Tsamaela Gongwe le Kara ya ga Jehofa ya Selegodimo

“Wèna, u buè mahoko a me nabō, leha ba utlwa, leha ba gana go utlwa.”—ESEKIELE 2:7.

1, 2. Ke sepalangwa sefe sa segosi seo Esekiele a ileng a se bona, mme ke eng seo a neng a se bolelelwa?

KARA ya ga Jehofa ya selegodimo jaanong e eme fa pele ga batlhanka ba gagwe. Ba bona sepalangwa seo sa segosi sa Morena wa bone wa Lobopo ka matlho a tumelo. Se a galalela, se a boitshega, se sentle go gaisa.

² Sone sepalangwa seo sa segosi se ne sa tloga sa tsamaya se tswa fa pele ga moperofeti wa Modimo ebong Esekiele mo ponatshegelong dingwaga di ka nna 2 600 tse di fetileng. Go tswa mo kareng eno e e rweleng setulo sa bogosi—eleng phuthego ya Modimo ya selegodimo ya dibopiwa tsa moya—Jehofa o ne a naya Esekiele taelo eno e e gakgamatsang: “Bana ba ke gu romañ kwa go bōnè ba makgakga, ba pelo e e leshōkō: me u tla ba raea, u re, Morèna Modimo o bua yana, a re. Me bōnè, le ha ba utlwa, kgotsa ba gana go utlwa, (gonne ke lekgotla ye le borukhutlhi,) ba tla bo ba itse ha go kile ga ne go le moperofeti mo go bōnè.”—Esekiele 2:4, 5.

3. Ke setshwani sefe sa motlha wa segompieno seo Esekiele a nang naso?

³ Esekiele o ne a diragatsa thomo eo a ititeile sehuba, a dira jaaka sedirisiwa se le sengwe ka monwana mo seatleng sa Modimo. Ka mo go tshwanang, Modimo jaanong o na le sedirisiwa se le sengwe ka monwana seo a se laolang. Setlhopha sa Esekiele, eleng masalela a a tloditsweng, ke sone se se di gogang kwa pele mo tirong ya go neela bosupi jwa bofelo, ba kgobokanetswe ke “boidiidi yo bogolo” jwa “dinku di sele” go ba ema nokeng. (Tshenolō 7:9, 10; Yohane 10:16) Ba le mmogo ke “lecomane le le leñwe hèla,” ba na le Modisa yo o Molemo, ebong Jesu Keresete, a ba eteletse pele a le kafa tlase ga bolaodi jwa Mopalami yo mogolo wa Kara, ebong Jehofa Modimo.

4, 5. Go tlile jang gore phuthego e e bonalang ya Modimo e nne teng, mme ke eng seo se ileng sa e diragalela tumalanong le Isaia 60:22?

⁴ Kafa tlase ga kaelo ya ga Jehofa, phuthego eno ya lefatshe ka bophara e godile go tswa go e potlana go fetoga sedirisiwa se se maatla sa go bolela taelo ya gore “Boihañ Modimo, lo o neè kgalalèlō; gonne nakō ea katlholō ea ōna e tsile.” (Tshenolō 14:7) Fela jaaka fa Esekiele a ne a sa ikemisa kana a sa itlhoma gore e nne moperofeti, jalo phuthego ya Modimo e e bonalang ga e a itlhoma kana ya itlhopha. Ga e a nna teng ka ntlha ya thato ya motho kana ka ntlha ya maiteko a gagwe. Mopalami wa Kara eno ya bomodimo ke ene a dirileng gore phuthego eno e nne teng. Ka ntlha ya go fiwa maatla ke moya wa Modimo mmogo le go engwa nokeng ke baengele ba ba boitshepo, batho ba ga Jehofa ba ile ba nna le koketsego e e boitshegang mo eleng gore ‘yo mmotlana o ne a nna morafe o o thata.’—Isaia 60:22.

