Thuto 2

Modimo ke Mang?

Modimo wa boammaaruri ke ofe mme leina la gagwe ke mang? (1, 2)

O na le mmele wa mofuta ofe? (3)

Dinonofo tsa gagwe tse di tlhomologileng ke dife? (4)

A re ka dirisa ditshwantsho le matshwao fa re mo obamela? (5)

Ke ditsela dife tse pedi tse re ka ithutang Modimo ka tsone? (6)

1. Batho ba obamela dilo tse dintsi. Mme lefa go ntse jalo Baebele e re bolelela gore go na le Modimo o le mongwe fela wa BOAMMAARURI. O bopile sengwe le sengwe se se kwa legodimong le se se mo lefatsheng. E re ka a re file botshelo, ke Ene fela yo re tshwanetseng go mo obamela.—1 Bakorinthe 8:5, 6; Tshenolo 4:11.

2. Modimo o na le direto tse dintsi mme o na le leina le le lengwe fela. Leina leo ke JEHOFA. Mo Dibaebeleng tse dintsi, leina la Modimo le ntshitswe mme la emisediwa ka direto tsa MORENA kana MODIMO. Mme fa Baebele e ne e kwalwa, leina Jehofa le ne le tlhagelela ka makgetlho a a ka nang 7 000 mo go yone!—Ekesodo 3:15; Pesalema 83:18.

3. Jehofa o na le mmele mme ga o tshwane le wa rona. “Modimo ke Mowa,” Baebele ya rialo. (Johane 4:24) Moya ke mofuta wa setshedi se se kwa godimo thata ga rona. Ga go na motho ope yo o kileng a bona Modimo. Jehofa o nna kwa legodimong mme o kgona go bona dilo tsotlhe. (Pesalema 11:4, 5; Johane 1:18) Lefa go ntse jalo, moya o o boitshepo ke eng? Ga se motho yo o tshwanang le Modimo. Go na le moo, ke maatla a Modimo a a dirang.—Pesalema 104:30.

4. Baebele e re senolela botho jwa ga Jehofa. E bontsha gore dinonofo tsa gagwe tse di tlhomologileng ke lorato, tshiamiso, botlhale le thata. (Duteronome 32:4; Jobe 12:13; Isaia 40:26; 1 Johane 4:8) Baebele e re bolelela gape gore o kutlwelobotlhoko, o pelonomi, wa itshwarela, o pelotshweu e bile o pelotelele. Rona jaaka bana ba ba kutlo, re tshwanetse go leka go mo etsa.—Baefeso 5:1, 2.

5. A re tshwanetse go ikobela kana ra rapela ditshwantsho, kana matshwao mo kobamelong ya rona? Nnyaa! (Ekesodo 20:4, 5) Jehofa a re re tshwanetse go obamela ene fela. A ka se ka a naya ope kana sepe kgalalelo ya gagwe. Ditshwantsho ga di na maatla ape a go re thusa.—Pesalema 115:4-8; Isaia 42:8.

6. Re ka kgona go itse Modimo botoka jang? Tsela e nngwe ke ka go ela tlhoko dilo tse a di bopileng mme re bo re tlhatlhanya ka se di re bolelelang sone. Popo ya Modimo e re bontsha gore o na le maatla a magolo le botlhale jo bogolo. Re bona lorato lwa gagwe mo go sengwe le sengwe se a se dirileng. (Pesalema 19:1-6; Baroma 1:20) Tsela e nngwe e re ka ithutang ka Modimo ka yone ke ka go ithuta Baebele. Mo go yone o re bolelela mo gontsi malebana le gore ke Modimo o o ntseng jang. Mme gape o re bolelela ka maikaelelo a gagwe le gore o batla gore re dire eng.—Amose 3:7; 2 Timotheo 3:16, 17.

[Ditshwantsho mo go tsebe 5]

Re ithuta ka Modimo mo popong le go tswa mo Baebeleng