Dikgatiso Tse di Dirisiwang mo Bukaneng ya Pokano ya Botshelo le Bodiredi Jwa Rona
MARCH 1-7
MATLOTLO A A MO LEFOKONG LA MODIMO | DIPALO 7-8
“Re ka Ithuta Eng ka Baiseraele Fa ba Ne ba Le mo Kampeng?”
it-1-E 497 ¶3
Phuthego
Gantsi kwa Iseraele, go ne go na le banna ba ba tlhomilweng go nna baemedi. (Eser 10:14) Ka ntlha ya seno, “dikgosana tsa ditso” ke tsone di neng tsa ntsha dimpho fa motlaagana o sena go tlhomiwa. (Dip 7:1-11) Le mo motlheng wa ga Nehemia go ne go na le baperesiti, Balefi le ditlhogo tsa batho tse di neng di “netefatsa ka letshwao” gore dilo di dirwa ka tsela e e siameng. (Neh 9:38–10:27) Ka nako ya fa Baiseraele ba ne ba le kwa nageng, go ne go na le “dikgosana tsa phuthego, ba ba biditsweng ba kopano, banna ba ba tumileng,” mme mo banneng bano go ne go na le ba ba 250 ba ba neng ba ikopantse le Kora, Dathane, Abirame le One gore ba nne kgatlhanong le Moshe le Arone. (Dip 16:1-3) Jehofa o ne a thusa Moshe gore a tlhophe banna ba bagolwane ba le 70 gore ba mo thuse go sikara “morwalo wa batho.” (Dip 11:16, 17, 24, 25) Lefitiko 4:15 e bua ka “banna ba bagolwane ba phuthego,” mme go lebega baemedi ba batho e ne e le banna ba bagolwane ba Iseraele, ditlhogo, baatlhodi le badiredi.—Lef 4:15; Dip 1:4, 16; Jos 23:2; 24:1.
it-2-E 796 ¶1
Rubene
Kwa bothibelelong jwa Baiseraele, lotso lwa ga Rubene lo ne lo nna fa gare ga lotso lwa ga Simeone le lwa ga Gada mme ditso tseno di ne di nna kwa borwa jwa motlaagana. Lotso lwa ga Rubene lo ne lo etelela ditso tseno pele nako le nako fa Baiseraele ba ne ba fuduga mme ba latela lotso lwa ga Juda, Isakare le Sebulone. (Dip 2:10-16; 10:14-20) Ka nako ya fa motlaagana o ne o kgakolwa, ditso tseno di ne di ntsha dimpho tsa tsone ka tsela e di rulagantsweng ka yone fa di fuduga.—Dip 7:1, 2, 10-47.
Dintlhakgolo Tsa Buka ya Dipalo
8:25, 26. Go tlhomamisa gore go nne le banna ba ba tshwanelegang go dira ditiro tsa Balefi, le go akanyetsa dingwaga tsa bone, banna ba ba godileng ba ne ba tshwanetse go tlogela tiro e e patelediwang. Le fa go ntse jalo, ba ne ba ka ithaopa go thusa Balefi ba bangwe. Le fa gone gompieno motho a ka se ka a kgona go tlogela tiro ya go rera ka Bogosi, molaomotheo ono o re ruta thuto e e botlhokwa. Fa e le gore Mokeresete ga a kgone go diragatsa maikarabelo mangwe ka ntlha ya go gola, a ka nna a dira bodiredi bongwe jo a ka bo kgonang.
Go Ribolola Matlotlo mo Dikwalong
it-1-E 835
Leitibolo
E re ka maitibolo otlhe a basimane a Baiseraele a ne a tlile go nna ditlhogo tsa malapa, seno se ne se raya gore ba ne ba tla emela setšhaba sotlhe. Tota e bile, Jehofa o ne a bitsa setšhaba seno a re ke “leitibolo” la gagwe mme e ne e le leitibolo ka ntlha ya kgolagano e a e dirileng le Aborahame. (Ek 4:22) Jehofa o ne a sireleditse maitibolo otlhe a Baiseraele, ka jalo o ne a kopa gore a ‘itshepisetswe leitibolo lengwe le lengwe le le tonanyana le le bulang sebopelo sengwe le sengwe mo go bomorwa Iseraele, mo bathong le mo diphologolong.’ (Ek 13:2) Ka jalo, maitibolo a basimane a ne a neetswe Jehofa.