⁵ Basupi ba ga Jehofa ba ba fetang 4 000 000 ba bolela molaetsa wa Bogosi mo mafatsheng a a fetang 212. Ba beilwe ka ditlhopha tsa diphuthego tse di fetang 63 000 tseo di rulagantsweng go nna dipotologo mmogo le dikgaolo. Diofisi tse dikgolo tsa makala mmogo le madirelo a go gatisa di dira kafa tlase ga kaelo ya Setlhopha Se Se Laolang seo eleng karolo ya konokono ya ntlokgolo ya mokgatlho. Botlhe ba gatela pele jaaka ekete ke motho a le mongwe fela, ba rera mafoko a a molemo, ba ruta bao ba reetsang, ba aga mafelo ao go kopanelwang mo go one. Ee, phuthego ya ga Jehofa e e bonalang e tsamaela gongwe le kara ya selegodimo mmogo le Mopalami wa yone.

6. Ke eng seo se kopanyelediwang mo go tsamaeleng gongwe le phuthego ya ga Jehofa e e bonalang?

⁶ Fa e le gore o mongwe wa Basupi ba ga Jehofa, a o tsamaela gongwe le phuthego ya Modimo e e bonalang? Go dira jalo ga se kgang fela ya go nna gone kwa dipokanong tsa Bokeresete le go senya nako mo bodiheding. Go tsamaya go amana segolo thata le go dira kgatelopele mmogo le go gola semoyeng. Go kopanyeletsa go nna le maikutlo a a molemo, go itlhomela dilo tseo eleng tsone di tshwanetseng tsa tla pele, mmogo le go sa salele kwa morago ka tshedimosetso. Fa re tsamaela gongwe le kara ya ga Jehofa ya selegodimo, matshelo a rona a dumalana le molaetsa oo re o bolelang.

7. Ke ka ntlha yang fa re sekaseka boitshwaro jwa ga Esekiele jaaka moperofeti wa Modimo?

⁷ Malebana le kgang eno ya gore re tsamaele gongwe, batlhanka ba motlha wa segompieno ba ga Jehofa ba ka ithuta go le gontsi go tswa mo sekaong sa ga Esekiele. Lemororo a ne a tlhophilwe segolobogolo jaaka moperofeti ke Jehofa, Esekiele lefa go ntse jalo o ne a na le maikutlo, a na le dilo tseo a amegileng ka tsone, mmogo le dilo tseo a di tlhokang. Ka sekai, o ne a tlelwa ke kutlobotlhoko e kgolo ya go latlhegelwa ke mosadi wa gagwe ka loso e sale monna yo mosha thata go nyala. Lefa go ntse jalo, le ka motlha o ne a se ka a lebala thomo ya gagwe jaaka moperofeti wa ga Jehofa. Fa re tlhatlhoba kafa Esekiele a neng a itshwara ka gone mo dikarolong tse dingwe, re ka inonotsha gore re tsamaele gongwe le phuthego ya Modimo e e bonalang. Seno se tla re kgonisa gore re tsamaele gongwe le phuthego ya gagwe e e sa bonaleng.

Go Amogela Thomo Mmogo le go E Diragatsa

8. Malebana le thomo ya gagwe, ke sekao sefe seo Esekiele a ileng a se tlhoma?

⁸ Esekiele o ne a tlhoma sekao se se molemo ka go amogela thomo ya gagwe mmogo le go e diragatsa. Lefa go ntse jalo, go ne go tlhokega gore a nne kutlo mmogo le go nna pelokgale gore a e diragatse, ka gonne re bala jaana: “Morwa motho, u se ka ua ba boiha, le gōna u se ka ua boiha mahoko a bōnè, leha go na le meñana le mitlwa nau, me u agile ha gare ga diphepheñ: u se ka ua boiha mahoko a bōnè, u bo u se ka ua rèrèga ka pōnalō ea bōnè, leha ba le lekgotla ye le borukhutlhi. Me wèna, u buè mahoko a me nabō, leha ba utlwa, leha ba gana go utlwa; gonne ba borukhutlhi mo go golo thata. Me wèna, morwa motho, utlwa se ke se buañ nau; u se ka ua nna borukhutlhi yaka lekgotla yeuō ye le cuololañ.”—Esekiele 2:6-8.

