Go Tlhagolela Maitseo a Bokeresete mo Lefatsheng Leo Le Senang Maitseo

“Bōnañ, go molemō yañ, go monate yañ, ha bana ba monna ba aga mmogō ka pelo ñwe hèla.”—PESALEMA 133:1.

1. Ke eng seo se diragaletseng maitseo a a siameng?

“MO DINGWAGENG tse 25 tse di sa tswang go feta, batho ba ile ba tlhoka maitseo,” ga bua jalo mokwala-dikgang Ann Landers. “Ga se fela gore banna ga ba bulele basadi ditswalo tsa dikoloi kana go ba sutela mo ditulong mo ditereneng kana mo dibeseng. Mme ke se se fetang seo.” Eleruri, gongwe le gongwe koo re lebang gone, re bona bosupi jwa gore re tshela mo lefatsheng leo go tlhoka maitseo ga lone go ntseng go oketsega. Batho ba tsenelela ba bangwe fa go tlhomaganwe, ba gogela motsoko mo dilifiting tse di tletseng batho, ba leletsa mmino kwa godimo mo mafelong a maitiso, jalo le jalo. Boitemogelo jwa letsatsi le letsatsi bo re lemotsha gore lefa maemo a thuto le maemo a botshelo a tlhabolotswe, motlha wa rona ka kakaretso ke oo mo go one Ke a Leboga le Tswee-tswee eleng mafoko a a sa itsiweng, mme bopelonomi jo bo tlwaelegileng le maitseo di lebetswe gotlhelele.

2. Ke ka ntlhayang fa go sa gakgamatse go bo go sena maitseo a a siameng gompieno?

² A sotlhe seno se a gakgamatsa? Eseng thata. Go re gakolola fela seo moaposetoloi Paulo a neng a tlhotlhelediwa go se bua kaga boitsholo jwa batho mo “metlheñ ea bohèlō” fa ‘dipaka e tla bo e le tse di tlhokofatsang.’ Gareng ga tse dingwe, Paulo o ne a bolelela pele gore batho ba ne ba tla nna “baithati, . . . babelahadi, le baipegi, . . . ba ba sa lebogeñ, . . . Ba sena loratō loa tlhōlègō, . . . ba sena boithibō.” (2 Timotheo 3:1-3) Le eleng fa o sa ele dilo tlhoko mo go kalo o tla lemoga gore boitshwaro jo bo ntseng jalo bo bonala gompieno mo bathong ba dingwaga tsotlhe, maemo, le merafe. Ke ka ntlhayang fa go ntse jalo? Ke eng seo se bakang go tlhokega ga maitseo a a siameng ka kakaretso?

Dilo Tseo di Bakang Maitseo a a sa Siamang

3. “Mōea” wa tsamaiso eno o tlhotlheletsa maitseo a a sa siamang jang?

³ Polelwana “baithati” e tlhalosa sentle “losika lwa nna pele,” seo se lebisitseng mo bathong bao ba ileng ba godisiwa go gatelelwa boikgagapeledi, go ikakanyetsa ba le bosi, le go iteba bobone fela. Moya ono, o o tletsetletseng mo ‘moyeng’ o o re dikologileng, ka tlhamalalo fela o kgatlhanong le kgakololo eno ya Bibela ya gore Bakeresete ba ‘se tlhokomele dilo tse e leng tsa bone fela, fa e se gore, mongwe le mongwe a tlhokomele le tse e leng tsa ba bangwe.’ (Baefesia 2:2, 3; Bafilipi 2:4) Go felela ka eng? Kokomana eo e godisitsweng ka kgopolo ya gore ‘itirele seo o se ratang’ eleruri ga e kitla e tshwenyega ka gope ka gore boitsholo jwa yone bo tla ama ba bangwe jang.

4. Bao ba tlhokomologang ditekanyetso tse di amogelwang ba lebiwa jang gompieno, mme pono ya Mokeresete e tshwanetse go nna efe mo kgannyeng eno?

⁴ Sengwe seo pele se neng se tsaya karolo e kgolo mo go bolokeng maitseo ka selekanyo se se rileng mo gare ga batho e ne e le kgatelelo ya balekane. Go tshwenyega ka gore ba bangwe ba tla akanya jang ke selo se segolo seo se ntseng se dira batho gore ba itshware. Lefa go ntse jalo, gompieno, fa mokgwa mongwe e le o o tshosang kana o o feteletseng, ke one o batho ba le bantsi ba tla o ratang. Bao ba tlhokomologang ditekanyetso tseo di amogelwang ga ba sa tlhole ba lejwa jaaka ba ba senang maitseo kana ba ba makgakga mme ba lebiwa jaaka ba ba botlhale kana ba ba tlhabologileng, bao ba elediwang fela thata. Lefa go le jalo, gakologelwa, gore “go tlhabologa” go raya “boemo jo e seng jwa tlholego, jo bo sa itshekang, kana jwa ntlhantlha.” Le tswa mo thitong ya lereo la Segerika leo le dirisitsweng jaaka ‘go rulaganya ka botlhale’ mo go 2 Petere 1:16. Eleruri, Bakeresete ba boammaaruri ba tla bo ba dira sentle fa ba bifela boikutlo jo bo ntseng jalo.

5. Ke lebaka lefe gape leo le tlatseletsang mo go tlhokegeng ga maitseo a a siameng?

⁵ Moreri 8:11 e bua jaana: “Ereka katlholō kaga tihō e e boshula e sa dihahadiwe ka bonakō, ke gōna ka mouō pelo ea bana ba batho e tlhōmameñ mo go bōnè ka mokgwa o o tletseñ, go tla ba diha boshula.” Seno ke lebaka le lengwe leo le tlatseletsang mo go sa nneng le maitseo ga batho. Ke ka go bo batho ba fitlhela go le bonolo fela go tsietsa, mme ga ba amege ka gope ka go tlola ditekanyetso tse di tlhomilweng tsa boitshwaro. “Baagi bao ba neng ba ka tlhabiwa ke ditlhong fa ba ne ba ka itsisiwe phatlalatsa jaaka bangwe ba disenyi ba ntse ka motlhofo fela ba roba melao e e farologaneng mo ponong ya batho—melao ya ditsela, melao ya diokobatsi, melao ya go kgotlela naga,” go bua jalo setlhogo sengwe mo The New York Times. Ka baka leo, “go tsosa modumo, go senya dithoto tsa ba bangwe le go kwala mabotana” tsotlhe jaanong ke karolo e e ka sekang ya itlhokomolosiwa ya se se re diragalelang letsatsi le letsatsi. Ka jalo, maitseo, gammogo le go tlotla ditshwanelo tsa batho ba bangwe, dithoto tsa bone, le bosephiri di ntse di tswelela go kgorelediwa.

