“Gore lo Tle Lo se Ka Lwa Tsena mo Thaelong”
“Nnang lo disitse mme lo rapele lo sa kgaotse, gore lo tle lo se ka lwa tsena mo thaelong.”—MATHAIO 26:41.
BOTHATA jo a neng a lebane le jone bo ne bo le bogolo thata go feta bope jo a kileng a lebana le jone. Jesu Keresete, Morwa Modimo, o ne a le gaufi le go wetsa botshelo jwa gagwe mo lefatsheng. Jesu o ne a lemoga gore go ise go ye kae o ne a tlile go tshwarwa, a atlholelwe loso, mme a kokotelwe mo koteng ya tlhokofatso. O ne a itse gore ditshwetso tsotlhe tsa gagwe le sengwe le sengwe se a se dirang se ne se tla ama leina la ga Rraagwe. Gape Jesu o ne a itse gore se se diregang se tlile go laola gore botshelo jwa batho jwa mo isagweng bo tla nna jang. O ne a dirang fa a ne a lebane le mathata ano otlhe?
2 Jesu o ne a ya kwa tshingwaneng ya Gethesemane le barutwa ba gagwe. O ne a rata go ya kwa tshingwaneng eno thata. Fa a fitlha koo o ne a katoga barutwa ba gagwe go sekae. Fa a le nosi o ne a kopa Rraagwe yo o kwa legodimong gore a mo neye nonofo, a mo tshololela sehuba ka thapelo e e tswang pelong—e seng gangwe fela, o dirile jalo gararo. Le fa Jesu a ne a itekanetse o ne a sa akanye gore o ka lebana le kgatelelo eo a le esi.—Mathaio 26:36-44.
3 Gompieno le rona re na le mathata a re lebaneng le one. Pelenyana mo boroutšhareng jono, re ne ra sekaseka bosupi jwa gore re tshela mo metlheng ya bofelo ya tsamaiso eno e e bosula. Dithaelo le mathata a a bakwang ke lefatshe la ga Satane di nna maswe go ya pele. Ditshwetso le dilo tse di dirwang ke mongwe le mongwe wa rona yo o ipolelang gore o direla Modimo wa boammaaruri di tlile go ama leina la gagwe le go ama thata tebelelo e mongwe le mongwe wa rona a nang le yone ya go bona botshelo mo lefatsheng la gagwe le lesha. Re rata Jehofa. Re batla go ‘itshoka go ya bokhutlong’—bokhutlo jwa botshelo jwa rona kgotsa jwa tsamaiso eno, go ikaegile ka gore ke sefe se se tla tlang pele mo go tsone. (Mathaio 24:13) Mme re ka dira jang gore re nne le boikutlo jwa go potlaka re bo re nne re disitse?
4 Ka gonne Jesu a ne a itse gore barutwa ba gagwe, ba bogologolo le ba gompieno, le bone ba ne ba tla lebana le mathata, o ne a ba rotloetsa jaana: “Nnang lo disitse mme lo rapele lo sa kgaotse, gore lo tle lo se ka lwa tsena mo thaelong.” (Mathaio 26:41) Mafoko ao a kaya eng mo go rona gompieno? O lebane le thaelo efe? Mme o ka nna jang o “disitse”?
Re Raelwa go Dira Eng?
5 Letsatsi le letsatsi rotlhe re lebana le thaelo ya go ineela mo “serung sa ga Diabolo.” (2 Timotheo 2:26) Baebele e re tlhagisa gore batho ba totatota Satane a ba tlhaselang ke baobamedi ba ga Jehofa. (1 Petere 5:8; Tshenolo 12:12, 17) Ka lebaka lefe? Ga se gore o batla go re bolaya. Satane o a bo a sa fenya fa re swa re ikanyega mo Modimong. Satane o lemoga gore Jehofa, ka nako ya gagwe e e tshwanetseng, o tla dirolola loso ka go tsosa baswi.—Luke 20:37, 38.
