Ke Ka Ntlha Yang Fa Re Tshwanetse go Latelela Tshiamo?

MONNA mongwe o ne a nna a farologane le ba bangwe mo lefatsheng le le neng le tletse thubakanyo la pele ga Morwalela. Monna yoo e ne e le Noa. Ene le lelapa la gagwe ba ne ba tsamaya le Modimo fa batho botlhe bone ba ne ba sa re sepe ka One. “Noa e ne e le monna eo o siameñ” mo metlheng e e boikepo eo, mme o ne a nna “moreri oa tshiamō” mo bathong ba ba sa reetseng ba lefatshe leo.—Genesise 6:9; 2 Petere 2:5.

Moaposetoloi Paulo o ne a le mo kgolegelong kwa Kaesarea ka nako nngwe mo e ka nnang ka ngwaga wa 56 wa Motlha wa rona o o Tlwaelegileng. Fa a ntshiwa mo kgolegelong a isiwa fa pele ga Mmusi Felise, Paulo o ne a dirisa tshono eo go rerela molaodi yono wa Roma. O ne a bua ka eng tota? “A mo ranolèla kaga tshiamō, le boikgapō, le tshèkō e e tlañ.” (Ditihō 24:25) Ee, Paulo le ene e ne e le moreri wa tshiamo.

Tsela eo batlhanka ba babedi bano ba ba ikanyegang ba Modimo ba neng ba ikutlwa ka yone ka tshiamo e ne e tshwanela tota. Jehofa ke ‘Modimo o o tekatekano ebile ke Mmoloki.’ (Isaia 45:21) Ka gone, seane se se tlhotlheleditsweng se re bolelela jaana: “Tsela ea moikepi ke makgapha mo go Yehofa: me o rata èna eo o latèlañ tshiamō.” (Diane 15:9) Batlhanka botlhe ba Modimo ba tshwanetse go latelela tshiamo.

Se se utlwisang botlhoko ke gore batho ba bantsi gompieno ga ba amege thata ka nonofo eno. Ba bua jaana: ‘Ga ke utlwise moagelani wa me botlhoko, ka jalo ke tlhomamisegile gore Modimo o a intumelela.’ Kana ba ka nna ba tswelela ba re: ‘Go na le ditsela tse dintsi tsa go dira tshiamo. Sengwe le sengwe se tla siama fa fela ke tlhagafaletse bodumedi jwa me.’ A o akanya gore Modimo o amogela boikutlo jo bo ntseng jalo jwa go sa tlhagafale?

Bangwe ba ka nna ba tsosa kgang ka sengwe se sele. Ba ka nna ba tswa ba itse polelo eno ya ga Paulo: “Re siamisicwe ka tumèlō.” (Baroma 5:1) Ba ka nna ba ipotsa jaana ka seno: ‘Bakeresete bao ba setseng ba boletswe fa ba siame, ba tshwanetse go nna ba latelela tshiamo jang?’ O ne o ka araba potso e e ntseng jalo jang?

Modimo wa Tshiamo

Go ya ka buka e e tlhalosang mafoko, tshiamo ke go nna le boitsholo jo bo siameng, ke tshiamiso, tseo tsotlhe di dumalanang le molao wa Modimo kana wa boitsholo. Ereka Jehofa e le Modimo wa tshiamo, mongwe le mongwe yo a batlang go mo itumedisa o tshwanetse go amega thata ka nonofo eno ya botlhokwa. “Yehofa o siame,” go ne ga bua jalo mopesalema. “O rata tshiamō, bathōkgami ba tla bōna sehatlhōgō sa gagwè.” (Pesalema 11:7; Duteronome 32:4) Moaposetoloi Petere o ne a re: “Gonne matlhō a ga Yehofa a mo basiamiñ, le ditsèbè tsa gagwè mo mekokotleloñ ea bōnè.”—1 Petere 3:12.