6. Maitseo a batho a amiwa jang ke go nna ba tshwaregile, mme Jesu o ne a farologana jang le bone mo go seno?

⁶ Ereka maitseo a a siameng ka kakaretso a lebiwa jaaka selo se se seng kalo mo botshelong, gantsi batho ba le bantsi baa a lebala fa ba itlhaganetse—mme batho ba le bantsi gompieno ba lebega ba itlhaganetse ka dinako tsotlhe. Ka baka leo, ba fetana kwantle ga go bua sepe, kana ba gagamaditse difatlhego fela. Ba itshusumetsa le go kgarametsana fela fa go tlhomaganwe, kana ba tsenelela ka go fela pelo mo ditseleng tsa dikoloi fela gore ba tle ba boloke metsotso kana metsotswana e se kae. Gantsi, batho ke bao ba tshwaregang thata ka dilo tsa bone tsa botho, kana dithulaganyo tsa bone di tlala ka dilo tse dintsi tse ba tshwanetseng go di dira, mo eleng gore sengwe fela seo se ka tlang ba sa se lebelela kana moeng e nna selo seo se ba tshwenyang kana seo se ba kgoreletsang. A ko o akanye gore seno se farologana jang le tsela e ka yone Jesu a neng a amogela batho bao ba neng ba tla kwa go ene le eleng ka dinako tse di neng di sa mo siamela.—Mareko 7:24-30; Luke 9:10, 11; 18:15, 16; Yohane 4:5-26.

7. Ke eng seo Bakeresete ba boammaaruri ba tshwanetseng go itisa kgatlhanong le sone mabapi le maitseo?

⁷ Lemororo re tshela mo lefatsheng leo dilo di tsamaelang ka bonako mo go lone, ebile dilo tseo di batlang nako ya rona le maatla di ntseng di oketsegela pele, go letla dikgatelelo tseo go re dira gore re tlhoke maitseo eleruri ga go kitla go tokafatsa dilo. Phapaanong le seo, tsela e e ntseng jalo e gogela kwa bothubaking jo bo senang tlhaloganyo jo re utlwalelang ka jone—ditatalalano, dintwa, dikgogakgogano, le eleng dipolaano—tseo di bakwang ke go busolosiwa ga go tlhoka maitseo ka go tlhoka maitseo. Sotlhe seno ke karolo ya moya wa lefatshe leno leo Bakeresete ba boammaaruri ba sa tshwanelang go nna karolo ya lone.—Yohane 17:14; Yakobe 3:14-16.

Dikao Tse Dikgolo tsa Maitseo a a Siameng

8. Lefa re dikologilwe ke batho bao ba senang maitseo, ke eng seo Bakeresete ba kgothalediwang go se dira?

⁸ Ereka re dikologilwe ke batho bao ba sa tshwenyegeng thata ka ba bangwe, go motlhofo gore re ka ineela mo kgatelelong eo mme re latlhegelwe ke maitseo a mantle. Lefa go ntse jalo, fa re gakologelwa kgakololo ya Bibela ya gore re se ka ra “bopèga yaka lehatshe yeno,” re ka lebelela dikao tse di tlhomologileng tsa Bibela mme ra leka go tshegetsa ditekanyetso tse di kwa godimo tsa maitseo a Bokeresete mo lefatsheng la gompieno leo le senang maitseo. (Baroma 12:2, 21; Mathaio 5:16) Ditiro tsa rona di tshwanetse go bontsha gore re dumalana ka pelo yotlhe le mopesalema yo a neng a bua jaana: “Bōnañ, go molemō yañ, go monate yañ, ha bana ba monna ba aga mmōgō ka pelo ñwe hèla.”—Pesalema 133:1.

9. Ke eng seo Dikwalo di se senolang kaga tsela e Jehofa a dirisanang le batho ka yone?

⁹ Sekao se segolo mo go bontsheng maitseo a a siameng ke Mmopi le Rre wa botlhe, Jehofa Modimo ka boene. Go tlwaelegile gore bao ba leng mo maemong a a kwa godimo kana bao ba nang le maatla mo godimo ga ba bangwe ba ‘dirise maemo a bone’ mme ba batle gore dikeletso tsa bone di diragadiwe. Lefa go le jalo, Motho yo Mogolo thata mo lobopong, Jehofa Modimo, o na le maitseo ka dinako tsotlhe fa a dirisana le bao ba leng kwa tlase ga gagwe. Fa a ne a segofatsa tsala ya gagwe Aberahame, o ne a bua jaana: “Tswee-tswee, tsholetsa matlho a gago, mme o lebelele go tswa fa go wena.” Gape: “Tswee-tswee leba, kwa legodimong mme o bale dinaledi.” (Genesise 13:14, NW; 15:5, NW) Fa a ne a naya Moshe sesupo sa maatla a Gagwe, Modimo o ne wa re: “Tswee-tswee, tsenya letsogo la gago, mo seaparong sa gago kwa godimo.” (Ekesodo 4:6, NW) Dingwaga tse dintsi morago ga foo, Jehofa, o ne a bua le eleng le batho ba gagwe ba diganana ka moperofeti wa gagwe Mika jaana: “Tswee-tswee, reetsang, lona ditlhogo tsa ga Jakobe le lona balaodi ba ntlo ya Iseraele. . . . Tswee-tswee, reetsang, seno, lona balaodi.” (Mika 3:1, 9, NW) Mo ntlheng eno, a re “baetsi ba Modimo” ka go bua re re “Tswee-tswee” fa re dirisana le ba bangwe?—Baefesia 5:1.

10, 11. (a) Go ka bolelwa eng ka ditsela tsa ga Jesu le maitseo a gagwe? (b) Re ka dira jaaka Jesu jang mo go nneng ba ba nang le maitseo a a siameng mo bathong botlhe?