9. E ne e le ka go dira eng fela Esekiele a neng a tla tswa mo molatong wa madi?

⁹ Esekiele o ne a sa tshwanela go nna yo o sa kgathaleng kana a boifa, a tlhoka go nna a kgotlediwa ka metlha gore a dire thomo ya gagwe. O ne a se kitla a nna le molato wa madi fela fa a ne a ka bua mafoko a ga Jehofa ka go iketleetsa mmogo le ka bopelokgale. Esekiele o ne a bolelelwa jaana: “Leha go nntse yalo e re ha u tlhagisa moikepi, me a sa shokologe mo boikepoñ yoa gagwè, leha e le mo tseleñ ea gagwè ea boikèpō, o tla shwèla mo boikepoñ yoa gagwè: me wèna u bo u golotse mōea oa gago.”—Esekiele 3:19.

10. Setlhopha sa Esekiele se itshupile jang go bo se tshwana le moperofeti?

¹⁰ Jaaka fa go ne go ntse mo kgannyeng ya ga Esekiele, setlhopha se se tloditsweng sa Esekiele se amogetse thomo ya sone eo se e neilweng ke Modimo mme se a e diragatsa. Fa e le gore re Basupi ba ga Jehofa, re tshwanetse ra gakologelwa gore botshelo jwa rona mmogo le matshelo a ba bangwe a ikaegile ka go nna kutlo ga rona. (1 Timotheo 4:15, 16) Mosupi mongwe le mongwe o tshwanetse go tsamaela gongwe le phuthego ya ga Jehofa. Modimo ga o kitla o re golegelela mo kareng ya gagwe le go re kgokgothisa ka yone. Go sa kgathale mmogo le go nna pelopedi go tlontlolola Mopalami wa Kara eno. Ka gone phuthego e e bonalang ya ga Jehofa e re kgothaletsa gore re boloke dilo tse di kgatlhang Modimo e le tsone tsa konokono mo matshelong a rona. Fa re reetsa kgothatso e e ntseng jalo ka metlha seo se tla re boloka re tsamaisana le phuthego ya Modimo mmogo le go tlotlomatsa bodihedi jwa rona jo bo boitshepo gore bo se ka jwa fetoga jo bo lapisang, jwa seomodiro fela. Kwantle ga pelaelo, batho ba ga Jehofa botlhe ba bontsha boineelo jo bo tlhomologileng. Seabe sa rona ka namana ke gore re tsamaye ka mosepele o o tshwanetseng.

Mafoko a Modimo A Tsenngwa mo Pelong

11. Ke sekao sefe seo Esekiele a ileng a se tlhoma malebana le mafoko a Modimo?

¹¹ Esekiele gape o ne a tlhoma sekao se se molemo ka go tsenya mafoko a Modimo mo pelong ya gagwe. E ne ya re a laelwa, a ja momeno wa lekwalo oo a neng a o neetswe ke Modimo. “Mo ganoñ ya me oa bo o nntse yaka dinotshe ka monate,” go ne ga bolela jalo Esekiele. Lemororo momeno ono wa lekwalo o ne o tletse “dikhutsahalō, le selelō, le tatlhègō,” o ne o le monate mo go Esekiele ka gonne o ne a anaanela tlotlo eo ya go emela Jehofa. E ne e le boitemogelo jo bo monate mo moperofeting go diragatsa kabelo eo a neng a e filwe ke Modimo. Modimo o ne wa mmolelela jaana: “Morwa motho, mahoko aotlhe a me a ke tla a buañ nau u a amogèlè ka pelo, u bo u a utlwè ka ditsèbè.” (Esekiele 2:9–3:3, 10) Diponatshegelo tseo di ne tsa dira Esekiele gore a lemoge ka botlalo seo Modimo o neng o mo letlile gore a nne le seabe mo go sone mme di ne tsa nonotsha kamano ya gagwe le Jehofa.

