Kgaolo 1

O Ka Bona Isagwe E E Itumedisang!

1, 2. Ke eng se Mmopi wa gago a batlang o nna le sone?

MOTHO mongwe yo o mo ratang o go tlamparela ka lorato. O tshega monate le ditsala tse o di ratang fa lo ntse lo ja dijo tse di monate. O itumelela go leba bana ba gago fa ba ntse ba tshameka ka boitumelo. Dipaka tse di tshwanang le tseno di itumedisa tota mo botshelong. Lefa go ntse jalo, go bonala fa batho ba bangwe ba nna le mathata a a masisi a a sa feleng mo botshelong. Fa e le gore o diragaletswe ke seno, se kgobege marapo.

² Modimo o batla gore o itumele ka bosakhutleng o le mo maemong a a molemo fela thata mo tikologong e ntle. Seno ga se toro fela ka go bo tota Modimo o go naya selotlele sa go bona isagwe e e ntseng jalo. Selotlele seo ke kitso.

3. Ke kitso efe e e ka dirang gore o bone boitumelo, mme ke ka ntlha yang fa re ka tlhomamisa gore Modimo a ka kgona go re naya kitso eo?

³ Re bua ka kitso ya mofuta mongwe o o kgethegileng e e fetang botlhale jwa motho kgakala. Ke “kitso ya Modimo.” (Diane 2:5) Mokwadi mongwe wa Baebele o ne a bolela jaana mo e ka nnang dingwaga tse 2 000 tse di fetileng: “Ntlo nngwe le nngwe e tle e agiwe ke motho mongwe; mme yo o agileng dilo tsotlhe ke Modimo.” (Bahebere 3:4) Akanya fela ka kitso e Modiri wa dilo tsotlhe a tshwanetseng a bo a na nayo! Baebele e bolela gore Modimo o itse palo le maina otlhe a dinaledi. A bo e le selo se se jesang kgakge jang ne, e re ka go na le makgolokgolo a dimilione tse di diketekete tsa dinaledi mo losagaripeng lwa rona, e bile baithutadinaledi ba bolela gore go na le masagaripa a mangwe a a ka nnang dimilione di le dikete di le lekgolo! (Pesalema 147:4) Gape, Modimo o itse sengwe le sengwe ka rona, ka jalo ke mang tota yo a neng a ka araba dipotso tse di botlhokwa kaga botshelo go mo gaisa?—Mathaio 10:30.

4. Ke eng fa re tshwanetse go lebelela gore Modimo o tla re naya ditaolo tse di re kaelang, mme ke buka efe e e ka re nayang seo?

⁴ Akanya ka banna bangwe ba le babedi ba ba lekang go baakanya dikoloi tsa bone. Monna yo mongwe ka ntlha ya go tlalelwa, o latlhela dithulusu tsa gagwe fa fatshe. Yo mongwe o baakanya phoso a iketlile, a bo a kgotla koloi ka selotlele, mme a bo a nyenya jaaka enjene ya gagwe e duma e bo e tsamaya sentle. Tota ga o kake wa nna le bothata jwa go fopholetsa gore mo banneng ba babedi bano ke ofe yo o tshotseng bukana ya ditaelo e e ntshitsweng ke modiri wa koloi eno. A ga go utlwale gore Modimo o ne a tla re naya ditaelo tse di tla re gogang mo botshelong? Jaaka fa o ka tswa o itse, Baebele e ipolela gore e ntse fela jalo—ke buka e e nang le ditaelo le e e re kaelang e e tswang kwa Mmoping wa rona, e e diretsweng go re naya kitso ya Modimo.—2 Timotheo 3:16.

5. Kitso e e mo Baebeleng e botlhokwa go le kana kang?

⁵ Fa e le gore se Baebele e se bolelang seno se boammaaruri, akanya ka letlotlo la kitso le le tshwanetseng la bo le le mo bukeng eno! Mo go Diane 2:1-5 e re kgothatsa gore re senke botlhale, re bo epe jaaka khumo e e fitlhegileng—e seng mo mmung o e leng megopolo ya batho, mme mo Lefokong la Modimo. Fa re ka bo senka koo, re tla bona “kitso ya Modimo.” E re ka a tlhaloganya makoa a rona le dilo tse re tlhaelang mo go tsone, Modimo o re naya ditaelo tse di tla re thusang go tshela ka kagiso re itumetse. (Pesalema 103:14; Isaia 48:17) Mo godimo ga moo, kitso ya Modimo e re naya mafoko a a molemo a a itumedisang.