¹⁰ Jesu Keresete, ene “eo o mo sehubeñ sa ga Rara,” ke sekao se sengwe gape se se tlhomologileng seo se tshwanetseng go ediwa. (Yohane 1:18) Fa a ne a dirisana le batho, o ne a le bonolo ebile a le lorato kafa letlhakoreng le lengwe, mme a nitame ebile a nonofile mo go je lengwe; lefa go le jalo ga a ise a ko a nne bogale kana a seke a tlhomogele ope pelo. Fa e akgela ka “neo ya gagwe e e tlhomologileng ya go dirisana le batho ba mefuta yotlhe,” buka ya The Man From Nazareth e bua jaana: “O ne a kopana le banna le basadi phatlalatsa le mo sephiring ka go tshwana. O ne a utlwana le bana mo go tlhokeng kitso ga bone mme seo se gakgamatsang thata o ne a utlwana gape le banna ba digakolodi tse di hutsafetseng ba ba tshwanang le Sakaio. Basadi ba malapa ba ba tlotlegang, jaaka Maria le Maratha, ba ne ba kgona go bua le ene ka phuthologo, mme diaka le tsone di ne di mo senka jaaka ekete di ne di tlhomamiseditswe gore o ne a tla di tlhaloganya le go tsalana natso . . . Go sa tlhokomeleng melelwane eo e neng e khinne batho ba ba tlwaelegileng ke nngwe ya dinonofo tsa gagwe tse di tlhomologileng.”

¹¹ Go tshwara mongwe le mongwe ka tlotlo le ka kakanyetso ke sesupo sa gore motho ka boammaaruri o na le maitseo a a siameng, mme re tla bo re dira sentle go dira jaaka Jesu Keresete mo go seno. Ee, batho ba le bantsi ba kgona go tlotla batho ba ba rileng fela, segolo bogolo ba maemo a bone a fetang a bone. Mme bao ba ba lebang jaaka ba ba kwa tlase ga bone kana le eleng bao ba lekanang le bone ka maemo, gantsi ba itlhaola mo go bone, ga ba re sepe ka bone, ba bile ba nna makgakga mo go bone. Ka ditsela dingwe seno se lebega se ba naya boikutlo jwa gore ba kwa godimo ebile ba na le maatla. Mme go ile ga bolelwa sentle fela gore: “Motho yo o bokoa o itira modipa ka bogale.” Ka gone, Bibela e re kgothatsa jaana: “Mo tlotloñ, a moñwe a beè eo moñwe kwa pele.” (Baroma 12:10) Fa re dira bojotlhe jwa rona go latela kgakololo eno, re tla bo re le gaufi le go nna batho ba ba nang le maitseo mo bathong botlhe, jaaka Jesu a ne a ntse.

12. Moko wa thuto ya ga Jesu ka dikamano tsa batho ke eng?

¹² Sekao seno sa nonofo e e siameng, le e e tlhomologileng thata se bonala gape mo dithutong tsa ga Jesu, segolo bogolo mo go eno e e bidiwang Molao wa Konokono: “Cotlhe tse lo ratañ batho ba di lo dihèla, le lona lo ba diheleñ hèla yalo.” (Mathaio 7:12) Ka mo go kgatlhisang, mo go Analects, nngwe ya Four Books tsa ga Confucius—eo e sa bolong go lejwa jaaka sekao se se tlhomologileng thata sa boitsholo kwa Botlhaba—molaodi o ne a bodiwa ke mongwe wa barutwa ba gagwe fa go na le lefoko le le lengwe fela leo le neng le ka dira jaaka molao-motheo wa boitsholo mo botshelong. “Gongwe lefoko ‘go direlelana’ (shu) le ka tshwanela,” moruti a araba jalo, mme o ne a oketsa jaana: “O seka wa direla ba bangwe se o sa batleng ba se go direla.” Phapaanong le seo, re kgona go bona botlhokwa jwa thuto ya ga Jesu. Dikamano tse di gaufi, tse di itumedisang, le tse di botsalano di ka nna gone fela fa motho e le ene a tsayang kgato ya ntlha go ‘direla ba bangwe’ se se molemo.

Maitseo a Bokeresete a Thailwe mo Loratong lwa Bokeresete

13, 14. (a) Ke eng seo se ileng sa lemogiwa bosheng jaana ka maitseo a batho ka kakaretso? (b) Ke eng seo se tlhotlheletsang go kgatlhegela maitseo gompieno?

¹³ Ka gonne maitseo a a maswe a tletsetletse, gompieno go buiwa thata ka go boela kwa boitsholong jo bo tshwanetseng. “Re ne ra ganana le maitseo ka bo-1960,” go bua jalo Marjabelle Stewart, mokwadi le moruti yo o itsegeng wa kgang eo, “mme phetogo e ntšha e a a busetsa. Batho ba bolela gore a botlhokwa mme ba batla go itse gore ditekanyetso tsa loago ke dife.” Kgatlhego e ntšha eno mo maitseong e bontshiwa ka go tlalatlala ga seno mo dibukeng, mo dibukaneng tsa kaelo, ditlhogo tsa dikgakololo, le ditshupo tsa TV di bontsha sengwe le sengwe go tloga go gore motho o ka dirisa foroko efe kwa dijong tsa maitseboa le gore o ka bua jang le motho mo dikamanong tsa gompieno tse di raraaneng le tse di ntseng di fetoga ka bonako tsa loago le tsa lelapa.

¹⁴ Lefa go le jalo, ke ka ntlhayang fa batho ba bangwe ba simolola go amega thata jaana ka maitseo? “Mo bathong ba gompieno ba ba gaisanang thata,” Stewart o a tlhalosa, “gore motho a atlege o tshwanetse go nna le maitseo.” Ka mafoko a mangwe, maitseo a a siameng a lebiwa fela jaaka selo seo se thusang motho gore a dirisane le ba bangwe le go tswelela pele. Jalo batho ba bala dibuka le go tsenelela dithuto tse di rutang ka maitseo go ithuta gore ba ka apara jang gore ba atlege, ba ka nna ba ba kgatlhisang jang, le gore ba ka amogelwa jang mo ntlwaneng ya bolaodi ya dipuisano, jalo le jalo.a Bothata ka seno sotlhe ke gore maitseo a fetogile selo seo se dirisiwang go fitlhelela sengwe, jaaka sebopego se motho a fitlhang botho jwa gagwe jwa boammaaruri ka sone fa a dira sengwe a bo a fetoga fa a feditse. Ka gone, ga go gakgamatse, gore nako le nako re bo re utlwa ka bokebekwa jo bo tshosang fela thata jwa baamogedi ba madi a mantsi jo bo diriwang ke batho ba ‘lotso’ le ba ‘maemo’ a a kwa godimo.