6 Satane o batla go senya sengwe se se botlhokwa go feta botshelo jwa rona jwa gone jaanong—boikanyego jwa rona mo Modimong. O leka ka natla go supa gore o ka re kgaoganya le Jehofa. Fa Satane a ka dira gore re se ka ra ikanyega—a dira gore re tlogele go rera dikgang tse di molemo kgotsa re tlhokomologe melao ya Bokeresete—o tla bo a fentse! (Baefeso 6:11-13) Ka jalo “Moraedi” o a re raela.—Mathaio 4:3.
7 “Maano a boferefere” a ga Satane ga a tshwane. (Baefeso 6:11) O ka nna a re raela ka go rata dikhumo, ka poifo, ka dipelaelo kgotsa ka go rata menate. Mme nngwe ya ditsela tsa gagwe tse a atlegang thata mo go tsone ke go dirisa go kgobega marapo. Ka gonne e le leferefere, o itse gore go kgobega marapo go ka re koafatsa ga dira gore go nne motlhofo gore a re tlhasele. (Diane 24:10) Ka gone o re raela gore re latlhele seditse segolobogolo fa re “gateletswe” mo maikutlong.—Pesalema 38:8.
8 Fa re ntse re atamela bokhutlo jwa malatsi a bofelo, go lebega dilo tse di bakang go kgobega marapo di ntse di oketsega, mme le rona di a re ama. (Bona lebokose le le reng “Dilo Dingwe Tse di Bakang go Kgobega Marapo.”) Go sa kgathalesege gore go kgobega marapo go bakwa ke eng, go ka re koafatsa tota. Go ‘ithekela nako e e re siametseng’ go diragatsa maikarabelo a semoya—go akaretsa go ithuta Baebele, go nna teng kwa dipokanong tsa Bokeresete le go nna le seabe mo bodireding—go ka nna thata fa o lapile mo mmeleng, mo tlhaloganyong le mo maikutlong. (Baefeso 5:15, 16) Gakologelwa gore Moraedi o batla gore o latlhele seditse. Mme eno ga se nako ya go goga dinao kgotsa ya go latlhegelwa ke boikutlo jwa rona jwa go potlaka malebana le dinako tse re tshelang mo go tsone! (Luke 21:34-36) O ka emelana jang le thaelo mme wa nna o disitse? Sekaseka dikakantsho tse nnè tse di ka go thusang.
“Rapelang lo sa Kgaotse”
9 Ikaege ka Jehofa ka thapelo. Gakologelwa sekao sa ga Jesu kwa tshingwaneng ya Gethesemane. O ne a dirang fa a ne a gateletswe thata mo maikutlong? O ne a kopa thuso mo go Jehofa, a rapela ka tlhoafalo mme “mofufutso wa gagwe wa nna jaaka marothodi a madi a wela fa fatshe.” (Luke 22:44) Akanya fela. Jesu o ne a itse Satane sentle. Fa Jesu a ne a le kwa legodimong o ne a bone dithaelo tsotlhe tse Satane a di dirisang go raela batlhanka ba Modimo. Mme Jesu o ne a sa tseye gore o ka kgona go fenya thaelo nngwe le nngwe e Moraedi a neng a ka mo raela ka yone. Fa e le gore Morwa yo o itekanetseng wa Modimo o ne a tsaya go le botlhokwa go rapela gore Modimo a mo thuse le go mo naya nonofo, go tweng ka rona?—1 Petere 2:21.
10 Gakologelwa gape gore fa Jesu a sena go rotloetsa barutwa ba gagwe gore ba ‘rapele ba sa kgaotse’ o ne a re: “Moya o tlhaga, mme nama yone e bokoa.” (Mathaio 26:41) Ke nama ya ga mang e Jesu a neng a bua ka yone? Go phepafetse gore ga se ya gagwe; nama ya gagwe e e itekanetseng e ne e se na bokoa bope. (1 Petere 2:22) Mme boemo jwa barutwa ba gagwe bo ne bo sa tshwane le jwa gagwe. Ka gonne ba ne ba ruile bosaitekanelang le ditshekamelo tsa jone tsa boleo, ba ne ba tla tlhoka thuso tota gore ba kgone go fenya thaelo. (Baroma 7:21-24) Ke gone ka moo a neng a ba rotloetsa, mmogo le Bakeresete botlhe ba boammaaruri ba ba nnileng teng morago ga bone, gore ba rapelele thuso go lebana le thaelo. (Mathaio 6:13) Jehofa o araba dithapelo tse di ntseng jalo. (Pesalema 65:2) Jang? Ka ditsela di ka nna pedi.
