Ke eng se Austin le Laurie ba tshwanang ka sone? Ba ka tswa ba lemoga kgotsa ba sa lemoge, boobabedi ba tlhotlhelediwa ke sengwe se se maatla—go tlwaela.

Go tweng ka wena? A o batla go nna le mekgwa mengwe e e siameng? Gongwe o ipeetse mokgele wa go ikatisa ka metlha, go robala mo go oketsegileng kgotsa go nna o ikgolaganya le batho ba o ba ratang.

Ka fa letlhakoreng le lengwe, gongwe o batla go tlogela mekgwa e e sa siamang e e jaaka go goga motsoko, go ja dijo tse di se nang dikotla kgotsa go fetsa nako e ntsi mo Internet.

Boammaaruri ke gore, go thata go tlogela mekgwa e e sa siamang. Tota e bile, mekgwa e e sa siamang e tshwana le go tsena mo dikobong tse di bothitho fa go le tsididi: go motlhofo go tsena mme go thata go tswa!

Ka jalo, o ka dira jang gore mekgwa e o tshelang ka yone e go solegele molemo go na le go nna kotsi mo go wena? Ela tlhoko dikakantsho tse tharo tse di theilweng mo melaometheong ya Baebele.

O ka nna wa batla go fetola sengwe le sengwe ka bonako mo botshelong jwa gago. O ipolelela jaana, ‘Beke eno ke tlile go tlogela go goga, go rogana, go robala bosigo thata mme ke tlile go simolola go ikatisa, go ja dijo tse di siameng le go leletsa rremogolo le mmemogolo.’ Mme fa o leka go fitlhelela mekgele yotlhe ka nako e le nngwe, ga o kitla o atlega!

Motho yo o boingotlo o tekatekano. O a itse gore o tlhoka nako, maatla le didirisiwa. Ka jalo, go na le gore a leke go fetola dilo tsotlhe ka nako e le nngwe, o dira diphetogo ka iketlo.

SE O KA SE DIRANG

Itekanyetse morwalo. Dikgato tse di latelang di ka go thusa:

1. Dira ‘manaane’ a mabedi. Mo go la ntlha, kwala mekgwa e e siameng e o batlang go nna le yone mme mo go la bobedi kwala mekgwa e e sa siamang e o batlang go e tlogela. Kwala sengwe le sengwe se se tlang mo mogopolong wa gago mo lenaaneng lengwe le lengwe.

2. Rulaganya dilo tse o di kwadileng mo lenaaneng lengwe le lengwe mme o simolole ka tse di botlhokwa pele.

3. Tlhopha mekgwa e le mmalwa—gongwe o le mongwe kgotsa e mebedi—mo lenaaneng lengwe le lengwe, mme o leke go berekela mo go yone. Fa o fitlheletse mekgele eo, dira e mengwe e e latelang.

Gore o fitlhelele mokgele wa gago ka bonako, tlogela mekgwa e e sa siamang mme o dire e e siameng. Ka sekai, fa e le gore lenaane la gago la mekgwa e e sa siamang le akaretsa go leba thelebishene thata mme la mekgwa e e siameng le akaretsa go ikgolaganya le batho ba o ba ratang, o ka swetsa ka gore: ‘Go na le gore letsatsi le letsatsi fa ke goroga kwa lapeng ke tshube thelebishene, ke tla leletsa tsala kgotsa mongwe wa losika.’

• O ipoleletse gore o tla ja dijo tse di siameng mme fa o bona aesekerimi o a e galela.

• O sweditse go tlogela motsoko mme gangwe le gape tsala ya gago—e e itseng gore o leka go o tlogela—e go naya motsoko.

• O rulagantse go ikatisa gompieno mme go lebega go le thata go batla ditlhako tsa go taboga!

A o kgona go bona kafa maemo ano a tshwanang ka gone? Go lemogilwe gore dilo tse di re dikologileng—maemo a re ipayang mo go one le batho ba re fetsang nako le bone—di na le seabe mo go direng gore re nne le mekgwa e e siameng le gore re tlogele e e sa siamang.