Ka gone, ga re a tshwanela go se amege thata ka kgang eno jaaka Bajuda ba bantsi ba ne ba dira. Ga go belaetse gore bontsi jwa bone e ne e le batho ba ba itlotlang bao ba neng ba sa utlwise baagelani ba bona botlhoko ka gope. Gape ba ne ba tlhoafetse—ba le tlhaga—ka bodumedi jwa bone. Mme bontsi jwa batho ba lekgolo la ntlha la dingwaga ba ne ba sa siama mo matlhong a Modimo. Paulo o ne a re: “Gonne ke shupa kaga bōnè ha ba na le tlhōhalō kaga Modimo, me e be e se kaha kicoñ. Gonne e rile ka ba sa itse tshiamō ea Modimo, me ba senka go tlhōmamisa e e leñ ea bōnè, ga baa ka ba ineèla mo tshiamoñ ea Modimo.”—Baroma 10:2, 3.

Bajuda ba ne ba dira phoso fa kae? Paulo o bolela gore ga ba a ka ba latela tshiamo go ya kafa kitsong e e tlhomameng. Sekao sa bone sa tlhagiso se re bolelela gore ga go a lekana go nna le botho jo bo siameng fela le go tila go utlwisa ba bangwe botlhoko. Gape se supa gore go na le ditsela tse dintsi tsa go dira tshiamo. Ka phepafalo he, tsela eo Bajuda ba bantsi ba motlha wa ga moaposetoloi ba neng ba e tlhophile e ne e le phoso. Re ka atlega mo go lateleleng tshiamo fela fa re reetsa Modimo. Buka ya Diane e bolela jaana: “Morwaaka, ha u ka chola mahoko a me, ua ba ua ipeèla ditaolō tsa me ha go wèna: Hoñ u tla tlhaloganya tshiamō le katlholō, le tekatekanyō, E, tselana ñwe le ñwe e e molemō.”—Diane 2:1, 9.

Tsela ya Tshiamo

Go tloga ka Moshe go fitlha ka Jesu tshiamo e ne e amana le go reetsa ditaolo tsa Modimo tse di mo Molaong wa ga Moshe. Ereka Baiseraele ba ba sa itekanelang ba ne ba sa kgone go nna ba sa tlole ditaolo tseno, ba ne ba tshwanela go ntsha ditlhabelo le ditshupelo tsa boleo tseo di laolwang ke Molao go duelela molato wa bone. Moshe o ne a raya Baiseraele a re: “Me go tla nna tshiamō mo go rona, ha re tlhōkōmèla go diha taolō e eotlhe ha pele ga Yehofa Modimo oa rona, yaka a re laotsè.”—Duteronome 6:25.

Go ne go se ope yo a neng a kgona go obamela Molao ka botlalo ka makgolokgolo a mantsi a dingwaga. Lefa go ntse jalo, ba bantsi ba ne ba leka go latelela tshiamo ka one, mme Bibela e bolela gore bangwe ba bano ba ne ba siame. Ka sekai, batsadi ba ga Johane Mokolobetsi ba tlhalosiwa ba ne ba le “tshiamō ha pele ga Modimo ka bobedi yoa bōnè, ba tsamaea mo ditaoloñ cotlhe, le mo ditaeoñ tsa Morèna, ba sena molato.”—Luke 1:6.

Lefa go ntse jalo, Jesu o ne a simolola tsela e ntšha ya tshiamo. O ne a boloka Molao wa ga Moshe ka botlalo—ene motho fela yo a kileng a dira jalo. Jesu o ne a swela mo koteng ya pogisetso mme Jehofa o ne a amogela boleng jwa botshelo jwa gagwe jo bo itekanetseng jaaka thekololo ya batho. Go tloga ka nako eo, ditlhabelo tsa kgolagano ya Molao di ne di sa tlhole di tlhokega. Setlhabelo se se itekanetseng sa ga Jesu se ne se dueletse maleo a batho botlhe ba ba dipelo di siameng.—Bahebera 10:4, 12.

Bakeresete Ba Boammaaruri Ba Bolelwa Ba Siame

Ka gone he, fa esale ka Jesu a swa go nna tshiamo go ne ga amana thata le go dumela go Morwa yo o siameng yono wa Modimo. (Yohane 3:16) Lemororo Bajuda ba ba neng ba gagamaletse bodumedi ba motlha wa ga Paulo ba ile ba se ka ba nna ba ba siameng ka gonne ba ne ba ganne thuto e e tlhomameng kaga Jesu, re bala jaana ka Bakeresete ba ba ikanyegang: “Me ba siamisiwa hèla ka tshegōhaco ea ōna ka ntlha ea thèkololō e e mo go Keresete Yesu.”—Baroma 3:24.