12. Ke eng seo Esekiele a neng a se dira mo lobakeng lo lo fetang masome a mabedi a dingwaga a direla jaaka moperofeti?

¹² Esekiele o ne a neelwa diponatshegelo mmogo le melaetsa go dirwa jalo ka maikaelelo a a farologaneng ebile go direlwa bareetsi ba ba farologaneng. O ne a tshwanelwa ke gore a reetse ka kelotlhoko mme e bo e re morago ga moo a bo a bua mmogo le go dira dilo jaaka fa a laetswe. O ne a senolelwa tshedimosetso e ntšha mmogo le mekgwa e mesha kgato ka kgato mo dingwageng di le 22 tsa tirelo ya boperofeti. Ka dinako tse dingwe Esekiele o ne a bua molaetsa oo o neng o kwadilwe ka tsela e e kgethegileng. Ka dinako tse dingwe, o ne a dirisa pontsho, jaaka ya go robala fa pele ga setena seo se neng se tshwantshetsa Jerusalema. (Esekiele 4:1-8) Sekai sa gagwe mo dikgannyeng tsa gagwe ka namana, tse di ntseng jaaka tsela eo a neng a itshwara ka yone fa mosadi wa gagwe a ne a swa, le tsone di ne di na le molaetsa. (Esekiele 24:15-19) O ne a sa tshwanela go salela kwa morago ka tshedimosetso, ka metlha o ne a tshwanela go neela molaetsa o o tshwanetseng mmogo le go tsaya kgato e e tshwanetseng ka nako e e tshwanetseng. Esekiele o ne a bofeletswe mo kamanong e e atamalaneng thata, e e tswelelang pele ya go dira le Jehofa.

13. Re ka dira jang gore re nne le kamano e e molemo le Jehofa?

¹³ Ka mo go tshwanang, go dira gore re nne le kamano e e atamalaneng le Jehofa mmogo le go e tshola e ntse jalo jaaka badirimmogo le ene, re tshwanetse ra tsenya Lefoko la Modimo mo pelong ya rona. (1 Bakorintha 3:9) Go tsamaela gongwe le phuthego e e bonalang ya Modimo mo ntlheng eno go tlhoka gore re nnele go ja dijo tsa semoya jaaka fa di ntse di tsholwa ka nako eo e leng yone. (Mathaio 24:45-47) “Puō e e itshekileñ” e nna e ntse e gola ka metlha. (Sefania 3:9) Ke fela fa re sa salela kwa morago ka tshedimosetso re tla kgonang eleruri go reetsa kaelo ya Mopalami wa Kara ka boikobo.

14, 15. Ke thulaganyo efe e e tlhokegang gore re tsamaye ka mosepele o o tlhomilweng ke phuthego ya Modimo?

¹⁴ Ka gone, re tshwanelwa ke gore re nne le thulaganyo e e molemo ya go rapela ka namana, go ithuta ka namana, mmogo le go nna le seabe mo bodiheding jo bo boitshepo jwa mafoko a a molemo. (Baroma 15:16) Gakologelwa sekao sa ga Esekiele sa fa a ne a ja momeno wa lekwalo oo o neng o na le molaetsa wa Modimo. Esekiele o ne a ja momeno oo wa lekwalo otlhe, ga a ka a ja bontlhanngwe jwa one fela. Ga a ka a nnela go tlhophatlhopha manathwana ao a neng a ka tswa e le one a mo natefelang ka namana. Ka mo go tshwanang, tsela eo re ithutang Bibela mmogo le dikgatiso tsa Bokeresete ka yone e tshwanetse ya laolwa sentle gore re kgone go tswelela re ntse re ja dijo tsa semoya jaaka fa re ntse re di abelwa, mme re tshwanetse ra ja dilo tsotlhe tseo di bewang mo godimo ga tafole ya semoya, go akaretsa le boammaaruri jo bo boteng.

¹⁵ A re iteka ka tlhoafalo gore re tlhaloganye dijo tse di loileng? Go tsamaela gongwe go tlhoka gore kitso ya rona mmogo le go tlhaloganya ga rona dilo go tswelele pele go pota ka kwa ga dithuto tsa motheo, ka gonne re bala jaana: “Moñwe le moñwe eo o hecwañ ka mashi ga a na tlwaèlanō le lehoko ya tshiamō; gonne ke ñwanyana hèla. Me diyō tse di loileñ ke tsa banna ba ba godileñ, eboñ bōnè ba ea reñ ka ba nntse ba diha, maikutlō a bōnè a tlwaediwe go lemoga molemō le boshula.” (Bahebera 5:13, 14) Ee, go dira kgatelopele semoyeng ke karolo ya botlhokwa ya go tsamaya ka mosepele oo o tlhomilweng ke phuthego ya Modimo.

