Go Ithuta Tsela e e Gaisang ya Lorato

Kosovo, Bosnia, Lebanon, le Ireland. Ano ke maina a a neng a tlhagelela gantsi mo dikgannyeng mo dingwageng tsa bosheng jaana. A dira gore batho ba akanye ka tshololo ya madi, dibomo le dipolaano. Gone mme, dintwa tse di setlhogo tse di bakilweng ke bodumedi, morafe, setso kana dikgotlhang tse dingwe ga se gone di simololang. Tota e bile, hisitori yotlhe e tletse ka tsone e bile di tliseditse batho dipogiso tse dintsi thata.

ERE ka dintwa di ntse di le teng go ralala hisitori, batho ba le bantsi ba konela ka gore dintwa di ka se fele e bile ke selo sa tlholego gore batho ba tlhoane. Le fa go ntse jalo, dikgopolo tse di ntseng jalo, di farologane gotlhelele le dithuto tsa Lefoko la Modimo e leng Baebele. Dikwalo di bolela jaana ka tlhamalalo: “Yo o sa rateng ga a ise a itse Modimo, ka gonne Modimo ke lorato.” (1 Johane 4:8) Go phepafetse gore Mmopi o batla gore batho ba ratane.

Gape Baebele e senola gore motho o bopilwe mo setshwanong sa Modimo. (Genesise 1:26, 27) Seno se raya gore motho o dirilwe gore a kgone go bontsha dinonofo tsa Modimo, tse e kgolo ya tsone e leng lorato. Fa go ntse jalo, ke ka ntlha yang fa batho ba reteletswe thata jaana go ratana mo hisitoring yotlhe? Le gone moo, Baebele e a itsise. Ke ka ntlha ya go bo banyalani ba ntlha ba batho, Adame le Efa, ba ne ba tsuologela Modimo le go wela mo boleong. Ka ntlha ya moo, bana botlhe ba bone ba ne ba rua boleo le go sa itekanela. Baroma 3:23 e tlhalosa jaana: “Botlhe ba leofile e bile ba tlhaela kgalalelo ya Modimo.” Bokgoni jwa rona jwa go rata jo re bo neilweng ke Modimo bo senngwa ke go bo re ruile boleo e bile re sa itekanela. A seno se raya gore batho ba ka se tlhole ba kgona go ratana? Ke tsholofelo efe e e leng teng ya gore re tla ke re tshedisane le bangkarona ka kagiso le ka lorato?

Re Tshwanetse ra Ithuta go Rata Modimo

Jehofa Modimo o a itse gore le mororo batho ba sa itekanela, ba sa ntse ba ka kgona go nna lorato. Ke gone ka moo a laelang gore botlhe ba ba batlang go mo itumedisa ba bontshe lorato ka fa ba ka kgonang ka teng. Morwa Modimo e bong Jesu Keresete, o ne a tlhalosa seno sentle fa a ne a kopiwa go bolela taelo e kgolo go gaisa tsotlhe mo Molaong o o neng o neilwe Iseraele. O ne a re: “‘O tshwanetse go rata Jehofa Modimo wa gago ka pelo yotlhe ya gago le ka moya otlhe wa gago le ka mogopolo otlhe wa gago.’ Eno ke taolo e kgolo thata e bile e le ya ntlha.” Mme a oketsa jaana: “Ya bobedi, e e tshwanang le yone, ke eno, ‘O tshwanetse go rata moagelani wa gago jaaka o ithata.’ Molao otlhe . . .[o] ikaegile ka ditaolo tse pedi tseno.”—Mathaio 22:37-40.

Le fa go ntse jalo, batho ba le bantsi ba ikutlwa gore go thata go rata mongwe yo ba ka se mmoneng le gore rona batho ga re ka ke ra bona Jehofa Modimo ka gonne ke Moya. (Johane 4:24) Le fa go ntse jalo, letsatsi le letsatsi re amiwa ke dilo tse Modimo a di dirileng, e re ka rotlhe re ikaegile ka dilo di le dintsi tse di molemo tse a di bopileng gore di re solegele molemo. Moaposetoloi Paulo o ne a supa ntlha eno fa a ne a bolela jaana: “[Modimo] o ne wa se ka wa itlogela o se na bosupi ka gore o ne wa dira molemo, wa lo naya dipula go tswa legodimong le dipaka tsa maungo, wa tlatsa dipelo tsa lona ka botlalo ka dijo le lethamo le legolo.”—Ditiro 14:17.