Ka tlhaloganyo eno, mafoko ao a dira ka tlhamalalo fela mo Bakereseteng ba ba tloditsweng, bao ba bolelwang ba siame ka gonne ba dumela mo setlhabelong sa ga Jesu ebile e tla nna baruaboswa mmogo le Keresete mo Bogosing jwa selegodimo. Lefa go ntse jalo, gompieno, fela jaaka moaposetoloi Johane a ne a bolelela pele, go na le boidiidi jo bogolo jwa Bakeresete ba ba nang le tsholofelo ya selefatshe. Ba ‘tlhatswa dikobo tsa bone ba di sweufatsa mo mading a Kwana’ mme ka gone ba bolelwa gore ba siame ka e le ditsala tsa Modimo tseo di tla falolang sepitla se segolo.—Tshenolō 7:9, 14; bapisa Yakobe 2:21-26.

Nna O Latelela Tshiamo

Lefa go ntse jalo, tlhokomela gore go latelela tshiamo ga go felele fela ka go dumela mo go Jesu. Timotheo o ne a setse a na le dingwaga tse dintsi e le Mokeresete yo o ineetseng ebile a tloditswe fa Paulo a ne a mo kwalela mafoko a a latelang: “U latèlè tshiamō; le poihōmodimo, le tumèlō, le loratō, le bopelotelele, le bopelonōlō. Tlhabana ntwa e e molemō ea tumèlō.” (1 Timotheo 6:11, 12; 2 Timotheo 2:22) Ke ka ntlha yang fa Timotheo a ne a tshwanetse gore a “latèlè tshiamō” fa e le gore Modimo o ne o setse o mo leba jaaka yo o siameng?

Ka gonne lefoko “tshiamō” le dirisiwa mo Bibeleng gape ka kakaretso go raya motho yo o ikanyegang le yo o nang le boitsholo jo bo siameng mo botshelong, mme a dira gotlhe mo a ka go kgonang go obamela ditaolo tsa ga Jehofa. Seno ke kafa re tlhaloganyang ka gone batsadi ba ba neng ba siame ba ga Johane Mokolobetsi. (Luke 1:6) Rraagwe Jesu yo a neng a mo neilwe, Josefa, le Josefa wa Arimathea le bone ba ne ba siame ka tsela e e tshwanang eno. (Mathaio 1:19; Luke 23:50) Ntlha ya go bo Bakeresete ba bolelwa ba siame ka tsela eno ga e ba imolole boikarabelo jwa go latelela tshiamo. Eleruri, Mokeresete ope fela yo a tlogelang go ikanyega mme a bo a nna le boitsholo jo bo siameng mo botshelong kana a palelwa ke go obamela ditaolo tsa Modimo o tla latlhegelwa ke boemo jwa gagwe jo bo siameng mo matlhong a ga Jehofa.

Go Latelela Tshiamo Ke Kgwetlho

Go latelela tshiamo ke kgwetlho. Ka ntlha yang? Ka gonne rotlhe ga re a itekanela mme re sekametse thata mo go direng se se sa siamang. (Genesise 8:21; Baroma 7:21-23) Mo godimo ga moo, re tshela mo lefatsheng leo le tlhotlheletsang dikgopolo le ditiro tse di sa siamang le leo le leng kafa tlase ga taolo ya ga Satane Diabolo, “eo o boshula.” (1 Yohane 5:19; 2 Bakorintha 4:4) Ga go gakgamatse go bo Paulo fa a ne a kwalela Timotheo a ne a amanya go latelela tshiamo le go ‘tlhabana ntwa e e molemo ya tumelo’!—1 Timotheo 6:11, 12.

A re ka fenya “ntwa e e molemō” eno? Ee, fa fela re rata ditekanyetso tsa ga Jehofa go tswa mo pelong ebile re ila se se bosula. Bibela e bua jaana kaga Jesu: “U ratile tshiamō, me ua ila boikèpō.” (Bahebera 1:9) Re tshwanetse go nna le boikutlo jo bo tshwanang: re nne le keletso e e nonofileng ya go tlhagolela seo se itumedisang Modimo le go tila sepe fela se se ka se kang sa mo itumedisa.