Go Sa Kgobiwe Marapo ke go Tlhoka Kgatlhego

16, 17. Esekiele o ne a dirisana jang le go tlhoka kgatlhego, go kgalwa, mmogo le go sa reediwe ke ope?

¹⁶ Gape Esekiele o ne a tlhoma sekao se se molemo ka go nna boikobo mmogo le go sa itetle go kgobiwa marapo ke go tlhoka kgatlhego kana go kgalwa. Ka mo go tshwanang, ka go sa salele morago mo puong e e itshekileng fa e ntse e gola, seno se dira gore re lebe ntlheng eo Mopalami wa Kara ya segosi a lebileng kwa go yone. Ka gone seo se re tlhomelela gore re reetse ditaelo tsa gagwe, gore re nonofe mme re se ka ra kgobiwa marapo ke go tlhoka kgatlhego kana go kgalwa ke bao re ba bolelelang molaetsa wa ga Jehofa wa katlholo. Jaaka fa go ne go ntse ka Esekiele, Modimo o re tlhagisitse go sale gale gore batho bangwe ba ne ba tla nna kgatlhanong le rona ka tlhoafalo, ba le ditlhogo di thata le dipelo tse di logwadi. Ba bangwe ba ne ba se kitla ba reetsa ka gonne ba sa batle go reetsa Jehofa. (Esekiele 3:7-9) Ba bangwe mo godimo ga moo ba ne ba tla nna baitimokanyi, fela jaaka Esekiele 33:31, 32 e bolela: “Me ba tle mo go wèna, yaka batho ba tla ba tle, ba dule ha pele ga gago yaka e ka bo e le batho ba me, me ba utlwe mahoko a gago, me ba se ke ba a dihe: gonne ka molomo ba bua loratō lo logolo, me pelo ea bōnè e ee le papadi ea bōnè hèla. Me bōna, u nntse mo go bōnè yaka pina e e monate ea moñwe eo o nañ le lencwe ye le kgatlhañ, me a itse go letsa seleco sentlè: gonne ba utlwa mahoko a gago, me ga ba a dihe.”

¹⁷ Diphelelo tsa seno e ne e tla nna eng? Temana ya bo 33 e oketsa ka go re: “Me mogañ go mo go dihalañ, bōna, goè tla, hoñ ba tla itse ha moperofeti moñwe a kile a ne a le mo go bōnè.” Mafoko ao a bontsha gore Esekiele ga a ka a tlogela tiro ka gonne a ne a sa reediwe ke ope. Go tlhoka kgatlhego ga ba bangwe ga go a ka ga mo dira gore a latlhegelwe ke kgatlhego. Go sa kgathalesege gore a batho ba ne ba reetsa kana nnyaa, o ne a reetsa Modimo le go diragatsa thomo ya gagwe.

18. Ke dipotso dife tseo o ka di ipotsang?

¹⁸ Phuthego e e bonalang ya ga Jehofa jaanong e oketsa mokgosi wa yone wa gore botlhe ba tshwanetse ba boifa Modimo le go o naya kgalalelo. A o a itshoka fa o kgalwa ka ntlha ya go ema ka bopelokgale mo go neeleng bosupi kaga Bogosi, fa o kgalelwa mokgwa wa gago wa go tshela ka boitsholo jo bontle? A o nna o tlhomame fa o gatelelwa ka gonne o sa amogele tshelo ya madi, ka gonne o sa obamele ditshwantsho tsa semorafe, ka gonne o sa keteke malatsi a boikhutso a lefatshe?—Mathaio 5:11, 12; 1 Petere 4:4, 5.

