FA O ne o ka kopana le Diana,a o ne o tla mo tsaya e le lekgarebe le le botlhale, le le botsalano e bile le rata batho. Mme le fa Diana a lebega a itumetse, ka fa teng o tlaletswe thata jaana mo go fetang malatsi, dibeke kgotsa le e leng dikgwedi a ikutlwa a se na mosola. A re: “Ga go letsatsi lepe le le fetang ke sa akanye ka go swa. Eleruri ke akanya gore botshelo bo ka nna botoka fa ke seyo.”

Diana a re a ka se ka a ba a ipolaya. Le fa go ntse jalo, ka dinako tse dingwe ga a bone lebaka lepe la go tswelela a tshela. A re: “Selo se ke se eletsang thata ke gore ke bolawe ke kotsi. Ke setse ke tsaya loso e le tsala—e seng mmaba.”

Batho ba le bantsi ba tlhaloganya tsela e Diana a ikutlwang ka yone, mme bangwe ba bone ba kile ba akanyetsa—kgotsa ba leka—go ipolaya. Le fa go ntse jalo, baitse ba re bontsi jwa batho ba ba lekang go ipolaya, e a bo e se gore tota ba batla go ipolaya; ba batla fela go fedisa pogo ya bone. Ka bokhutshwane fela, ba dumela gore ba na le lebaka la go bo ba tshwanetse go swa; se ba se tlhokang ke lebaka la go tswelela ba tshela.

Ke eng fa o tshwanetse go tswelela o tshela? Ela tlhoko mabaka a mararo a go tswelela o tshela.

Go ipolaya go a tle go tlhalosiwe e le “tharabololo ya leruri ya bothata jwa nakwana.” Le fa go ka tswa go le thata jang go dumela, maemo a a ngomolang pelo—tota le a go lebegang o ka se kgone go a laola—e ka nna a nakwana. E bile tota a ka tokafala o sa lebelela.—Bona lebokoso le le reng, “Maemo a Bone a Ile a Fetoga.”

Tota le fa maemo a sa fetoge, go botoka go rarabolola mathata a gago ka iketlo. Jesu o ne a re: “Lo se ka le ka motlha lwa tlhobaela kaga letsatsi le le latelang, gonne letsatsi le le latelang le tla nna le ditlhobaelo tsa lone. Letsatsi lengwe le lengwe le lekanwe ke bosula jwa lone.”—Mathaio 6:34.

Mme go tweng fa e le gore maemo a gago a ka se fetoge? Ka sekai, a re re o na le bolwetse jo bo sa foleng. Kgotsa go tweng fa o tlaletswe ka ntlha ya boemo bongwe jo bo ka se rarabologeng, jo bo jaaka go thubega ga lenyalo kgotsa go swelwa ke mongwe yo o mo ratang?

Tota le mo maemong a a ntseng jalo, go na le sengwe se o ka se fetolang: tsela e o lebang boemo ka yone. Fa o ithuta go amogela se o ka se kgoneng go se fetola, go ka direga thata gore o lebe dilo ka tsela e e siameng. (Diane 15:15) Gape go ka direga thata gore o batle ditsela tse dingwe tsa go itshokela boemo joo go na le go tsaya go swa e le tharabololo. Diphelelo e ka nna dife? Ka selekanyo se se rileng, o simolola go kgona go laola boemo bongwe jo go lebegang bo ka se laolege.—Jobe 2:10.

GAKOLOGELWA SENO: O ka se kgone go palama thaba ka go tsaya kgato e le nngwe fela; le fa go ntse jalo, o ka lebana le kgwetlho eo kgato ka kgato. Go ntse fela jalo le ka bontsi jwa dikgwetlho tse o lebanang le tsone, le fa di ka tswa di lebega di tshwana le dithaba go le kana kang.

SE O KA SE DIRANG GOMPIENO: Bua le mongwe—gongwe tsala kgotsa leloko lengwe la lelapa—ka boemo jwa gago. Motho yoo a ka nna a kgona go go thusa go leba boemo jwa gago ka tsela e e tshwanetseng.—Diane 11:14.

Go swa go ka lebega go le botoka go na le go tshela fa o akanya gore ga go na sepe se se ka dirwang go tokafatsa boemo jwa gago. Mme sekaseka dingwe tsa dilo tse di ka go thusang.

Thapelo. Thapelo ga se selo fela se se dirang gore o ikutlwe botoka; le gone ga se selo se o se dirang fela ka gonne o se na kgoro ya botso. Ke puisano ya mmatota le Jehofa Modimo yo o go kgathalelang. Jehofa o batla gore o mmolelele dilo tse o tshwenyegang ka tsone. Tota e bile Baebele e re rotloetsa jaana: “Latlhela mokgweleo wa gago mo go Jehofa, mme ene o tla go tshegetsa.”—Pesalema 55:22.