Mo godimo ga moo, re tshwanetse go gakologelwa gore go latelela tshiamo ga se kgaisano. Fa re iteba re le botoka mo go ba bangwe, kana fa re ikgogomosa ka tshiamo ya rona, re tla bo re tshwana fela le Bafarisai ba Bajuda. (Mathaio 6:1-4) Bao ba atlegang mo go lateleleng tshiamo eleruri ba a ikokobetsa, ‘ba kaya ba bangwe fa ba ba gaisa ka molemo.’—Bafilipi 2:3.

Paulo o ne a otlelela kafa go leng botlhokwa ka gone gore re ithute Bibela fa re ntse re latelela tshiamo fa a ne a kwala jaana: “Lokwalo loñwe le loñwe lo lo kwadilweñ ka tlhotlheleco ea Modimo, lo bile lo molemō go ruta, le go kgalemèla le go shokolola, le go kaèla ka tshiamo.” (2 Timotheo 3:16) Fa re ithuta Bibela re bo re ya kwa dipokanong tsa Bokeresete koo Bibela e tlhalosiwang gone, re tla thapisiwa go nna ba ba siameng. Bibela e ka re bopa gore re ‘apare motho yo mosha, yo o bopilweng mo tshiamong, le mo boitshepong jwa boammaaruri.’—Baefesia 4:24.

Fa tshiamo e nna karolo ya botho jwa rona, re tla ila boikepo eleruri. Ga re kitla re raelwa gore re nne le ditsala tse di maswe tsa lefatshe leno. (1 Bakorintha 15:33) Ga re kitla re tlhotlhelediwa go rata dilo tsa lefatshe leno kana go leba dilo tse di bonalang di le botlhokwa thata jaaka lefatshe leno le dira. (Diane 16:8; 1 Timotheo 6:9, 10; 1 Yohane 2:15-17) Eleruri ga re kitla re gogelwa ke boitlosobodutu jo bo leswe le jo bo nang le thubakanyo joo bo tletsetletseng jaana gompieno.—Baefesia 5:3, 4.

Masego a Tshiamo

Ee, go latelela tshiamo ka tsela ya ga Jehofa ke kgwetlho, mme go lwa ntwa eo go mosola. Ka ntlha yang? Ka gonne e dira gore re nne le botsalano jo bo atamalaneng le Jehofa. A tshiamelo e e kwa godimo ruri! Bibela e re bolelela jaana: “[Jehofa] o segōhatsa boagō yoa mosiami.” “Yehofa o kgakala le baikepi: me o utlwa morapèlō oa basiami.” (Diane 3:33; 15:29) Mo godimo ga moo, re kgona go tlhaloganya boikaelelo jwa ga Jehofa tota. “Tselana ea mosiami e nntse yaka lesedi ye le phatsimañ, ye le phatsimèlañ pele hèla go ea motshegariñ o mogolo.”—Diane 4:18.

Bibela e solofetsa gore bao ba batlang tshiamo ba tla sirelediwa fa tsamaiso e e sa siamang eno ya dilo e nyelediwa. “Batlañ Yehofa, lona bakgōbaladi botlhe ba lehatshe, ba lo dihileñ katlhōlō ea gagwè; batlañ tshiamō, batlañ kgōbalalō; e ka tla ea re goñwe loa shuywa mo letsatsing ya bogale yoa ga Yehofa.” (Sefania 2:3) Morago ga foo, Bibela e naya bao ba nang le tsholofelo ya mo lefatsheng tebelelo eno e e molemolemo: “Basiami ba tla rua lehatshe, ba tla aga mo go yeōna ka bosakhutleñ.”—Pesalema 37:29.

Abo ao e le mabaka a a molemolemo jang ne a gore re latelele tshiamo! Ke fela jaaka Modimo o bua jaana: “Eo o latèlañ tshiamō le boutlwèlō botlhoko, o bōna botshelō, le tshiamō, le tlotlō.”—Diane 21:21.