19. Malebana le kaelo, ke eng seo re tla se dirang gore re tsamaele gongwe le kara ya selegodimo ya ga Jehofa?

¹⁹ Tsela eno ga e motlhofo, mme lefa go ntse jalo bao ba itshokang go fitlha bokhutlong ba tla bolokwa. (Mathaio 24:13) Ka thuso ya ga Jehofa, ga re kitla re letla batho ba lefatshe gore ba re dire gore re tshwane nabo mme ka gone ba re dira gore re se ka ra tsamaela gongwe le kara ya selegodimo ya ga Jehofa. (Esekiele 2:8; Baroma 12:21) Fa re tsamaela gongwe le phuthego ya baengele ya sekakara, re tla tsamaisana le kaelo mmogo le ditaelo tseo re di bonang ka phuthego ya Modimo e e bonalang kwantle ga go senya nako. Jehofa o re tlamela ka seo re se tlhokang gore re lwe le dilo tseo di tlhaselang tumelo ya rona, gore re nne re ngaparetse Lefoko la botshelo, le go boloka matlho a rona a tsepilwe mo dilong tsa mmatota tsa semoya tseo di theilweng mo Mopalaming wa Segosi wa kara eno ya selegodimo.

Re Rotloediwa Gore Re Tsamaele Gongwe

20. Ke dilo dife tse dingwe tseo di kwadilweng ke Esekiele tseo di tshwanetseng tsa re rotloetsa gore re tsamaele gongwe?

²⁰ Diponatshegelo tsa ga Esekiele di tshwanetse tsa re rotloetsa gore re tsamaele gongwe. O ne a se ka a itsise dikatlholo tsa Modimo fela kgatlhanong le Iseraele mme gape o ne a bega dipolelelopele tsa go tsosolosiwa ga yone. Esekiele o ne a tlhalosa ka Mongwe yoo a neng a tla nna le tshwanelo ya semolao ya go busa mo setulong sa bogosi sa ga Jehofa ka nako e e beilweng. (Esekiele 21:27) Motlhanka yoo wa Segosi, ebong “Dafide,” o ne a tla phutha batho ba Modimo sesha mmogo le go ba disa. (Esekiele 34:23, 24) Lemororo ba ne ba tla tlhaselwa ke Gogo wa Magogo, Modimo o ne o tla ba golola, mme baba ba Gagwe ba ne ba tla patelesega gore ba ‘itse Jehofa’ le eleng fa ba ne ba ya tatlhegong. (Esekiele 38:8-12; 39:4, 7) Jalo batlhanka ba Modimo ba ne ba tla ipelela botshelo jo bo sa khutleng mo tsamaisong ya kobamelo e e itshekileng eo e akaretsang tempele ya semoya. Metsi a botshelo ao a elelang a tswa mo sebesong e ne e tla nna motswedi wa dijo mmogo le wa phodiso, mme ba ne ba tla kgaoganngwa boswa jwa lefatshe gore ba ke ba bone tshegofatso.—Esekiele 40:2; 47:9, 12, 21.

21. Ke ka ntlha yang fa seabe seo Basupi ba ga Jehofa ba motlha wa segompieno ba nang le sone se feta seo Esekiele a neng a na le sone?

²¹ Abo Esekiele a tshwanetse a bo a ile a itumela thata jang ne go bega kaga dipolelelopele tseo! Lefa go ntse jalo, seabe seo Basupi ba ga Jehofa ba motlha wa segompieno ba nang le sone se segolo mo go seo. Re tshela mo nakong eo dingwe tsa dipolelelopele tseo di diragadiwang ka yone. Tota ebile, re tsaya karolo ka tlhagafalo mo go diragadiweng ga tse dingwe tsa tsone. A rona ka namana re bontsha go ya ka tsela eo re tshelang ka yone kafa re tlhatswegileng pelo ka gone gore Jesu jaanong o a busa jaaka Yoo o nang le tshwanelo ya semolao? A re tlhatswegile pelo ka namana gore mo bogautshwaneng Jehofa o tla iitshekisa le go falotshetsa bao ba tsamaelang gongwe le phuthego ya gagwe mo lefatsheng le lesha? (2 Petere 3:13) Go tlhatswega pelo ka tsela e e ntseng jalo, goo go patilweng ke ditiro tsa tumelo, go bontsha gore eleruri re tsamaela gongwe le kara ya selegodimo ya ga Jehofa.