15, 16. (a) Ke eng seo mokwadi mongwe a se buang mabapi le “melao e e molemo go gaisa ya boitsholo”? (b) 1 Bakorintha 13:4-7 e amana jang le maitseo a boammaaruri a Bokeresete?

¹⁵ Seno se kgakala fela thata le seo maitseo a a molemo a tshwanetseng go nna sone. Amy Vanderbilt, mokwadi yo o tlotlegang thata mo kgannyeng eno, o kwala jaana mo bukeng ya gagwe New Complete Book of Etiquette: “Melao e e molemo go gaisa ya boitsholo e ka fitlhelwa mo Kgaolong ya bo-13 ya Bakorintha wa Ntlha, kgang e e kwadilweng ka matsetseleko thata ya lorato ke Moitshepi Paulo. Melao eno ga e dirisane ka gope le go apara sentle kana le eleng go itira jaaka yo o nang le maitseo. E bua kaga maikutlo le maitseo, bopelonomi, le go akanyetsa ba bangwe.”

¹⁶ Legale, seo Amy Vanderbilt a neng a bua ka sone, e ne e le ditemana tsa 1 Bakorintha 13:4-7 koo moaposetoloi Paulo a neng a tlhalosa dikarolo tse di farologaneng tsa lorato lwa Bokeresete ka botlalo. Tlhokomela seo dintlha di se kae fela tseo a di buileng di ka felelang ka sone. Ka sekai, motho yo o ‘itshokang ka bopelotelele ebile a le pelonomi’ eleruri o tla nna pelotelele mme a tlotle ba bangwe fa a dirisana le bone. ‘Yo o sekang a dira se se tshwanelang’ ke tsela nngwe ya go re ‘o dira kafa go tshwanetseng,’ mme “go dira ka mo go tshwanetseng” go tlhalosiwa jaaka “go dira tumalanong le ditekanyetso tsa seo se itumedisang, se se tshwanetseng, kana boleng.” Ka gone, fela jaaka New Testament in Modern English ya ga J. B. Phillips e baya polelwana eno: “Lorato lo na le maitseo a a molemo.” Ga go bonolo go akanya gore motho yo o bontshang lorato le le ntseng jalo o ka lebiwa jaaka yo o senang maitseo.

17. Maitseo a rona a supa eng?

¹⁷ Ka phepafalo, he, maitseo a Bokeresete a amana ka tlhamalalo le lorato lwa Bokeresete. Ga se fela tsela ya go fitlhelela dilo kana selo seo a ka se aparang fa a batla go dira jalo. Go na le moo, maitseo a rona—tsela eo re dirisanang le ba bangwe ka yone, boikutlo jo re bo bontshang, boitsholo, boitshwaro jwa rona jwa ka gale—ke sesupo sa ka moo re amegang ka batho ba bangwe ka gone le boteng jwa lorato lwa rona mo go bone. Rotlhe bannye le bagolo, re tshwanetse go leka go reetsa kgakololo eno ya Bibela: “A moñwe le moñwe a batlèlè oa ga gabō molemō.” (1 Bakorintha 10:24) Ka gone, jaaka karolo ya lorato lwa Bokeresete, maitseo a Bokeresete ke letshwao leo le re tshwayang jaaka barutwa ba boammaaruri ba ga Jesu Keresete.—Yohane 13:35.

Go Nna le Maitseo a a Siameng ka Dinako Tsotlhe

18. Re tshwanetse go ikemisetsa go dira eng go sa kgathalesege seo re se bonang mo tikologong ya rona?

¹⁸ Mabapi le kokomana ya rona, Jesu o ne a bolelela pele gore “e tla re ka boikèpō bo tla bo bo ntsihetse, loratō loa bontsi bogolo lo tla tsidihala.” (Mathaio 24:12) Go tsidifala gono ga lorato go bontshiwa ka phepafalo ke boikutlo jwa go sa reng sepe ka batho le jwa go ipona bobone fela ga batho ba bantsi gompieno. Lefa go le jalo, go na le gore re tlhotlheletsege go itshwara ka mokgwa o o tshwanang wa go sa re sepe ka ba bangwe, re tshwanetse go nna re gakologelwa kgakololo eno ya ga Paulo: “Se dueleñ boshula yoa ga opè ka boshula. Akanyañ dilō tse di tlotlègañ mo matlhoñ a batho botlhe. Ha go ka nna yalo, lo nnè kagishō le batho botlhe, kaha nonohoñ ea lona.” (Baroma 12:17, 18) E tshwanetse go nna boikaelelo jwa rona go nna ba ba nang le maitseo a a siameng ka dinako tsotlhe, le eleng lefa maiteko a rona a anaanelwa kana a sa anaanelwe.—Mathaio 5:43-47.

19. Maitseo a rona a ka ama dikarolo tse dingwe tsa botshelo jwa rona jang?

¹⁹ Ee, maitseo a Bokeresete ke sesupo sa tlholego sa lorato le go amega ka ba bangwe tseo di leng mo dipelong tsa rona. Fela jaaka seo re se buang se supa seo re leng sone, jalo maitseo a rona a bontsha gore re amega go le kae kana kafa re sa amegeng ka gone ka ba bangwe. (Mathaio 12:34, 35) Ka gone, maitseo a tshwanetse go tsaya karolo e kgolo mo botshelong jwa rona. A tshwanetse go nna tsela ya botshelo. Mme a tshwanetse go bontshiwa jang ka botlalo? Maitseo a Bokeresete a ka tlhagolelwa jang ka botlalo? Re tla tlhatlhoba seno mo setlhogong se se latelang.

“A Mokgwa oa Lona oa Botshelō E Nnè O O Chwanetseñ Mahoko A A Molemō”

“A mokgwa oa lona oa botshelō e nnè o o chwanetseñ Mahoko a a Molemō a ga Keresete.”—BAFILIPI 1:27.

