Go Dirisa Baebele fa o Araba Dipotso

FA RE bodiwa dipotso kaga dilo tse re di dumelang, tsela e re tshelang ka yone, tsela e re lebang ditiragalo dingwe tsa sesheng ka yone, tsholofelo ya rona ka isagwe, re leka go araba re dirisa Baebele. Ka ntlha yang? Ka gonne ke Lefoko la Modimo. Dilo tse re di dumelang re di tsaya mo Baebeleng. Re tshela go dumalana le Baebele. Ke yone e e re kaelang gore re lebe ditiragalo tsa lefatshe jang. Tsholofelo ya rona ka isagwe e theilwe thata mo ditsholofetsong tse di tlhotlheleditsweng tsa Baebele.—2 Tim. 3:16, 17.

Re lemoga sentle gore leina la rona le re naya boikarabelo. Re Basupi ba ga Jehofa. (Isa. 43:12) Ka gone ga re arabe dipotso go ya ka filosofi ya batho, mme re di araba go ya ka se Jehofa a se bolelang mo Lefokong la gagwe le le tlhotlheleditsweng. Ke boammaaruri gore mongwe le mongwe wa rona o na le tsela e a lebang dilo ka yone, mme re letla gore Lefoko la Modimo le kaele tsela e re lebang dilo ka yone ka gonne re dumela ka pelo yotlhe gore le boammaaruri. Gone ke boammaaruri gore Baebele mo dilong tse dintsi e a re golola gore re itlhophele kafa re ratang go dira dilo ka teng. Le fa go ntse jalo, ga re batle go gatelela tsela e re bonang dilo ka yone mo go ba bangwe, mme re eletsa go ruta melaometheo e e mo Dikwalong, ka go dira jalo re letla bareetsi ba rona go nna le kgololesego ya go itlhophela, e le rona re nang le yone. Fela jaaka moaposetoloi Paulo, re batla “go tsweledisa kutlo ka tumelo.”—Bar. 16:26.

Jesu Keresete o tlhalosiwa mo go Tshenolo 3:14 e le “mosupi yo o ikanyegang le yo o boammaaruri.” O ne a araba dipotso jang le gone o ne a dira jang mo maemong a a neng a lebana le one? Ka dinako tse dingwe o ne a dirisa ditshwantsho tse di neng di dira gore batho ba akanye. Mme mo makgetlhong a mangwe o ne a botsa motho yo o mmotsang potso gore ene o tlhaloganya temana jang. Go le gantsi o ne a nopola ditemana, a di buelela ka mafoko a gagwe, kgotsa a di umaka fela. (Math. 4:3-10; 12:1-8; Luke 10:25-28; 17:32) Mo lekgolong la ntlha la dingwaga, gantsi memeno ya Dikwalo e ne e bewa mo disinagogeng. Ga go na bosupi bope jwa gore Jesu o ne a na le motlobo wa gagwe wa memeno eo, mme o ne a itse Dikwalo sentle e bile o ne a di umaka kgapetsakgapetsa fa a ruta batho. (Luke 24:27, 44-47) O ne a ka bolela ka boammaaruri gore se a neng a se ruta o ne a sa se itshimololela. O ne a bua se a neng a se utlwile mo go Rraagwe.—Joh. 8:26.

Re eletsa go latela sekao sa ga Jesu. Ga re ise re ko re utlwe Modimo a bua, jaaka Jesu ene a mo utlwile. Mme Baebele ke Lefoko la Modimo. Fa re e dirisa go araba dipotso, re dira gore go se ka ga nna e kete re araba go ya ka dikakanyo tsa rona. Re bontsha gore mo boemong jwa go ntsha maikutlo a motho yo o sa itekanelang, re ikemiseditse ka pelo yotlhe go dira gore Modimo e nne ene a kayang gore boammaaruri bo fa kae.—Joh. 7:18; Bar. 3:4.

Gone ke boammaaruri gore keletso ya rona ga se fela go dirisa Baebele mme ke go e dirisa ka tsela e e tla solegelang moreetsi molemo tota. Re batla gore a reetse ka tsela e e leng gore o tla kgona go amogela se a se utlwang. Go ikaegile ka gore motho yono o ikutlwa jang, o ne o ka tsenyeletsa megopolo ya Baebele ka go re: “A ga o akanye gore selo sa botlhokwa thata ke gore Modimo ene a reng?” Kgotsa o ne o ka re: “A o ne o itse gore Baebele e tlhalosa yone kgang eo?” Fa e le gore o bua le motho yo o sa tlotleng Baebele, o ka nna wa tlhoka go dirisa tsenyeletso e e farologaneng le eo go se kae. Gongwe o ka re: “Mma ke go bontshe boporofeti jono jwa bogologolo.” Kgotsa o ka nna wa re: “Buka e e leng yone e anamisiwang thata mo hisitoring ya motho ya re . . . ”

Ka dinako tse dingwe o ka rata go buelela temana fela ka mafoko a gago. Le fa go ntse jalo, fa go kgonega, go ka nna molemo thata fa o bula Baebele ka boyone le go bala se e se buang. Fa maemo a dumela bontsha motho temana eo mo Baebeleng ya gagwe. Go dirisa Baebele ka tlhamalalo jaana gantsi go tlhotlheletsa batho thata.—Baheb. 4:12.

Bagolwane ba Bakeresete ba na le boikarabelo jo bogolo jwa go dirisa Baebele fa ba araba dipotso. Sengwe sa dilo tse di batlegang gore motho a direle e le mogolwane ke gore mokaulengwe a bo a “tshwareletse ka nitamo mo lefokong le le ikanyegang malebana le botswerere jwa gagwe jwa go ruta.” (Tito 1:9) Leloko la phuthego le ka dira tshwetso e e masisi mo botshelong fa mogolwane a sena go mo neela kgakololo. A bo go le botlhokwa jang ne gore kgakololo eno e bo e theilwe mo Dikwalong! Fa mogolwane a tlhoma sekao mo go direng jalo a ka tlhotlheletsa ba bangwe ba le bantsi mo tseleng e ba rutang ka yone.