Se re Ka se Ithutang mo Motsamaisasekepeng

GO TSAMAYA o le nosi ka sekepe mo lewatleng go ka lapisa thata. Letsapa le le tseneletseng la mmele le ka tlogela motsamaisasekepe a feletswe, mo e leng gore o feletsa a dira diphoso e bile a dira ditshwetso tse di sa siamang. Ka lebaka leno, o anaanela mosola wa tshetledi mo lewatleng. E dira gore motsamaisasekepe yo o felelwang ke nonofo a kgone go ikhutsa a bo a boele a nne le nonofo gape kwantle ga gore a tseelwe kong ke metsi mo go kotsi. Mo godimo ga moo, tshetledi mo lewatleng e dira gore karolo e e kwa pele ya sekepe e lebagane le phefo le makhubu mme e dira gore sekepe se ritibale tota.

Fela jaaka batsamaisasekepe ba lebana le dikotsi tse dintsi mo lewatleng, ka metlha Bakeresete ba nna ba lebane le dikgatelelo tsa lefatshe leno mme ba ikutlwa ba tlhoka go ikhutsa. Totatota, Jesu o kile a gakolola barutwa ba gagwe jaana: “Tlang, lona ka bolona, re yeng kwa thoko mo lefelong le le se nang batho mme lo ikhutse go sekae.” (Mareko 6:31) Gompieno, batho bangwe ba kgona go tsaya dibeke di le mmalwa ba tsaya loeto kgotsa mafelobeke ba intshitse ba ile go ikhutsa le ba malapa a bone. Dinako tse di ntseng jaana di a lapolosa e bile di a nonotsha. Le fa go ntse jalo, re ka tlhomamisa jang gore ka dinako tseo re bolokesegile ka tsela ya semoya? Ke eng se e ka nnang tshetledi ya rona ya semoya mo lewatleng e e tla re thusang gore re se ka ra katogela kong mme re tsepame?

Jehofa ka bopelotshweu o re rulaganyeditse sengwe. Ke Lefoko la gagwe le le Boitshepo Baebele fela. Fa re e bala letsatsi le letsatsi, re ka atamalana le Jehofa mme le ka motlha re ka se ka ra katogela kgakala le ene. Kgakololo ya yone e ka re tsepamisa mme ya dira gore re kgone go emelana le diteko tsa ga Satane le lefatshe la gagwe. Go nna le thulaganyo ya ka metlha ya go bala Baebele, le fa re se mo thulaganyong ya rona e e tlwaelegileng, go ka re setlela ka tsela ya semoya.—Jošua 1:7, 8; Bakolosa 2:7.

Mopesalema o re gakolola gore “go itumela motho” yo o ‘natefelelwang ke molao wa ga Jehofa, o balela molao wa gagwe kwa tlase motshegare le bosigo.’ (Pesalema 1:1, 2, NW) Go bala Lefoko la Modimo letsatsi le letsatsi go tla re naya matswela a a ‘itumedisang’ a go lapologa le go nonofa eletota, re ipaakanyeditse go tswelela mo tseleng ya rona ya Bokeresete.

A o Ka Rata go Etlewa?

Le e leng mo lefatsheng leno le le tletseng matshwenyego, o ka kgona go itumela ka go bona kitso e e tlhomameng go tswa mo Baebeleng kaga Modimo, Bogosi jwa gagwe le boikaelelo jwa gagwe jo bo molemo jo a nang najo ka batho. Fa e le gore o ka rata go bona tshedimosetso e e oketsegileng kana o ka rata mongwe a go etela kwa legaeng la gago go tla go ithuta Baebele le wena mahala, tsweetswee kwalela Watch Tower, Private Bag X2067, Krugersdorp, 1740, South Africa, kana kwa atereseng e e tshwanetseng e e mo lenaaneng le le mo tsebeng 2.