1. Tiragalo ya bosheng jaana kwa New York City e ne ya dira gore ramotse a dire dikakgelo dife tse di molemo? (Baroma 13:3)

“BASUPI ba ba fetang 1 000” ba ne ba tlile kwa City Hall ya kwa borwa jwa Manhattan ka September 29, 1988, go bega jalo The New York Times. Ba ne ba tlile go tshegetsa kopo ya kago eo e neng e tlile go sekasekiwa fa pele ga Board of Estimate ya motse-mogolo oo. Lefa kopo eo ya go ba letla go aga kago e ntšha ya bonno kwa ntlong-kgolo ya lefatshe lotlhe ya Basupi ba ga Jehofa e ne ya ganwa, ramotse “o ne a akgola Basupi ka gore ke batho ba ‘boitsholo jo bontle fela thata’ mme a bolela gore ba ne ba tshwanetse go ‘tlotlomadiwa eleruri.’”

2. Ke ka tsela efe maitseo a Basupi ba ga Jehofa a farologaneng, mme ka ntlhayang?

² Gantsi, fa batho ba ba fetang sekete ba kgobokane go tla go tshegetsa kgato eo e sa dumelelweng, go ka lebelelwa eng? Go kgarametsana, go goa, le eleng go lwa le bothubaki ke dilo tse di tlwaelegileng. Ke ka ntlhayang fa Basupi ba farologane? Ke ka gonne ba lemoga gore boitsholo jwa bone ka dinako tsotlhe bo ama tumelo ya bone. Ba gakologelwa sentle kgakololo eno ya Dikwalo: “Lo tshelè ka mokgwa o montlè mo go Badichaba; e tle e re mo ba lo bolèlañ yaka badiha boshula ka gōna, bo ba galaletsè Modimo mo motlheñ oa tekolō.”—1 Petere 2:12.

Maitseo a Mantle a Galaletsa Jehofa

3. Maitseo a rona a na le seabe sefe mo go tlotleng Jehofa?

³ Go galaletsa Jehofa ka boitshwaro jo bontle ka phepafalo ke karolo ya boikarabelo jwa rona jwa Bokeresete. (Mathaio 5:16) Legale, boitshwaro jo bontle, bo akareletsa dilo tse dintsi—ka sekai, boikanyegi, botlhaga, le boitsholo jo bo siameng. Lefa go ntse jalo, dinonofo tseno gantsi di anaanelwa fela ke bao ba re itseng sentle kana bao re dirisanang ka metlha le bone, jaaka ditsala tsa rona, bamasika, bahiri, badirimmogo, le barutabana. Mme go tweng ka bontsintsi jwa batho bao re sa dirisaneng thata le bone? Fano ke gone koo maitseo a rona segolo bogolo a tlhokegang gone. Jaaka sephuthelo se sentle se tlatseletsa mo boikuelong jwa mpho e e tlhwatlhwa kgolo, maitseo a mantle a dira gore seo re ka se nayang ba bangwe se ikuele. Lefa re ka bo re na le dinonofo dipe fela tse dingwe tse dintle tsa Bokeresete kana lefa maikaelelo a rona a ka tswa a kgatlha jang, a tla dira go le gonnye fela fa maitseo a rona e se a a siameng. Jalo maitseo a rona a ka galaletsa Jehofa jang?

4. Re tshwanetse go tlhokomela maitseo a rona mo dikarolong dife tsa botshelo?

⁴ “A mokgwa oa lona oa botshelō e nnè o o chwanetseñ Mahoko a a Molemō,” go bua jalo Paulo. (Bafilipi 1:27) Le gale, seno se kopanyeletsa bodihedi jwa rona jwa phatlalatsa. Mme boitshwaro jwa rona le maitseo kwa lefelong la rona la kobamelo, mo tikologong, kwa tirong, kwa sekolong, ee, mo karolong nngwe le nngwe ya botshelo jwa rona, a amana ka tlhamalalo fela le go atlega ga rona mo bodiheding. Paulo o kwala jaana: “Re sa kgopise mo go sepè, gore tihèlō ea rona e tle e se ke ea beèwa molato.” (2 Bakorintha 6:3) Re ka tlhomamisega jang gore re dirisa kgakololo eo? Re ka dira eng go thusana, segolo bogolo ba babotlana ba ba leng mo gare ga rona, go bontsha maitseo a Bokeresete ka dinako tsotlhe?

Kwa Holong ya Bogosi

5. Ke eng seo re tshwanetseng go se tlhokomela fa re le kwa Holong ya Bogosi?

⁵ Holo ya Bogosi ke lefelo la rona la kobamelo. Re ya koo ka go bo re laleditswe ke Jehofa le Morwawe, Jesu Keresete. Ka tlhaloganyo eo, re baeng mo ntlong ya ga Jehofa. (Pesalema 15:1; Mathaio 18:20) A o moeng yo o molemo fa o tla kwa Holong ya Bogosi? Gore re nne jalo, re tswanetse go bontsha go akanyetsa le tlotlo tse di tshwanetseng eseng mo molaletsing wa rona fela mme gape le mo balalediweng ba bangwe. Seno se kopanyeletsa eng?

6. (a) Go tla morago kwa dipokanong ka metlha go bontsha go palelwa mo go eng? (b) Go ka dirwa eng go fenya bothata jono?

⁶ Santlha, go na le kgang ya go tla ka nako. Eleruri ga go motlhofo go dira jalo ka metlha. Ba bangwe ba nna kgakala; ba bangwe ba na le malapa le bana bao ba tshwanetseng go ba baakanya. Eleruri ba akgolelwa maiteko a bone a go nna gone kwa dipokanong tsa Bokeresete ka metlha. Lefa go ntse jalo, go ile ga tlhokomelwa gore go na le ba bangwe bao ba nang le mokgwa wa go tla morago kwa dipokanong. Ba ka dira eng go baakanya seno? Santlha motho o tshwanetse go lemoga gore go tla morago kwa dipokanong tsa Bokeresete ga se ka metlha go bontshang go sa anaaneleng ga gagwe botlhokwa jwa dipokano. Go lebega bangwe ba batho bao ba tlang morago kwa dipokanong ka metlha ba ipelela dipokano fela jaaka ba bangwe—fela fa ba fitlha koo. Go na le moo, bothata bo ka nna jwa tswa bo bakiwa ke go sa rulaganyeng sentle le go sa akanyetseng Bakeresete-ka-bone. Lengwe la mabaka ao ka one re kgothalediwang gore “re se ka ra bakèla go phuthèga ga rona,” ke gore re tle re ‘gopolane le go tlhotlheletsana mo loratong le mo ditihong tse di molemo.’ (Bahebera 10:24, 25) Ga re kake ra dira seno fa, nako le nako, re goroga morago mme ka jalo re itaya ba bangwe tsebe le go ba kgoreletsa. Gore re se ka ra tla morago, baitse ba akantsha gore re ikemisetse go goroga pele ga nako ka tshwanelo go na le gore re fitlhe fela ka nako. A o tlhoka go itlwaetsa seno?

