“Mo Godimo ga Dilo Tsotlhe, Ratanang ka Lorato lo Logolo”

“Bokhutlo jwa dilo tsotlhe bo atametse. . . . Mo godimo ga dilo tsotlhe, ratanang ka lorato lo logolo.”—1 PETERE 4:7, 8.

JESU o ne a itse gore diura tsa gagwe tsa bofelo a na le baaposetoloi ba gagwe di botlhokwa. O ne a itse se se neng se tlile go ba diragalela. Ba ne ba na le tiro e ntsi e ba neng ba tshwanetse go e dira, mme ba ne ba tla tlhoiwa le go bogisiwa jaaka ene. (Johane 15:18-20) O ne a ba gakolola botlhokwa jwa go “ratana” ka makgetlho a feta gangwe mo bosigong jwa bofelo ba le mmogo.—Johane 13:34, 35; 15:12, 13, 17.

² Moaposetoloi Petere, yo o neng a le teng mo bosigong joo, o ne a mo tlhaloganya sentle. Dingwaga di le dintsi morago ga moo, fa Petere a ne a kwala pele ga Jerusalema e senngwa, o ne a gatelela botlhokwa jwa lorato. O ne a gakolola Bakeresete jaana: “Bokhutlo jwa dilo tsotlhe bo atametse. . . . Mo godimo ga dilo tsotlhe, ratanang ka lorato lo logolo.” (1 Petere 4:7, 8) Mafoko a ga Petere a na le bokao jwa botlhokwa mo go rona ba re tshelang mo “metlheng ya bofelo” ya tsamaiso ya gone jaanong ya dilo. (2 Timotheo 3:1) “Lorato lo logolo” ke eng? Ke ka ntlha yang fa go le botlhokwa gore re rate ba bangwe jalo? Mme re ka bontsha jang gore re ba rata ka lorato loo?

“Lorato lo Logolo”—Ke Eng?

³ Batho ba bantsi ba akanya gore lorato ke boikutlo jo bo tshwanetseng go itlela fela mo mothong. Mme Petere o ne a sa bue ka mofuta mongwe le mongwe fela wa lorato; o ne a bua ka lorato lwa maemo a a kwa godimo thata. Lefoko “lorato” mo go 1 Petere 4:8 ke thanolo ya lefoko la Segerika a·gaʹpe. Lefoko leo le raya lorato lo e seng lwa boithati, lo lo kaelwang, kgotsa lo lo laolwang ke molaomotheo. Buka nngwe ya re: “Lorato lwa agape ke lorato lo motho a kgonang go lo tlhagolela, ka gonne ga se lorato fela lwa maikutlo mme motho o nna le lone fa a ikemiseditse go lo bontsha.” Ka tlhago fela re na le mokgwa wa bopelotshetlha mme re tshwanetse go gakololwa gore re bontshe ba bangwe lorato, re dira jalo ka ditsela tse melaometheo ya Modimo e re kaelang gore re dire ka tsone.—Genesise 8:21; Baroma 5:12.

⁴ Seno ga se reye gore re tshwanetse go ratana ka gonne re patelesega go dira jalo. A·gaʹpe ga se lorato lo lo se nang maikutlo. Petere o ne a re re tshwanetse go ‘ratana ka lorato lo logolo [ke gore, “lo lo atologileng”].’a (Kingdom Interlinear) Le fa go ntse jalo, lorato loo lo tlhoka gore motho a dire maiteko. Mabapi le lefoko la Segerika le le ranotsweng go twe “lo logolo,” mokanoki mongwe a re: “Le dira gore motho a akanye ka motabogi a gagamaditse mesifa ya gagwe fa a iteka ka natla kwa bowelong jwa lobelo.”

