Kafa Phuthego e Rulagantsweng le go Kaelwa ka Teng

MO LEKWALONG la ntlha le moaposetoloi Paulo a neng a le kwalela Bakorintha, o ne a tlhalosa boammaaruri jo bo botlhokwa ka Modimo. O ne a re: “Modimo ke Modimo, e seng wa tlhakatlhakano, mme ke wa kagiso.” Go tswa foo fa a tlhalosa go ya pele malebana le dipokano tsa phuthego, o ile a re: “A dilo tsotlhe di diragale ka mokgwa o montle le ka thulaganyo.”—1 Bakor. 14:33, 40.

² Kwa tshimologong ya lekwalo leno, moaposetoloi Paulo o ne a naya kgakololo malebana le dikgaogano tse di neng di le gone mo phuthegong ya Korintha. O ile a gakolola bakaulengwe ba teng gore ba “bue ka tumalano” le gore ba “nne seoposengwe ka tsela e e tshwanetseng mo mogopolong o le mongwe fela le mo tseleng e le nngwe fela ya go akanya.” (1 Bakor. 1:10, 11) Go tswa foo o ne a ba naya kgakololo e e malebana le dilo tse di farologaneng tse di neng di kgoreletsa kutlwano mo phuthegong. O ne a dirisa papiso ya mmele wa motho go ba bontsha botlhokwa jwa kutlwano le tirisanommogo. O ile a kgothaletsa botlhe mo phuthegong ya Bokeresete gore go sa kgathalesege seabe se ba nang le sone, ba tlhokomelane ka lorato. (1 Bakor. 12:12-26) Seno se bontsha gore fa ba ba mo phuthegong ba dirisana mmogo, phuthego e ne e tla nna le thulaganyo.

³ Mme gone, phuthego ya Bokeresete e ne e tshwanetse go rulaganngwa jang? Ke mang yo o neng a tla e rulaganya? E ne e tla nna le thulaganyo ya mofuta ofe? Ke bomang ba ba neng ba tla tlhomiwa gore ba sikare maikarabelo a go etelela pele? Fa re letla Baebele gore e re kaele, re bona dikarabo tse di utlwalang sentle tsa dipotso tseno.—1 Bakor. 4:6.

E NE E RULAGANTSWE KA TSELA YA PUSO YA MODIMO

⁴ Phuthego ya Bokeresete e ne ya tlhomiwa ka letsatsi la Pentekosete ya 33 C.E. Re ka ithuta eng mo phuthegong eo ya lekgolo la ntlha la dingwaga? E ne e rulagantswe le go kaelwa ka tsela ya puso ya Modimo, ke gore, e ne e busiwa (Segerika, kraʹtos) ke Modimo (the·osʹ). Mafoko ano ka bobedi a tlhaga mo go 1 Petere 5:10, 11. Pego e e tlhotlheleditsweng ya se se neng sa direga ka nako eo kwa Jerusalema mo e ka nnang dingwaga tse 2 000 tse di fetileng, e bontsha sentle gore phuthego ya Bakeresete ba ba tloditsweng e ne e tlhomilwe ke Modimo. (Dit. 2:1-47) E ne e le kago ya gagwe, e le ntlo ya gagwe. (1 Bakor. 3:9; Baef. 2:19) Le gompieno tsela e phuthego ya Bokeresete e rulagantsweng ka yone le e e dirang dilo ka yone, e latela yone thulaganyo eo e e neng ya tlhomiwa mo lekgolong la ntlha la dingwaga.

⁵ Phuthego ya ntlha e ne ya simologa e na le barutwa ba ka nna 120. Moya o o boitshepo o ne wa tshololelwa pele mo bathong bano, e le go diragatsa Joele 2:28, 29. (Dit. 2:16-18) Le fa go ntse jalo, mo go lone letsatsi leo, batho ba bangwe ba ka nna 3 000 ba ne ba kolobediwa mo metsing mme ba nna karolo ya phuthego eno e e tsetsweng ka moya. Ba ne ba amogetse lefoko le le kaga Keresete mme “ba tswelela ba ineela mo thutong ya baaposetoloi.” Morago ga moo, “Jehofa a tswelela a ba oketsa letsatsi le letsatsi ka ba ba bolokwang.”—Dit. 2:41, 42, 47.