MARCH 8-14
MATLOTLO A A MO LEFOKONG
LA MODIMO | DIPALO 9-10
“Jehofa o Etelela Batho ba Gagwe Pele Jang?”
it-1-E 398 ¶3
Kampa
Fa kampa ya Baiseraele e ne e fudugela kwa lefelong le lengwe (mo go Dipalo 33, Moshe o bua ka nako ya fa ba ne ba fuduga makgetlo a ka nna 40) ba ne ba tsamaya ka tsela e e rulaganeng sentle. Fa leru le ne le sa suti mo godimo ga motlaagana, Baiseraele ba ne ba sa fuduge. Mme fa leru le ne le suta, Baiseraele ba ne ba fuduga. “Ba ne ba nna ba thibeletse ka taelo ya ga Jehofa, mme ba bolola ka taelo ya ga Jehofa.” (Dip 9:15-23) Go ne go dirilwe diterompeta tse pedi tsa selefera tse di neng di thusa batho mo kampeng gore ba itse ditaelo tsa ga Jehofa. (Dip 10:2, 5, 6) Mme fa modumo wa terompeta o fetofetoga seno se ne se raya gore Baiseraele ba tshwanetse go fuduga. Baiseraele ba ne ba fuduga lekgetlo la ntlha “mo ngwageng wa bobedi [1512 B.C.E.], mo kgweding ya bobedi, mo letsatsing la bomasome a mabedi.” Fa Baiseraele ba ne ba fuduga go ne go tswa letlole la kgolagano pele, go bo go tswa ditso tse tharo tse di etelelwang pele ke Juda, Isakare le Sebulone. Mme ditso tseno di ne di setswe morago ke Bagereshone le Bamerari ba ba neng ba tshotse dilo tse ba neng ba abetswe gore ba di tseye tsa motlaagana fa go fudugiwa. Ba bo ba latelwa ke ditso tse tharo tse di eteletsweng pele ke Rubene, lo setswe morago ke lotso lwa ga Simeone le lwa ga Gada. Mme morago go bo go latela Bakohathe ba ba neng ba tshotse lefelo le le boitshepo mme go bo go latela ditso tse tharo tse di eteletsweng pele ke Eferaime lo setswe morago ke lotso lwa ga Manase le lwa ga Benjamine. Mme lotso lwa bofelo go fuduga e ne e le lwa ga Dana, Ashera le Nafetali. Go ne go rulagantswe gore fa Baiseraele ba fuduga, ditso tse di nang le batho ba bantsi le banna ba ba maatla di nne kwa pele le kwa morago.—Dip 10:11-28.
A o Lemoga Bosupi Jwa Gore re Kaelwa ke Modimo?
Re ka bontsha jang gore re anaanela kaelo ya Modimo? Moaposetoloi Paulo o ne a re: “Utlwang ba ba etelelang pele mo gare ga lona mme lo ikobe.” (Baheb. 13:17) Ga se ka metlha go leng motlhofo go dira jalo. Ka sekai: Akanya o le Moiseraele mo motlheng wa ga Moshe. Akanya fela pilara e ema morago ga gore lo tsamaye lobaka lo lo rileng. E tla ema foo lobaka lo lokae? Letsatsi? Beke? Dikgwedi di le mmalwa? O ipotsa gore, ‘A go botlhokwa gore ke phutholole merwalo ya me yotlhe?’ Kwa tshimologong, o ka nna wa phutholola fela dilo tse di tlhokegang thata. Le fa go ntse jalo, morago ga malatsi a le mmalwa, o betwa ke pelo ka ntlha ya go nna o phuruphutsa merwalo ya gago, mme o simolola go phutholola dilo tsotlhe. Mme fa e kete o fetsa go phutholola merwalo ya gago, o bona pilara e emelela—mme o tshwanelwa ke go simolola go phutha merwalo ya gago gape! Seo se ne se se kitla se nna motlhofo. Le fa go ntse jalo, Baiseraele ba ne ba tshwanetse go “bolola morago fela ga moo.”—Dipa. 9:17-22.
Ka jalo, re itshwara jang fa re neelwa kaelo ya Modimo? A re leka go e dirisa “morago fela ga moo”? Kgotsa a re tswelela re dira dilo fela jaaka re ne re tlwaetse go di dira? A re itse dikaelo tse di mo nakong, tse di jaaka tse di malebana le go tshwara dithuto tsa magae tsa Baebele, go rerela batho ba ba buang puo e sele, go nna le kobamelo ya lelapa ka metlha, go dirisana mmogo le Dikomiti Tsa Puisano le Dikokelo le go itshwara sentle fa re le kwa dikopanong? Re bontsha gape gore re anaanela kaelo ya Modimo ka go amogela kgakololo. Fa re tshwanetse go dira ditshwetso tsa botlhokwa, ga re ikanye botlhale jwa rona, mme re senka kaelo mo go Jehofa le mo phuthegong ya gagwe. Fela jaaka ngwana a batla tshireletsego mo batsading ba gagwe fa go nna le setsuatsue, le rona re senka tshireletsego mo phuthegong ya ga Jehofa, fa re lebana le mathata a lefatshe leno a a jaaka setsuatsue.