⁵ Ga re a tshwanela go bontsha lorato fela fa go le motlhofo go dira jalo, kana go rata fela batho ba ba rileng. Lorato lwa Bokeresete lo tlhoka gore re “atolose” dipelo tsa rona, re bontshe ba bangwe lorato le fa tota go ka tswa go se motlhofo go dira jalo. (2 Bakorintha 6:11-13) Go a bonala gore re tshwanetse go tlhagolela lorato lwa mofuta ono le go nna re lo bontsha, fela jaaka motabogi a tshwanetse go ikatisa le go tokafatsa bokgoni jwa gagwe. Go botlhokwa thata gore re ratane ka lorato lo lo ntseng jalo. Ka ntlha yang? Ka mabaka a ka nna mararo.

Ke ka Ntlha Yang fa re Tshwanetse go Ratana?

⁶ Sa ntlha, ke ka gonne “lorato lo tswa kwa Modimong.” (1 Johane 4:7) Jehofa, Motswedi wa nonofo eno e e rategang, o re ratile pele. Moaposetoloi Johane a re: “Lorato lwa Modimo lo ne lwa bonadiwa ka seno mo go rona, ka gonne Modimo o ne a romela Morwawe yo o tsetsweng a le esi mo lefatsheng gore re bone botshelo ka ene.” (1 Johane 4:9) Morwa Modimo o ‘rometswe’ ka go nna motho, a diragatsa bodiredi jwa gagwe le go swela mo koteng ya tlhokofatso—fela gore “re bone botshelo.” Re tshwanetse go arabela jang mo loratong lono lo logolo lo Modimo a re bontshang lone? Johane a re: “Fa e le gore Modimo o re ratile jaana, rona ka borona re patelesega go ratana.” (1 Johane 4:11) Ela tlhoko gore Johane a re, “Fa e le gore Modimo o re ratile jaana”—e seng wena fela mme rona. Kgang eno e utlwala sentle: Fa Modimo a rata baobamedi ka rona, le rona re tshwanetse go ba rata.

⁷ Sa bobedi, go botlhokwa thata gore re ratane thata jaanong gore re kgone go thusa bakaulengwe ba rona ba ba tlhokang ka gonne “bokhutlo jwa dilo tsotlhe bo atametse.” (1 Petere 4:7) Re tshela mo ‘dinakong tsa mathata tse go leng boima go lebana le tsone.’ (2 Timotheo 3:1) Maemo a lefatshe, masetlapelo a tlholego le kganetso di re tlisetsa mathata. Re tlhoka go atamalana fa re le mo maemong a a lekang. Lorato lo logolo lo tla dira gore re utlwane mme lo tla re tlhotlheletsa gore re “tlhokomelane.”—1 Bakorintha 12:25, 26.

⁸ Sa boraro, re tshwanetse go ratana ka gonne ga re batle go “naya Diabolo sebaka” gore a re tlhasele. (Baefeso 4:27) Satane o bonako go dirisa bosaitekanelang jwa badumedi ka rona—makoa a bone, diphoso tsa bone—e le dikgoreletsi. A go bua fela ga mongwe a sa akanya kgotsa go sa dire ka bopelonomi ga mongwe go tla dira gore o tlogele phuthego? (Diane 12:18) Go ka se nne jalo fa re ratana ka lorato lo logolo! Lorato loo lo re thusa go nna ka kagiso le go direla Modimo re utlwana re le “seoposengwe.”—Sefania 3:9.

Kafa re ka Bontshang ka Teng Gore re Rata ba Bangwe

⁹ Go bontsha lorato go tshwanetse ga simolola kwa gae. Jesu o ne a re balatedi ba gagwe ba boammaaruri ba ne ba tla tlhaolwa ka lorato lo ba ratanang ka lone. (Johane 13:34, 35) Lorato ga lo a tshwanela go bontshiwa mo phuthegong fela mme gape lo tshwanetse lwa bontshiwa mo lapeng—mo balekaneng ba lenyalo le mo gare ga batsadi le bana. Ga go a lekana go ikutlwa fela o rata maloko a lelapa; re tshwanetse go bontsha lorato loo ka ditsela tse di molemo.