⁶ Phuthego ya kwa Jerusalema e ne ya gola thata jaana mo moperesiti yo mogolo wa Bajuda a ileng a ngongoregela gore barutwa ba ne ba tladitse Jerusalema ka thuto ya bone. Barutwa ba basha kwa Jerusalema ba ne ba akaretsa baperesiti ba le bantsi ba Bajuda, ba ba neng ba nna karolo ya phuthego.—Dit. 5:27, 28; 6:7.

⁷ Jesu o ne a ile a re: “Lo tla nna basupi ba me mo Jerusalema mmogo le mo Judea yotlhe le Samarea le go ya karolong e e kwa kgakalakgakala ya lefatshe.” (Dit. 1:8) Go ne ga nna fela jalo ka gonne fa go ne go tsoga pogiso e kgolo kwa Jerusalema morago ga loso lwa ga Setefane, barutwa ba ba neng ba nna koo ba ne ba gasamela kwa Judea le Samarea yotlhe. Mme gongwe le gongwe kwa ba neng ba ya teng ba ne ba tswelela ba bolela dikgang tse di molemo le go dira barutwa ba bangwe, ba ba neng ba akaretsa le Basamarea bangwe. (Dit. 8:1-13) Mme moragonyana, dikgang tse di molemo di ne tsa rerwa ka katlego mo bathong ba ba sa rupang ba ditšhaba, ba e seng Bajuda. (Dit. 10:1-48) Tiro eno yotlhe ya go rera le go dira barutwa ba bantsi e ne ya felela ka gore go tlhongwe diphuthego tse disha ka kwa ntle ga Jerusalema.—Dit. 11:19-21; 14:21-23.

⁸ Go ne ga dirwa dithulaganyo dife go tlhomamisa gore nngwe le nngwe ya diphuthego tseno tse disha e rulaganngwa le go kaelwa ka tsela ya puso ya Modimo? Ka thuso ya moya wa Modimo, go ne ga dirwa thulaganyo ya gore go nne le badisa ba babotlana gore ba tlhokomele letsomane. Mo diphuthegong tse Paulo le Barenabase ba neng ba di etela mo loetong lwa bone lwa ntlha lwa borongwa, ba ne ba tlhoma banna bangwe go nna bagolwane. (Dit. 14:23) Mokwadi wa Baebele e bong Luke o tlhalosa tshedimosetso e e malebana le pokano e Paulo a neng a e tshwara le bagolwane ba phuthego ya Efeso. Paulo o ile a ba raya a re: “Itlhokomeleng lo bo lo tlhokomele letsomane lotlhe, le moya o o boitshepo o lo tlhomileng balebedi mo go lone, gore lo dise phuthego ya Modimo, e a neng a e reka ka madi a Morwawe.” (Dit. 20:17, 28) Ba ne ba tshwanelega go nna bagolwane ka gonne ba ne ba na le ditshwanelego tsa Dikwalo. (1 Tim. 3:1-7) Tito yo e neng e le modirimmogo le Paulo, o ne a newa taelo ya gore a tlhome banna ba bagolwane mo diphuthegong tsa Kereta.—Tito 1:5.

⁹ Fa diphuthego tse disha di ntse di tlhomiwa, baaposetoloi le banna ba bagolwane kwa Jerusalema ba ne ba tswelela ba eteletse pele phuthego ya Bokeresete ya lefatshe lotlhe ya mo lekgolong la ntlha la dingwaga e e neng e setse e godile. Ba ne ba direla e le setlhopha se se laolang.

¹⁰ Fa moaposetoloi Paulo a ne a kwalela phuthego ya kwa Efeso, o ne a tlhalosa gore fa phuthego ya Bokeresete e dira dilo tumalanong le moya wa Modimo, e ne e ka kgona go boloka kutlwano ka go ikobela taolo ya ga Jesu Keresete. Moaposetoloi Paulo o ne a kgothaletsa Bakeresete ba koo gore ba lwele go nna boikokobetso le go boloka “bongwefela jwa moya” ka go kopanela mmogo ka kagiso le batho botlhe mo phuthegong. (Baef. 4:1-6) Go tswa foo o ne a nopola Pesalema 68:18 a bo a e amanya le thulaganyo ya ga Jehofa ya gore go nne le banna ba ba nang le ditshwanelego tsa Dikwalo gore ba direle mo phuthegong e le baaposetoloi, baporofeti, baefangedi, badisa le barutisi. Banna bao, ba e leng dimpho tse di tswang kwa go Jehofa, ba ne ba tla thusa phuthego yotlhe gore e nonofe ka botlalo e leng selo se se neng se tla itumedisa Modimo.—Baef. 4:7-16.