Go Ribolola Matlotlo mo Dikwalong
it-1-E 199 ¶3
Go Kopana Mmogo
Goreng go le Botlhokwa. Ngwaga le ngwaga batho ba ne ba tshwanetse go kopana mmogo go keteka tlolaganyo mme lebaka la go bo seno se le botlhokwa ke ka gonne ba ne ba rutwa ke Jehofa. Monna mongwe le mongwe yo o phepa e bile a sa tsaya loeto o ne a tshwanetse go keteka tlolaganyo mme fa a sa dire jalo o ne a tshwanetse go bolawa. (Dip 9:9-14) Fa Kgosi Hesekia a ne a bitsa batho botlhe ba Juda le Iseraele go tla Jerusalema go tla go keteka tlolaganyo, o ne a ba romelela molaetsa a re: “Lona bomorwa Iseraele, boelang kwa go Jehofa . . . lo se ka lwa thatafatsa thamo ya lona jaaka borraalonamogologolwane ba ne ba dira. Nayang Jehofa lefelo mme lo tle mo lefelong la gagwe le le boitshepo le a le itshepisitseng ka bosakhutleng mme lo direle Jehofa Modimo wa lona, gore bogale jwa gagwe jo bo tukang bo boe ka morago mo go lona. . . . Jehofa Modimo wa lona o pelontle e bile o kutlwelobotlhoko, mme ga a kitla a faposa sefatlhego mo go lona fa lo boela kwa go ene.” (2Dit 30:6-9) Le fa gone Bakeresete ba sa tlhole ba keteka tlolaganyo, Paulo o ne a ba kgothaletsa gore ba kopane mmogo fa a ne a re: “A re akanyetsaneng gore re tlhotlheletsaneng mo loratong le mo ditirong tse di molemo, re sa lese go phuthega mmogo ga rona, jaaka bangwe ba na le mokgwa oo, mme re kgothatsana, mme re dira jalo le go feta e re ka lo bona letsatsi le atamela.”—Bah 10:24, 25.
MARCH 15-21
MATLOTLO A A MO LEFOKONG
LA MODIMO | DIPALO 11-12
“Goreng re sa Tshwanela go Ngongorega?”
Lo se Nne Bautlwi ba ba Lebalang Bobe
20 Bontsi jwa Bakeresete ga ba ineele mo boitsholong jo bo maswe jwa tlhakanelodikobo. Le fa go ntse jalo, re tshwanetse go nna kelotlhoko gore re se ka ra itetla go latela tsela ya go nnela go ngongorega e e ka dirang gore Modimo a se ka a re amogela. Paulo o re gakolola jaana: “Le gone a re se lekeng Jehofa, jaaka bangwe ba [Baiseraele] ba ne ba mo leka, mme ba nyelediwa ke dinoga. Le gone re se ka ra nna bangongoregi, fela jaaka bangwe ba bone ba ne ba ngongorega, mme ba nyelediwa ke mosenyi.” (1 Bakorintha 10:9, 10) Baiseraele ba ne ba ngongorega ka Moshe le Arone—ee, tota le ka Modimo ka boene—ba ngongoregela mana a ba neng ba tlamelwa ka one ka kgakgamatso. (Dipalo 16:41; 21:5) A Jehofa o ne a kgopisiwa go sekae fela ke go ngongorega ga bone go na le kafa a neng a kgopisitswe ka teng ke kgokafalo ya bone? Pego ya Baebele e bontsha gore bontsi jwa batho ba ba neng ba ngongorega ba ne ba bolawa ke dinoga. (Dipalo 21:6) Mo tiragalong ya pele ga foo, go ne ga nyelediwa bangongoregi ba batsuolodi ba le 14 700. (Dipalo 16:49) Ka gone, a re se lekeng Jehofa ka go se bontshe go tlotla dilo tse a re tlamelang ka tsone.
‘Nnang Lo se Na Dingongorego’
7 Boikutlo jwa Baiseraele bo ne bo fetogile tota! La ntlha ba ne ba lebogela go gololwa kwa Egepeto le go namolwa mo Lewatleng le Lehibidu ba bo ba opelela Jehofa dipako. (Ekesodo 15:1-21) Mme fa batho ba Modimo ba setse ba lebane le botshelo jo bo thata jwa kwa nageng e bile ba boifa Bakanana, ba ne ba felelwa ke go leboga mme ba nna le moya wa go se kgotsofale. Mo boemong jwa go lebogela Modimo kgololesego ya bone, ba ne ba mo pega molato ka se ba neng ba se leba e le go sotliwa mme tota e se gone. Ka jalo go ngongorega go ne go bontsha go se anaanele dithulaganyo tse di molemo tsa ga Jehofa. Ke sone se a ileng a re: “Phuthego e e bosula eno e tla nna le ngongorego eno eo e e dirang kgatlhanong le nna ka lobaka lo lo kae?”—Dipalo 14:27; 21:5.
it-2-E 719 ¶4
Go Ngongorega
Go ngongorega go kgoba marapo e bile ga go age. Fela fa Baiseraele ba sena go tswa kwa Egepeto, ba ne ba simolola go ngongorega ka Jehofa ba bo ba tshwayatshwaya phoso batho ba ba tlhomilweng go etelela pele e leng Moshe le Arone. (Ek 15:1-21) Fa nako e ntse e ya, dingongorego tsa bone di ne tsa kgoba Moshe marapo mo a neng a kopa go swa. (Dip 11:13-15) Motho yo o ngongoregang o itsenya mo kotsing. Fa Baiseraele ba ne ba ngongorega ka Moshe, Jehofa o ne a re ba ngongorega ka tsela e a neng a ba etelela pele ka yone. (Dip 14:26-30) Batho ba le bantsi ba ne ba swa ka gonne ba ne ba tshwayatshwaya diphoso.