11 Sa ntlha, Modimo o re thusa go lemoga dithaelo. Dithaelo tsa ga Satane di tshwana le dirai tse di gasamisitsweng mo tseleng e e lefifi. Fa o sa di bone di ka nna tsa go tshwara. Jehofa o senola dirai tsa ga Satane ka Baebele le ka dikgatiso tse di theilweng mo Baebeleng, mme seo se re thusa gore re se ka ra ineela mo thaelong. Mo dingwageng tse di ntseng di feta, dikgatiso le dithulaganyo tsa dikopano tse dinnye le tse dikgolo gangwe le gape di ntse di re tlhagisa ka dikotsi tsa go tshaba batho, boitsholo jo bo sa siamang jwa tlhakanelodikobo, go rata dikhumo, le dithaelo tse dingwe tsa ga Satane. (Diane 29:25; 1 Bakorintha 10:8-11; 1 Timotheo 6:9, 10) A ga o itumelele go bo Jehofa a re tlhagisa ka maano a ga Satane? (2 Bakorintha 2:11) Ditlhagiso tseo tsotlhe ke karabo ya dithapelo tsa gago fa o kopa thuso go lwantsha thaelo.
12 Sa bobedi, Jehofa o araba dithapelo tsa rona ka go re naya nonofo e re e tlhokang go itshokela thaelo. Lefoko la gagwe la re: “Modimo . . . ga a na go lo lesa lo raelwa go feta se lo ka se itshokelang, mme mmogo le thaelo gape o tla dira tsela ya go tswa gore lo kgone go e itshokela.” (1 Bakorintha 10:13) Le ka motlha Modimo a ka se letle thaelo epe gore e re fekeetse mo re ka salang re se na nonofo ya semoya go e itshokela—fa re tswelela re ikaega ka ene. O re ‘direla tsela ya go tswa’ jang? O “naya moya o o boitshepo ba ba mo kopang.” (Luke 11:13) Moya oo o ka go thusa go gakologelwa melaometheo ya Baebele e e ka nonotshang boikemisetso jwa rona jwa go dira se se siameng e bile o re thusa go dira ditshwetso tse di botlhale. (Johane 14:26; Jakobe 1:5, 6) O ka re thusa go bontsha dinonofo tse di tlhokegang gore re kgone go fenya dikeletso tse di sa siamang. (Bagalatia 5:22, 23) E bile moya wa Modimo o ka tlhotlheletsa badumedi mmogo le rona go ‘nna thuso e e re nonotshang.’ (Bakolosa 4:11) A ga o itumelele go bo Jehofa a arabela ka tsela e e lorato jalo fa re mo rapela re kopa thuso?
O se Ka wa Lebelela Se se Ka se Kang sa Kgonega
13 Gore re nne re disitse, ga re a tshwanela go lebelela dilo tse di ka se kang tsa kgonega. Ka ntlha ya mathata a botshelo, rotlhe re felelwa ke nonofo ka dinako tse dingwe. Mme re tshwanetse go gakologelwa gore Modimo ga ise a ke a re solofetse gore re tla tshela re se na mathata mo tsamaisong eno e kgologolo ya dilo. Le mo metlheng ya go kwalwa ga Baebele, batlhanka ba Modimo ba ne ba lebana le mathata, go akaretsa pogiso, lehuma, go tshwenyega thata mo maikutlong le bolwetse.—Ditiro 8:1; 2 Bakorintha 8:1, 2; 1 Bathesalonika 5:14; 1 Timotheo 5:23.