GOMPIENO DIPHUTHEGO DI LATELA SEKAO SA BAAPOSETOLOI

¹¹ Le gompieno, diphuthego tsotlhe tsa Basupi ba ga Jehofa di latela sekao se se ntseng jalo sa go rulaganya dilo. Diphuthego tseno tsotlhe, di bopa phuthego ya lefatshe lotlhe e e seoposengwe e e ikaegileng ka setlhopha sa batlodiwa. (Seka. 8:23) Jesu Keresete ke ene a dirang gore seno se kgonege. Fela jaaka a ile a solofetsa, ka boikanyegi o ntse a na le barutwa ba gagwe ba ba tloditsweng “malatsi otlhe go fitlha bokhutlong jwa tsamaiso eno ya dilo.” Batho ba ba tlang mo phuthegong eno e e ntseng e gola ba amogela dikgang tse di molemo tsa Modimo, ba ineela ka pelo yotlhe mo go Jehofa, mme ba kolobediwa go nna barutwa ba ga Jesu. (Math. 28:19, 20; Mar. 1:14; Dit. 2:41) Ba tsaya “modisa yo o molemo,” e bong Jesu Keresete e le Tlhogo ya letsomane lotlhe le le nang le Bakeresete ba ba tloditsweng le “dinku tse dingwe.” (Joh. 10:14, 16; Baef. 1:22, 23) ‘Letsomane leo le le lengwe’ le boloka kutlwano ya lone ka go amogela gore Keresete ke tlhogo ya phuthego le ka go ikobela thulaganyo e phuthego ya Modimo e e dirisang, e leng “motlhanka yo o boikanyego le yo o botlhale,” yo Keresete a mo tlhomileng. E kete re ka tswelela re bontsha gore re ikanya ka botlalo thulaganyo eno e e dirisiwang gompieno.—Math. 24:45.

SEABE SA MAKGOTLA A BODUMEDI

¹² Go ile ga tlhomiwa makgotla mangwe gore go abiwe dijo tsa tshwantshetso ka nako e e tshwanetseng le gore dikgang tse di molemo tsa Bogosi di rerwe pele bokhutlo bo tla. Makgotla ano a kwadisitswe semolao go dumalana le melao ya dinaga tse a dirang mo go tsone mme a dirisana mmogo. A dira gore go rerwa ga dikgang tse di molemo mo lefatsheng lotlhe go nne motlhofo.

KAFA MAKALA A RULAGANTSWENG KA GONE

¹³ Fa go tlhomiwa ofisi ya lekala, go tlhomiwa Komiti ya Lekala ya bagolwane ba le bararo kgotsa go feta, gore e tlhokomele tiro ya naga eo kgotsa ya dinaga tse di tlhokometsweng ke lekala leo. Leloko le le lengwe la komiti eo le direla e le morulaganyi mo Komiting ya Lekala.

¹⁴ Diphuthego tse di tlhokometsweng ke lekala lengwe le lengwe di rulaganngwa go ya ka dipotologo. Dipotologo tseno di farologana ka bogolo, go ikaegile ka mafelo le dipuo tse di buiwang kwa go tsone le palo ya diphuthego tsa tshimo ya lekala leo. Mo potologong nngwe le nngwe, go tlhomiwa molebedi wa potologo gore a tlhokomele diphuthego tse di mo potologong eo. Ofisi ya lekala e naya molebedi wa potologo dikaelo tsa gore a ka dira dikabelo tsa gagwe jang.

¹⁵ Diphuthego di dumalana le dithulaganyo tseno tsa phuthego ya Modimo tse di diretsweng gore botlhe ba solegelwe molemo. Di amogela go tlhomiwa ga bagolwane ba ba okamelang tiro ya makala, ya dipotologo le ya diphuthego. Di ikaega ka motlhanka yo o boikanyego le yo o botlhale gore a di neye dijo ka nako e e tshwanetseng. Gompieno, motlhanka yo o boikanyego le ene o ikobela taolo ya ga Keresete ka botlalo, o kgomarela melaometheo ya Baebele le go ikobela kaelo ya moya o o boitshepo. Fa rotlhe re dirisana mmogo ka kutlwano, go nna le diphelelo tse di tshwanang le tse Bakeresete ba lekgolo la ntlha la dingwaga ba neng ba nna le tsone: “Eleruri, diphuthego tsa tswelela di nitamisiwa mo tumelong e bile di oketsega ka palo letsatsi le letsatsi.”—Dit. 16:5.