Kgaolo 8

Go Lekela go Nna Bafenyi

SEMERENA

1. (a) Ke phuthego efe e e latelang go amogela molaetsa o o tswang mo go Jesu yo o galaleditsweng? (b) Jesu ka go ipitsa “wa Ntlha le wa Bofelo,” o ne a gakolola Bakeresete ba phuthego eo eng?

GOMPIENO, Efeso wa bogologolo ke marope fela. Mme kwa molaetsa wa bobedi wa ga Jesu o neng o romelwa teng e sa ntse e le toropo e e tlhanaselang. Dikilometara di ka nna 56 go ya kwa bokone jwa marope a Efeso go toropo ya Turkey e e bidiwang Izmir, koo le gompieno go nang le diphuthego tse di tlhagafetseng tsa Basupi ba ga Jehofa di le nnè. Fano, mo lekgolong la ntlha la dingwaga, go ne go le Semerena. Jaanong ela tlhoko mafoko a ga Jesu a a latelang: “Kwalela moengele wa phuthego e e kwa Semerena o re: Tseno ke dilo tse a di buang, ‘wa Ntlha le wa Bofelo,’ yo o neng a swa mme a tshela gape.” (Tshenolo 2:8) Ka go tlhalosetsa Bakeresete ba Semerena seno, Jesu o ba gakolola gore ke ene wa ntlha go boloka bothokgami yo Jehofa ka sebele a neng a mo tsosetsa botshelong jwa bosasweng jwa semoya mme e bile e le wa bofelo go tsosiwa jalo. Jesu ka boene o tla tsosa Bakeresete botlhe ba bangwe ba ba tloditsweng. Ka gone o tshwanelegela go neela bomonnawe kgakololo, e bong ba ba solofelang go tshela botshelo jwa bosasweng jwa selegodimo le ene.

2. Ke ka ntlha yang fa Bakeresete botlhe ba gomodiwa ke mafoko a “yo o neng a swa mme a tshela gape”?

² Jesu e nnile ene wa ntlha go itshokela go bogisediwa tshiamo, mme o ne a amogela tuelo e e mo tshwanetseng. Go ikanyega ga gagwe go ya losong le go tsosiwa mo baswing mo go neng ga latela ke motheo wa tsholofelo mo Bakereseteng botlhe. (Ditiro 17:31) Lebaka la go bo Jesu ‘a ne a swa mme a tshela gape’ le supa gore le fa e ka nna eng se re tshwanelwang ke go se itshokela mo tseleng ya boammaaruri ga se sa lefela. Tsogo ya ga Jesu ke motswedi wa kgothatso e kgolo mo Bakereseteng botlhe, segolo bogolo fa ba tshwanelwa ke go bogela tumelo ya bone. A o mo seemong seno? He le wena o ka kgothadiwa ke mafoko a ga Jesu a a latelang a a neng a a bolelela phuthego ya Semerena:

3. (a) Ke kgothatso efe e Jesu a neng a e fa Bakeresete ba Semerena? (b) Le mororo Bakeresete ba Semerena ba ne ba humanegile, ke ka ntlha yang fa Jesu a ne a re ba ne ba “humile”?

³ “Ke itse pitlagano ya gago le lehuma—mme o humile—le tlhapatso ka ba ba reng bone ka bobone ke Bajuda, mme e se bone e le sinagoge ya ga Satane.” (Tshenolo 2:9) Jesu ga a nyatse bomorwarraagwe ba kwa Semerena ka gope, o ba akgola fela ka lorato. Ba nnile le pitlagano e kgolo ka ntlha ya tumelo ya bone. Ba humanegile mo dilong tse di bonalang, mo go ka tswang go bakilwe ke boikanyego jwa bone. (Bahebera 10:34) Le fa go ntse jalo, se ba tshwenyegileng thata ka sone ke dilo tsa semoya, mme ba ipoloketse mahumo kwa legodimong, jaaka Jesu a gakolotse. (Mathaio 6:19, 20) Jalo he, Modisa yo Mogolo o ba leba jaaka ba ba ‘humileng.’—Bapisa Jakobe 2:5.

