Go Diragatsa Boineelo Jwa Rona “Ka Malatsi Otlhe”
“Fa motho mongwe a rata go ntshala morago a a iitatole, a tseye mokgoro wa gagwe ka malatsi otlhe, mme a ntshale morago.”—LUKE 9:23.
1.Tsela nngwe e re ka atlholang ka yone gore re atlega go le kana kang jaaka Bakeresete ke efe?
“ARURI re ne re le banna ba ba ineetseng?” Go ya ka Poresidente wa bo35 wa United States e bong John F. Kennedy, karabo ya potso eno e botlhokwa fa o tlhatlhoba gore batho ba ba nang le maemo mo pusong ba atlegile go le kana kang. Potso eno e ne e ka nna le bokao jo bogolwanyane fa e dirisiwa go tlhatlhoba gore rona re atlegile go le kana kang jaaka badiredi ba Bakeresete.
2.Bukantswe nngwe e tlhalosa lefoko “boineelo” jang?
2 Mme gone, boineelo ke eng? Webster’s Ninth New Collegiate Dictionary e bo tlhalosa e le “kgato kana tirelo ya go ineela mo Modimong mongwe kana go ineela go dirisediwa tiro e e boitshepo,” “go neela kana go seegelwa kwa thoko go dirisediwa tiro nngwe e e rileng,” “boineelo jwa go intsha setlhabelo.” Go bonala John F. Kennedy a ne a dirisa lefoko leno go kaya “boineelo jwa go intsha setlhabelo.” Mo Mokereseteng, boineelo bo kaya se sentsi go feta seo.
3.Boineelo jwa Bokeresete ke eng?
3 Jesu Keresete o ne a raya barutwa ba gagwe a re: “Fa motho le fa e le mang a rata go ntshala morago, a a iitatole, mme a a tseye mokgoro wa gagwe a itse go ntshala morago.” (Mathaio 16:24) Go beelwa kwa thoko go dira tiro ya bomodimo ga go tlhoke fela gore motho a dire sengwe sa kobamelo ka Sontaga kana fa a etetse lefelo lengwe la kobamelo. Go ama tsela yotlhe ya motho ya go tshela. Go nna Mokeresete go kaya go iitatola kana go ikgana o ntse o direla Modimo o Jesu Keresete a neng a o direla, Jehofa. Mo godimo ga moo, Mokeresete o ‘tsaya mokgoro’ wa gagwe ka go itshokela go boga gope mo go ka diregang ka ntlha ya go nna molatedi wa ga Keresete.
Sekao se se Molemolemo
4.Kolobetso ya ga Jesu e ne e emela eng?
4 Fa Jesu a ne a le mo lefatsheng o ne a bontsha gore go ineela mo go Jehofa go tlhoka eng. O ne a ikutlwa ka tsela eno: “O ganne setlhabelo le tshupelo, mme wa mpaakanyetsa mmele.” Go tswa foo a oketsa jaana: “‘Bona, ke tsile go dira go rata ga gago, Modimo,’ jaaka go kwadilwe ka ga me mo kabong ya lokwalo.” (Bahebere 10:5-7) E re ka e ne e le leloko la morafe o o ineetseng, o ne a neelwa go Jehofa fa a tsholwa. Lefa go ntse jalo, fa a ne a simolola bodiredi jwa gagwe jwa mo lefatsheng, o ne a ikisa gore a kolobediwe go tshwantshetsa gore o itlisa kwa go Jehofa go dira thato ya gagwe, mme seo mo go ene se ne se tla akaretsa gore a ntshe botshelo jwa gagwe go nna setlhabelo sa thekololo. Ka jalo o ne a tlhomela Bakeresete sekao gore ba dire sengwe le sengwe se Jehofa a se batlang.
5.Jesu o ne a leba dilo tse di bonalang jang ka tsela e e tlhomang sekao?
