Thusa Seithuti go Anaanela Dinonofo Tsa ga Jehofa Tse di sa Tshwaneng le Dipe
1 Mo bodireding jwa rona, ga re rute batho ba bangwe dithuto tsa Baebele tsa motheo fela. Re thusa batho go itse Jehofa e le motho le go dira gore ba anaanele dinonofo tsa gagwe tse di sa tshwaneng le dipe. Fa batho ba ba peloephepa ba ithuta boammaaruri ka Modimo, bo a ba ama, bo ba tlhotlheletsa gore ba dire diphetogo mo matshelong a bone ‘gore ba tsamaye kafa go tshwanetseng Jehofa gore ba mo itumedise ka botlalo.’—Bakol. 1:9, 10; 3:9, 10.
2 Buka ya Rona e Ntšha E re E Dirisang go Ithuta: Di tloga fela, buka ya Baebele e Ruta Eng? e tlotla ka dinonofo tsa ga Jehofa. Kgaolo ya ntlha fela e araba dipotso tseno: A tota Modimo o amega ka wena?, Modimo o ntse jang?, le A go a kgonega go atamalana le Modimo? Gape kgaolo eo e gatelela boitshepo jwa Modimo (ser. 10), tshiamiso le kutlwelobotlhoko ya gagwe (ser. 11), lorato lwa gagwe (ser. 13), maatla a gagwe (ser. 16), le bopelotlhomogi, bopelontle, go iketleeletsa go itshwarela, bopelotelele le boikanyegi jwa gagwe (ser. 19). Serapa sa 20 se sobokanya dilo jaana: “Fa o ithuta mo go oketsegileng ka Jehofa, le ene o tla simolola go nna motho wa mmatota mo go wena mme wena o tla nna le lebaka la go mo rata le go ikutlwa o atamalane le ene.”
3 Re ka dirisa jang buka ya Baebele e Ruta Eng? go thusa diithuti tsa Baebele go atamalana le Jehofa? Fa re sena go sekaseka serapa sengwe se se buang ka nngwe ya dinonofo tsa Modimo, re ka nna ra botsa seithuti jaana, “Seno se go bolelela eng ka Jehofa?” kgotsa “Seno se bontsha jang gore Modimo o a go kgatlhegela ka namana?” Fa re dirisa dipotso tse di ntseng jalo nako le nako mo thutong ya rona, re ruta diithuti tsa rona go tlhatlhanya ka se ba se ithutang le go ba thusa go anaanela dinonofo tsa ga Jehofa tse di sa tshwaneng le dipe.
4 Dirisa Lebokoso la Poeletso: Kwa bofelong jwa kgaolo nngwe le nngwe, kopa seithuti go akgela ka mafoko a gagwe ka ntlha nngwe le nngwe e e mo lebokosong le le reng “Se Baebele e se Rutang.” Tlotla ka ditemana tse di umakilweng. Go thusa seithuti go tlhalosa kafa se ikutlwang ka gone, ka dinako tse dingwe o ka nna wa mmotsa jaana, “O ikutlwa jang ka se Baebele e se rutang mo ntlheng eno?” Ka go dira jalo, ga o gatelele fela dintlha tsa konokono tsa kgaolo mme gape o lemoga sentle se seithuti se se dumelang tota. Seno se tla thusa seithuti go simolola go nna le kamano e ntle le Jehofa.