7. Tlhalosa ka moo go reetsa ka kelotlhoko kwa dipokanong go amanang ka gone le maitseo a a siameng.

⁷ Maitseo a a siameng a re tlhoka go tlhokomela batho ba bangwe fa ba bua le rona. (Diane 4:1, 20) Seno se dira gape le mo dipokanong tsa Bokeresete, koo badihedi ba Modimo ba buang e le gore ba ka re naya mpho e e agang ya semoya. Eleruri e tla bo e se go bontsha maitseo a a siameng fa e le gore re ne re ka otsela, ra nnela go sebaseba le bao ba ntseng fa thoko ga rona, ra tlhafuna tšhunkama kana dilekere, re bala dibuka tse dingwe, kana re dira ditiro dingwe fela pokano e ntse e tsweletse. Elihu yo mmotlana o ne a seka a nna fela ka bopelotelele fa Jobe le ditsala tsa gagwe tse tharo di ne di bua ka nako e telele mme o ne gape a “reetsa” seo ba neng ba se bua mme gape a ba “tlhōkōmèla.” (Yobe 32:11, 12) Maitseo a a siameng a Bokeresete a tla re tlhotlheletsa go bontsha sebui le molaetsa wa gagwe o o thailweng mo Bibeleng tlotlo e e tshwanetseng ka go mo reetsa ka tshisibalo le go mo tshegetsa.

8. Re bontsha jang gore re barutwa-mmogo ba ga Jesu Keresete?

⁸ Pele le morago ga dipokano, maitseo a Bokeresete a kopanyeletsa go kgatlhegela ba bangwe ba ba leng gone kwa Holong ya Bogosi. Paulo o ne a tlhokomela gore maloko a a tloditsweng a phuthego ya Bokeresete a ne a ‘sa tlhole e le baeng le bajaki fela, mme e ne e le ba ntlo ya Modimo.’ (Baefesia 2:19) A o tshwara Basupi-ka-wena jaaka baeng le bajaki kana jaaka maloko a ntlo e le nngwe? Go dumedisa ka botsalano, go ba tshwara ka letsogo, monyenyo o o bonolo—gongwe dilo tseno tsotlhe ke tse e seng tsa sepe, mme ke karolo ya bosupi jwa gore re barutwa-mmogo ba ga Keresete. Fa e le gore re dira dilo tseno fa re kopana le baeng, a ga re a tshwanela go di dira “bogolo mo go ba e leñ ba ntlo ea tumèlō”?—Bagalatia 6:10.

9. Bana ba ka rutiwa go bontsha kgatlhego mo bathong ba e seng fela ba dingwaga tsa bone jang?

⁹ A bana ba ka rutiwa go bontsha go kgatlhegela batho ka tsela eno go na le fela bao e leng ba dingwaga tsa bone? Bagolo bangwe ba ka nna ba ikutlwa gore bana ba tshwanetse go ya go tshameka le ditsala tsa bone tse di potlana morago ga go nna oura yotlhe kana tse pedi ba reeditse kwa dipokanong. Mme Holo ya Bogosi ga se lefelo le go tshamekelwang kwa go lone. (Moreri 3:1, 17) Fa morutabana wa mosimanyana wa dingwaga tse nne le sephatlo a ne a mmotsa gore o na le bomorwarraagwe le bokgaitsadie ba le kae, o ne a araba jaana: “Ba bantsi mo ke sa kgoneng go ba bala botlhe.” Moragonyana, fa batsadi ba gagwe ba ne ba mmotsa kaga seno, mosimanyana o ne a tlhalosa jaana: “Ga ke itse gore ke na le barwarre le bokgaitsadiake ba le kae. Fa ke ya kwa Holong ya Bogosi, ba bantsi fela thata.” Mo go ene, botlhe ba ba neng ba nna teng kwa dipokanong e ne e le bomorwarraagwe le bokgaitsadie.

Mo Bodiheding jwa Rona jwa Phatlalatsa

10. Ke taolo efe ya ga Jesu e e ka re thusang ‘go tshela ka mo go tshwanelang mafoko a a molemo’ fa re le mo bodiheding jwa rona?

¹⁰ Go ‘tshela ka mokgwa o o tshwanelang mafoko a a molemo’ ka tlholego fela go kopanyeletsa bodihedi jwa rona jwa phatlalatsa. Re tshwanetse go nna re gakologelwa gore molaetsa o re o tshotseng ke wa kagiso, mme maitseo a rona a tshwanetse go supa seo. (Baefesia 6:15) Jesu o ne a re naya taolo eno: “E re lo tsèna mo tluñ lo e dumedisè. Me ha ntlo euō e le eōna e e chwanetseñ, a kagishō ea lona e tlè mo go eōna.” Re dira gore mong wa ntlo a itse gore re mo kgatlhegela ka mmatota go tswa mo pelong ka go nna ba ba bothito, ba ba botsalano le ba ba nang le tlotlo. Lefa go le jalo, ka dinako dingwe, re kopana le motho yo a ka nnang a bo a se botsalano, gongwe ebile a rata ntwa. A re tla kgoberega re bo re simolola go itshwara ka tsela e e tshwanang? Elatlhoko seo Jesu a ileng a tswelela go se bua: “Me ha [ntlo] e le e e sa chwanèlañ, a kagishō ea lona e boèlè mo go lona.” (Mathaio 10:12, 13) Maitseo a rona kwa mejakong a tshwanetse ka metlha a bo a tshwanela “tihèlō ea tetlanyō.”—2 Bakorintha 5:18.