5 Fa Jesu a sena go kolobediwa o ne a tshela botshelo jo kgabagare bo neng jwa felela ka gore a swe loso lwa setlhabelo. O ne a sena sepe le go ikgobokanyetsa madi kana go tshela botshelo jwa manobonobo. Go na le moo, bodiredi jwa gagwe e ne e le sone selo sa botlhokwa mo botshelong jwa gagwe. O ne a gakolola barutwa ba gagwe gore ba ‘batle bogosi pele le tshiamo ya gagwe,’ mme ene ka boene o ne a diragatsa mafoko ano. (Mathaio 6:33) E bile kana, nako nngwe o ne a ba a re: “Diphokoje di na le mesima, dinonyane tsa loapi di na le ditlhaga; mme Morwa Motho ene ga a na fa o ka bayang tlhogo ya gagwe teng.” (Mathaio 8:20) O ne a ka nna a rulaganya dithuto tsa gagwe ka tsela ya gore a tle a bapale madi mo balateding ba gagwe. E re ka e ne e le mmetli o ne a ka nna a ipha nako ya go betla sedirisiwa sengwe se sentle sa logong a bo a se rekisa gore a tle a nne le dikgapetla tsa selefera tse di oketsegileng. Mme lefa go ntse jalo ga a ka a dirisa bokgoni jwa gagwe go batla khumo ya dilo tse di bonalang. Jaaka batlhanka ba ba ineetseng ba Modimo, a re etsa Jesu ka go leba dilo tse di bonalang ka tsela e e tshwanetseng?—Mathaio 6:24-34.
6.Re ka etsa Jesu jang ka go nna batlhanka ba ba ineetseng ba Modimo, ba ba intshang setlhabelo?
6 Fa Jesu a ne a baya tirelo ya gagwe go Modimo kwa pele, o ne a sa batle dilo tse di tla solegelang ene molemo. Botshelo jwa gagwe mo dingwageng tse tharo le sephatlo tsa bodiredi jwa gagwe jwa phatlalatsa e ne e le jwa go intsha setlhabelo. Ka lekgetlho lengwe morago ga go dira ka thata letsatsi lotlhe, a sa bona le nako ya go ja tota, Jesu o ne a iketleeditse go ruta batho ba ba neng ba “patikegile ba gasagasame jaaka dinku tse di se nang modisa.” (Mathaio 9:36; Mareko 6:31-34) Lefa a ne a “tsenywe ke letsapa la loeto,” o ne a simolola motlotlo le mosadi wa Mosamaria yo o neng a tlile fa motsweding wa ga Jakobe kwa Sikare. (Johane 4:6, 7, 13-15) Ka dinako tsotlhe o ne a akanyetsa ba bangwe gore ba tshele sentle pele a ikakanyetsa ene. (Johane 11:5-15) Re ka etsa Jesu ka go tlogela ka bopelotshweu dilo tse re di batlang re bo re direla Modimo le ba bangwe. (Johane 6:38) Fa re akanyetsa gore re ka dira jang gore eleruri re itumedise Modimo go na le go dira fela bonyenyane jo go tlhokwang gore re bo dire, re tla bo re diragatsa boineelo jwa rona.
7.Re ka etsa Jesu jang ka go nna re isa tlotlo kwa go Jehofa ka dinako tsotlhe?
7 Fa Jesu a ne a thusa batho, o ne a sa leke ka gope go dira gore a bonwe ke batho. O ne a ineetse go Modimo gore a dire thato ya Gagwe. Ka jalo o ne a tlhomamisa ka dinako tsotlhe gore Jehofa, Rraagwe, o amogela kgalalelo yotlhe ka ntlha ya sengwe le sengwe fela se se neng se weditswe. Fa mmusi mongwe a ne a mmitsa “Moruti yo o Molemo,” a dirisa lefoko “molemo” jaaka sereto, Jesu o ne a mmaakanya a re: “Ga go ope yo o molemo, fa e se yo mongwe fela, e bong Modimo.” (Luke 18:18, 19; Johane 5:19, 30) A le rona fela jaaka Jesu, re itlhaganelela go tlosa tlotla mo go rona re e lebisa kwa go Jehofa?
8.(a) Jesu o ne a ikgaoganya le lefatshe jang jaaka motho yo o ineetseng? (b) Re tshwanetse go mo etsa jang?
8 Mo botshelong jwa ga Jesu jotlhe jwa mo lefatsheng a ineetse, o ne a bontsha gore o ne a ipeetse kwa thoko gore a dire tirelo e e boitshepo. O ne a ipoloka a le phepa gore a kgone go intsha jaaka “kwanyana e e se nang bogole, le fa e le selabe” gore a nne setlhabelo sa thekololo. (1 Petere 1:19; Bahebere 7:26) O ne a diragatsa melawana yotlhe ya Molao wa ga Moshe, ka go rialo a diragatsa Molao oo. (Mathaio 5:17; 2 Bakorinthe 1:20) O ne a tshegetsa se a neng a se ruta kaga boitsholo. (Mathaio 5:27, 28) Motho o ne a ka se ka a mo tshwaya phoso ka tshwanelo a re o na le maitlhomo a a bosula. Eleruri, o ne a “ila boikepo.” (Bahebere 1:9) Jaaka batlhanka ba Modimo, a re etseng Jesu ka go boloka matshelo a rona le maitlhomo a rona tota a le phepa mo matlhong a ga Jehofa.