BOTSHELO JO BO SA KHUTLENG!

6. Ke eng se Jesu Keresete a neng a se tlhomamisa kaga kitso ya Modimo?

⁶ Jesu Keresete, yo o itsegeng thata mo hisitoring o ne a tlhalosa kgang eno ya go itse Modimo ka phepafalo. O ne a re: “Botshelo jo bo sa khutleng ke jo, gore ba go itse, wena, Modimo o o osi, o o boammaaruri, le ene yo o mo romileng, e bong Jesu Keresete.” (Johane 17:3, mokwalo o o sekameng ke wa rona.) Akanya fela ka gone—kitso e e isang botshelong jo bo sa khutleng!

7. Ke bosupi bofe jo bo leng teng jwa gore e ne e se boikaelelo jwa Modimo gore re swe?

⁷ O se ka wa itlhaganelela go latola fela o re botshelo jo bo sa khutleng ke toro. Go na le moo, leba tsela e mmele wa motho o dirilweng ka yone. O dirilwe ka tsela e e matsetseleko thata mo a kgonang go latswa, go utlwa, go dupa, go bona, le go ama. Go na le dilo tse dintsi mo lefatsheng tse di re itumedisang—dijo tse di monate, molodi o o monate wa dinonyane, dithunya tse di nkgang monate, mafelo a mantle, le botsalano jo bo itumedisang! Le jone boboko jwa rona jo bo gakgamatsang bo gaisa le khomputara e e di fetang tsotlhe, ka go bo bo dira gore re kgone go anaanela le go itumelela dilo tseno tsotlhe. A o akanya gore Mmopi wa rona o batla gore re swe mme re latlhegelwe ke dilo tseno tsotlhe? A go ne go ka se ka ga utlwala gore re akanye gore o ne a batla gore re tshele re itumetse e bile re itumelela botshelo ka bosakhutleng? Ebu, o ka bona dilo tseno fa o ka itse ka Modimo.

BOTSHELO MO PARADAISENG

8. Baebele e bolela eng kaga isagwe ya batho?

⁸ Se Baebele e se bolelang ka isagwe ya lefatshe le batho se ka nna sa sobokanngwa ka lefoko leno le le lengwe—Paradaise! Jesu Keresete o ne a bua ka yone fa a ne a bolelela monna mongwe yo o neng a swa jaana: “O tlaa nna le nna kwa Parataise gompieno.” (Luke 23:43) Ga go belaetse gore monna yoo o ne a akantse ka boitumelo jo batsadi ba rona ba ntlha, Adame le Efa ba neng ba na le jone, fa a ne a utlwa go umakiwa Paradaise. Fa Modimo o ne o ba bopa, ba ne ba itekanetse e bile ba tshela mo parakeng ya mofuta wa tshingwana e Mmopi a neng a e tlhamile e bile a e jetse dijalo. E ne e bidiwa sentle go twe ke tshimo ya Edene, ka go bo leina leo le kaya boitumelo.

9. Botshelo bo ne bo ntse jang mo Paradaiseng ya ntlhantlha?

⁹ A bo tshimo eo e ne e le ntle jang ne! E ne e le paradaise tota. Mo ditlhareng tsa yone tse dintle go ne go na le tse di neng di ungwa maungo a a monate thata. Fa Adame le Efa ba ntse ba sekaseka lefelo leno la bone, ba nwa metsi a lone a a itshekileng le go fula maungo mo ditlhareng tsa lone, go ne go se na sepe se se neng se ka ba dira gore ba tshwenyege kana ba boife. Le tsone diphologolo di ne di se kotsi, ka go bo Modimo o ne a tlhomile monna yono le mosadi wa gagwe jaaka tlhogo e e lorato ya tsone tsotlhe. Mo godimo ga moo, batho ba babedi bano ba ntlha ba ne ba itekanetse sentle mo mmeleng. Ba ne ba tlile go bona isagwe e e sa khutleng, e e itumedisang thata fela fa ba ne ba ka nna ba utlwa Modimo. Ba ne ba filwe tiro e e itumedisang thata ya go tlhokomela legae la bone le lentle la Paradaise. Mo godimo ga moo, Modimo o ne o file Adame le Efa taolo ya gore ba ‘tlale ka lefatshe ba le fenye.’ Bone le ditlogolwana tsa bone ba ne ba tshwanetse go atolosa Paradaise go fitlha polanete eno yotlhe ya rona e nna lefelo le lentle le le kgatlhang.—Genesise 1:28.