Le mororo mongwe le mongwe a solegelwa molemo ka tsela nngwe ke dilo tse Mmopi a di dirileng, fa go bapisiwa, ke ba le mmalwa fela ba ba mo lebogang kana ba ba tlhotlheletsegang go mo leboga. Ka jalo, re tshwanetse go akanya ka dilo tsotlhe tse di molemo tse Modimo a re diretseng tsone le go tlhatlhanya ka dinonofo tse di molemo tse di bonalang mo dilong tsotlhe tse a di dirileng. Go dira jalo go tshwanetse ga dira gore re kgone go lemoga botlhale le maatla a a boitshegang a Mmopi wa rona yo Mogolo. (Isaia 45:18) Mo godimo ga moo, go tshwanetse ga re thusa go bona kafa a leng Modimo yo o lorato ka teng, ka gore ga a re naya botshelo fela mme gape o dirile gore re kgone go ipelela dilo di le dintsi tse di itumedisang mo botshelong.

Ka sekai, akanya fela ka mefuta e mentsintsi ya dithunya tse dintle tse Modimo o di bopileng mo lefatsheng. A bo go re kgatlha jang ne go bo gape a dirile gore re kgone go bona le go itumelela dilo tseno tse dintle! E bile gape Modimo o re neile mefuta yotlhe ya dijo tse di otlang gore di re nonotshe. A bo a le lorato jang ne go bo a re dirile re kgona go latswa e le gore re itumelele dilo tse re di jang! A tseno ga se dilo tse di bontshang sentle gore tota Modimo o a re rata e bile o re ratela dilo tse di molemo?—Pesalema 145:16, 17; Isaia 42:5, 8.

Kwantle ga go re itshenolela ka “buka ya tlholego,” Mmopi o dirisa Lefoko la gagwe, Baebele, go re bontsha gore ke Modimo wa mofuta ofe. Seno ke ka gonne mo Baebeleng go na le dilo di le dintsi tse di lorato tse Jehofa Modimo a di dirileng mo nakong e e fetileng le masego a mantsi a o a solofetsang go a tlisetsa batho mo isagweng e e fa gaufi. (Genesise 22:17, 18; Ekesodo 3:17; Pesalema 72:6-16; Tshenolo 21:4, 5) Mo godimo ga tsotlhe, Baebele e re senolela gore selo se segolo se se supang lorato lwa Modimo mo bathong—ke go neela Morwawe yo o tsetsweng a le esi go nna Mogolodi wa rona e le gore re ka gololwa mo bokgobeng jwa boleo le loso. (Baroma 5:8) Eleruri, fa re ntse re ithuta go le gontsi ka Mmopi wa rona yo o lorato, re tlhotlheletsega thata go mo rata go tswa pelong.

Go Ithuta go Rata Bengkarona

Jaaka Jesu a bontshitse, mo godimo ga go rata Modimo ka pelo yotlhe, moya le tlhaloganyo, re tshwanetse go rata baagelani ba rona jaaka re ithata. Tota e bile, lorato lwa Modimo lo re pateletsa go rata bengkarona. Moaposetoloi Johane o ne a tlhalosa jaana: “Baratwa, fa e le gore Modimo o ne wa re rata jaana, he rona ka borona re patelesega go ratana.” O ne a gatelela jaana gape: “Fa mongwe a bua polelo e e reng: ‘Ke rata Modimo,’ mme lefa go ntse jalo a tlhoile mokaulengwe wa gagwe, ke moaki. Ka gonne yo o sa rateng mokaulengwe wa gagwe, yo o mmoneng, ga a ka ke a bo a rata Modimo, o a iseng a o bone. Mme re na le taolo eno go tswa kwa go one, gore yo o ratang Modimo o tshwanetse a bo a rata le mokaulengwe wa gagwe.”—1 Johane 4:11, 20, 21.