Dikai tsa Tlhagiso
9.Paulo o ne a umaka sekai sefe sa tlhagiso, mme ke ka ntlha yang fa re tshwanetse go tlhatlhoba sekai seno?
9 Re na le sekai se se tlhagisang sa Baiseraele, seo se farologaneng le sekai sa ga Jesu. Tota lefa ba sena go bolela gore ba ne ba tla dira sotlhe se Jehofa a neng a se ba boleletse, ba ne ba se ka ba dira thato ya gagwe. (Daniele 9:11) Moaposetoloi Paulo o ne a kgothaletsa Bakeresete gore ba ithute sengwe mo go se se diragaletseng Baiseraele. A re tlhatlhobeng dingwe tsa ditiragalo tse Paulo a neng a bua ka tsone mo lokwalong lwa gagwe lwa ntlha go Bakorinthe mme re bone gore ke dirai dife tse batlhanka ba Modimo ba ba ineetseng mo motlheng wa rona ba tshwanetseng go di tila.—1 Bakorinthe 10:1-6, 11.
10. (a) Baiseraele ba ne ba ‘eletsa dilo tse di bosula’ jang? (b) Ke ka ntlha yang fa Baiseraele ba ne ba bonwa molato thata fa ba ngongorega la bobedi ka dijo, mme re ka ithuta eng mo sekaing seno sa tlhagiso?
10 Selo sa ntlha, Paulo o ne a re tlhagisa gore re se ka ra “eletsa dilo tse di bosula.” (1 Bakorinthe 10:6) Seo se ka re gopotsa nako e Baiseraele ba neng ba ngongorega ka yone gore ba ja mana fela. Jehofa o ne a ba romelela makutikweo. Go ne go diragetse sengwe se se tshwanang mo e ka nnang ngwaga pelenyana ga foo mo nageng ya Sine, pele fela ga Baiseraele ba bolela gore ba ineetse mo go Jehofa. (Ekesodo 16:1-3, 12, 13) Mme boemo bo ne bo sa tshwane totatota. Fa Jehofa a ne a fa Baiseraele makutikweo la ntlha, ga a ka a ba tshwaya phoso ka ntlha ya go ngongorega. Lefa go ntse jalo, jaanong boemo bo ne bo farologane. “E rile nama e sa ntse e le gare ga meno a bone, e ise e tlhafunwe, bogale jwa ga Jehofa jwa bo bo tuketse morafe, mme Jehofa a betsa batho ka sebetso se se bogale thata.” (Dipalo 11:4-6, 31-34) Go ne go fetogile eng? E re ka jaanong e ne e le setšhaba se se ineetseng, ba ne ba ikarabelela se ba se dirang. Go sa anaanele ga bone dilo tse Jehofa a neng a ba di neile go ne ga dira gore ba ngongorege ka Jehofa, lefa ba ne ba solofeditse gore ba ne ba tla dira gotlhe mo Jehofa a neng a go buile! Go ngongorega ka tafole ya ga Jehofa gompieno go ntse fela jalo. Batho bangwe ba palelwa ke go anaanela dilo tsa semoya tse Jehofa a di re baakanyeditseng ka “motlhanka yo o boikanngo le yo o botlhale.” (Mathaio 24:45-47) Lefa go ntse jalo, gakologelwa gore ka ntlha ya boineelo jwa rona re tlhoka go nna re gakologetswe ka go leboga se Jehofa a se re diretseng re bo re amogele dijo tsa semoya tse Jehofa a di re neelang.
11. (a) Baiseraele ba ne ba senya kobamelo ya bone go Jehofa jang ka go obamela medimo ya disetwa? (b) Re ne re ka amiwa jang ke mofuta mongwe wa kobamelo ya medimo ya disetwa?
