 ke Eng?

Karabo ya Baebele

Go ya ka buka ya bofelo ya Baebele, 666 ke palo kgotsa leina la sebatana sa naga se se tswang mo lewatleng, se se nang le ditlhogo di le supa le dinaka di le lesome. (Tshenolo 13:1, 17, 18) Sebatana seno se tshwantshetsa tsamaiso ya bopolotiki ya lefatshe lotlhe, e e laolang “lotso longwe le longwe le batho le teme le setšhaba.” (Tshenolo 13:7) Go ya ka Modimo, leina 666 le supa fa tsamaiso eno ya bopolotiki e tlhaela fela thata. Ka tsela efe?

Ga se letshwao fela. Maina a Modimo a a nayang batho a na le bokao. Ka sekai, Modimo o ne a naya Aberame, mo go rayang “Rara o Kwa Godimo (O Tlotlomaditswe)” leina Aborahame le le rayang “Rra Boidiidi (Bontsintsi),” fa a ne a mo solofetsa gore o tla mo dira “rra boidiidi jwa ditšhaba.” (Genesise 17:5, ntlha e e kwa tlase mo go NW) Ka tsela e e tshwanang, Modimo o file sebatana seno leina 666 e le letshwao le le tlhalosang dinonofo tsa sone.

Palo thataro e kaya go sa itekanela. Gantsi mo Baebeleng dipalo di dirisiwa go tshwantshetsa sengwe. Palo supa e emela go felela kgotsa go itekanela. Palo thataro, e re ka e tlhaela ka nngwe go nna supa, e kaya sengwe se se sa felelang kgotsa se se sa itumediseng mo matlhong a Modimo e bile e ka amanngwa le baba ba Modimo.​—1 Ditiragalo 20:6; Daniele 3:1.

Gararo go gatelela. Ka dinako dingwe Baebele e gatelela kgang ka go e boeletsa gararo. (Tshenolo 4:8; 8:13) Ka jalo leina 666 le gatelela thata gore Modimo o leba ditsamaiso tsa bopolotiki di tlhaela fela thata. Di paletswe ke go tlisa kagiso e e nnelang ruri le pabalesego​—dilo tse Bogosi jwa Modimo e leng jone fela bo tla di tlisang.

Letshwao la sebatana

Baebele ya re batho ba amogela “letshwao la sebatana” ka gonne ba sala sebatana morago “ka kgatlhego,” mo ba bileng ba se obamela. (Tshenolo 13:3, 4; 16:2) Ba dira jalo ka go tlotlomatsa naga ya bone, matshwao a naga kgotsa maatla a yone a sesole. Fela jaaka The Encyclopedia of Religion e bolela: “Gompieno bosetšhaba e setse e le bodumedi jo bogolo tota mo lefatsheng.”a

Letshwao la sebatana le nna jang mo seatleng sa mongwe sa moja kgotsa mo phatleng? (Tshenolo 13:16) Modimo o ne a bua jaana malebana le ditaelo tse a di fileng setšhaba sa Iseraele: “Lo a bofelele jaaka sesupo mo seatleng sa lona, mme a nne moitlamo wa phatla fa gare ga matlho a lona.” (Duteronome 11:18) Seno se ne se sa reye gore Baiseraele ba tshwaye diatla le diphatla tsa bone, mme go ne go raya gore mafoko a Modimo a ne a tla kaela ditiro tsotlhe tsa bone le megopolo ya bone. Ka tsela e e tshwanang, go na le gore 666 e nne letshwao la mmatota le le kwadilweng mo mmeleng, letshwao leno la sebatana le tshwantshetsa batho ba ba letlang tsamaiso ya bopolotiki go laola matshelo a bone. Ba ba nang le letshwao la sebatana ba kgatlhanong le Modimo.​—Tshenolo 14:9, 10; 19:19-21.