¹⁰ Balekane ba lenyalo ba ka bontshana jang lorato? Monna yo tota a ratang mosadi wa gagwe o mmontsha ka mafoko le ka ditiro—mo bathong le fa ba le kwa thoko—gore o a mo anaanela. O tlotla seriti sa gagwe jaaka motho e bile o akanyetsa dikakanyo tsa gagwe, tsela e a lebang dilo ka yone le maikutlo a gagwe. (1 Petere 3:7) O baya boitumelo jwa mosadi wa gagwe kwa pele ga jwa gagwe, mme o dira sotlhe se a ka se kgonang go mo tlhokomela ka dilo tse a di tlhokang mo nameng, semoyeng le mo maikutlong. (Baefeso 5:25, 28) Mosadi yo tota a ratang monna wa gagwe o mo naya “tlotlo e e boteng” le fa ka dinako tse dingwe monna wa gagwe a sa dire jaaka a lebeletse. (Baefeso 5:22, 33) O ema monna wa gagwe nokeng e bile o a mo ikobela, ga a lebelele gore a dire dilo tse a sa kgoneng go di dira, mme o dirisana sentle le ene ka go baya dilo tsa semoya kwa pele.—Genesise 2:18; Mathaio 6:33.

¹¹ Batsadi, lo ka bontsha jang gore lo rata bana ba lona? Go dira ga lona ka natla go ba naya dilo tse ba di tlhokang nameng ke bosupi jwa gore lo a ba rata. (1 Timotheo 5:8) Mme bana ba tlhoka se se fetang dijo, diaparo le bonno. Gore ba tle ba gole ba rata Modimo e bile ba mo direla, ba tlhoka go thapisiwa ka tsela ya semoya. (Diane 22:6) Seo se raya go ipha nako lo le lelapa ya go ithuta Baebele, go nna le seabe mo bodireding le go nna teng kwa dipokanong tsa Bokeresete. (Duteronome 6:4-7) Gore re dire ditiro tseo ka metlha go tlhokega gore re itime dilo dingwe, segolobogolo mo dinakong tseno tsa mathata. Go tshwenyega ka bana ba gago le maiteko a o a dirang go ba tlhokomela ka dilo tse ba di tlhokang semoyeng go bontsha lorato, ka gonne ka go dira jalo o bontsha gore o akantse ka se se tla ba tswelang molemo go ya go ile.—Johane 17:3.

¹² Gape go botlhokwa gore batsadi ba bontshe lorato ka go tlamela bana ba bone ka dilo tse ba di tlhokang mo maikutlong. Bana ba bokoa; o tshwanetse go tlhomamisetsa dipelonyana tsa bone tse dinnye gore o a ba rata. Ba bolelele gore o a ba rata, mme o ba bontshe lorato fela thata, ka gonne fa o dira jalo o ba tlhomamisetsa gore ke batho ba ba ka ratwang e bile ba na le mosola. Ba akgole ka lorato go tswa pelong, ka gonne seo se dira gore ba bone gore o bona maiteko a bone e bile o a a anaanela. Ba otlhaye ka lorato, ka gonne kgalemelo e e ntseng jalo e ba bontsha gore o amega ka gore ba nna batho ba mofuta mang. (Baefeso 6:4) Go ba bontsha lorato ka ditsela tse di ntseng jalo go a thusa gore o nne le lelapa le le itumetseng le le utlwanang le le tla nnang mo boemong jo bo molemo gore le ka kgona go emelana le mathata a metlha ya bofelo.