Ke eng fa o sa bue le Modimo ka thapelo gompieno? Dirisa leina la gagwe, Jehofa, mme o bue le ene go tswa pelong. (Pesalema 62:8) Jehofa o batla gore o mo itse, o nne tsala ya gagwe. (Isaia 55:6; Jakobe 2:23) Thapelo ke mokgwa wa puisano o o ka o dirisang nako nngwe le nngwe, gongwe le gongwe.

Batho ba ba amegang ka wena. Botshelo jwa gago bo botlhokwa mo bathong ba bangwe—go akaretsa ditsala le ba lelapa la gago ba ba ka tswang ba setse ba kile ba go bolelela gore ba amega ka wena. Batho ba ba amegang ka wena ba akaretsa le batho ba o ka tswang o ise o tsamaye o kopane le bone. Ka sekai, fa Basupi ba ga Jehofa ba le mo bodireding, ba a tle ba kopane le batho ba ba tlaletsweng, ba bangwe ba bone ba ileng ba bolela gore ba ne ba tlhoka thuso fela thata mo ba neng ba akanya go ipolaya. Go rera ka ntlo le ntlo go dirile gore Basupi ba ga Jehofa ba nne le tshono e e tlhomologileng ya go thusa batho ba ba ntseng jalo. Basupi ba ga Jehofa ba latela sekao sa ga Jesu ka go amega ka beng ka bone. Ba amega le ka wena.—Johane 13:35.

Go bona thuso mo go ba ba nang le bokgoni. Gantsi dikakanyo tsa go ipolaya di bontsha gore motho o na le bolwetse bongwe jwa maikutlo, jo bo jaaka clinical depression. Ga go tlhabise ditlhong go lwala bolwetse bongwe jwa maikutlo—fela jaaka go sa tlhabise ditlhong go lwala bolwetse bongwe jwa mo mmeleng. Tota e bile, go tshwenyega mo maikutlong go ile ga bidiwa “mofikela wa tlhaloganyo.” Mongwe le mongwe a ka tshwenyega mo maikutlong—mme a ka alafiwa.a

GAKOLOGELWA SENO: Gantsi ga go motlhofo go intsha mo mosimeng o o boteng wa go tshwenyega mo maikutlong. Mme o ka kgona go tswa fa mongwe a go tshwara ka seatla a go ntsha.

SE O KA SE DIRANG GOMPIENO: Batla ngaka e e itsegeng ka go kgona go alafa malwetse a go fetofetoga maikutlo a a jaaka go tshwenyega mo maikutlong.

Baebele e bontsha gore botshelo bo “tletse matshwenyego.” (Jobe 14:1) Gompieno mongwe le mongwe o amiwa ke mofuta mongwe wa masetlapelo. Mme batho bangwe ba ikutlwa ba se na tsholofelo le e seng ka botshelo, jaaka e kete dilo di ka se siame, go ka se nne botoka mo isagweng. A o ikutlwa jalo? Fa go ntse jalo, tlhomamisega gore Baebele e re naya tsholofelo ya mmatota—e seng wena fela mme batho botlhe. Ka sekai:

• Baebele e ruta gore Jehofa Modimo o ne a ikaeletse gore re nne le botshelo jo bo botoka.—Genesise 1:28.

• Jehofa Modimo o solofetsa go dira lefatshe la rona paradaise.—Isaia 65:21-25.

• Ruri tsholofetso eo e tla diragadiwa. Tshenolo 21:3, 4 ya re:

  “Mogope wa Modimo o mo bathong, mme o tla aga le bone, mme ba tla nna batho ba gagwe. Mme Modimo ka boene o tla nna le bone. Mme o tla phimola dikeledi tsotlhe mo matlhong a bone, mme loso lo tla bo lo seyo, le fa e le khutsafalo le fa e le selelo le fa e le botlhoko di tla bo di sa tlhole di le gone. Dilo tsa pele di fetile.”

Tsholofelo eo ga se go ijesa dijo tsa ditoro fela. Jehofa Modimo ruri o ikaeletse go e diragatsa, o na le maatla le keletso ya go dira jalo. Tsholofetso e e mo Baebeleng e ka ikanngwa, mme e araba sentle potso e e reng, “Ke eng fa o tshwanetse go tswelela o tshela?”

GAKOLOGELWA SENO: Le fa maikutlo a gago a ka fetofetoga jaaka mokoro o o yang kwa le kwa mo lewatleng le le sa iketlang, molaetsa wa Baebele o o nayang tsholofelo o ka tshwana le tshetledi e e go thusang gore o nne o tlhomame.

SE O KA SE DIRANG GOMPIENO: Simolola go sekaseka se Baebele e se rutang ka tsholofelo ya mmatota ka isagwe. Basupi ba ga Jehofa ba tla itumelela go go thusa. O ka ikgolaganya le bone mo lefelong la lona kgotsa wa bona tshedimosetso e e mosola mo atereseng eno ya bone ya Internet, jw.org/tn.a