Gompieno re tshela mo lefatsheng le mo go lone batho ba le bantsi ba bontshang boikutlo jwa go batla go nna ba ntlha, ba nna “baithati,” fela jaaka Baebele e boleletse pele. (2 Timotheo 3:2) Ka gone, fa re batla go ithuta tsela e e gaisang ya lorato, re tshwanetse go dira maiteko a a tseneletseng a go fetola dikgopolo tsa rona le go etsa Mmopi wa rona yo o lorato, go na le go latela ditsela tsa bogagapa tsa batho ka kakaretso. (Baroma 12:2; Baefeso 5:1) Modimo o “pelonomi mo go ba ba sa lebogeng le ba ba boikepo,” e bile o “tlhabisetsa batho ba ba boikepo le ba ba molemo letsatsi la gagwe e bile a nesetsa batho ba ba siameng le ba ba sa siamang pula.” E re ka Rraarona yo o kwa magodimong a re tlhometse sekao se se molemo jaana, re tshwanetse ra lwela go nna pelonomi le go thusa batho botlhe. Ka go dira jalo, re ka itshupa go nna ‘barwa ba ga Rraarona yo o kwa magodimong.’—Luke 6:35; Mathaio 5:45.

Ka dinako tse dingwe ditiro tse di ntseng jalo tsa lorato di felela ka go thusa batho go nna baobamedi ba Modimo wa boammaaruri. Dingwaga dingwe tse di fetileng mmalapa mongwe yo e leng mongwe wa Basupi ba ga Jehofa o ne a leka go abela moagelani wa gagwe molaetsa wa Baebele, fa a tla ganediwa botlhoko. Le fa go ntse jalo, ga a ka a kgobiwa marapo ke go tsiboga jalo. Go na le moo, o ne a tswelela go bontsha bopelonomi le go leka go thusa moagelani wa gagwe. Ka nako nngwe o ne a thusa moagelani wa gagwe go fudugela kwa ntlong e nngwe. Ka nako nngwe gape o ne a rulaganya gore mongwe a pate moagelani wa gagwe go ya kwa boemafofane go ya go kgatlhantsha ba losika lwa moagelani. Moragonyana, moagelani o ne a amogela thuto ya Baebele mme kgabagare a nna Mokeresete yo o tlhoafetseng le mororo monna wa gagwe a ne a mmogisa setlhogo. Ee, ditiro tseo tsa lorato di ne tsa thaya motheo wa masego a a nnetseng ruri.

Fa re bua boammaaruri, re tla dumela gore Modimo ga a re rate ka gonne re na le dinonofo tse dintsi tse di kgatlhang. Go na le moo, o re rata le fa gone re na le diphoso le ditlhaelo tse dintsi. Fa go ntse jalo, le rona re tshwanetse go rata bengkarona le mororo ba na le makoa a mantsi. Fa re itlwaetsa gore re lemoge le go anaanela dinonofo tse di molemo tsa ba bangwe go na le go leba diphoso tsa bone, re tla go fitlhela go le motlhofo go ba rata. Tsela e re ikutlwang ka yone ka bone e ka nna ya feta le ya lorato lo lo laolwang ke melaometheo mme ya akaretsa botsalano jo bogolo jwa lorato jwa ditsala tse di kgolo.

Go Godisa Lorato Lwa Gago

Lorato le botsalano di tlhoka go ngomaelwa le go tlhagolelwa, mme gareng ga dilo tsa botlhokwa tse di bopang seno ke bopeloephepa le go tshepega. Batho bangwe ba leka go fitlha makoa a bone gore ba kgatlhe batho ba ba batlang go tsalana le bone. Le fa go ntse jalo, gantsi seo se feleletsa se sentse dilo ka gonne kgabagare batho bao ba tla itse boammaaruri mme ba ikgogele morago ka ntlha ya go se tshepege gono. Ka jalo, ga re a tshwanela go tshaba go letlelela ba bangwe ba re itse ka tsela e tota re leng ka yone—le e leng le fa re na le makoa a re sa ntseng re lwela go a fenya. Seno se ka thusa go dira botsala le bone.