4. Bakeresete ba Semerena ba ne ba bogisiwa ke bomang thata, mme Jesu o ne a leba babogisi bao jang?

⁴ Jesu o lemoga bogolo thata gore Bakeresete ba Semerena ba ne ba itshoketse go ganediwa mo gogolo ke Bajuda ba senama. Mo metlheng ya pele ga moo, bontsi jwa batho ba bodumedi jono ba ne ba ikemisetsa go kganela go anama ga Bokeresete. (Ditiro 13:44, 45; 14:19) Jaanong, masome a dingwaga a sekae fela morago ga go wa ga Jerusalema, Bajuda bao ba Semerena ba bontsha moya one ole wa bosatane. Ga go gakgamatse go bo Jesu a ba leba jaaka ‘sinagoge ya ga Satane’!a

5. Ke diteko dife tseo Bakeresete ba Semerena ba neng ba tla thulana natso?

⁵ Ka go bo ba ne ba lebane le kilo e e ntseng jalo, Bakeresete ba Semerena ba gomodiwa ke Jesu jaana: “O se ka wa boifa dilo tse o tlogang o di boga. Bona! Diabolo o tla nna a latlhela bangwe ba LONA mo kgolegelong gore LO lekwe ka botlalo, le gore LO nne le pitlagano malatsi a le lesome. Itshupe o ikanyega go ya losong, mme ke tla go naya serwalo sa botshelo.” (Tshenolo 2:10) Fano Jesu o dirisa sebopego sa Segerika sa bontsi, a bontsha gore mafoko a gagwe a akaretsa phuthego yotlhe. Jesu ga a solofetse gore diteko tsa Bakeresete ba Semerena di tla tloga di fela. Bangwe ba bone ba tla tswelela ba bogisiwa ba bo ba latlhelwa mo kgolegelong. Ba tla bona pitlagano “malatsi a le lesome.” Palo ya lesome e tshwantshetsa botlalo kana bogotlhe malebana le dilo tsa selefatshe. Le bone bathokgami bao ba ba humileng mo semoyeng ba tla lekwa fela thata fa ba sa ntse ba le mo nameng.

6. (a) Ke ka ntlha yang fa Bakeresete ba Semerena ba ne ba sa tshwanela go boifa? (b) Jesu o ne a digela molaetsa wa gagwe go phuthego ya Semerena jang?

⁶ Le fa go le jalo, Bakeresete ba Semerena ga ba tshwanela go boifa kana go ineela. Fa ba ka nna ba ikanyegile go ya kwa bokhutlong, ba tla duelwa ka “serwalo sa botshelo,” mo go bone e le botshelo jwa bosasweng kwa magodimong. (1 Bakorintha 9:25; 2 Timotheo 4:6-8) Moaposetoloi Paulo o ne a leba tuelo eno ya botlhokwa e le eo motho a ka e ntshetsang setlhabelo sa sengwe le sengwe, le eleng sa botshelo jwa gagwe. (Bafilipi 3:8) Ka phepafalo, batho ba ba ikanyegang ba Semerena ba ikutlwa ka tsela e e tshwanang. Jesu o digela molaetsa wa gagwe ka go re: “A yo o nang le tsebe a utlwe se moya o se buang le diphuthego: Yo o fenyang ga a na go gobadiwa ke loso lwa bobedi ka gope.” (Tshenolo 2:11) Bafenyi ba tlhomamisediwa gore ba tla bona botshelo jwa bosasweng jwa selegodimo mo go ka se kang ga direga gore ba swe.—1 Bakorintha 15:53, 54.

“Pitlagano Malatsi a le Lesome”

7, 8. Fela jaaka phuthego ya Semerena, phuthego ya Bokeresete e ne ya ‘lekwa ka botlalo’ jang ka 1918?