¹³ Lorato lo re tlhotlheletsa go itlhokomolosa diphoso tsa ba bangwe. Gakologelwa gore fa Petere a ne a rotloetsa babadi ba gagwe gore ba ‘ratane ka lorato lo logolo’ o ne a ntsha lebaka la go bo seno se le botlhokwa: “Ka gonne lorato lo bipa maleo a le mantsi.” (1 Petere 4:8) Go “bipa” maleo ga go reye go ‘fitlha’ maleo a a masisi. Maleo a a ntseng jalo a tshwanetse go begelwa ba ba nang le maikarabelo mo phuthegong mme bone ba dire sengwe ka one. (Lefitiko 5:1; Diane 29:24) E tla bo e se go bontsha lorato le e seng—e bile go sa tsamaisane le Dikwalo—go letlelela batho ba ba leofang ka tsela e e feteletseng gore ba tswelele ba utlwisa batho ba ba se nang molato botlhoko kgotsa ba ba sotla.—1 Bakorintha 5:9-13.

¹⁴ Gantsi, diphoso le melato ya badumedi mmogo le rona ga e masisi. Rotlhe re a kgotswa ka lefoko kgotsa ka go dira sengwe, re a swabisana kgotsa re utlwisana botlhoko. (Jakobe 3:2) A re tshwanetse go nna bonako go bua ka makoa a batho ba bangwe mo go ba bangwe? Go dira jalo go tla baka go tlhoka kutlwano mo phuthegong. (Baefeso 4:1-3) Fa re laolwa ke lorato, ga re na go “senola molato” wa modumedi mmogo ka rona. (Pesalema 50:20) Fela jaaka polasetara le pente di bipa dikarolo tse di seng dintle tsa lebota, fela jalo le lorato lo bipa diphoso tsa ba bangwe.—Diane 17:9.

¹⁵ Lorato lo tla dira gore re thuse ba tota ba tlhokang thuso. Jaaka maemo mo metlheng ya bofelo a senyegela pele, go ka nna le dinako tse badumedi mmogo le rona ba tlhokang thuso ya dilo tse di bonalang le ya dilo tse dingwe. (1 Johane 3:17, 18) Ka sekai, a mongwe mo phuthegong ya rona o na le mathata ka tsa madi kgotsa o latlhegetswe ke tiro? Fa go ntse jalo gongwe re ka mo thusa ka dilo tse di bonalang, go ya kafa maemo a rona a re letlang ka teng. (Diane 3:27, 28; Jakobe 2:14-17) A legae la motlholagadi mongwe yo o tsofetseng le tlhoka go baakanngwa? Gongwe re ka nna ba ntlha go tsaya kgato go thusa ka go dira tiro nngwe fa go tshwanela.—Jakobe 1:27.

¹⁶ Ga re a tshwanela go bontsha fela batho ba ba nnang mo lefelong la rona lorato. Ka dinako tse dingwe re ka nna ra utlwa dipego ka batlhanka ba Modimo mo dinageng tse dingwe ba ba wetsweng ke mathata a ditsuatsue, dithoromo tsa lefatshe, kgotsa dikgaruru tsa selegae. Ba ka tswa ba tlhoka dijo, diaparo le dilo tse dingwe. Ga se selo sa botlhokwa gore ke ba morafe o sele kgotsa ba setso se sele. Re ‘rata bakaulengwe botlhe.’ (1 Petere 2:17) Ka jalo, jaaka diphuthego tsa lekgolo la ntlha la dingwaga, re itumelela go tshegetsa dithuso tsa namolo tse di rulagantsweng go ba thusa. (Ditiro 11:27-30; Baroma 15:26) Fa re bontsha lorato ka ditsela tseo tsotlhe, re nonotsha sebofo sa lorato se se re dirang seoposengwe mo metlheng eno ya bofelo.—Bakolosa 3:14.

¹⁷ Lorato lo re tlhotlheletsa go bolelela ba bangwe dikgang tse di molemo tsa Bogosi Jwa Modimo. Sekaseka sekai sa ga Jesu. Ke ka ntlha yang fa a ne a rera e bile a ruta? O ne a tlhotlheletsega go “tlhomogela pelo” boidiidi jwa batho ka gonne ba ne ba le mo seemong se se tlhomolang pelo semoyeng. (Mareko 6:34) Ba ne ba tlhokomologilwe e bile ba tsieditswe ke badisa ba maaka ba bodumedi, ba ba neng ba tshwanetse go ba ruta boammaaruri jwa semoya le go ba naya tsholofelo. Ka gonne Jesu a ne a tlhotlhelediwa ke lorato lo lo boteng lo lo tswang pelong le go nna kutlwelobotlhoko, o ne a gomotsa batho ka “dikgang tse di molemo tsa bogosi jwa Modimo.”—Luke 4:16-21, 43.

