Kafa re ka Dirisang Dipuisano Tse di Akantshiwang ka Gone

1. Re tshwanetse go leba jang dipuisano tse di akantshitsweng tse re di neilweng?

¹ Tirelo ya Rona ya Bogosi e nna e ntse e na le dipuisano tse di akantshiwang tse re ka di dirisang go tsamaisa dimakasine tsa rona le dikgatiso tse dingwe. Ga re tlhoke go di bua fela jaaka di ntse fa re le mo bodireding jwa tshimo. Di diretswe go re naya fela sekai sa se re ka se buang. Gantsi re tla nna le matswela a a botoka fa re dirisa mafoko a rona. Fa re bua ka tsela e e tlwaelegileng fela, seno se dira gore mong wa ntlo a ritibale e bile go bontsha gore re tlhomamisegile ka se re se buang.—2 Bakor. 2:17; 1 Bathes. 1:5.

2. Ke ka ntlha yang fa re tshwanetse go akanyetsa dingwao tsa mo lefelong la rona fa re baakanyetsa dipuisano tsa rona?

² Nna o Fetofetole Puisano ya Gago: Tsela e re bolelelang batho dikgang tse di molemo ka yone e amiwa thata ke dingwao tsa lefelo la rona. A go a kgonega gore o dumedise mong wa ntlo pele o bo o setse o simolola motlotlo wa gago, kana a batho ba mo lefelong la lona ba lebeletse gore o simolole fela ka go bua gore o tlile ka eng? Seno se farologana go ya ka mafelo mme ka dinako tse dingwe le go ya ka batho. Gape re tshwanetse go nna le temogo fa re botsa dipotso. Ka dinako tse dingwe dipotso tse di siameng mo bathong ba lefelo lengwe, e ka nna ya se ka ya nna tse di siameng mo go ba lefelo le lengwe. Ka jalo, re tshwanetse go nna botlhale mme re fetole dipuisano tsa rona gore di tshwanele batho ba lefelo leo.

3. Ke ka ntlha yang fa re tshwanetse go akanyetsa tsela e batho ba re tlotlang le bone ba godisitsweng ka yone le tsela e ba akanyang ka yone?

³ Mo godimo ga moo, re tshwanetse go akanya ka tsela e batho ba mo lefelong la rona ba godisitsweng ka yone le kafa ba akanyang ka gone fa re baakanyetsa tirelo ya tshimo. Ka sekai, o ne o se kitla o tlotla ka Mathaio 6:9, 10 le Mokatoliki ka tsela e o neng o tla tlotla ka yone le motho yo o sa itseng thapelo ya “Rara wa Rona.” Fa re akanyetsa kwa pele, gantsi re ka kgona go fetofetola dipuisano tsa rona gore di tshwanele batho ba re kopanang le bone mo bodireding jwa rona botoka.—1 Bakor. 9:20-23.

4. Ke ka ntlha yang fa go le botlhokwa gore re baakanyetse sentle?

⁴ Le fa gone re ikaeletse go dirisa nngwe ya dipuisano tse di akantshitsweng fano ka tsela e e kwadilweng ka yone, re tshwanetse go baakanyetsa sentle. Re tshwanetse go bala ka kelotlhoko setlhogo kana kgaolo e re ikaeletseng go e dirisa mme re batle dintlha tse di ka dirang gore motho a kgatlhege. Morago ga moo o bo o akaretsa dintlha tseno mo puisanong ya gago. Re ka kgona go tsamaisa dikgatiso tsa rona ka tlhagafalo fa fela re itse tshedimosetso e e molemo e di e tshwereng.

5. Ke ka ntlha yang fa re ka dirisa puisano e sele, mme re ka dira seno jang?

⁵ Go Dirisa Dipuisano Tse Dingwe: A re tshwanetse go dirisa fela dipuisano tse di akantshitsweng? Nnyaa. Fa e le gore o go fitlhela go le motlhofo go dirisa mokgwa o mongwe kana temana e nngwe, dira jalo. Re tshwanetse go dira jalo segolobogolo ka dimakasine, re batle ditshono tsa go tlotla ka ditlhogo tse dingwe tse di mo teng ga makasine tse di ka kgatlhang batho thata mo tshimong ya rona. Fa go na le dipontsho tsa tirelo ya tshimo tse di tshwanetseng go dirwa mo Pokanong ya Tirelo, go ka dirwa dithulaganyo tsa gore go dirisiwe mokgwa ope fela o o ka tshwanelang tshimo ya lona. Fa go dirwa jalo, botlhe ba ka thusiwa go bolelela ba bangwe dikgang tse di molemo ka tsela e e nang le matswela.

Pego ya Tirelo ya September

Palo Babul. Babul.

ya Bab. Thus. Metlha

Botswana 1 388 53 83

Lesotho 3 008 112 268

Namibia 1 207 32 75

St. Helena 125 - 1

South Africa 75 219 1 789 6 531

Swaziland 2 166 58 179

Kafa re ka Buelelang Dimakasine ka Gone

Tora ya Tebelo Jan. 15

“Rotlhe re eletsa gore rona le bana ba rona re tshele botshelo jo bo botoka, mme batho ba le bantsi ba akanya gore ga ba ka ke ba kgona go dira jalo. A o akanya gore re ka laola isagwe ya rona? [Mo letle gore a arabe.] Makasine ono o bontsha go tswa mo Baebeleng gore ga se gore ga go na se re ka se dirang, mme isagwe ya rona e ikaegile ka ditshwetso tse re di dirang gone jaanong.” Bala Duteronome 30:19.

Tora ya Tebelo Feb. 1

“A ga go utlwise botlhoko go bo batho ba le bantsi jaana gompieno ba gatelelwa le go amiwa ke thubakanyo? [Umaka tiragalo nngwe ya bosheng e e itsegeng mo lefelong la lona, mme o mo letle gore a arabe.] Makasine ono o tlotla ka tsela e Modimo a lebang botshelo jwa motho ka yone. E tlhalosa gape kafa a tla re gololang ka gone mo pogong e re lebaneng le yone gompieno.” Bala Pesalema 72:12-14.

Tsogang! Feb. 8

“Fa re lwala, rotlhe re anaanela ngaka e e akanyetsang kafa re ikutlwang ka gone. Mme gone a o akanya gore balwetse ba le bantsi ba akanyetsa maikutlo a dingaka tsa bone? [Mo letle gore a arabe.] Makasine ono o tlotla ka dikgwetlho tse dingaka di lebaneng le tsone le se se tla diregang mo go tsa kalafi mo nakong e e tlang.” Bala Isaia 33:24.

“Bongwe jwa bothata jo bogolo jo re lebaneng le jone gompieno ke go gatelelwa thata mo maikutlong. A ga o dumalane le seo? [Mo letle gore arabe.] Baebele e ne ya bolelela pele sentle gore go ne go tla nna jalo. [Bala 2 Timotheo 3:1.] Makasine ono o na le dikakantsho tse di molemo tse di ka thusang wena le lelapa la gago go itshokela go gatelelwa thata mo maikutlong.”