11 Go tswa foo, Paulo o ne a tlhagisa jaana: “Le gone lo se ka lwa nna baobamedi ba medimo ya disetwa, jaaka bangwe ba bone.” (1 Bakorinthe 10:7) Fano go bonala sentle gore moaposetoloi o ne a bua ka kobamelo ya namane e e neng ya diragala morago fela ga gore Baiseraele ba dire kgolagano le Jehofa kwa Thabeng ya Sinai. O ka nna wa re, ‘Jaaka motlhanka yo o ineetseng wa ga Jehofa, le ka motlha ga nkitla ke obamela medimo ya disetwa.’ Lefa go ntse jalo, ela tlhoko gore go ya kafa Baiseraele ba neng ba leba dilo ka gone, ba ne ba sa kgaotse go obamela Jehofa; lefa go ntse jalo, ba ne ba simolola mokgwa wa go obamela namane—sengwe se se makgapha mo Modimong. Mofuta ono wa kobamelo o ne o akaretsa eng? Batho ba ne ba dira ditlhabelo fa pele ga namane, go tswa foo ba ne ba “dulela go ja le go nwa, ba itse go nanoga ba tshameka.” (Ekesodo 32:4-6) Gompieno batho bangwe ba ka nna ba iphaka gore ba obamela Jehofa. Mme lefa go ntse jalo mo matshelong a bone ba ka nna ba bo ba tsaya go itumelela dilo tsa lefatshe leno e le sone selo sa botlhokwatlhokwa, eseng go obamela Jehofa, mme ba leka go sukunyetsa tirelo ya ga Jehofa mo nakong e e setseng. Gone ke boammaaruri, seno ga se maswe thata jaaka go obamela namane ya gouta, mme lefa go ntse jalo go batlile go tshwana fela fa go lejwa dilo tsa botlhokwa. Fa motho a dira dikeletso tsa gagwe ka namana modimo, ga a diragatse boineelo jwa gagwe go Jehofa le eseng.—Bafilipi 3:19.
12. Boitemogelo jwa Baiseraele le Baale wa Peora bo re ruta eng kaga go iitatola?
12 Sekai se se latelang sa tlhagiso se se umakilweng ke Paulo le sone se ne se akaretsa mofuta mongwe wa boitlosobodutu. “Le gone a re se direng boaka, jaaka bangwe ba bone ba kile ba dira, mme ba swa ka letsatsi le le lengwe fela, ba le 23 000.” (1 Bakorinthe 10:8) Baiseraele, ba ba neng ba raelwa ke menate ya boitsholo jo bo sa siamang e e neng e tlisiwa ke bomorwadia Moabe, ba ne ba gogelwa gore ba obamele Baale wa Peore kwa Sitime. (Dipalo 25:1-3, 9) Go iitatola gore re dire thato ya ga Jehofa go akaretsa go amogela melao ya gagwe malebana le boitsholo jo bo phepa. (Mathaio 5:27-30) Mo motlheng ono wa melao e e ntseng e repa, re gakololwa kafa go tlhokegang ka gone gore re ipoloke re le phepa mo mefuteng yotlhe ya boitshwaro jo bo sa siamang, re ineele mo taolong ya ga Jehofa gore e nne ene a laolang gore se se siameng le se se bosula ke sefe.—1 Bakorinthe 6:9-11.
13. Sekao sa ga Finease se re thusa jang go tlhaloganya gore go ineela mo go Jehofa go akaretsa eng?
13 Lefa batho ba le bantsi ba ne ba wela mo seraing sa boaka kwa Sitime, bangwe ba ne ba diragatsa boineelo jwa setšhaba go Jehofa. Finease e ne e le mongwe yo o neng a tlhagafetse ka tsela e e tlhomologileng wa bone. E rile Finease a bona kgosana ya Baiseraele a tlisa mosadi wa Midiana mo tenteng ya gagwe, gone fela foo a tsaya lerumo ka seatla a ba phunyeletsa ka lone. Jehofa o ne a raya Moshe jaana: “Finease . . . o fapositse bogale jwa me mo baneng ba Iseraele, ka a ne a le lefufa ka lefufa la me mo gare ga bone; mme ka se ka ka nyeletsa bana ba Iseraele mo lefufeng la me.” (Dipalo 25:11) Go nna lefufa ka Jehofa—ke sone se se kaiwang ke boineelo. Re ka se ka ra letla sepe gore se tseye boemo jwa boineelo jwa rona go Jehofa mo dipelong tsa rona. Go tlhagafalela Jehofa gape go re tlhotlheletsa gore re boloke phuthego e le phepa ka go itsise bagolwane ka boitsholo jo bo maswe thata, re sa bo letlelele.
