Nonofo e e Botlhokwa Thata mo Morutising yo o Molemo
1. Nonofo e e botlhokwa thata ya morutisi yo o molemo ke efe?
1 Ke eng se se dirang gore motho a nne morutisi yo o molemo wa Baebele? A ke thuto ya lefatshe? A ke go nna le maitemogelo? A ke go nna le bokgoni jwa tlholego? Ke yone nonofo e e diragatsang Molao, e e tlhaolang barutwa ba ga Jesu e bile ke nonofo e e botlhokwa thata le e e kgatlhang thata mo dinonofong tsa konokono tsa ga Jehofa. (Joh. 13:35; Bagal. 5:14; 1 Joh. 4:8) Ke lorato. Barutisi ba ba molemo ba bontsha lorato.
2. Ke eng fa go le botlhokwa gore re rate batho?
2 Rata Batho: Morutisi yo Mogolo e bong, Jesu, o ne a rata batho mme seno se ne sa dira gore ba mo reetse. (Luke 5:12, 13; Joh. 13:1; 15:13) Fa re amega ka batho, re tla dirisa tshono nngwe le nngwe e re e bonang go neela bosupi. Dikgoreletsi tse di jaaka pogiso le go sa kgatlhege ga batho ga di kitla di re kgoba marapo. Re tla bontsha batho ba re ba rerelang gore re ba kgatlhegela go tswa pelong mme re tla fetofetola se re buang le bone ka sone gore se tsamaisane le dilo tse ba tshwenyegileng ka tsone. Re tla iketleetsa go ipha nako, e seng fela fa re ithuta le moithuti mongwe le mongwe wa Baebele mme gape re tla dira jalo fa re baakanyetsa thuto nngwe le nngwe e sa le gale.
3. Go rata boammaaruri jwa Baebele go tla re thusa jang mo bodireding?
3 Rata Boammaaruri Jwa Baebele: Gape Jesu o ne a rata boammaaruri jwa Baebele mme o ne a bo leba e le matlotlo. (Math. 13:52) Fa re rata boammaaruri, re tla bua ka matlhagatlhaga mme seno se ka dira gore bareetsi ba rona ba kgatlhege. Lorato lo lo ntseng jalo lo tla re thusa gore re tlhome mogopolo mo tshedimosetsong e e botlhokwa e re e bolelelang batho ba bangwe go na le gore re tshwenyege ka bokgoni jwa rona mo bodireding mme fa re dira jalo, re ka se tshoge thata fa re le mo bodireding.
4. Re ka tlhagolela jang lorato?
4 Tlhagolela Lorato: Re ka tlhagolela jang go rata batho? Ka go akanya ka lorato lo Jehofa le Morwawe ba lo bontshitseng le go akanya ka seemo se se utlwisang botlhoko sa semoya se batho ba ba mo tshimong ya rona ba leng mo go sone. (Mar. 6:34; 1 Joh. 4:10, 11) Lorato lo re ratang boammaaruri jwa Baebele ka lone lo tla nonofa le go feta fa re ithuta le go tlhatlhanya ka metlha. Lorato ke karolo ya dinonofo tse moya o di tlhagisang. (Bagal. 5:22) Ka jalo, re ka kopa Jehofa moya o o boitshepo le go mo kopa gore a re thuse gore lorato lwa rona lo gole. (Luke 11:13; 1 Joh. 5:14) Go sa kgathalesege gore re na le thuto e e kana kang ya lefatshe, maitemogelo a a kana kang mo boammaaruring kgotsa bokgoni jo bo kana kang jwa tlholego, re ka kgona go nna barutisi ba Baebele ba ba nang le matswela ka go bontsha lorato.