14 Gompieno, le rona re na le mathata. Re ka lebana le pogiso, ra nna le ditlhobaelo ka tsa madi, ra tshwenyega thata mo maikutlong, ra lwala kgotsa ra boga ka ditsela tse dingwe. Fa Jehofa a ne a ka re sireletsa ka kgakgamatso mo mathateng otlhe, a seo se ne se se na go naya Satane lebaka la go kgoba Jehofa? (Diane 27:11) Jehofa o letla batlhanka ba gagwe gore ba raelwe le gore ba lekwe, mo ka dinako tse dingwe ba felelang ba sule pele ga nako ba bolawa ke baganetsi.—Johane 16:2.
15 Ka jalo, ke eng se Jehofa a se solofeditseng? Jaaka re bone fa godimo, o solofeditse gore o tla re thusa go itshokela thaelo epe fela e re ka lebanang le yone, fela fa re mo ikanya ka botlalo. (Diane 3:5, 6) O re sireletsa semoyeng ka Lefoko la gagwe, ka moya wa gagwe le ka phuthego ya gagwe, mme seo se re thusa go boloka kamano e re nang le yone le ene. Fa re na le kamano eno e ntle le ene, le fa re ka swa, re ntse re le bafenyi. Ga go na sepe, le fa e le loso tota, se se ka thibelang Modimo go duela batlhanka ba gagwe ba ba ikanyegang. (Bahebera 11:6) Mme mo lefatsheng le lesha le jaanong le leng gaufi, Jehofa ga a na go palelwa ke go diragatsa ditsholofetso tse dingwe tsotlhe tsa go segofatsa ba ba mo ratang.—Pesalema 145:16.
Gakologelwa Dikgang Tsa Botlhokwa Fano
16 Gore re itshoke go ya bokhutlong, re tshwanetse go gakologelwa dikgang tsa botlhokwa tse di amanang le go bo Modimo a letleletse boikepo. Fa ka dinako tse dingwe mathata a rona a lebega a re fekeetsa mo re batlang go itlhoboga, re tshwanetse go ikgakolola gore Satane o gwetlhile tshwanelo ya ga Jehofa ya bolaodi. Gape Motsietsi yoo o setse a kile a belaela boineelo le boikanyego jwa baobamedi ba Modimo. (Jobe 1:8-11; 2:3, 4) Dikgang tseo le tsela e Jehofa a tlhophileng go di rarabolola ka yone di botlhokwa go feta matshelo a rona. Jang?
17 Go bo Modimo a letleletse mathata ka nakwana go buletse ba bangwe sebaka sa go amogela boammaaruri. Akanya ka seno: Jesu o ne a boga gore re tle re bone botshelo. (Johane 3:16) A ga re anaanele seo? Mme a re iketleeleditse go itshokela mathata ka sebakanyana fela gore le ba bangwe ba bone botshelo? Gore re itshoke go ya bokhutlong, re tshwanetse go lemoga gore botlhale jwa ga Jehofa bo bogolo thata go feta jwa rona. (Isaia 55:9) O tla fedisa boikepo ka nako e e tshwanetseng thata ya go rarabololela dikgang tseno ruri le ka tsela e e tla re solegelang molemo ka bosakhutleng. Tota mme gone, o ne a ka tlhoka jang go dira jalo? Modimo ga a na tshiamololo!—Baroma 9:14-24.
“Atamelang Modimo”
18 Gore re nne le boikutlo jwa go potlaka, re tshwanetse go atamalana le Jehofa. Le ka motlha o se ka wa lebala gore Satane o dira sotlhe se a ka se kgonang go senya kamano ya rona e e molemo le Jehofa. Satane o batla gore re dumele gore bokhutlo ga bo kitla bo tla, le gore go rera dikgang tse di molemo kgotsa go tshela go ya ka melao ya Baebele ga go na mosola. Mme ke “moaki le ramaaka.” (Johane 8:44) Re tshwanetse go ikemisetsa go “ganetsa Diabolo.” Le ka motlha ga re a tshwanela go leba kamano ya rona le Jehofa e le selo se se sa reng sepe. Baebele e re rotloetsa jaana ka lorato: “Atamelang Modimo, mme o tla lo atamela.” (Jakobe 4:7, 8) O ka atamela Jehofa jang?