14. (a) Baiseraele ba ne ba leka Jehofa jang? (b) Go ineela mo go Jehofa ka mo go feletseng go re thusa jang gore re se ka ra ‘ngodiega’?
14 Paulo o ne a bua ka sekai se sengwe sa tlhagiso fa a ne a re: “Le gone a re se lekeng Morena, jaaka bangwe ba bone ba kile ba mo leka, mme ba bolawa ke dinoga.” (1 Bakorinthe 10:9) Fano Paulo o ne a bua ka nako ya fa Baiseraele ba ne ba ngongorega ka Modimo mo go Moshe fa ba ne ba “ngodiega thata ka ntlha ya tsela.” (Dipalo 21:4) A o a tle o dire phoso eo? Fa o ne o ineela mo go Jehofa, a o ne o akanya gore Haremagetone e gaufi thata? A Jehofa o ntse a le pelotelele thata go feta jaaka o ne o solofetse? Gakologelwa, ga re a ka ra ineela mo go Jehofa gore re mo direle ka lobaka lo lo rileng fela lwa nako kana go fitlha fela ka Haremagetone. Boineelo jwa rona bo tswelela pele ka bosakhutleng. Ka jalo, “a re se lapeng mo go direng molemo; gonne re tlaa roba mo motlheng o e leng one, fa re sa ngodiege.”—Bagalatia 6:9.
15. (a) Baiseraele ba ne ba ngongorega kaga mang? (b) Boineelo jwa rona go Jehofa bo re tlhotlheletsa jang gore re tlotle taolo ya puso ya Modimo?
15 Labofelo, Paulo o ne a tlhagisa ka go nna ‘ba ba ngongoregang’ ka batlhanka ba ba tlhomilweng ba ga Jehofa. (1 Bakorinthe 10:10) Baiseraele ba ne ba ngongorega thata ka Moshe le Arone fa ditlhola tse 10 mo go tse 12 tse di neng di romilwe go ya go tlhola naga ya Kanana di ne di tla ka dipego tse di bosula. Ba ne ba bo ba bua kaga go itlhophela moeteledipele yo mongwe mo boemong jwa ga Moshe le gore ba boele kwa Egepeto. (Dipalo 14:1-4) Gompieno, a re amogela go etelelwa pele ke go dira ga moya wa ga Jehofa o o boitshepo? Tafole e e tletseng dijo tsa semoya tse motlhanka yo o boikanngo le yo o botlhale a di baakanyang e bontsha sentle gore Jesu o dirisa mang go ntsha “dijo ka dipaka tse e leng tsone.” (Mathaio 24:45) Go ineela mo go Jehofa ka moya otlhe go re tlhoka gore re bontshe go tlotla batlhanka ba gagwe ba ba tlhomilweng. E kete le ka motlha re ka se tshwane le batho bangwe ba motlha wa gompieno ba ba ngongoregang mme ba ile kwa tlhogong e nngwe, jaaka go ka tualo, gore e ba etelele pele go ba busetsa mo lefatsheng.
A ke Bojotlhe jo Nka bo Kgonang?
16. Batlhanka ba ba ineetseng ba Modimo ba ka rata go ipotsa dipotso dife?
16 Baiseraele ba ka bo ba sa wela mo diphosong tse di masisi jalo fa ba ka bo ba ile ba gakologelwa gore go ineela ga bone go Jehofa go ne go sa ikaega ka mabaka mangwe fela. Jesu Keresete ene o ile a diragatsa boineelo jwa gagwe go ya bokhutlong, go farologana le Baiseraele bale ba ba senang tumelo. Jaaka balatedi ba ga Keresete, re etsa sekao sa gagwe sa go ineela ka moya otlhe, re tshela matshelo a rona ‘re sa tlhole re tshelela dithato tsa batho, fa e se go rata ga Modimo.’ (1 Petere 4:2; bapisa 2 Bakorinthe 5:15.) Thato ya ga Jehofa gompieno ke gore “batho botlhe ba ke ba bolokwe, mme ba fitlhe mo kitsong ya boammaaruri.” (1 Timotheo 2:4) Gore re fitlhelele seo, re tshwanetse go rera “Mafoko a a Molemo a, a bogosi” bokhutlo bo ise bo tle. (Mathaio 24:14) Re dira tirelo eno ka boiteko jo bo kana kang? Re ka rata go ipotsa jaana, ‘A ke bojotlhe jo nka bo kgonang?’ (2 Timotheo 2:15) Maemo ga a tshwane. Jehofa o itumelela go direlwa “ka ga se motho o nang naso, e seng ka ga se o se nang naso.” (2 Bakorinthe 8:12; Luke 21:1-4) Ga go na ope yo o tshwanetseng go atlhola gore yo mongwe o ineetse go le kana kang le gone e le ka tlhoafalo go le kana kang. Mongwe le mongwe o tshwanetse go tlhatlhoba gore ene ka namana o ineetse mo go Jehofa ka selekanyo se se kana kang. (Bagalatia 6:4) Tsela e re ratang Jehofa ka yone e tshwanetse ya re tlhotlheletsa gore re botse jaana, ‘Nka itumedisa Jehofa jang?’