11. Mokgwa wa rona wa go apara le tebego ya rona di ka ama seabe sa rona jaaka badihedi ba Modimo jang?

¹¹ Maitseo a rona a bua ka rona ka ditsela tse dingwe gape. Ka sekai, a tebego ya rona e tshwanela seabe sa rona jaaka badihedi ba Lefoko la Modimo? Go tweng ka didirisiwa tseo re di dirisang—kgetse ya dibuka, Bibela, le dibuka tsa Bibela? Motlhatlheledi mongwe wa koranta nngwe o ne a naya borrakgwebo kgakololo eno: “Aparelang gore lo ya tirong, eseng modiro, kokoano fela e e seng ya sepe kana go ya kwa metshamekong.” Ka ntlhayang? Ka gonne diaparo tsa gago le tebego ya gago “ke mekwalo e mekhutshwane e e nayang batho ba ba go dikologileng tshedimosetso ya gore o mang le gore o ntse jang le gore o motho wa mofuta ofe.” Jalo fa re le mo “tirong” ya bodihedi, diaparo tsa rona le tebego ya rona ga di a tshwanela go nna tse di seng phepa lefa e le go nna botlhaswa, le gore ga di a tshwanela go nna tse di maphatsiphatsi, le tse di feteletseng, mme ka metlha e nne tse di “chwanetseñ Mahoko a a Molemō.”—Bapisa 1 Timotheo 2:9, 10.

12. Re ka bontsha jang maitseo a a siameng ka go tlotla ditshwanelo le dithoto tsa mong wa ntlo?

¹² Lefa re tshwanetse go nna re “iketleeditse ka metlha eotlhe go hetola moñwe le moñwe eo o [re botsang]” ka mafoko a a molemo, maitseo a a siameng a Bokeresete a tlhoka gore re dire seo ka “boikokobeco le poihō.” (1 Petere 3:15) Seo se kopanyeletsa go tlotla ditshwanelo tsa mong wa ntlo le thoto ya gagwe. A re rulaganya tiro ya rona gore re tle re kgone go ba etela ka dioura tse di tshwanetseng? A re podimatseba go lemoga fa re kgoreletsa sengwe sa botlhokwa kana tiro nngwe? A re dirisa mafoko a a tshwanang le “A nka?” “Tswee-tswee,” le “Ke a go leboga,” thata? A re leka go kopanyeletsa mong wa ntlo mo motlotlong, kana a go bua rona fela e le gore re ka fetsa seo re rulaganyeditseng go se bua?

13. Bontsha ka moo maitseo a a molemo mo bodiheding gantsi a nnang le matswela a a molemo ka gone.

¹³ Maitseo a a siameng, gammogo le go tlhoafalela go amega ka batho ka bopeloephepa, gantsi di bula tsela ya go naya bosupi jo bo molemo. Ke gone ka moo bana ba ba nang le maitseo a a siameng gantsi ba kgonang go goga tlhokomelo ya beng ba matlo koo bagolo ba palelwang ke go dira jalo gone. Mosupi mongwe wa dingwaga tse 13 kwa Mexico o ne a kopana le mosetsanyana mongwe yo mmotlana yo a neng a batla go ithuta. Lefa go ntse jalo, mosetsanyana yoo o ne a bolela gore o tla tshwanelwa ke go dira jalo rraagwe a sa itse. Mme mmoledi yo mmotlana yono o ne a ikutlwa gore fa go ntse jaana, ene ka boene o tshwanetse go bona tetla ya ga rre yoo ka go bo a mo tlotla. Ka jalo o ne a ithaopela go bua le rre yoo mme a mmolelela gore seo ba neng ba tlile go se ithuta se ne se le botlhokwa fela thata. Fa a bona tlhoafalo ya kgaitsadi yono mme gape a lemoga gore o tlile mo go ene ka tlhamalalo, o ne a re: “Fa e le gore seo lo ileng go se ithuta se botlhokwa mo go kalo, he, lelapa lotlhe le tshwanetse go se ithuta.” Go ne ga felela ka gore mmotlana yono wa dingwaga tse 13 a simolole thuto ya Bibela le lelapa lotlhe, go kopanyeletsa le morwaabone yo o nyetseng le mosadi wa gagwe le bana ba bangwe ba ba godileng.

Maitseo a a Siameng a Simolola kwa Gae

14. Maitseo a a siameng a simolola kae, mme ke ntlha efe e e nang le seabe se segolo?

¹⁴ Maitseo a a siameng a Basupi ba babotlana gantsi ke bosupi jo bo molemo jwa katiso eo ba e bonang kwa gae. Eleruri, maitseo a rona a supa tsela ya rona ya botshelo. Ka lebaka leno, go farologana le seo ba bangwe ba ka se akanyang, maitseo a a siameng a tshwanetse go nna selo sa botlhokwa thata kwa gae. Mo go seno, fela jaaka mo dikarolong tse dingwe tsa botshelo jwa lelapa, sekao sa batsadi ke sa botlhokwa thata. (2 Timotheo 1:5) Go raya bana o re, “Dirang jaaka ke bua, eseng jaaka ke dira” eleruri ga se tsela ya go ba ruta maitseo. Dikarolo tse dintsi tsa maitseo a a siameng di ithutiwa eseng fela ka go laelwa ka molomo, mme ka go di bona le ka go di etsa. “Batsadi ga se barutisi ba konokono fela, mme gape ke dikao, ka go bo bana ba ithuta ka go dira jaaka rona,” go tlhokomela jalo Beverley Feldman, mokwadi wa Kids Who Succeed. Ke mofuta ofe wa maitseo oo bana ba gago ba o bonang mo go wena?