Go Ribolola Matlotlo mo Dikwalong
it-2-E 309
Mana
A ne A Ntse jang. Mana o ne o le mosweu mme o ne o tshwana le borekhu jwa setlhare. O ne o utlwala jaaka dikuku tse di sephaphathi tse di nang le tswina ya dinotshe kgotsa jaaka ‘dikuku tse di botshe tse di tsentsweng leokwane.’ Mana o ne o kgona go silwa kgotsa go thugwa mme o ne o ka kgona go apewa kgotsa go ne go ka dirwa dikuku ka one.—Ek 16:23, 31; Dip 11:7, 8.
MARCH 22-28
MATLOTLO A A MO LEFOKONG
LA MODIMO | DIPALO 13-14
“Tumelo e re Thusa go Nna Pelokgale”
Go Nna Pelokgale ka Ntlha ya Tumelo le Poifomodimo
5 Lefa go ntse jalo, batho ba le babedi mo ditlhoding tseno, e leng Joshua le Kalebe, ba ne ba gakaletse go tsena mo Lefatsheng le le Solofeditsweng. Ba ne ba re: Bakanana “ke senkgwe mo go rona. Boitshireletso jwa bone bo fapogile mo godimo ga bone, mme Jehofa o na le rona. Lo se ka lwa ba boifa.” (Dipalo 14:9) A Joshua le Kalebe ba ne ba na le bopelokgale jwa go tlhoka tlhaloganyo? Legoka! Bone le setšhaba sotlhe ba ne ba bone kafa Jehofa a neng a nyenyefatsa Egepeto e e maatla le medimo ya teng ka Dipetso Tse di Lesome. Ka nako eo ba ne ba bone Jehofa a nwetsa Faro le masole a gagwe mo Lewatleng le Lehibidu. (Pesalema 136:15) Ga go pelaelo gore, ditlhodi tse di lesome le batho ba ba neng ba tlhotlhelediwa ke bone ba ne ba se na seipato sa go boifa. Jehofa o ile a bua jaana a bontsha go utlwa botlhoko: “Batho bano . . . ga ba kitla ba dumela mo go nna ka lobaka lo lo kae ka ntlha ya ditshupo tsotlhe tse ke neng ka di dira mo go bone?”—Dipalo 14:11.
6 Jehofa o ne a tlhalosa modi wa bothata—bogatlapa jwa batho bano bo ne bo bontsha go tlhoka tumelo ga bone. Ee, tumelo le bopelokgale di amana fela thata, di amana thata jaana mo moaposetoloi Johane a neng a kwala jaana ka phuthego ya Bokeresete le ntwa ya yone ya semoya: “Eno ke phenyo e e fentseng lefatshe, tumelo ya rona.” (1 Johane 5:4) Gompieno, tumelo e e tshwanang le ya ga Joshua le Kalebe e dirile gore dikgang tse di molemo tsa Bogosi di rerwe mo lefatsheng lotlhe ke Basupi ba ga Jehofa ba ba fetang dimilione tse thataro, ba basha le ba bagolo, ba ba nonofileng le ba ba bokoa. Ga go mmaba ope yo o kgonneng go didimatsa lesomo leno le le nonofileng le le le pelokgale.—Baroma 8:31.
Go Ribolola Matlotlo mo Dikwalong
it-1-E 740
Lefatshe le Modimo a le Neileng Iseraele
LEFATSHE le Modimo a neng a le neileng Baiseraele e ne e le lefatshe le le ungwang. Moshe o ne a romela ditlhola go ya kwa Lefatsheng le le Solofeditsweng a bo a ba laela gore ba tle ka maungo a one. Ba ne ba tlisa difeige, digaranata le kala ya diterebe mme diterebe tseno di le ditona mo e leng gore go ne go tlhokega banna ba babedi gore ba di tshware mmogo. Le fa gone ba ne ba tshogile ka gonne ba ne ba se na tumelo, ba ne ba bega ba re: Ruri lefatshe le “elela mashi le tswina ya dinotshe.”—Dip 13:23, 27.
MARCH 29–APRIL 4
MATLOTLO A A MO LEFOKONG
LA MODIMO | DIPALO 15-16
“O se Ka wa Ikgogomosa le go Itshepa Thata”
A o Itsiwe ke Jehofa?