Tswelela Pele O Tsamaela Gongwe

22. Ke eng seo se ka dirwang go tila dilo tse di itayang tsebe e le gore re tswelelepele re na le pono e e phepafetseng ya semoya?

²² Ereka re setse re ‘beile seatla sa rona mo mogomeng,’ ga re a tshwanela go leba kwa morago kwa go sepe seo lefatshe leno le nang le sone re se eletsa. (Luke 9:62; 17:32; Tito 2:11-13) Ka gone a re lweng kgatlhanong le go batla go ikokoanyetsa dikhumo mo lefatsheng, mme a re bolokeng leitlho la rona le bona sentle, le tlhomilwe mo Bogosing. (Mathaio 6:19-22, 33) Fa re dira gore matshelo a rona a se ka a raraana, re tlogela sengwe le sengwe seo se re imelang sa lefatshe gongwe le gongwe fa go tlhokegang gone, go tla re thusa gore re tsamaele gongwe le phuthego ya ga Jehofa. (Bahebera 12:1-3) Dilo tse di itayang tsebe di ka nna tsa dira gore re se ka ra bona kara ya selegodimo le Mopalami wa yone sentle. Mme ka thuso ya gagwe, re ka tswela pele re na le pono e e phepafetseng ya semoya, jaaka fa go ne go ntse ka Esekiele.

23. Ke eng seo Basupi ba ba ikanyegang ba tshwanelwang ke go se direla ba ba sa tswang go kopanela?

²³ Bontlhanngwe jwa boikarabelo joo re nang le jone jaaka Basupi ba ga Jehofa bo kopanyeletsa go thusa ba le bantsi ba basha gore ba tsamaele gongwe le kara ya ga Modimo ya selegodimo. Ka 1990 go ne go na le ba ba ka nnang 10 000 000 kwa Segopotsong sa loso lwa ga Jesu Keresete. Lemororo bangwe ba batho bano ba ka nna ba tswa ba nna gone kwa go dingwe tsa dipokano tsa Bokeresete, ba tlhoka go bona kafa go tlhokegang ka gone gore ba gatele pele le phuthego e e bonalang ya ga Jehofa. Jaaka Basupi ba ba ikanyegang, re ka ba thusa ka moya oo re o bontshang mmogo le kgothatso eo re e neelang.

24. Ke eng seo re tshwanetseng ra se dira mo metlheng eno e e kgatlhisang thata?

²⁴ Metlha eno ke e e kgatlhisang thata. Re bone kara ya selegodimo e tswa e tsamaya fa pele ga rona ka matlho a tumelo. Mopalami wa segosi wa Kara eno o neetse phuthego ya gagwe e e bonalang thomo ya gore e rerele merafe gore, kwa bokhutlong, ba tla itse gore Jehofa ke mang. (Esekiele 39:7) Dirisa tshono eno thata ka moo o ka kgonang ka gone o nne le seabe mo go tlotlomatseng bolaodi jwa Modimo mmogo le mo go itshekisiweng ga leina la gagwe ka go tsamaela gongwe le kara ya selegodimo ya ga Jehofa.

O Ne O Tla Araba Jang?

◻ Ke sekao sefe seo Esekiele a ileng a se tlhoma malebana le thomo ya gagwe?

◻ Go tsamaela gongwe le phuthego ya Modimo go bolelang?

◻ Esekiele o ne a leba jang mafoko a ga Jehofa?

◻ Re ka latela jang sekao sa ga Esekiele mo go lweng kgatlhanong le go tlhoka kgatlhego?

◻ Ke eng seo se tshwanetseng sa rotloetsa batlhanka ba ga Jehofa gore ba tsamaele gongwe le kara ya gagwe ya selegodimo?

[Ditshwantsho mo go tsebe 15]

Ke eng seo se tlhokegang gore re tsamaele gongwe le kara ya selegodimo ya ga Jehofa?

[Setshwantsho mo go tsebe 16]

Esekiele o ne a anaanela ditshiamelo tseo a neng a di filwe ke Modimo. Wena?