¹⁸ Le gompieno, batho ba bantsi ba tlogetswe fela ba sa tlhokomelwe ka dilo tsa semoya e bile ba tsieditswe. Fela jaaka Jesu, fa re le bonako go lemoga dilo tse batho ba ba iseng ba itse Modimo wa boammaaruri ba di tlhokang, lorato le kutlwelobotlhoko di tla re tlhotlheletsa go ba bolelela dikgang tse di molemo tsa Bogosi Jwa Modimo. (Mathaio 6:9, 10; 24:14) Ka gonne go setse nako e khutshwane, go potlakile le go feta gore re rere molaetsa ono o o bolokang matshelo.—1 Timotheo 4:16.

“Bokhutlo Jwa Dilo Tsotlhe bo Atametse”

¹⁹ Gakologelwa, Petere o ne a simolola kgakololo ya gagwe ya gore re ratane ka mafoko ano: “Bokhutlo jwa dilo tsotlhe bo atametse.” (1 Petere 4:7) Go ise go ye kae lefatshe leno le le boikepo le tla emisediwa ke lefatshe le lesha le le siameng la Modimo. (2 Petere 3:13) Ka jalo, gompieno ga se nako ya go tsaya dilo motlhofo. Jesu o ne a re tlhagisa jaana: “Itlhokomeleng gore dipelo tsa lona di se ka le ka motlha tsa imelwa ke go ja mo go feteletseng le ke go nwa bobe le ke ditlhobaelo tsa botshelo, mme ka tshoganyetso letsatsi leo la lo wela ka ponyo ya leitlho jaaka seru.”—Luke 21:34, 35.

²⁰ Ka jalo a re ‘nneng re disitse,’ ka go nna re ntshitse matlho dinameng go bona gore jaanong re tshela mo lobakeng lofe lwa nako. (Mathaio 24:42) A re itiseng mo dithaelong tsa ga Satane tse di ka re itayang tsebe. Le ka motlha re se ka ra letla lefatshe leno le le se nang lorato go re thibela go bontsha ba bangwe lorato. Sa botlhokwa le go feta, a re atamalaneng thata le Modimo wa boammaaruri, Jehofa, yo mo bogautshwaneng Bogosi jwa gagwe jwa Bomesia bo tla diragatsang maikaelelo a gagwe a a molemolemo mo lefatsheng leno.—Tshenolo 21:4, 5.

[Ntlha e e kwa tlase]

DIPOTSO TSA THUTO

• Jesu o ne a naya barutwa ba gagwe kgakololo efe fa a ne a kgaogana le bone, mme ke eng se se bontshang gore Petere o ne a mo tlhaloganya sentle? (Ser. 1-2)

• “Lorato lo logolo” ke eng? (Ser. 3-5)

• Ke ka ntlha yang fa re tshwanetse go ratana? (Ser. 6-8)

• O ka bontsha jang gore o rata ba bangwe? (Ser. 9-18)

• Ke ka ntlha yang fa eno e se nako ya go tsaya dilo motlhofo, mme ke eng se re tshwanetseng go ikemisetsa go se dira? (Ser. 19-20)

[Setshwantsho mo go tsebe  29]

Lelapa le le utlwanang le mo boemong jo bo botoka jwa go lebana le mathata a metlha ya bofelo

[Setshwantsho mo go tsebe  30]

Lorato lo re tlhotlheletsa gore re thuse ba ba tlhokang thuso tota

[Setshwantsho mo go tsebe  31]

Go bolelela ba bangwe dikgang tse di molemo tsa Bogosi Jwa Modimo ke go bontsha lorato