12 Le fa go ntse jalo, fa setšhaba sa Iseraele se ne se le mo tseleng se ya kwa Lefatsheng le le Solofeditsweng, Kora o ne a bona se a neng a akanya gore ke mathata mo thulaganyong ya Modimo. Go tswa foo, banna ba bangwe ba le 250 ba ba etelelang pele mo setšhabeng ba ne ba ema Kora nokeng fa a ne a leka go dira diphetogo. Kora le ba bangwe ba ka tswa ba ne ba tlhomamisegile ka kamano ya bone le Jehofa. Ba ne ba raya Moshe ba re: “Go lekane ka [wena], ka gonne batho ba phuthego yotlhe ba boitshepo e bile Jehofa o mo gare ga bone.” (Dipa. 16:1-3) A bo ba ne ba na le boikutlo jwa go itshepa thata le jwa go ikgogomosa jang ne! Moshe o ne a ba raya a re: “Jehofa o tla itsise gore ke mang yo e leng wa gagwe.” (Bala Dipalo 16:5.) Fa letsatsi le le latelang le wela, Kora le botlhe ba ba neng ba tsuologa le ene ba ne ba sule.—Dipa. 16:31-35.
A o Itsiwe ke Jehofa?
11 Moshe le Kora ba farologana thata, fa go tla mo kgannyeng ya go tlotla thulaganyo ya ga Jehofa le ditshwetso tsa gagwe. Tsela e ba neng ba itshwara ka yone e ne ya ama kafa Jehofa a ileng a ba leba ka gone. Kora e ne e le Molefi wa Mokohathe mme o ne a na le ditshiamelo tse dintsi tse di ka tswang di ne di akaretsa go bona setšhaba se gololwa mo Lewatleng le Lehibidu, go ema nokeng katlholo ya ga Jehofa kgatlhanong le Baiseraele ba ba seng kutlo kwa Thabeng ya Sinai, le go nna le seabe mo go tsamaiseng letlole la kgolagano. (Ekes. 32:26-29; Dipa. 3:30, 31) Go lebega a ile a ikanyega mo go Jehofa dingwaga di le dintsi e bile e le sekao se se molemo mo bathong ba le bantsi mo kampeng ya Iseraele.
Go Ribolola Matlotlo mo Dikwalong
Tlhomamisa Gore Dilo Tsa Pele di Tle Pele!
Jehofa o ne a leba kgang eno e le masisi tota. Baebele e bolela jaana: “Jehofa a raya Moshe a re: ‘Ruri motho yoo o tla bolawa.’” (Dipalo 15:35) Ke ka ntlha yang fa Jehofa a ile a tsaya se monna yono a se dirileng se le masisi thata?
Batho ba ne ba na le malatsi a le marataro gore ba rwalele dikgong mmogo le go bona gore ba tlhoka eng malebang le dijo, diaparo le marobalo. Letsatsi la bosupa le ne le tshwanetse go beelwa dilo tsa bone tsa semoya. Le fa gone go ne go se phoso go rwalela dikgong, go ne go le phoso go dira tiro eno ka nako e e ka bong e beetswe go obamela Jehofa. Le fa gone Bakeresete ba se kafa tlase ga Molao wa ga Moshe, a gompieno tiragalo eno ga e re rute gore re beye dilo tse di tlang pele mo maemong a tsone?—Bafilipi 1:10.
APRIL 5-11
MATLOTLO A A MO LEFOKONG
LA MODIMO | DIPALO 17-19
“Ke Nna . . . Boswa Jwa Gago”
A o Letla Jehofa e Nna Kabelo ya Gago?
9 Akanya ka Balefi ba ba neng ba se ka ba amogela lefatshe e le boswa. E re ka ba ne ba tshwenyegile thata ka kobamelo e e itshekileng, ba ne ba tshwanelwa ke go ikaega ka Jehofa gore a ba tlamele, ka gonne o ne a ba bolelela jaana: “Ke nna kabelo ya gago.” (Dipa. 18:20) Le fa re sa direle kwa tempeleng ya mmatota jaaka baperesiti le Balefi ba ne ba dira, re ka etsa moya wa bone, re na le tsholofelo ya gore Jehofa o tla re tlamela. Go botlhokwa thata go ikanya Modimo gore o na le maatla a go re tlamela, e re ka re ntse re tsenelela kwa teng mo malatsing a bofelo.—Tshen. 13:17.