⁷ Fela jaaka Bakeresete ba Semerena, setlhopha sa Johane le balekane ba bone gompieno ba ‘lekilwe ka botlalo’ mme e bile ba ntse ba lekiwa. Go ikanyega ga bone mo ditekong go ba tshwaya e le batho ba Modimo tota. (Mareko 13:9, 10) Ka bokhutshwane fela morago ga letsatsi la Morena le sena go simologa, mafoko a Jesu a neng a a bolelela Bakeresete ba Semerena a ne a gomotsa setlhopha se sebotlana sa boditšhabatšhaba sa batho ba ga Jehofa eleruri. (Tshenolo 1:10) Fa e sale ka 1879, bano ba ne ba ntse ba epolola mahumo a semoya mo Lefokong la Modimo a ba neng ba a abalana le ba bangwe kwantle ga tuelo. Mme ka nako ya Ntwa ya Lefatshe I, ba ne ba thulana le kilo e kgolo le kganetso, ntlha e nngwe e le ka go bo ba ne ba sa ye le mmudubudu wa ntwa mme ntlha e nngwe e le ka gonne ba ne ba sa boife go senola diphoso tsa dikereke tse di ipitsang tsa Bokeresete. Pogiso e ba neng ba e tsosediwa ke baeteledipele bangwe ba dikereke tse di ipitsang tsa Bokeresete e ne ya fitlha kwa setlhoeng sa yone ka 1918 mme e ne e tshwana le se Bakeresete ba Semerena ba neng ba se dirwa ke Bajuda ba motse oo.

⁸ Pogiso kwa United States of America e ne ya fitlha kwa setlhoeng fa mookamedi yo mosha wa Mokgatlho wa Watch Tower, e bong Joseph F. Rutherford, le badirikaene ba le supa ba ne ba latlhelwa mo kgolegelong ka June 22, 1918, bontsi jwa bone ba atlholetswe dingwaga di le 20 mo kgolegelong. Ba ne ba ntshiwa ka beile morago ga dikgwedi di le robongwe. Ka May 14, 1919, kgotlatshekelo ya boikuelo e ne ya tsholola ditatofatso tsa maaka tse ba neng ba latofadiwa ka tsone; go ne ga bontshiwa fa kgetsi eo e ne e na le diphoso di le 130. Moatlhodi Manton wa kereke ya Katoliki ya Roma, motlotlegi wa maemo a St. Gregory yo Mogolo, yo ka 1918 a neng a ganne go naya Bakeresete bano beile, moragonyana ka 1939, o ne a atlholelwa dingwaga di le pedi mo kgolegelong le go duela R20 000 ka ntlha ya melato e le merataro ya go batla le go amogela dipipamolomo.

9. Basupi ba ga Jehofa mo Jeremane wa Bonasi ba ne ba tshwarwa jang ke Hitler, mme baruti ba ne ba itshwara jang?

⁹ Ka nako ya puso ya Bonasi mo Jeremane, Hitler o ne a thibela tiro ya go rera ya Basupi ba ga Jehofa gotlhelele. Mo dingwageng di le dintsi, diketekete tsa Basupi ba ne ba tswalelwa mo dikampeng tsa pogisetso le mo dikgolegelong ka bosetlhogo, koo bontsi jwa bone ba neng ba swela teng, fa makawana a ka nna 200 a a neng a gana go tsena mo bosoleng jwa ga Hitler a ne a bolawa. Se se bontshang gore baruti ba ne ba tshegetsa seno sotlhe ke mafoko a moruti wa Katoliki, a a neng a kwadilwe mo pampiring ya dikgang ya The German Way ya May 29, 1938. Gareng ga tse dingwe o ne a re: “Jaanong go na le naga e le nngwe mo lefatsheng lotlhe koo ba go tweng ke . . . Baithuti ba Baebele [Basupi ba ga Jehofa] ba thibetsweng teng. Naga eo ke Jeremane! . . . Fa Adolf Hitler a ne a tsaya puso, mme Setlhopha sa Bobishopo ba Kereke ya Katoliki ba Jeremane ba tlhalosa gape se ba se kopang mo go ene, Hitler o ne a re: ‘Batho bano ba go tweng ke Baithuti ba Baebele ba ba Tlhoafetseng [Basupi ba ga Jehofa] ba letshwenyo; . . . ke ba tsaya e le batsietsi; ga ke letlelele gore Bakatoliki ba Jeremane ba kgotlelwe ka tsela eo ke Moatlhodi Rutherford yono wa Moamerika; ke nyeletsa [Basupi ba ga Jehofa] mo Jeremane.’” Moruti yono o ne a nesetsa mafoko ao pula.