10. Jesu o ne a akantse ka eng fa a ne a bua ka Paradaise?

¹⁰ Lefa go ntse jalo, fa Jesu a ne a umaka Paradaise, o ne a sa reye gore monna yo o neng a swa yoo a akanye ka dilo tsa bogologolo. Nnyaa, Jesu o ne a bua ka isagwe! O ne a itse gore legae lotlhe la rona la selefatshe le ne le tla nna paradaise. Ke yone tsela e Modimo o neng o tla diragatsa boikaelelo jwa gagwe jwa kwa tshimologong ka motho le ka lefatshe la rona ka yone. (Isaia 55:10, 11) Ee, Paradaise e tlile go tsosolosiwa! Mme e tlile go nna jang? Mma Lefoko la Modimo, Baebele e e Boitshepo le arabe.

BOTSHELO MO PARADAISENG E E TSOSOLOSITSWENG

11. Go tlile go diragala eng ka bolwetse, botsofe le loso mo Paradaiseng e e tsosolositsweng?

¹¹ Bolwetse, botsofe le loso ga di kitla di tlhola di nna teng. “E dira gone matlho a difofu a tlaa foufololwang, le ditsebe tsa bosusu di tlaa thibololwang. E dira gone setlhotsa se tlaa tlolang jaaka kwalata, le loleme lwa semumu lo tlaa opela.” (Isaia 35:5, 6) “O tlaa nna Modimo wa bone [batho]. O tlaa phimola dikeledi tsotlhe mo matlhong a bone; ga go ketla go tlhola go le loso; le gone ga go ketla go tlhola go le bohutsana, le fa e le selelo, le fa e le botlhoko; dilo tsa pele di fetetse ruri.”—Tshenolo 21:3, 4.

12. Ke eng fa re ka tlhomamisa gore ga go kitla go nna le bokebekwa, thubakanyo le boikepo mo Paradaiseng e e tlang mo isagweng?

¹² Bokebekwa, thubakanyo le boikepo di tla bo di etse ruri. “Badirabosula ba tlaa kgaolwa; . . . Gonne e tlaa re kwa pelenyana, moikepi a bo a sa tlhole a le gone. . . . o tlaa ba a seyo. Bapelonomi ba tlaa rua lefatshe.” (Pesalema 37:9-11) “Baikepi ba tlaa kgaolwa ba tlosiwa mo lefatsheng, le ba ba dirang ka bonongwana ba tlaa khumolwa mo go lone.”—Diane 2:22.

13. Modimo o tlile go lere kagiso jang?

¹³ Kagiso e tla tlala mo lefatsheng lotlhe. “[Modimo] o khutlisa ditlhabano le kwa bokhutlong jwa lefatshe; o roba bora, o putlaganya lerumo ka bogare.” (Pesalema 46:9) “Basiami ba tlaa thama; go tlaa nna letlotlo la kagiso, go tle go tsamaye kgwedi e tlhokafalele ruri.”—Pesalema 72:7.

14, 15. Baebele e bolela eng kaga matlo, tiro le dijo mo Paradaiseng e e tsosolositsweng?

¹⁴ Matlo a tla nna teng le tiro e tla itumedisa. “Ba tlaa aga matlo, ba nna mo go one . . . Ga ba ketla ba aga, mme go nne o sele; ga ba ketla ba tlhoma, mme go je o sele; gonne jaaka malatsi a setlhare a ntse, malatsi a batho ba me a tlaa nna jalo, mme baitshenkedwi ba me ba tlaa ja tiro ya diatla tsa bone ka monate, ka lobaka lo loleele. Ga ba ketla ba kgokgolela lefela, le fa e le go tsholela thekisego bana.”—Isaia 65:21-23.

