Dipokano di Solegela Basha Molemo
1 Mosetsana mongwe wa dingwaga tsa bolesome o ne a bolela jaana: “Ka dinako tse dingwe ke akanya gore basha ba na le mathata a magolo tota mo botshelong. Re dikologilwe ke batho ba ba dirang kgokafalo, ba ba dirisang diokobatsi le ba ba nwang.” A le wena o ikutlwa ka tsela eo? Fa go le jalo, o akanya gore ke eng se se ka go thusang go lwantsha ditlhotlheletso tseno tse di bosula? O tlhoka tumelo, tumelo e e nonofileng malebana le gore ditsela tsa ga Jehofa di siame, ka gonne fa e seyo “ga go kgonege go o itumedisa sentle.” (Baheb. 11:6) Go nna gone kwa dipokanong go tla go thusa go nonotsha tumelo ya gago ya Bokeresete le go ititaya sehuba gore o tile se se bosula.
2 Dipokano di go Tsholetse go le Gontsi: Ke eng se se dirang gore o itumelele dijo tse di monate le ditsala? A ga se dijo tse di monate o na le ditsala tse di itumedisang lo iketlile? Ebu, dipokano tsa rona di re itumedisa ka tsela eo, mme e le ka tsela ya semoya.
3 Dilo tse go tlotliwang ka tsone kwa dipokanong di a aga, go simolola ka dikgang tse di amanang le mathata a letsatsi le letsatsi a botshelo go ya go dithuto tsa boporofeti jo bo kgatlhang jwa Baebele. Go neelwa thuto e e molemo e e go rutang go tshela tsela e e molemolemo ya botshelo le go itshokela mathata a o kopanang le one. Ditsala tse o nang le tsone kwa dipokanong di molemo go gaisa tsotlhe, mme maemo a semoya a a itumedisa e bile a sireletsegile. (Pes. 133:1) Ga go gakgamatse go bo mosha mongwe a ne a bolela jaana: “Ke ya sekolong ka dinako tsotlhe, mme go a ntapisa. Mme dipokano di ntse jaaka sediba mo sekakeng, koo ke itapolosang gone gore ke itshokele letsatsi le le latelang la sekolo.” Yo mongwe o ne a re: “Ke lemogile gore go nna tsala le ba bangwe ba ba ratang Jehofa go nthusa gore ke nne gaufi le ene.”
4 Fa o ikwadisitse mo Sekolong sa Bodiredi sa Puso ya Modimo, o ithuta go batlisisa tshedimosetso ya Baebele, go e dira puo, mme go tswa foo o bo o e neela ka tsela ya go tlotla fa pele ga bareetsi kwa Holong ya Bogosi. Akanya ka melemo ya go thapisediwa go ruta boammaaruri jwa Lefoko la Modimo jo bo bolokang botshelo ka botswerere! Ke kae gape koo basha ba ka bonang thapiso e e botlhokwa jalo?
5 Tsela ya go Solegelwa Molemo Thata ke Dipokano: Go na le dilo di le tharo tse di botlhokwa tse di tla go thusang gore o solegelwe molemo thata ke dipokano. Ke go baakanyetsa, go nna le seabe mo go tsone le go dirisa se o se ithutileng.
6 Di Baakanyetse: Rulaganya nako ya go baakanyetsa dipokano ka metlha. O se ka wa letla tiro ya sekolo, tiro e e seng ya letsatsi lotlhe, kana ditiro tsa boitlosobodutu go go jela nako e o e tlhokang gore o sekaseke go sa le gale dintlha tse go tla tlotliwang ka tsone kwa pokanong nngwe le nngwe. Go molemo go nna le thulaganyo e e siameng. Sa ntlha, latela thulaganyo ya mmalo wa Baebele ya beke le beke ya Sekolo sa Bodiredi sa Puso ya Modimo. O tlhoka fela metsotso e sekae letsatsi le letsatsi gore o bale le go tlhatlhanya ka dikgaolo tsa beke eo. Beela nako kwa thoko go baakanyetsa Thuto ya Buka ya Phuthego le Thuto ya Tora ya Tebelo. Ba bangwe ba dira seno gongwe letsatsi kana a le mabedi pele ga dipokano tseo. Dira se se tshwanang ka dipuo tse di leng mo thulaganyong ya Pokano ya Tirelo ya beke nngwe le nngwe ka fa o ka kgonang ka gone.
7 Nna le Seabe mo go Tsone: Baebele e bolela gore fa Jesu a na le dingwaga di le 12, o ne a fitlhelwa kwa tempeleng, a reeditse, a botsa dipotso le go araba dipotso. (Luke 2:46, 47) Ka mafoko a mangwe, o ne a nna le seabe ka botlalo. O tla solegelwa molemo thata ke dipokano fa o leka thata go nna le seabe mo go tsone.—Dia. 15:23.
8 O tshwanetse go tlhoma mogopolo mo go se se rutiwang kwa dipokanong. Ka dinako tse dingwe go thata go reetsa puo go feta fa o e neela. Ka ntlha yang? Mogopolo wa gago o ka nna wa kgarakgatshega fa motho yo mongwe a bua. O ka lwantsha seno jang? Ka go kwala dintlha. Kwala dintlha tse di botlhokwa tse o tla di dirisang moragonyana. Go kwala dintlha go tla go thusa go tlhoma mogopolo mo thulaganyong. Gape, leba dikwalo, mme o latele fa sebui se ntse se di bala.
9 Mo godimo ga moo, ipeele mokgele wa go nna le seabe mo motlotlong mongwe le mongwe wa dipotso le dikarabo kwa dipokanong. O tla solegelwa molemo thata fa o akanya sentle ka se o batlang go se bua. Diane 15:28, NW, ya re: “Pelo ya mosiami e a tlhatlhanya gore e tle e arabe.”
10 Dirisa Se o Se Ithutang: Kgato ya bofelo ke go tlhomamisa gore se o se ithutang se ‘dire mo go wena.’ (1 Bathes. 2:13) Fa o nna o dirisa dintlha tse di molemo tse o di ithutang kwa pokanong nngwe le nngwe, o tla nna gaufi thata le Jehofa Modimo. O tla mo tsaya e le motho wa mmatota, mme o tla ipela thata le go kgotsofala fa o ntse o “tsamaya mo boammaaruring,” o dira gore e nne jwa gago.—3 Joh. 4.
11 Bakaulengwe le bokgaitsadi ba basha, lo tla itumelela dipokano ka botlalo fa lo baakanyetsa dipokano ka metlha, lo nna le seabe mo go tsone, le go dirisa se lo se ithutang. Mo godimo ga moo, lo tla bona melemo yotlhe mo go tsone. Tumelo ya lona e tla nonotshiwa, mmogo le boikemisetso jwa lona jwa go nna lo ikanyega mo go Rraalona wa selegodimo, Jehofa.—Pes. 145:18.