A Modimo o Dira ka Ditsela Tse di “Sokameng”?
“DEUS ESCREVE CERTO POR LINHAS TORTAS” (“MODIMO O KWALA sentle ka ditlhaka tse di sokameng”) ke seane sa Brazil. Se bontsha gore ka dinako tsotlhe Modimo o dira selo se se siameng mme ka dinako tse dingwe e le ka tsela e e bonalang e kete e sokame mo mothong. Ka sekai, fa motho yo o sa ntseng a itekanetse a tlhokafala, batho ba le bantsi ba re, ‘Modimo o mmileditse kwa legodimong.’ Fa mongwe a le segole kana a tlhagetswe ke matlhotlhapelo mangwe, ba bangwe ba bolela go re, ‘Ke thato ya Modimo.’ E re ka Modimo a pegwa molato ka ntlha ya loso, malwetse le ka ntlha ya dilo tse dingwe tse di hutsafatsang, mafoko a a ntseng jalo a bontsha gore Modimo ‘o kwala ka tsela e e sokameng,’ gore o dira dilo ka tsela e motho a sa e tlhaloganyeng.
Ke ka ntlha yang fa batho ba le bantsi ba bodumedi ba dumela gore Modimo ke ene yo o bolayang batho le go ba leretse mathata? Gantsi ditumelo tseno di nna gone ka gonne batho ba sa tlhaloganye ditemana dingwe tsa Baebele. A re lebeng dingwe tsa tsone ka bokhutshwane.
● “E mang yo o dirang motho gore a nne semumu, gongwe a nne susu, gongwe a nne yo o bonang, kgotsa a nne sefofu? A ga se nna Jehofa?”—Ekesodo 4:11.
A seno se raya gore re ka pega Modimo molato ka gonne go na le batho ba ba golafetseng ka ditsela tse di farologaneng? Nnyaa. Seno se tla bo se sa dumalane le botho jwa Modimo. Baebele e re bolelela jaana: “Tlhōlō nngwe le nngwe ya Modimo e molemomogolo.” (1 Timotheo 4:4) Re ka se mo pege molato fa go na le motho mongwe yo o tshotsweng e le sefofu, e le semumu, kana e le susu. O ratela popo ya gagwe se se molemo fela, ka gonne ke Motswedi wa “mpho nngwe le nngwe e e molemo le neo nngwe le nngwe e e itekanetseng.”—Jakobe 1:17.
Ke batsadi ba rona ba ntlha, Adame le Efa, ba ba neng ba itlhophela go tsuologela Modimo mme ba latlhegelwa ke boitekanelo jwa bone mme ka gone ba palelwa ke go nna le bana ba ba itekanetseng. (Genesise 3:1-6, 16, 19; Jobe 14:4) Fa ditlogolwana tsa bone di ntse di nyala le go nna le bana, go sa itekanela, go akaretsa le bogole jwa mo mmeleng, go ne ga simolola go bonala mo bathong. Le mororo e se Jehofa Modimo yo o bakileng seno, o se letleletse gore se diragale. Ke gone ka moo a neng a ka bua ka ene a re ‘o dira motho gore a nne’ semumu, susu le sefofu.
● “Se se sokameng ga se kake sa siamisiwa.”—Moreri 1:15.
A ke Modimo yo o sokamisitseng dilo? Tota nnyaa. Moreri 7:29 e bolela jaana: “Modimo o dirile motho a thokgame; mme ba senkile maano a le mantsi.” Contemporary English Version e tlhalosa temana eno ka mafoko a mangwe: “Re ne re ikanyega ka botlalo fa Modimo a ne a re bopa, mme gone jaanong re na le megopolo e e sokameng.” Mo boemong jwa go utlwa ditekanyetso tse di siameng tsa Modimo, gantsi, banna le basadi ba ile ba itlhophela go latela maano, kana ditsela tsa bone—tse di feleletsang di ba utlwisitse botlhoko.—1 Timotheo 2:14.
Gape, jaaka moaposetoloi Paulo a boletse, ka ntlha ya boleo jwa batho, “tlhōlō e ne ya bewa mo taolong ya bosenangmosola.” (Baroma 8:20) Mme seemo seno “ga se kake sa siamisiwa” ke se motho a se dirang. Tshokamo yotlhe le bosenangmosola mo dilong tsa lefatshe di ka tlosiwa fela fa Modimo a ka tsenya letsogo.