19 Go tlhatlhanya re na le boikutlo jwa go rapela go botlhokwa. Fa mathata a botshelo a lebega a go fekeetsa, tshololela Jehofa maikutlo a gago. Fa o mmolelela fela ka tlhamalalo se bothata e leng sone, go tla nna motlhofo gore o bone kafa a arabang dithapelo tsa gago ka teng. Ga se ka metlha o tla bonang karabo e o e lebeletseng, mme fa o batla go mo tlotla le go nna o ikanyega, o tla go thusa gore o kgone go itshoka ka katlego. (1 Johane 5:14) Fa o ntse o bona tsela e a go kaelang ka yone mo botshelong jwa gago seno se tla go thusa gore o atamalane le ene. Go bala le go akanya ka dinonofo tsa ga Jehofa le ditsela tsa gagwe, jaaka di kwadilwe mo Baebeleng, le gone go botlhokwa. Go tlhatlhanya jalo go go thusa gore o mo itse botoka; go tlhotlheletsa pelo ya gago mme go dira gore o mo rate thata. (Pesalema 19:14) Mme lorato loo, go feta le fa e le eng se sengwe, lo tla go thusa go ganetsa thaelo le gore o nne o disitse.—1 Johane 5:3.
20 Gore re nne gaufi le Jehofa, gape go botlhokwa gore re nne gaufi le badumedi mmogo le rona. Go tla tlotlwa ka kgang eno mo karolong ya bofelo ya boroutšhara jono.
DIPOTSO TSA THUTO
• Ke eng se Jesu a neng a se dira fa a ne a le kafa tlase ga kgatelelo e kgolo, a tloga a wetsa botshelo jwa gagwe jwa mo lefatsheng, mme o ne a rotloetsa barutwa ba gagwe gore ba dire eng? (Ser. 1-4)
• Ke eng fa Satane a tlhasela thata baobamedi ba ga Jehofa, mme o re raela ka ditsela dife? (Ser. 5-8)
• Gore re kgone go ganetsa thaelo, ke eng fa re tshwanetse go rapela ka metlha (Ser. 9-12), re sa tshwanela go lebelela dilo tse di ka se kang tsa kgonega (Ser. 13-15), re tshwanetse go gakologelwa dikgang tsa botlhokwa (Dir. 16-17), e bile re tshwanetse go “atamalana le Modimo” (Dir. 18-20)?
[Lebokoso mo go tsebe 25]
Dilo Dingwe Tse di Bakang go Kgobega Marapo
Botsogo/botsofe. Fa re tshwerwe ke bolwetse jo bo sa foleng kgotsa fa botsofe bo dira gore re se ka ra kgona go dira dilo dingwe, re ka nna ra utlwa botlhoko thata mo maikutlong ka gonne re sa kgone go dira mo go oketsegileng fa re direla Modimo.—Bahebera 6:10.
Go swaba. Re ka nna ra kgobega marapo fa re bona batho ba bantsi ba sa kgatlhege fa re rera Lefoko la Modimo.—Diane 13:12.
Go ikutlwa o se na mosola. Motho o ka nna a simolola go dumela gore ga a ratwe ke ope, le ke Jehofa tota, ka ntlha ya go bo a sa ka a tshwarwa sentle ka lobaka lo loleele.—1 Johane 3:19, 20.
Go utlwisiwa botlhoko. Fa motho a kgopisitswe thata ke modumedi ka ene, o ka nna a tshwenyega thata mo a ka nnang a batla go tlogela go ya dipokanong tsa Bokeresete kgotsa go ya tirelong ya tshimo.—Luke 17:1.
Pogiso. Batho ba bangwe ba ba sa dumeleng dilo tse o di dumelang ba ka nna ba go ganetsa, ba go bogisa kana ba go sotla.—2 Timotheo 3:12; 2 Petere 3:3, 4.
[Setshwantsho mo go tsebe 26]
Jesu o ne a re rotloetsa go “rapela re sa kgaotse” go bona thuso ya go lwantsha thaelo