Jehofa ke Kabelo ya Me
4 Tiro eo e ne e kaya eng mo Balefing? Jehofa o ne a re ke kabelo ya bone ka kgopolo ya gore go na le gore ba amogele lefatshe e le boswa, ba ne ba neilwe tshiamelo e e ka se lekanngweng le epe ya go mo direla. Go nna “boperesiti jwa ga Jehofa” e ne e le boswa jwa bone. (Josh. 18:7) Fa re bala Dipalo 18:20, re lemoga gore seno se ne se sa ba dire gore ba humanege. (Bala Dipalo 18:19, 21, 24.) Balefi ba ne ba tshwanetse go newa “sa bosome sengwe le sengwe mo Iseraele go nna boswa e le tuelo ya tirelo ya bone.” Ba ne ba tla amogela sa bosome sa dijalo tsa Baiseraele le sa bosome sa koketsego ya leruo la bone. Mme Balefi bone, ba ne ba tshwanetse go ntsha moneelo wa sa bosome sa se ba se amogetseng, “wa o o e gaisang yotlhe” gore ba eme boperesiti nokeng. (Dipa. 18:25-29) Gape baperesiti ba ne ba newa “meneelo yotlhe e e boitshepo” e bomorwa Iseraele ba e tliseditseng Modimo mo lefelong la gagwe la kobamelo. Ka jalo, maloko a boperesiti a ne a na le lebaka le le utlwalang la go dumela gore Jehofa o ne a tla ba tlamela.
Go Ribolola Matlotlo mo Dikwalong
“Le Tswa mo Batsading ba ba Itshekileng Thata”
Masea ka dinako dingwe a ne a tshasiwa letswai fa a sena go tsholwa, gongwe e le ka gonne go ne go dumelwa gore le kgona go alafa kgotsa go bolaya megare. (Esekiele 16:4) Baebele e dirisa letswai gape ka tsela ya tshwantshetso. Ka sekai, Jesu, o ne a re barutwa ba gagwe ke “letswai la lefatshe,” a kaya gore batho ba bangwe ba ne ba ka bolokwa ka ntlha ya molaetsa o o nayang botshelo o ba neng ba o rera. (Mathaio 5:13). Letswai le nnile gape letshwao la go bontsha gore selo se tsepame e bile se nnetse ruri. Ke ka moo “kgolagano ya letswai” e neng e tsewa jaaka tumalano e e tlamang.—Dipalo 18:19.
APRIL 12-18
MATLOTLO A A MO LEFOKONG
LA MODIMO | DIPALO 20-21
“Go Nna Bonolo Le fa O Gateletswe go Tla go Thusa”
Nna Bonolo Mme o Itumedise Jehofa
19 Re tla tila go dira diphoso. Akanya gape ka se se diragaletseng Moshe. Go ne ga feta dingwaga di le dintsi a le bonolo e bile a itumedisa Jehofa. Mme morago ga dingwaga di ka nna 40 Baiseraele ba le kwa nageng, Moshe o ne a palelwa ke go bontsha nonofo eno. Miriame yo a ka tswang a bolokile botshelo jwa gagwe kwa Egepeto o ne sa tswa go tlhokafala le go fitlhwa kwa Kadeshe. Le mo lekgetlong leno Baiseraele ba ne ba ngongorega ka gore ga ba tlhokomelwe sentle. Ba ne ba “omana le Moshe” ka gonne go ne go se na metsi. Le fa gone Jehofa a ile a naya Moshe maatla a go dira dikgakgamatso tse dintsi e bile Moshe a ile a ba etelela pele dingwaga di le dintsi, batho bao ba ile ba ngongorega. Ba ne ba sa ngongorege ka metsi fela, gape ba ne ba ngongorega ka Moshe jaaka e kete ke phoso ya gagwe go bo ba se na metsi.—Dipa. 20:1-5, 9-11.
Nna Bonolo Mme o Itumedise Jehofa
20 Moshe o ile a galefa mme a palelwa ke go nna bonolo. Ga a ka a bua le lefika jaaka Jehofa a ne a mo laetse. Go na le moo, o ile a bua le batho ka bogale le go itlotlomatsa. Morago ga moo o ile a itaya lefika gabedi go bo go tswa metsi a mantsi. O ile a dira phoso e e masisi ka gonne o ile a itetla go galefa le go nna boikgogomoso. (Pes. 106:32, 33) Ka gonne Moshe o ile a palelwa ke go nna bonolo ka nakwana, ga a ka a tsena kwa Lefatsheng le le Solofeditsweng.—Dipa. 20:12.
21 Re ithuta sengwe sa botlhokwa mo go se se diragaletseng Moshe. Sa ntlha, re tshwanetse go tswelela re le bonolo. Fa re sa dire jalo re ka nna ra simolola go ikgogomosa mme seo se ka dira gore re bue le go itshwara ka boeleele. Sa bobedi, kgatelelo ya maikutlo e ka re koafatsa, ka jalo, re tshwanetse go leka ka natla go nna bonolo le fa re gateletswe mo maikutlong.
