Gantsi mo Dikwalong Tsa Bokeresete Tsa Segerika go umakiwa Barenabase le moaposetoloi Paulo. Banna bano e ne e le balebedi ba ba etang, ba etela diphuthego tsa bogologolo. Goreng? Ba ne ba tshwenyegile thata ka boemo jwa semoya jwa bakaulengwe ba bone. Paulo o ne a re o batla go ‘boa mme a etele bakaulengwe,’ go bona gore ba ntse ba tsoga jang. O ne a ikemiseditse go tsamaya dikilometara di le makgolokgolo gore a ye go ba nonotsha. (Ditiro 15:36) Le gompieno balebedi ba ba etang ba na le boikutlo jo bo tshwanang.

Ba tla go re kgothatsa. Molebedi mongwe le mongwe wa potologo o etela diphuthego di ka nna 20 kgotsa go feta, a fetsa beke mo go nngwe le nngwe ya tsone, gabedi mo ngwageng. Re solegelwa molemo ke maitemogelo a banna bano le basadi ba bone, fa e le gore ba nyetse. Ba leka ka natla go itse mongwe le mongwe wa rona, bagolo le basha, mme ba itumelela go tsamaya le rona mo bodireding jwa tshimo le kwa bathong ba re ithutang Baebele le bone. Balebedi bano ba potologo ba tsamaya le bagolwane go dira maeto a bodisa, mme gape ba re nonotsha ka dipuo tse ba di neelang kwa dipokanong le kwa dikopanong.—Ditiro 15:35.

Ba bontsha go kgatlhegela botlhe. Balebedi ba potologo ba kgatlhegela thata boemo jwa semoya jwa diphuthego tse ba di etelang. Ba kopana le bagolwane le batlhanka ba bodiredi go sekaseka se se fitlheletsweng mo phuthegong, le go ba naya dikgakololo tse di tlhokegang tsa kafa ba ka diragatsang maikarabelo a bone ka gone. Ba thusa babulatsela gore ba kgone go atlega mo tirong ya bone, mme gape ba itumelela go itse batho ba ba sa tswang go kopanela le phuthego le go utlwa gore ba ntse ba gatela pele jang semoyeng. Mongwe le mongwe wa bakaulengwe bano o ithaopa ka go rata gore e nne ‘modirimmogo gore re solegelwe molemo.’ (2 Bakorintha 8:23) Re tshwanetse go etsa tumelo ya bone le boineelo jwa bone mo Modimong.—Bahebera 13:7.

• Ke ka ntlha yang fa balebedi ba potologo ba etela diphuthego?

• Re ka solegelwa molemo jang ke maeto a bone?

Fa go nna le masetlapelo, ka bonako fela Basupi ba ga Jehofa ba dira dithulaganyo tsa go namola bakaulengwe ba bone ba ba amegileng. Maiteko ao a bontsha lorato lwa mmatota lo re ratanang ka lone. (Johane 13:34, 35; 1 Johane 3:17, 18) Re ba thusa ka ditsela dife?

Re ntsha meneelo ya madi. Fa go ne go na le leuba le legolo kwa Judea, Bakeresete ba bogologolo ba kwa Antioka ba ne ba romela madi go thusa bakaulengwe ba bone. (Ditiro 11:27-30) Ka tsela e e tshwanang, le rona fa re utlwa gore bakaulengwe ba rona mo dikarolong tse dingwe tsa lefatshe ba mo mathateng, re romela meneelo ya madi ka diphuthego gore ba kgone go thusiwa ka dilo tse ba di tlhokang.—2 Bakorintha 8:13-15.

Re ba naya thuso e ba e tlhokang. Bagolwane ba ba mo lefelong le masetlapelo a diragetseng mo go lone, ba batla leloko lengwe le lengwe la phuthego go tlhomamisa gore botlhe ba babalesegile. Komiti ya namolo e ka etelela pele go abiwa ga dijo, metsi a a phepa, diaparo, bonno le tsa kalafi. Basupi ba le bantsi ba ba nang le bokgoni jo bo tlhokegang, ba ithaopela go dirisa ditshenyegelo tsa bone go ya go thusa mo tirong ya namolo kgotsa go baakanya magae le Diholo Tsa Bogosi tse di senyegileng. Kutlwano e re itumelelang yone mo phuthegong le maitemogelo a re setseng re na le one ka gonne re dira mmogo, a re thusa gore re kgone bona thuso ka bonako le badiri ba ba tlhokegang ka nako eno ya mathata. Le fa gone re thusa “ba ba amanang le rona mo tumelong,” fa go kgonega, re thusa le ba bangwe ba e seng ba bodumedi jwa rona.—Bagalatia 6:10.

