Ikanye Jehofa Gore a go Nonotshe
1 Go na le mabaka a le mantsi a go bo re tshwanetse go ikanya Jehofa. Go rera dikgang tse di molemo “mo lefatsheng lotlhe le le nang le banni” ke tiro e e gwetlhang eleruri. (Math. 24:14) Ka metlha re lwa le mebele ya rona e e sa itekanelang. (Bar. 7:21-23) Mo godimo ga moo, “re lwa . . . le babusi [ba ba fetang batho ka nonofo] ba lefatshe ba lefifi leno.” (Baef. 6:11, 12) Go bonala sentle gore re tlhoka thuso. Re ka bona nonofo jang mo go Jehofa?
2 Ka Thapelo: Jehofa o naya batlhanka ba gagwe ba ba mo kopang moya wa gagwe o o boitshepo o o maatla. (Luke 11:13) A o ikutlwa o se na bokgoni jwa go naya bosupi ka ntlo le ntlo, mo mmileng kana ka thelefouno? A o tshaba go naya bosupi jo e seng jwa ka tlwaelo? A tlhoafalo ya gago e fokoditswe ke go bo batho ba sa kgatlhege mo tshimong ya lona? Go tweng fa e le gore o gatelelwa go tlogela tumelo ya gago kgotsa go roba bothokgami jwa gago? Ikanye Jehofa. Mo rapele gore a go nonotshe.—Bafil. 4:13.
3 Ka Thuto ya Botho: Fela jaaka mebele ya rona e nonotshiwa ke go ja dijo, le mo semoyeng re nonotshiwa ke go iphepa ka metlha ka Lefoko la Modimo le ka dikgatiso tsa “motlhanka yo o boikanyego le yo o botlhale.” (Math. 4:4; 24:45) E ne ya re fa Stanley Jones a bodiwa gore ke eng se se neng sa mo naya nonofo ya go itshokela dingwaga di le dintsi a tswaletswe a le nosi mo kgolegelong nngwe kwa China a se na Baebele, o ne a re: “Re ka kgona go ema re nitame mo tumelong. Gone mme, selo sa ntlha se re tshwanetseng go se dira ke go ithuta. Re ikutlwa re tlhaelwa ke nonofo fa re sa ithute.”
4 Ka go Nna Gone Kwa Dipokanong: Kwa dipokanong tsa Bokeresete mo lekgolong la ntlha la dingwaga, Judase le Silase ba ne “ba kgothatsa bakaulengwe ka dipuo di le dintsi ba bo ba ba nonotsha.” (Dit. 15:32) Le gompieno, dilo tse re di utlwang kwa dipokanong di nonotsha tsela e re anaanelang Jehofa ka yone, di aga tumelo ya rona e bile di re tlhotlheletsa go nna le seabe mo bodireding. Dipokano di dira gore re kopane ka metlha le ‘badirimmogo le rona ba bogosi jwa Modimo,’ ba e leng ‘thuso e e re nonotshang.’—Bakol. 4:11.
5 Re tlhoka thuso mo ‘dinakong tseno tsa mathata tse go leng boima go lebana la tsone.’ (2 Tim. 3:1) Malebana le batho ba ba bonang nonofo mo go Jehofa, re tlhomamisediwa jaana: “Ba tla tlhatlogela kwa godimo ka diphuka jaaka bontsu. Ba tla siana mme ga ba kitla ba lapa; ba tla tsamaya mme ga ba kitla ba felelwa ke nonofo.”—Isa. 40:31.