15. Batsadi ba ka thusa bana ba bone go tlhagolela mekgwa e mentle e e tshwarelelang botshelo jotlhe ya maitseo jang?

¹⁵ “Borra bana, lo se ka loa rumola bana ba lona go ba gakatsa” ke kgakololo ya Bibela. (Baefesia 6:4) Go a lapisa ebile go a swabisa gore bana ba bolelelwe gore ba nne pelonomi le kutlo lefa go le jalo ba bona batsadi ba bone ba ngangisana, ba seba, ba tlhoka maitseo, kana ba galefa ka bonako. A ba tla bo ba le molato fa le bone ba ka itshwara ka mokgwa o o tshwanang? Mo letlhakoreng je lengwe, lokwalo lo tswelela go bua jaana: “Me lo ba godisetsè mo koatlhaoñ le mo taoñ ea Morèna [Jehofa, NW].” Mme seo se akareletsa metheo ya maitseo a a siameng, jaaka go re, “Dumela,” “Tswee-tswee,” “Ke a go leboga,” le “Intshwarele,” ba bontsha go tlotla batho ba bagolo, le go kgaoganya dilo le ba bangwe. (Lefitiko 19:32; Baroma 16:3-7) Fa dinonofo tseno di ithutilwe kwa gae mo bonyaneng di tla nna tsa botlhokwa mo botshelong jotlhe.—Diane 22:6.

16. Ke maiteko afe a a tlhokegang, mme go ka felela jang?

¹⁶ Jalo batsadi le bana ka go tshwana ba tshwanetse go ithuta maitseo a a siameng jaaka karolo ya botshelo jwa bone jwa letsatsi le letsatsi go na le gore ba emele motlha mongwe o o kgethegileng. Ka go dira jalo, batsadi ba tshwanetse go nna pelotelele le go itshokela diphoso tseo bana ba bone ba tla di dirang. Ba itsiseng gore maitseo a bone a a molemo a rayang mo go lona, mme lo ba akgolele botswelelopele bope fela jo ba bo dirang. Legale, seo se batla boiteko jo bogolo mo go wena. Mme a Dikwalo ga di a bolela gore go tlhagolela melao-metheo ya bomodimo mo baneng go tshwanetse go dirwa “ha u dutsè mo tluñ ea gago, le ha u tsamaea mo tseleñ, le ha u rapame, le ha u rapamologa”? (Duteronome 6:7) Go dira jalo go bopa tikologo ya botsalano le e e molemo mo lelapeng, eo e tla dirang mo gogolo mo go godiseng bana ba gago jaaka ba golela go nna bagolo ba ba thusang ba ba akanyetsang, le ba ba nang le maitseo. He ba tla fetoga motswedi wa pako le tlotlo mo go wena le Mmopi wa bone, Jehofa Modimo.

Batho ba ba Nang le Maitseo a a Siameng

17. Ke eng seo se ileng sa lemogiwa kwa Diholong tsa Bogosi tsa Basupi ba ga Jehofa?

¹⁷ “Basupi ba ba fetang 1 000” ba ba neng ba kgobokane kafa ntle ga City Hall kwa New York City mo thapameng eo ya September ba ne ba bontsha fela selekanyo se sennye sa ka moo Basupi ba ga Jehofa ba itshwarang ka gone ka metlha. Kwa lefelong lengwe gape, monna mongwe yo e neng e le lantlha a tla kwa Holong ya Bogosi o ne a bua jaana morago ga mo: “Ke ne ka kopana le batho ba ba nang le lorato ka mmatota mo letsatsing le le lengwe fela, ba ke neng ke sa ba itse gotlhelele, bao ke neng ke ise ke ko ke kopane le bone mo kerekeng e ke goletseng mo go yone.” Ga felela ka eng? “Go ne ga bonala sentle fela gore ke ne ke bone boammaaruri,” o ne a bua jalo. Monna yono o ne a fetola tsela ya gagwe ya botshelo, mme o ne a neela botshelo jwa gagwe go Jehofa a bo a kolobediwa mo dikgweding tse supa morago ga foo.—Bapisa 1 Bakorintha 14:25.

18. Ditekanyetso tsa maitseo a a siameng tsa Basupi ba ga Jehofa di ile tsa ama ba ba kwantle jang?

¹⁸ Ditekanyetso tsa Basupi tsa maitseo le go apara ga bone kwa dikopanong tsa bone tsa bomorafe le tsa boditšhabatšhaba di ile tsa akgolwa fela thata. Kwa go e nngwe ya ditiragalo tseo moragonyana jaana kwa Japane, mongwe yo o tsamaisang bajanala ba ba tsamayang ka bese o ne a tlhokomela jaana “Fa lo ne lo fologa mo beseng, mongwe le mongwe wa lona, go kopanyeletsa le ba babotlana, ga a ka a palelwa ke go nthaya a re, ‘Ke go leboga fela thata.’ Seo se ne sa intumedisa tota!” Kwa kopanong e nngwe, monna mongwe yo o dirang kwa boemelong jo bo gaufi jwa diterena o ne a raya Mosupi mongwe a re: “Fa batho ba ba 12 000 ba ne ba kgobokane mo kokoanong e e fetileng kwa Osaka Castle Hall go ne ga nna le tlhakatlhakano e ntsi thata.” Mme o ne a tswelela ka go re: “Lona lo na le thulaganyo tota, mme lo re imolotse. Ke kopa gore lo ise ditebogo tsa me go ope fela yo o ikarabelelang.”

19. Ke eng seo mongwe le mongwe wa rona a tshwanetseng go ikemisetsa go se dira malebana le maitseo?

¹⁹ Dikakgolo tse di ntseng jalo di bontsha eng? Gore Basupi ba ga Jehofa ka kakaretso ‘ba tshela ka tsela e e tshwanelang mafoko a a molemo.’ Mme go tweng ka rona, motho ka mongwe? Jaaka bana ba ba lebileng kwa go Rraabo yo o lorato, a rotlhe, bannye le bagolo, re lebe kwa go Rraarona, Jehofa, gore a re rute go nna batho ba ba nang le maitseo a a siameng, le eleng mo lefatsheng le le senang maitseo.—Duteronome 8:5; Diane 3:11, 12.

A O A Gakologelwa?

◻ Ke ka ntlhayang fa maitseo a a siameng a tlhokega jaaka karolo ya boitshwaro jo bo molemo?

◻ Ke maitseo afe a a molemo a a tshwanelang kwa lefelong la rona la kobamelo?

◻ Maitseo a a molemo a ka bontshiwa jang mo bodiheding jwa tshimo?

◻ Batsadi ba ka thusa bana ba bone go tlhagolela maitseo a a siameng jang?

◻ Ke selekanyo sefe se se kwa godimo sa maitseo seo re tshwanetseng go leka go se tshegetsa?