● “Akanya tiro ya Modimo; gonne e mang yo o ka siamisang sone se o se sokamisitseng?”—Moreri 7:13.
Ka mafoko a mangwe, Kgosi Solomone o botsa jaana: ‘Ke mang mo bathong yo o ka siamisang bogole le go sa itekanela tse Modimo a di letleletseng?’ Ga gona ope, ka gonne go na le lebaka la go bo Jehofa Modimo a dumeletse dilo tseno gore di diragale.
Ka gone, Solomone o akantsha jaana: “Nna molemo mo letsatsing le le molemo, mme mo letsatsing la masetlapelo o bone gore Modimo wa boammaaruri o dirile le leno fela jaaka lele, ka boikaelelo jwa gore batho ba se ka ba lemoga sepe gotlhelele morago ga one.” (Moreri 7:14, NW) Motho o tshwanetse go itumelela letsatsi fa dilo di mo tsamaela sentle mme a bontshe kanaanelo ka go nna molemo. O tshwanetse go leba letsatsi le le molemo e le mpho e e tswang kwa Modimong. Mme go tweng fa letsatsi le lere masetlapelo? Motho o tla bo a dira sentle fa a ‘bona,’ ke gore, fa a lemoga gore Modimo o dumeletse masetlapelo ano gore a diragale. Ke ka ntlha yang fa a dirile jalo? Solomone o bolela jaana: “Ka boikaelelo jwa gore batho ba se ka ba lemoga sepe gotlhelele morago ga one.” Seno se bolela eng?
Lebaka la go bo Modimo a dumeletse gore re itumele re bo re lebane le mathata le re gakolola gore re ka se itse se isagwe e se tshwereng. Masetlapelo a ka wela batho ba ba siameng le ba ba boikepo. Ga a tlhaole ope. Seno se tshwanetse sa re lemotsha botlhokwa jwa go ikaega, e seng ka rona, mme ka Modimo, re ntse re gakologetswe gore “Modimo ke lorato.” (1 Johane 4:8) Le fa gone go na le dilo dingwe tse re sa di tlhaloganyeng gone jaanong, re ka tlhomamisega gore fa sengwe le sengwe se diragaditswe ka botlalo, se Modimo a se dumeletseng se tlile go solegela botlhe ba ba amegang molemo.
Sepe fela se a se dumeletseng se ka se utlwise batho ba ba dipelo tse di siameng botlhoko ka bosakhutleng. Moaposetoloi Petere o ne a phepafatsa seno fa a ne a bua ka pogo e e neng ya tlela badumedikaene mo motlheng wa gagwe jaana: “Fa lo sena go boga ka lobakanyana, Modimo wa bopelonomi jotlhe jo bo sa re tshwanelang, o o neng wa lo biletsa kgalalelong ya one e e sa khutleng seoposengweng le Keresete, one ka boone o tla wetsa thapiso ya lona, o tla lo nitamisa, o tla lo nonotsha.”—1 Petere 5:10.
Ke Nako ya go Tlhamalatsa Dilo
Jehofa o re neela maatla gore re itshokele diteko tse re lebanang le tsone gone jaanong. Gape o solofetsa go dira “dilo tsotlhe disha.” (Tshenolo 21:5) Ee, ke boikaelelo jwa gagwe gore Bogosi jwa gagwe jwa selegodimo go ise go ye kae bo fodise digole le go tlhokomela go tsosiwa ga baswi. Gape puso eo e tla tlosa ene yo tota ditsela tsa gagwe di sokameng—Satane Diabolo. (Johane 5:28, 29; Baroma 16:20; 1 Bakorintha 15:26; 2 Petere 3:13) A bo e tla nna masego jang ne mo bathong ba ba boifang Modimo mo lefatsheng lotlhe, fa nako ya Modimo ya go siamisa dilo e goroga!
[Motswedi wa Setshwantsho mo go tsebe 28]
Job Hearing of His Ruin/The Doré Bible Illustrations/Dover Publications