Re ba gomotsa ka se ba se tlhokang mo semoyeng le mo maikutlong. Gantsi batho ba ba amilweng ke masetlapelo ba tlhoka go gomodiwa. Ka dinako tse di ntseng jalo, re nonotshiwa ke Jehofa, “Modimo wa kgomotso yotlhe.” (2 Bakorintha 1:3, 4) Re itumelela go bolelela batho bano ba ba tlaletsweng ka ditsholofetso tse di mo Baebeleng, le go ba tlhomamisetsa gore go ise go ye kae, Bogosi jwa Modimo bo tla fedisa masetlapelo otlhe a a re utlwisang botlhoko le a a re bogisang.—Tshenolo 21:4.

• Ke ka ntlha yang fa Basupi ba kgona go tsaya kgato ka bonako ka nako ya masetlapelo?

• Re ka naya batho ba ba falotseng masetlapelo kgomotso efe e e tswang mo Dikwalong?

Pelenyana fela ga loso lwa gagwe, Jesu o ne a tshwara pokano e e kgethegileng le barutwa ba gagwe ba le banè—Petere, Jakobe, Johane le Anderea. Mme fa a ne a bolelela pele sesupo sa go nna gone ga gagwe mo metlheng ya bofelo, o ne a botsa potso eno ya botlhokwa: “Tota motlhanka yo o boikanyego le yo o botlhale ke mang yo mong wa gagwe a neng a mo tlhoma gore a okamele ba ntlo ya gagwe, go ba naya dijo tsa bone ka nako e e tshwanetseng?” (Mathaio 24:3, 45; Mareko 13:3, 4) Jesu o ne a tlhomamisetsa barutwa ba gagwe gore e re ka e le “mong” wa bone, o tla tlhoma bangwe ba ba tla nnang ba abela balatedi ba gagwe dijo tsa semoya mo metlheng ya bofelo. Ke bomang ba e neng e tla nna motlhanka yono?

Ke balatedi ba ga Jesu ba tota ba tloditsweng ka moya. “Motlhanka” o abela baobamedi ba ga Jehofa dijo tsa semoya ka nako e e tshwanetseng. Re ikantse motlhanka yono yo o ikanyegang gore a tswelele a re naya ‘selekanyo sa rona sa dijo ka nako e e tshwanetseng.’—Luke 12:42.

Ba tlhokometse ba ntlo ya Modimo. (1 Timotheo 3:15) Jesu o ne a naya motlhanka maikarabelo a magolo a go tlhokomela tiro e e dirwang mo karolong e e mo lefatsheng ya phuthego ya ga Jehofa—go tlhokomela dithoto tsa gagwe, go etelela pele tiro ya go rera le go re ruta mo diphuthegong. Ka jalo, gore “motlhanka yo o boikanyego le yo o botlhale” a kgone go re naya se re se tlhokang ka nako e re se tlhokang ka yone, o aba dijo tsa semoya a dirisa dikgatiso tse re di dirisang mo bodireding, le dithulaganyo tse re nnang le tsone kwa dipokanong le kwa dikopanong.

Motlhanka o ikanyega mo dithutong tsa boammaaruri tsa Baebele le mo taelong e a e neilweng ya go rera dikgang tse di molemo, mme o bontsha botlhale ka tsela e a tlhokomelang dilo tsa ga Keresete ka yone mo lefatsheng. (Ditiro 10:42) Jehofa o segofatsa tiro ya motlhanka yono ka go dira gore batho ba le bantsi ba nne Basupi ba Gagwe le go mo thusa go aba dijo tse dintsi tsa semoya.—Isaia 60:22; 65:13.

• Jesu o ile a tlhoma mang gore a abele barutwa ba gagwe dijo tsa semoya?

• Motlhanka o bontsha ka ditsela dife gore o a ikanyega e bile o botlhale?