Ka sekai, kgaitsadi mongwe yo o godileng wa Mosupi kwa phuthegong nngwe e e kwa Botlhaba jo bo Kwa Kgakala ga a rutega thata. Le fa go ntse jalo, ga a leke go fitlhela ba bangwe seo. Ka sekai, o dumela a sa fitlhe gore ga a kgone go tlhalosetsa batho kafa ba ka tlhomamisang ka teng go tswa mo boporofeting jwa Baebele le mo hisitoring gore Metlha ya Baditšhaba e fedile ka 1914.a Le fa go ntse jalo, o tlhoma sekao se se molemo thata mo go tlhoafaleleng bodiredi, le mo go rateng bakaulengwe le go nna pelotshweu, mo e leng gore o tsewa e le mmamoratwa mo phuthegong.

Mo ditsong dingwe, motho o a kgalwa fa a bontsha lorato phatlalatsa; batho ba rutwa go nna bori fela fa ba dirisana le batho ba bangwe. Le fa gone ka gale go le molemo go nna maitseo le go akanyetsa ba bangwe, ga re a tshwanela go letla gore go nna bori ga rona go hupetse kana go fitlhe kafa re ikutlwang ka teng ka batho ba bangwe. Jehofa ga a ka a ikutlwa a tlhajwa ke ditlhong go bolelela batho ba a neng a ba itlhophetse, e leng Iseraele wa bogologolo, gore o a ba rata, a re: “Ke go ratile ka lorato lo lo sa khutleng.” (Jeremia 31:3) Moaposetoloi Paulo le ene o ne a bolelela badumedikaene kwa Thesalonika jaana: “E re ka re na le katamalano e e bothitho ya tlekeetso mo go lona, re ne ra itumelela thata go lo naya, e seng fela dikgang tse di molemo tsa Modimo, mme gape le meya ya rona, ka gonne lo ne lwa nna ba ba rategang mo go rona.” (1 Bathesalonika 2:8) Ka jalo fa re ntse re lwela go rata bengkarona ka lorato lwa boammaaruri, re a bo re dira se se dumalanang le thuto ya Baebele ya gore re letle maikutlo a a ntseng jalo a iponatshe ka tsela ya tlholego go na le go a gatelela.

Go Tlhokega Maiteko A a Sa Kgaotseng

Go ithuta go utlwa le go bontsha batho ba bangwe lorato ke kgato e e sa kgaotseng. Go dira jalo go re tlhoka maiteko a a tseneletseng ka gonne re tshwanetse go dira ka natla go fenya go sa itekanelang ga rona mmogo le go ganela tlhotlheletso e e maatla ya lefatshe leno le le se nang lorato. Le fa go ntse jalo, maduo a magolo a seno se a lereng a dira gore se nne sa botlhokwa thata.—Mathaio 24:12.

Le e leng le mo lefatsheng leno le le sa itekanelang, re ka nna ra ipelela dikamano tse di botoka le bengkarona mo go ka felelang ka boitumelo, kagiso le kgotsofalo e kgolo mo go rona le mo go ba bangwe. Ka go dira maiteko a a ntseng jalo, re ka itshupa re tshwanela tsholofelo e e kgatlhang ya go tshela ka bosakhutleng mo lefatsheng le lesha la Modimo. Mo godimo ga tsotlhe, ka go ithuta tsela e e gaisang ya lorato, re ka amogelwa le go segofadiwa ke Mmopi wa rona yo o lorato, gone jaanong le ka bosakhutleng!

[Ntlha e e kwa tlase]

[Ditshwantsho mo go tsebe 10]

Lorato lwa Bokeresete lo ka bontshiwa ka ditiro tsa bopelonomi

[Motswedi wa Setshwantsho mo go tsebe 8]

UN PHOTO 186226/​M. Grafman