17. Boineelo le go anaanela di amana jang? Tshwantsha.
17 Fa re ntse re anaanela Jehofa ka mo go oketsegileng re ineela mo go ene mo go oketsegileng. Mosimane mongwe wa dingwaga tse 14 wa kwa Japane o ne a ineela mo go Jehofa a bo a tshwantshetsa boineelo jwa gagwe ka go kolobediwa mo metsing. Moragonyana, o ne a batla go oketsa thuto ya gagwe le gore a nne rasaense. O ne a ise a ko a akanye ka bodiredi jwa nako e e tletseng, mme lefa go ntse jalo jaaka motlhanka yo o ineetseng, o ne a sa batle go tlogela Jehofa le phuthego ya gagwe e e bonalang. Gore a fitlhelele mokgele wa tiro e a neng a batla go e dira, o ne a ya kwa yunibesithing. Fa a le koo o ne a bona baalogi ba yunibesithi ba patelediwa gore ba dirise matshelo a bone otlhe ba direla dikhampani tsa bone kana ba ithuta. O ne a ipotsa jaana, ‘Ke dirang fa? A tota nka tshela ka tsela e ba batlang ka yone ke bo ke ineela mo tirong ya boitshediso? Gakere ke setse ke ineetse mo go Jehofa?’ E re ka a ne a tsosolositse kanaanelo ya gagwe, o ne a nna mmulatsela wa ka metlha. O ne a tlhaloganya boineelo jwa gagwe mo go oketsegileng mme seo sa mo tlhotlheletsa gore a ititeye sehuba gore o tla ya gongwe le gongwe kwa a tlhokwang gone. O ne a ya kwa Sekolong sa Thapiso sa Bodiredi mme a neelwa kabelo ya kwa a neng a tla direla teng jaaka morongwa kwa moseja.
18. (a) Boineelo jwa rona go Jehofa bo akaretsa go le kana kang? (b) Fa re ineela mo go Jehofa re ka nna le maduo afe?
18 Boineelo bo akaretsa botshelo jwa rona jotlhe. Re tshwanetse ra iitatola “ka malatsi otlhe” ra latela sekao se se molemo sa ga Jesu. (Luke 9:23) Fa re setse re iitatotse, ga re kope Jehofa gore a re fe malatsi a boitapoloso. Matshelo a rona a dumalana le melaometheo e Jehofa a e beelang batlhanka ba gagwe. Lefa e le mo dilong tse re ka itlhophelang mo go tsone, go tla bo go le mosola gore re bone gore a re dira bojotlhe jo re ka bo kgonang gore re tshele botshelo jwa go ineela mo go Jehofa. Fa re ntse re mo direla letsatsi le letsatsi, re dira ka natla gore re mo itumedise, re tla atlega jaaka Bakeresete mme re tla segofadiwa ka gore Jehofa a re itumelele, Ene yo o tshwanelwang ke gore re ineele mo go ene ka moya otlhe.
A o ka Tlhalosa?
◻ Boineelo bo ne jwa tlhoka eng mo go Jesu Keresete?
◻ Ke ka ntlha yang fa re tshwanetse go tila go ngongorega ka Jehofa?
◻ Re ka tila jang gore re se ka ra letla kobamelo ya medimo ya disetwa gore e tsene mo matshelong a rona re sa lemoge?
◻ Ke eng se e ka reng fa re se gakologelwa sa re thusa gore re se ka ra ‘ngodiegela’ go dira thato ya Modimo?
[Setshwantsho mo go tsebe 17]
Bakeresete ba ba ineetseng ga ba ‘lape mo go direng molemo’