Baebele e re kgothaletsa gore re akanyetse kwa pele. Fa re dira jalo, re tla nna kelotlhoko go tila dilo tse di ka dirang gore go nne thata go fitlhelela mekgele ya rona e bile re tla ipaya mo maemong a a siameng. (2 Timotheo 2:22) Ka jalo, go molemo go itirela dilo motlhofo.

SE O KA SE DIRANG

• Dira gore go nne thata go dira se se sa siamang. Ka sekai, fa e le gore o batla go emisa go ja dijo tse di se nang dikotla, o se ka wa di reka. Seo se tla go thusa gore fa o raelesega go di ja, di bo di seyo.

• Dira gore go nne motlhofo go dira se se siameng. Ka sekai, fa o batla go ikatisa mo mosong, baya diaparo tsa go ikatisa gaufi le bolao jwa gago pele o robala. Fa go le motlhofo go simolola, go tla nna motlhofo go tlwaela.

• Tlhopha ditsala ka botlhale. Go motlhofo go tshwana le batho ba re fetsang nako le bone. (1 Bakorintha 15:33) Ka jalo, o se ka wa itsalanya le batho ba ba dirang gore go nne thata go tlogela mekgwa e e sa siamang go na le moo, batla ditsala tse di ka go thusang go nna le mekgwa e e siameng.

Go na le kgopolo e e tlwaelegileng ya gore go itlwaetsa mokgwa o mosha go tsaya malatsi a le 21. Le fa go ntse jalo, dipatlisiso di bontsha gore batho ba bangwe ba tsaya lobaka lo lokhutshwane go dira diphetogo tse dikgolo mme ba bangwe ba tsaya lobaka lo loleele. A seo se tshwanetse go go kgoba marapo?

Akanya ka boemo jono: A re re o batla go simolola go ikatisa gararo mo bekeng.

• Mo bekeng ya ntlha o fitlhelela mokgele wa gago.

• Mo bekeng ya bobedi o tlodisa letsatsi.

• Mo bekeng ya boraro o fitlhelela mokgele wa gago gape.

• Mo bekeng ya bonè o ikatisa gangwe fela.

• Mo bekeng ya botlhano o fitlhelela mokgele wa gago gape, go tswa foo, o o fitlhelela beke le beke.

Go go tsere dibeke di le tlhano go tlwaela mokgwa o mosha. Go ka lebega go tsere lobaka mme fa o fitlheletse mokgele wa gago, o tla itumelela go bo o nnile le mokgwa oo o o siameng.

Baebele e re kgothaletsa go nna pelotelele. Kgangkgolo ke gore, ga se makgetlo a o paletsweng ka one mme ke makgetlo a o atlegileng ka one.

SE O KA SE DIRANG

• O se ka wa tsaya gore fa o paletswe gangwe go raya gore o paletswe gotlhelele. Nna o solofetse gore o tla lebana le dikgoreletsi fa o ntse o leka go fitlhelela mokgele wa gago.

• Akanya ka nako ya fa dilo di ne di tsamaya sentle. Ka sekai, fa e le gore o leka go tokafatsa tsela e o buang le bana ba gago ka yone, ipotse jaana: ‘Ke leng la bofelo ke neng ke ikutlwa ke batla go omanya banake ke bo ke sa dire jalo? Go na le go ba omanya, ke ne ka dira eng? Nka boeletsa seo jang?’ Dipotso tseo di ka go thusa gore o tlhome mogopolo mo go atlegeng e seng mo dilong tse o paletsweng mo go tsone.

A o ka rata go itse gore melaometheo ya Baebele e ka go thusa jang mo dikarolong dingwe tsa botshelo, tse di jaaka go tlhobaela, go nna le lelapa le le itumetseng le go bona boitumelo jwa mmatota mo botshelong? Bua le mongwe wa Basupi ba ga Jehofa kgotsa o tsene mo website ya rona ya jw.org/tn.