Moatlhodi yo o Atlholang Go ya Ka se Se Siameng
Sa ntlha, Modimo o ne a sa laela Moshe gore a bue le batho e bile o ne a sa mo laela go atlhola batho a re ke batsuolodi. Sa bobedi, Moshe le Arone ba ne ba palelwa ke go galaletsa Modimo. Modimo o ne a re: ‘Ga lo a ka lwa . . . intshepisa.’ (Temana 12) Fa Moshe a ne a re “re tla lo ntshetsa metsi,” o ne a bua e kete ene le Arone—e seng Modimo—ba ne ba tla ba ntshetsa metsi ka kgakgamatso. Sa boraro, katlholo eno e ne e tshwana le tse Modimo a di dirileng mo nakong e e fetileng. Modimo o ne a se ka a letlelela kokomana ya batsuolodi go tsena kwa Kanana, ka jalo o ne a dira se se tshwanang ka Moshe le Arone. (Dipalo 14:22, 23) Sa bonè, Moshe le Arone e ne e le baeteledipele ba Baiseraele. Batho ba ba nang le maikarabelo a magolo ba ikarabelela mo Modimong.—Luke 12:48.
Go Ribolola Matlotlo mo Dikwalong
A o Leba Makoa a Batho Jaaka Jehofa a a Leba?
12 Mo maemong ano otlhe, Jehofa a ka bo a ile a otlhaya Arone ka yone nako eo. Mme o ne a lemoga gore Arone e ne e se motho yo o bosula e bile o ne a se molato go le kalo. Go bonala Arone a ile a letla gore maemo kgotsa go tlhotlhelediwa ke ba bangwe go mo fapose mo tseleng e e siameng. Le fa go ntse jalo, fa a ne a bolelelwa ka diphoso tsa gagwe, o ne a di dumela ka bonako mme a tshegetsa dikatlholo tsa ga Jehofa. (Ekes. 32:26; Dipa. 12:11; 20:23-27) Jehofa o ne a tlhopha go tlhoma mogopolo mo tumelong ya ga Arone le go bo a na le boikutlo jwa go ikwatlhaya. Makgolokgolo a dingwaga moragonyana, Arone le ba losika lwa gagwe ba ne ba sa ntse ba gakologelwa e le batho ba ba boifang Jehofa.—Pes. 115:10-12; 135:19, 20.
APRIL 19-25
MATLOTLO A A MO LEFOKONG
LA MODIMO | DIPALO 22-24
“Jehofa o Dira Gore Baiseraele ba Segofadiwe”
Go Bolela “Dikgang Tse di Molemo Kaga Jesu”
5 Le gompieno, fela jaaka mo lekgolong la ntlha la dingwaga, go bogisiwa ga batho ba Modimo ga go a dira gore ba tlogele go rera. Gantsi fa Bakeresete ba patelediwa gore ba fudugele kwa mafelong a mangwe—kwa dikgolegelong kgotsa kwa dinageng tse dingwe—seo se ile sa dira gore batho ba ba mo mafelong ao ba utlwe molaetsa wa Bogosi. Ka sekai, ka nako ya Ntwa ya Lefatshe II, Basupi ba ga Jehofa ba ne ba kgona go neela bosupi mo dikampeng tsa pogisetso tsa Banasi. Mojuda mongwe yo o neng a kopana le Basupi koo a re: “Bopelokgale jwa bagolegwa ba Basupi ba ga Jehofa bo ne jwa ntlhomamisetsa gore tumelo ya bone e ne e theilwe mo Dikwalong—mme le nna ke ne ka nna Mosupi.”
it-2-E 291
Botseno
Go Nna Kgatlhanong le Jehofa. Moporofeti Baalame o ne a dira boeleele ka go batla go porofeta dilo tse di bosula ka Baiseraele gore Kgosi Balake wa Bamoabe a mo neye madi mme Jehofa ga a ka a letlelela seo. Moaposetoloi Petere o ne a kwala jaana ka Baalame: “Pelesa e e se nang lentswe, e bua ka lentswe la motho, e ne ya kgoreletsa tsela ya botsenwa ya moporofeti yono.” Fa moaposetoloi Petere a ne a tlhalosa botseno jwa ga Baalame, o ne a dirisa lefoko la Segerika e leng pa·ra·phro·niʹa le le ka tswang le kaya “motho yo o senang tlhaloganyo.”—2Pe 2:15, 16; Dip 22:26-31.
Go Ribolola Matlotlo mo Dikwalong
Dintlhakgolo Tsa Buka ya Dipalo
22:20-22— Ke ka ntlha yang fa bogale jwa ga Jehofa bo ne jwa tukela Balaame? Jehofa o ne a boleletse moporofeti Balaame gore a se ka a hutsa Baiseraele. (Dipalo 22:12) Le fa go ntse jalo, moporofeti yoo o ne a tsamaya le banna ba ga Balake ka maikaelelo a go hutsa Baiseraele. Balaame o ne a batla go itumedisa kgosi ya Moabe le go amogela tuelo mo go ene. (2 Petere 2:15, 16; Jude 11) Le e leng fa Balaame a ne a patelediwa go segofatsa Baiseraele go na le gore a ba hutse, o ne a batla kamogelo ya kgosi ka go akantsha gore basadi ba ba obamelang Baale ba dirisiwe go raela banna ba Baiseraele. (Dipalo 31:15, 16) Ka jalo, lebaka la go bo Modimo a ne a galefela Balaame e ne e le ka ntlha ya bogagapa jo bogolo jwa moporofeti yono.