10. (a) Ka letsatsi la Morena le simologile, ke pogiso efe eo Basupi ba ga Jehofa ba ileng ba thulana nayo? (b) Gantsi go ne go nna le diphelelo dife fa Bakeresete bano ba ne ba lwela kgololesego ya bodumedi mo dikgotlatshekelong?

¹⁰ Ka letsatsi la Morena le simologile, noga le losika lwa yone ga ba ise ba ko ba kgaotse go lwantshana le Bakeresete ba ba tloditsweng le balekane ba bone. Bontsi jwa bano ba ile ba latlhelwa mo dikgolegelong ba bo ba bogisiwa mo go setlhogo. (Tshenolo 12:17) Baba bao ba ile ba tswelela go “rera mathata ka taelo,” mme batho ba ga Jehofa ka tlhomamo ba gatelela ka go re: “Re tshwanetse go utlwa Modimo e le mmusi bogolo go batho.” (Pesalema 94:20; Ditiro 5:29) Ka 1954 makasine wa Tora ya Tebelo (ka Seesemane) o ne wa bega ka go re: “Dinaga tse di fetang masome a supa ka dinako tse di farologaneng mo dingwageng tse di masome a manè tse di fetileng di dirile melao e e thibelang mme gape tsa bogisa basupi ba ga Jehofa.” Koo go neng ga kgonega go lwela kgololesego ya bodumedi mo dikgotlatshekelong, Bakeresete bano ba dirile jalo mme ba felela ba fentse mo gogolo mo dinageng di le mmalwa. Mo Kgotlatshekelong e Kgolo ya United States fela, Basupi ba ga Jehofa ba kgonne go fenya mo ditshekong di le 50.

11. Ke polelelopele efe ya ga Jesu malebana le sesupo sa go nna gone ga gagwe e e diragaditsweng mo Basuping ba ga Jehofa mo letsatsing la Morena?

¹¹ Ga go na setlhopha sepe se sengwe se se kileng sa tlhokomela thatathata go utlwa taelo ya ga Jesu ya go ntshetsa Kaesare dilo tse e leng tsa ga Kaesare jaaka bone. (Luke 20:25; Baroma 13:1, 7) Le fa go le jalo, ga go na setlhopha sepe se sengwe se maloko a sone a latlhetsweng mo dikgolegelong mo mafatsheng a mantsi mo go kalo ke mebuso ya mefuta e e farologaneng mo go kalo, mme seno se sa ntse se tsweletse le mo motlheng wa gompieno mo dinageng tsa Amerika, mo Yuropa, mo Afrika, le mo Asia. Polelelopele e kgolo ya ga Jesu malebana le sesupo sa go nna gone ga gagwe e ne e akaretsa mafoko ano: “Go tswa foo batho ba tla lo isa kwa pitlaganong e bile ba tla lo bolaya, mme lo tla nna ba ba tlhoilweng ke ditšhaba tsotlhe ka ntlha ya leina la me.” (Mathaio 24:3, 9) Seno eleruri se diragaditswe mo letsatsing la Morena mo Basuping ba Bakeresete ba ga Jehofa.