¹⁵ Go tla nna le dijo tse di nonotshang e bile di le dintsi. “Go tlaa nna letlotlo la mabele mo lefatsheng, mo ditlhoeng tsa dithaba; loungo lwa one lo tlaa ebelega.” (Pesalema 72:16) “Lefatshe le ntshitse totafalo ya lone; Modimo, e bong Modimo wa rona tota, o tlaa re segofatsa.”—Pesalema 67:6.

16. Ke eng fa botshelo mo Paradaiseng bo tlile go nna monate?

¹⁶ Botshelo jo bo sa khutleng mo lefatsheng la paradaise bo tla bo bo le monate thata. “Basiami ba tlaa rua lefatshe, ba tlaa aga mo go lone ka bosakhutleng.” (Pesalema 37:29) “E e leng naga fela e tlaa ipela le lefatshe la lokgere; le sekaka se tlaa itumela se nyakalala jaaka sešeše.”—Isaia 35:1.

KITSO LE ISAGWE YA GAGO

17. (a) Ke eng se o tshwanetseng go se dira fa e le gore o kgatlhegela go tshela mo Paradaiseng? (b) Re itse jang gore Modimo o tlile go fetola dilo fela thata mo lefatsheng?

¹⁷ Fa e le gore o kgatlhegela go tshela mo Paradaiseng, se letle sepe go go thibela go bona kitso ka Modimo. O rata batho e bile o tla fetola dilo kafa go tlhokegang ka teng gore lefatshe le nne paradaise. Gone mme ruri, fa o ne o na le maatla a go khutlisa botlhoko le go sa dirweng ga dilo ka tshiamo mo lefatsheng leno, a o ne o ka se ka wa dira jalo? A re ka lebelela gore Modimo o ne o ka se ka wa dira jalo? Totatota, Baebele e bolela sentle ka papamalo kaga nako eo Modimo o tla tlosang tsamaiso eno e e tletseng bohutsana ka yone mme a e emisetsa ka puso e e itekanetseng, e e siameng. (Daniele 2:44) Mme lefa go ntse jalo, Baebele ga e re bolelele fela ka dilo tseno. E re bontsha kafa re ka falolelang ka teng mo lefatsheng le lesha le Modimo o le solofeditseng.—2 Petere 3:13; 1 Johane 2:17.

18. Kitso ya Modimo e ka go thusa jang gone jaanong?

¹⁸ Go itse ka Modimo le gone go ka re thusa thata le gone jaanong. Baebele e araba dipotso tse di boteng le tse di tshwenyang thata kaga botshelo. Fa re e letla gore e re kaele re tla nna le botsalano le Modimo. A bo seo e le tshiamelo e kgolo jang ne! E bile seno se tla dira gore re kgone go nna le kagiso e re ka e newang fela ke Modimo. (Baroma 15:13, 33) Fa o simolola go nna le kitso e e botlhokwa eno, o simolola go dira tiro e e botlhokwa thata le e e go solegelang molemo thata mo botshelong jwa gago. Ga o kitla o bo o ikwatlhaela go bo o bone kitso ya Modimo e e isang botshelong jo bo sa khutleng.

19. Ke potso efe e re tlileng go e sekaseka mo setlhogong se se latelang?

¹⁹ Re boletse gore Baebele ke buka e e re nayang kitso ka Modimo. Lefa go ntse jalo, re itse jang gore ga se buka fela e e nang le botlhale jwa motho, mme ke sengwe se segolo go feta seo? Re tlile go araba potso eno mo kgaolong e e latelang.

TLHATLHOBA KITSO YA GAGO

Kitso ya Modimo e ka dira gore o bone boitumelo jwa goyagoile jang?

Botshelo bo tlile go nna jang mo lefatsheng le le tlang la Paradaise?

Ke ka ntlha yang fa o tlile go solegelwa molemo ke kitso ya Modimo jaanong?