APRIL 26–MAY 2
MATLOTLO A A MO LEFOKONG
LA MODIMO | DIPALO 25-26
“Motho a le Mongwe o Kgona go Thusa ba Bangwe”
“Tshabang Kgokafalo”
MOTSHWARADITLHAPI o ya kwa lefelong le a ratang go tshwara ditlhapi mo go lone. Go na le mofuta mongwe wa tlhapi o a batlang go o tshwara. O tlhopha sengwe se a ka okang tlhapi ka sone a bo a se latlhela mo metsing a se golegeletse mo mogaleng. Morago ga nakonyana, mogala o a gagamala, thupa e e golegetsweng mogala e a obega, mme o goga tlhapi e a e tshwereng. O a nyenya ka gonne o itse gore o ne a tlhophile sengwe se se tshwanelang go oka tlhapi
2 Ka ngwaga wa 1473 B.C.E., monna mongwe yo o bidiwang Balaame o ne a akanya thata gore a ka dirisa thaelo efe. Le fa go ntse jalo, ene o ne a batla go tshwara batho ba Modimo, ba ba neng ba thibeletse mo Dipoeng tsa Moabe, gaufi fela le Lefatshe le le Solofeditsweng. Balaame o ne a ipolela fa e le moporofeti wa ga Jehofa, mme tota e ne e le monna fela yo o pelotshetlha yo o neng a thapetswe go hutsa Baiseraele. Le fa go ntse jalo, Jehofa o ne a dira gore Balaame a segofatse Baiseraele. E re ka Balaame a ne a batla fela go bona tuelo, o ne a ipolelela gore gongwe o ne a ka dira gore Modimo a hutse batho ba gagwe, fa fela ba ne ba ka raelesega go dira boleo jo bo masisi. Ka jone boikaelelo joo, Balaame o ne a tlisa thaelo—barweetsana ba ba hepisang ba Moabe.—Dipalo 22:1-7; 31:15, 16; Tshenolo 2:14.
“Tshabang Kgokafalo!”
4 Masetlapelo ano a ne a bakilwe ke eng? Batho ba le bantsi ba ne ba setse ba na le pelo e e boikepo ka gonne ba katogetse kgakala le Jehofa, ene Modimo yo o neng a ba golotse kwa Egepeto, a ba fepa kwa nageng mme a ba babalela go fitlha ba tsena kwa lefatsheng le le solofeditsweng. (Bahebera 3:12) Moaposetoloi Paulo o ne a kwala jaana a akantse ka kgang eno: “Le gone a re se direng kgokafalo, jaaka bangwe ba bone ba ne ba dira kgokafalo, mme ga wa ba le dikete di le masome a mabedi le boraro ba bone mo letsatsing le le lengwe.”—1 Bakorintha 10:8.
Go Ribolola Matlotlo mo Dikwalong
it-1-E 359 ¶1-2
Melelwane ya Lefatshe
Go lebega go ne go lebelelwa dilo tse pedi fa ditso di ne di newa lefatshe. Sa ntlha, go latlhelwa ga bola, sa bobedi, gore lotso lo ne lo le kana kang. Bola bo ne bo thusa go itse gore lotso lo lo rileng lo tla nna mo lefelong lefe, a ke kwa bokone, kwa borwa, kwa botlhaba kgotsa kwa bopirima, gore a e tla nna gaufi le metsi kgotsa kwa dithabeng. Jehofa ke ene a neng a dira tshwetso fa go latlhelwa bola, seno se ne se thusa gore ditso di se ka tsa fufegelana kgotsa tsa ngongorega. (Dia 16:33) Gape Jehofa o ne a tla dira gore seemo sa lotso longwe le longwe se tsamaisane le se Jakobe a neng a se porofeta pele a tlhokafala mo go Genesise 49:1-33.
Fa bola bo sena go latlhelwa mme go bonwe gore lotso longwe le longwe lo tla nna kae, go ne go lebelelwa gore lotso loo lo tla abelwa lefatshe le le kana kang: “Lo ikgaoganyetse lefatshe ka bola go nna thuo kafa malapeng a lona. Yo o nang le batho ba le bantsi lo mo okeletse boswa, mme wa ba ba seng bantsi lo fokotse boswa jwa gagwe. Koo bola bo tla mo tswelang gone, e tla nna jwa gagwe gone koo.” (Dip 33:54) Seno se ne se raya gore tshwetso e e dirilweng ka bola e ne e sa fetoge mme se se neng se fetoga e ne e le gore lotso longwe lo tla newa lefatshe le le kana kang. Ka jalo fa go ne go fitlhelwa gore lefatshe le le neng le neilwe lotso lwa ga Juda lo ne lo le lontsi thata, lo ne lwa fokodiwa lo bo lo newa lotso lwa ga Simeone.—Jos 19:9.