Modimo o batla gore re tshelele ruri mo lefatsheng la paradaise, ka kagiso e bile re itumetse!

Le fa go ntse jalo, o ka nna wa ipotsa jaana, ‘Seno se ka kgonega jang?’ Baebele ya re Bogosi jwa Modimo bo tla dira jalo, e bile ke thato ya Modimo gore batho botlhe ba ithute ka Bogosi joo le ka boikaelelo jwa gagwe ka rona.—Pesalema 37:11, 29; Isaia 9:7.

Modimo o batla gore re solegelwe molemo.

Fela jaaka rre yo o batlelang bana ba gagwe dilo tse di molemo, Rraarona yo o kwa legodimong o batla gore re itumele ka bosakhutleng. (Isaia 48:17, 18) O solofeditse gore ope fela “yo o dirang thato ya Modimo o ntse ka bosaengkae.”—1 Johane 2:17.

Modimo o batla gore re tsamaye mo ditselaneng tsa gagwe.

Baebele ya re Mmopi wa rona o batla go re “ruta ditsela tsa gagwe” gore re ‘tsamaye mo ditselaneng tsa gagwe.’ (Isaia 2:2, 3) O rulagantse “batho ba leina la gagwe” gore ba itsise thato ya gagwe mo lefatsheng lotlhe.—Ditiro 15:14.

Modimo o batla gore re mo obamele re le seoposengwe.

Go na le gore kobamelo e e itshekileng ya ga Jehofa e kgaoganye batho, e ba kopanya ka lorato lwa mmatota. (Johane 13:35) Ke bomang gompieno ba ba rutang batho mo lefatsheng lotlhe gore ba direle Modimo ka kutlwano? Re go kopa gore o ithute seno ka go dirisa boroutšhara jono.

O itse Basupi ba ga Jehofa ba le kae? Bangwe ba bone e ka tswa e le baagelani ba gago, badiri mmogo le wena kgotsa o tsena sekolo le bone. Kgotsa gongwe ba kile ba tlotla le wena ka Baebele. Tota re bomang, mme ke ka ntlha yang fa re bua le batho ka se re se dumelang?

Re batho fela ba ba tlwaelegileng. Re godile ka ditsela tse di farologaneng e bile re tswa mo maemong a a sa tshwaneng. Bangwe ba rona ba ne ba le mo bodumeding jo bongwe, fa ba bangwe bone ba ne ba sa dumele mo Modimong. Le fa go ntse jalo, pele ga re nna Basupi, rotlhe re ne ra ipha nako ya go tlhatlhoba dithuto tsa Baebele ka kelotlhoko. (Ditiro 17:11) Re ne ra dumela se re neng re se ithuta, mme go tswa foo ra itlhophela go obamela Jehofa Modimo.

Re solegelwa molemo ke go ithuta Baebele. Fela jaaka batho ba bangwe, re tlhagelwa ke mathata e bile re na le makoa. Mme e re ka re leka go dirisa melaometheo ya Baebele mo matshelong a rona a letsatsi le letsatsi, tsela e re tshelang ka yone e tokafala fela thata. (Pesalema 128:1, 2) Leo ke lengwe la mabaka a go bo re bua le batho ba bangwe ka dilo tse di molemo tse re di ithutileng mo Baebeleng.

Re tshela ka melao e e siameng ya Modimo. Melao eno e e mo Baebeleng, e re thusa go nna re itumetse le go tlotla ba bangwe, le go nna le dinonofo tse di jaaka boikanyegi le bopelonomi. E dira gore setšhaba se nne le batho ba ba nang le botsogo jo bo siameng le ba ba nang le maikarabelo, e bile e dira gore go nne le malapa a a utlwanang le a a nang le boitsholo jo bontle. E re ka re tlhatswegile pelo gore “Modimo ga a na tlhaolele,” re karolo ya lelapa la semoya la bakaulengwe ba lefatshe lotlhe ba ba utlwanang, ba ba sa kgaoganngweng ke tlhaolele le dipolotiki. Le fa gone re le batho fela ba ba tlwaelegileng, ka tsela nngwe re tlhomologile.—Ditiro 4:13; 10:34, 35.

• Basupi ba ga Jehofa ba tshwana le batho ba bangwe ka ditsela dife?

• Ke melao efe e e siameng e Basupi ba ga Jehofa ba ithutileng yone fa ba ntse ba bala Baebele?

Batho ba le bantsi ba akanya gore Basupi ba ga Jehofa ke leina la bodumedi bongwe jo bosha. Le fa go ntse jalo, dingwaga di feta 2 700 tse di fetileng, batlhanka ba Modimo yo o esi wa boammaaruri ba ne ba bidiwa “basupi” ba gagwe. (Isaia 43:10-12) Go tla go fitlha ka 1931, re ne re ntse re itsiwe re le Baithuti ba Baebele. Ke ka ntlha yang fa re ile ra ipitsa Basupi ba ga Jehofa?

Le tlhalosa Modimo wa rona. Go ya ka mekwalo ya seatla ya bogologolo, leina la Modimo, Jehofa, le tlhaga mo Baebeleng ka makgetlo a le diketekete. Mo dithanolong di le dintsi, leina leno le ne la ntshiwa mme mo boemong jwa lone ga tsenngwa direto tse di jaaka Morena kgotsa Modimo. Le fa go ntse jalo, Modimo o ne a ikitsise Moshe ka leina la gagwe e bong Jehofa, a re: “Leno ke leina la me ka bosakhutleng.” (Ekesodo 3:15) Ka tsela eno, o ne a itlhaola mo medimong yotlhe ya maaka. Re motlotlo go bo re bidiwa ka leina le le boitshepo la Modimo.

Le tlhalosa tiro ya rona. Batho ba le bantsi ba ba tshedileng mo metlheng ya bogologolo, go simolola ka monna yo o siameng e bong Abele, ba ne ba neela bosupi jwa gore ba dumela mo go Jehofa. Go ralala makgolokgolo a dingwaga, Noa, Aborahame, Sara, Moshe, Dafide le ba bangwe, ba ile ba nna bangwe ba ‘leru leno le legolo la basupi.’ (Bahebera 11:4–12:1) Fela jaaka motho mongwe a ka neela bosupi kwa kgotlatshekelo mo boemong jwa motho yo o se nang molato, re ikemiseditse go bolelela ba bangwe boammaaruri ka Modimo wa rona.

Re etsa Jesu. Baebele e mmitsa “mosupi yo o ikanyegang le yo o boammaaruri.” (Tshenolo 3:14) Jesu ka boene o ne a re ‘o bonaditse leina la Modimo’ mme a nna a ‘supa ka ga boammaaruri’ ka Modimo. (Johane 17:26; 18:37) Ka jalo, balatedi ba mmatota ba ga Keresete ba tshwanetse go bidiwa ka leina la ga Jehofa le go le itsise batho ba bangwe. Ke sone se Basupi ba ga Jehofa ba lekang go se dira.

• Ke ka ntlha yang fa Baithuti ba Baebele ba ile ba simolola go ipitsa Basupi ba ga Jehofa?

• Jehofa o na le lobaka lo lo kana kang a na le basupi mo lefatsheng?

• Mosupi wa ga Jehofa yo mogolo go ba gaisa botlhe ke mang?