Keteka Segegopotso ka Tshwanelo

ENE e le maitseboa a Nisane 14, 33 C.E., fa Jesu a ne a simolola Segopotso.a O ne a sa tswa go keteka mokete wa Tlolaganyo le barutwa ba gagwe ba le 12, ka jalo re ka tlhomamisega ka letlha leo. Fa Jesu a se na go koba Jutase yo o neng a mo oka, o ne a “tsaya senkgwe, ya re a sena go se segofatsa, a se ngathoganya, a se ba naya a re: ‘Tsayang; se ke mmele wa me.’ A ba a tsaya senwelo, mme ya re a sena go leboga, a se ba naya; mme ba nwa botlhe ga sone. A ba raya a re: ‘Se ke madi a me a kgolagano, a a tshololelwang batho ba le bantsi.’”—Mareko 14:22-24.

Jesu o ne a laela barutwa ba gagwe gore ba gopole loso lwa gagwe ka gonne lo le botlhokwa. (Luke 22:19; 1 Bakorinthe 11:23-26) Setlhabelo sa gagwe e ne e le sone fela se se neng se ka rekolola batho mo phutsong ya sebe se ba se ruileng le mo losong. (Baroma 5:12; 6:23) Senkgwe le beine tse a neng a di dirisa di ne di tshwantshetsa mmele wa gagwe o o itekanetseng le madi a gagwe. E re ka re itse letlha la kwa tshimologong, re ka keteka tiragalo eno ka letsatsi le le tsamaisanang le lone ngwaga le ngwaga, fela jaaka go ne go dirwa ka Tlolaganyo ya Sejuta. Mme re tshwanetse go dira jalo ka tshwanelo. Ka ntlha yang?

Moaposetoloi Paulo o ne a bolela gore batho ba ba jang ditshwantshetso tsa senkgwe le ba ba nwang beine ba ne ba tla “bolela loso lwa Morena a tsamaye a tle.” (1 Bakorinthe 11:26, mokwalo o o sekameng ke wa rona.) Ka gone ntlha ya botlhokwa mo moketeng e ne e tla nna loso lwa ga Jesu le se lo se bolelang ka batho. Tiragalo eo e ne e tla nna e e masisi, e le nako ya go akanya ka molemo wa Modimo le ka kanaanelo e re tshwanetseng go nna le yone ka Jehofa le Morwawe. (Baroma 5:8; Tito 2:14; 1 Johane 4:9, 10) Ka gone Paulo o ne a tlhagisa jaana: “Ke gone, yo o jang senkgwe, a ba a nwa senwelo sa Morena, a sa tshwanela, o tlaa bo a leofela mmele le madi a Morena.”—1 Bakorinthe 11:27.

Ka Tshwanelo—Jang?

Kwantle ga pelaelo, Modimo o ne a ka se ka a itumela fa re tlontlolola tiragalo eno ka go dira mekgwa mengwe e e belaetsang kana ka go amogela ditlwaelo tsa seheitane. (Jakobe 1:27; 4:3, 4) Seno se ne se tla dira gore ditiragalo tse di tlwaelegileng tsa letsatsi la Ista di se ka tsa amogelwa. Gore re diragatse taelo ya ga Jesu ya gore “dirang mo, [re mo gopole ka gone],” re tla batla go keteka Segopotso fela jaaka a ne a se simolola. (Luke 22:19; 1 Bakorinthe 11:24, 25) Seno se ne se tla dira gore dilo tse di tsentsweng mo moketeng ono ke dikereke tsa Labokeresete di se ka tsa amogelwa. New Catholic Encyclopedia e dumela gore “Mmisa wa gompieno o farologane gotlhelele le mokete o o neng o le motlhofo fela o o neng wa dirwa ke Keresete le Baaposetoloi ba Gagwe.” Mme ka gore Labokeresete e keteka Mmisa kgapetsakgapetsa, le fa e le ka malatsi otlhe, e ile ya fapoga mo se Jesu a neng a se ikaeletse mme ya dira gore e nne tiragalo e e tlwaelegileng fela.

Paulo o ne a kwalela Bakeresete ba Korintha ka ga go ja mo go sa tshwanelang ka gonne go ne go tsogile bothata mo phuthegong malebana le Sejo sa Morena sa Maitseboa. Batho ba bangwe ba ne ba sa tlotle gore se boitshepo. Ba ne ba tla le dijo tsa bone tsa maitseboa ba bo ba di ja pele kana ka nako ya pokano. Gantsi ba ne ba ja kana ba nwa go feta selekanyo. Seno se ne se ba dira gore ba otsele le go sirega tlhaloganyo. E re ka ba ne ba sa thanya mo tlhaloganyong le semoyeng, ba ne ba ka se “lemoge mmele” mme ka gone ba bo ba “leofela mmele le madi a Morena.” Lefa go ntse jalo, batho ba ba neng ba sa ja dijo tsa maitseboa ba ne ba tshwerwe ke tlala mme ba iteega tsebe. Totatota go ne go se na ope wa bone yo o neng a le mo boemong jwa go ja ditshwantshetso ka go anaanela le go lemoga sentle bomasisi jwa tiragalo eno—jwa gore mokete e ne e le wa go gopola loso lwa Morena. Seno se ne sa felela ka gore ba atlholwe, ka gonne ba ne ba o tlontlolola, tota le go o nyatsa.—1 Bakorinthe 11:27-34.