12. Setlhopha sa Johane se nonotshitse batho ba Modimo jang go emelelana le pogiso?

¹² Go nonotsha batho ba Modimo go emelelana le pitlagano, setlhopha sa Johane se nnile sa ba gakolola se se kaiwang ke mafoko a ga Jesu a a neng a a bolelela Bakeresete ba Semerena. Ka sekai, fa pogiso ya Banasi e ne e simologa, Tora ya Tebelo (ka Seesemane) ya 1933 le ya 1934 di ne di na le ditlhogo tse di jaaka “Lo se Ka Lwa ba Boifa,” seo se neng se tlhalosa Mathaio 10:26-33; “Teko e e Bogale bo Feteletseng,” seo se neng se thailwe mo go Daniele 3:17, 18; le “Legano la Ditau,” seo temana ya setlhogo sa sone e neng e le Daniele 6:22. Ka bo1980, e bong ngwagasome o buka eno e neng ya gatisiwa la ntlha ka one, mme Basupi ba ga Jehofa ba bogileng pogiso e e setlhogo mo mafatsheng a a fetang 40, Tora ya Tebelo e ne ya nonotsha batho ba Modimo ka ditlhogo tse di tshwanang le “Ba Itumetse Lefa Ba Bogisiwa!” le “Bakeresete ba Itshokela Pogiso ka Bopelotelele.”b

13. Fela jaaka Bakeresete ba Semerena, ke ka ntlhayang fa Basupi ba Bakeresete ba ga Jehofa ba ise ba ko ba boife pogiso?

¹³ Ee ruri, Basupi ba Bakeresete ba ga Jehofa ba bogisitswe mo mmeleng le ka diteko tse dingwe ka malatsi a le some a tshwantshetso. Fela jaaka Bakeresete ba bogologolo ba kwa Semerena, ga ba ise ba ko ba boife; e bile ga go na ope wa rona yo o tshwanetseng go boifa jaaka mathata a ntse a bifela pele mo lefatsheng. Re ikemiseditse go itshokela go bogisiwa le eleng ‘go gapiwa ga dilo tsa rona’ ka boitumelo. (Bahebera 10:32-34) Ka go ithuta Lefoko la Modimo le go le tshelela ka botlalo, re ka kgona go ema re nitame mo tumelong. Tlhomamisegang gore Jehofa o kgona go lo dibela e bile o tla lo dibela fa lo ntse lo boloka bothokgami. “Latlhela[ng] tlhobaelo yotlhe ya lona mo go ene, ka gonne o a lo kgathalela.”—1 Petere 5:6-11.

[Dintlha tse di kwa tlase]

[Lebokoso/Setshwantsho mo go tsebe 39]

Mo dingwageng di le dintsintsi, bakwalahisitori ba ntse ba neela bosupi kaga bothokgami jwa Basupi ba ga Jehofa kwa Jeremane ka nako ya puso ya Banasi. Buka ya Mothers in the Fatherland, e e kwadilweng ke mokwalahisitori Claudia Koonz, e e gatisitsweng ka 1986, e bua jaana: “Bontsintsi jwa Bajeremane ba ba neng ba se kafa tlase ga Bonasi ba ne ba leka go bona tsela e ba ka tshelang ka yone tlase ga puso e ba neng ba e nyatsa. . . . Batho ba ba neng ba farologane le bontsintsi jono le megopolo ya bone e e sa tshwaneng e ne e le Basupi ba ga Jehofa ba le 20 000 bao, ke raya le motho ka sebele sa gagwe, ba neng ba gana go ikobela mmuso wa Banasi ka tsela epe fela. . . . Setlhopha seno sa batho ba ba neng ba momagane ba gana go ineela gotlhelele ba ne ba kgonisiwa go dira jalo ke bodumedi. Go tswa fela kwa tshimologong, Basupi ba ga Jehofa ba ne ba se ka ba dirisana ka gope le karolo epe fela ya mmuso wa Bonasi. Le eleng morago ga Ba-Gestapo ba sena go senya Ntlokgolo ya bone ya naga eo ka 1933 ba bo ba thibela lekoko leo ka 1935, ba ne ba gana le eleng fela go re ‘Heil Hitler.’ Mo e ka nnang sephatlo (bontsi e le banna) sa Basupi ba ga Jehofa botlhe ba ne ba isiwa kwa dikampeng tsa pogisetso, ba le sekete ba bone ba ne ba bolawa, mme ba bangwe ba le sekete ba ne ba swa magareng a 1933 le 1945. . . . Bakatoliki le Baporotesetanta ba ne ba utlwa baruti ba bone ba ba kgothaletsa go dirisana mmogo le Hitler. Fa ba ne ba gana, ba ne ba dira jalo ba tlola molao wa kereke mmogo le wa puso.”