Ruta Batho ba ba Pelonomi go Tsamaya mo Tseleng ya Modimo
1. Go akaretsa eng go dira barutwa?
1 Barutwa ba ga Jesu ba lekgolo la ntlha la dingwaga go ne go twe ke ba “Tsela.” (Dit. 9:2) Bokeresete jwa boammaaruri bo akaretsa tsela yotlhe e motho a tshelang ka yone. (Dia. 3:5, 6) Ka jalo, fa re tshwere dithuto tsa Baebele, ga go a lekana fela go ruta batho kitso ya boammaaruri ya dithuto tsa Baebele. Re tshwanetse gape go thusa diithuti tsa Baebele go tsamaya mo tseleng ya ga Jehofa.—Pes. 25:8, 9.
2. Ke eng se se ka tlhotlheletsang seithuti sa Baebele go boloka ditaelo tsa Modimo?
2 Thusa Diithuti go Rata Jehofa le Jesu: Eleruri ga go motlhofo gore batho ba ba sa itekanelang ba dire gore dikakanyo tsa bone, mekgwa le puo ya bone di dumalane le thato ya Modimo! (Bar. 7:21-23; Baef. 4:22-24) Le fa go ntse jalo, go rata Modimo le Morwawe go tlhotlheletsa batho ba ba pelonomi go dira tiro eno e e boima. (Joh. 14:15; 1 Joh. 5:3) Re ka thusa jang diithuti tsa rona tsa Baebele go nna le lorato lono?
3. Re ka thusa jang diithuti go rata Jehofa le Jesu?
3 Thusa seithuti sa gago go itse gore Jehofa ke motho wa mofuta mang. Mokaulengwe mongwe o ne a tlhalosa jaana: “Batho ga ba ka ke ba rata motho yo ba sa mo itseng, ka jalo di sa ntse di tloga fela, ke ba ruta leina la Modimo go tswa mo Baebeleng mme ke batla ditsela tsa go gatelela dinonofo tsa ga Jehofa.” Go gatelela thata sekao sa ga Jesu ke tsela e e molemo go dira seno. (Joh. 1:14; 14:9) Mo godimo ga moo, dirisa lebokoso la poeletso kwa bofelong jwa kgaolo nngwe le nngwe ya buka ya Baebele e Ruta Eng? go thusa seithuti go akanya ka dinonofo tse di gakgamatsang tsa Modimo le Morwawe.
4. (a) Ke ka ntlha yang fa diithuti di le dintsi di fitlhela go le boima go rera? (b) Re ka thusa jang diithuti tsa rona go simolola go nna le seabe mo bodireding jwa Bokeresete?
4 Ruta Diithuti Tsa Baebele ka go Tlhoma Sekao se se Molemo: Jaaka barutisi le bakaedi, re bontsha ba bangwe ka ditiro tsa rona gore go tsamaya mo tseleng ya Modimo go kaya eng. (1 Bakor. 11:1) Ka sekai, diithuti di le dintsi tsa Baebele ga di a tlwaela go bolelela batho ba di sa ba itseng ka se di se dumelang. Ka jalo, go ka nna ga tlhokega bopelotelele le bokgoni go ba thusa go nna le lorato, tumelo le bopelokgale jo bo tlhokegang go nna le seabe mo tirong ya go rera le go dira barutwa. (2 Bakor. 4:13; 1 Bathes. 2:2) Gonne re batla go kaela diithuti tsa rona seno se tla re tlhotlheletsa go ba tshegetsa fa ba simolola go nna le seabe mo bodireding jwa Bokeresete.
5. Sekao se se molemo se thusa diithuti jang go tlhokomela se se akarediwang ke go latela ditaolo tsa Modimo?
5 Sekao sa gago se ka ruta diithuti mo dikarolong tse dingwe tse di botlhokwa tsa botshelo jwa Bokeresete. Fa o etela balwetse kgotsa o dumedisa ba bangwe kwa dipokanong tsa phuthego, ba bona lorato lwa mmatota. (Joh. 15:12) Fa o nna le seabe mo go phepafatseng Holo ya Bogosi kgotsa o dira dilo go thusa ba bangwe, o ba ruta go direla ba bangwe. (Joh. 13:12-15) Fa ba lemoga gore o tshela botshelo jo bo sa raraanang, ba tlhaloganya gore go bolela eng go ‘nna o batla pele bogosi.’—Math. 6:33.
6. Go nna le diphelelo dife fa re thusa batho ba ba pelonomi go direla Jehofa?
6 Tiro ya go ruta ba bangwe Lefoko la Modimo le ya go dira barutwa e akaretsa boiteko jo bogolo. Mme a bo go itumedisa jang ne go bona batho ba ba pelonomi “ba tswelela ba tsamaya mo boammaaruring”!—3 Joh. 4.