Temogo e a Tlhokega

Batho ba bangwe ba jele ditshwantshetso tsa Segopotso le mororo kwa morago, ba ne ba lemoga gore ba ne ba sa tshwanela go ka bo ba dirile jalo. Batho ba ba jang ditshwantshetso tsa Segopotso ka gonne ba tshwanela ba tlhophilwe ke Modimo mme ba supelwa ke moya wa Modimo gore ba a tshwanela. (Baroma 8:15-17; 2 Bakorinthe 1:21, 22) Ga se tshwetso e ba itiretseng yone ka namana kana boikaelelo jwa bone jo bo ba dirang gore ba tshwanele. Modimo o na le palo e e lekanyeditsweng ya batho ba ba tla busang le Keresete kwa magodimong ba le 144 000, e leng palo e potlana thata fa e bapisiwa le batho botlhe ba ba tla solegelwang molemo ke thekololo ya ga Keresete. (Tshenolo 14:1, 3) Go tlhophiwa ga bone go simologile mo motlheng wa ga Jesu, ka jalo go tla go fitlha gompieno go na le basekae fela ba ba jang. Mme fa bangwe ba bone ba ntse ba tlhokafala, palo eo e tshwanetse ya fokotsega.

Ke ka ntlha yang fa motho mongwe a ka ja ditshwantshetso ka phoso? Gongwe e ka tswa e le dikgopolo tsa bodumedi jo a neng a le mo go jone pele—tsa gore batho botlhe ba ba ikanyegang ba ya kwa legodimong. Kana e ka tswa e le boikgodiso kana bopelotshetlha—boikutlo jwa gore motho o a tshwanela go gaisa ba bangwe—le go eletsa go tlotlomala. Gongwe ke ka ntlha ya maikutlo a a nonofileng a a bakwang ke mathata a magolo kana bomadimabe bongwe jo bo dirang gore motho a se tlhole a kgatlhegela go tshela mo lefatsheng. Gape e ka tswa e le gore motho ke tsala e kgolo thata le mongwe yo o bileditsweng kwa legodimong. Rotlhe re tlhoka go gakologelwa gore tshwetso e dirwa ke Modimo fela, e seng rona. (Baroma 9:16) Ka jalo fa e ka re motho, a ‘se na go ipotsisa,’ a fitlhela gore tota o tshwanetse gore a se ka a ja ditshwantshetso tseno, jaanong o tshwanetse go tlogela go ja.—1 Bakorinthe 11:28.

Tsholofelo e Modimo a e beetseng bontsi jwa batho ke ya botshelo jo bo sa khutleng mo lefatsheng la paradaise. Ao ke masego a magolo a re tshwanetseng go a solofela, mme e le a re ka a eletsang motlhofo. (Genesise 1:28; Pesalema 37:9, 11) Ke mo lefatsheng koo batho ba ba ikanyegang ba tla kopanngwang gape le baratiwa ba bone ba ba tsositsweng mme ba tla kopana le batho ba ba siameng ba bogologolo, ba ba jaaka, Aberahame, Sara, Moshe, Rahabe, Dafite le Johane Mokolobetsi—botlhe e le ba ba suleng pele ga Jesu a bula tsela ya go ya kwa botshelong jwa selegodimo.—Mathaio 11:11; bapisa 1 Bakorinthe 15:20-23.

Batho ba ba solofetseng go tshela mo lefatsheng ba keteka Sejo sa Morena sa Maitseboa ka tshwanelo ka go nna teng le go reetsa ka tsela e e bontshang tlotlo, le fa gone ba sa je senkgwe le go nwa beine. Le bone ba solegelwa molemo ke setlhabelo sa ga Keresete, se se ba thusang gore ba amogelwe ke Modimo. (Tshenolo 7:14, 15) Fa ba reeditse puo e e neelwang, tsela e ba anaanelang dilo tse di boitshepo ka yone e a oketsega, le go eletsa go nna mo kutlwanong le batho ba Modimo gongwe le gongwe go a gola.

Monongwaga, morago ga letsatsi le se na go dikela ka Labobedi, April 2, Segopotso se tla bo se ketekwa mo diphuthegong tsotlhe tse di fetang 78 000 tsa Basupi ba ga Jehofa mo lefatsheng lotlhe. A o tla nna teng?

[Ntlha e e kwa tlase]

[Setshwantsho mo go tsebe 8]

Basupi ba ga Jehofa ba keteka Segopotso gangwe fela ngwaga le ngwaga