Dikgatiso Tse di Dirisiwang mo Bukaneng ya Pokano ya Botshelo le Bodiredi Jwa Rona
MAY 3-9
MATLOTLO A A MO LEFOKONG LA MODIMO | DIPALO 27-29
“Etsa Jehofa Ka go Sa Tlhaole ba Bangwe”
Anaanela Dinonofo Tsa ga Jehofa ka Botlalo
Bomorwadia Selofehade ba le batlhano ba ne ba ya kwa go Moshe mme ba mmotsa jaana: “Ke ka ntlha yang fa leina la ga rraarona le tshwanetse go tlosiwa mo gare ga lelapa la gagwe ka gonne a ne a se na ngwana wa mosimane?” Mme ba ne ba mo kopa jaana: “Tsweetswee re neye thuo mo gare ga bomorwarraagwe rraarona.” A Moshe o ne a ba araba ka go re, ‘Molao o ka se fetolwe’? Nnyaa, o ne “a isa kgang ya bone fa pele ga ga Jehofa.” (Dipa. 27:2-5) Jehofa o ne a reng? O ne a bolelela Moshe jaana: “Bomorwadia Selofehade ba bua sentle. Ba neye thuo ya boswa mo gare ga bomorwarraagwe rraabone, mme o dire gore boswa jwa ga rraabone bo fetele mo go bone.” Gape Jehofa o ne a dira se se fetang seo. O ne a fetola seo go nna molao, a laela Moshe jaana: “Fa go direga gore motho ope a swe a se na ngwana wa mosimane, foo lo dire gore boswa jwa gagwe bo fetele mo go morwadie.” (Dipa. 27:6-8; Josh. 17:1-6) Go simolola ka nako eo go ya pele, basadi botlhe ba Baiseraele ba ba neng ba lebane le seemo seo se se thata, ba ne ba ka kgona go sirelediwa.
Anaanela Dinonofo Tsa ga Jehofa ka Botlalo
Ruri eo e ne e le tshwetso e e bontshang bopelonomi le go sa nne le tlhaolele! Jehofa o ne a tshwara ka seriti basadi bano ba ba neng ba ka latlhegelwa ke boswa jwa bone, fela jaaka a ne a dira ka Baiseraele ba maemo a bone a neng a siame. (Pes. 68:5) Eno ke nngwe ya dipego tse dintsi tsa Baebele tse di bontshang boammaaruri jono jo bo nametsang: Jehofa o tshwara batlhanka ba gagwe botlhe ka go se ba tlhaole.—1 Sam. 16:1-13; Dit. 10:30-35, 44-48.
Anaanela Dinonofo Tsa ga Jehofa ka Botlalo
Re ka etsa Jehofa jang ka go sa nne le tlhaolele? Gopola gore go sa nne le tlhaolele go bonala ka ditsela tse pedi. Re ka kgona go tshwara batho ba bangwe ka go se ba tlhaole, fa fela re na le boikutlo joo jwa go se tlhaole. Ke boammaaruri gore rotlhe re na le go akanya gore ga re na tlhaolele. Mme gone, o ka tswa o dumela gore ga se ka dinako tsotlhe go leng motlhofo go itlhatlhoba ka tsela e e siameng. Ka jalo, ke eng se re ka se dirang fa re batla go lemoga gore a batho ba re itse re le batho ba ba se nang tlhaolele? Fa Jesu a ne a batla go itse gore batho ba reng ka ene, o ne a botsa ditsala tsa gagwe tse di ikanyegang jaana: “Batho ba re Morwa motho ke mang?” (Math. 16:13, 14) Ke eng fa re sa latele sekao seno sa ga Jesu? O ka nna wa botsa tsala nngwe ya gago e o e ikanyang e o itseng gore e tla go bolelela boammaaruri, gore a o itsege o le motho yo o se nang tlhaolele. Fa a go bolelela gore go bonala o na le mekgwa mengwe ya go tlhaola batho go ya ka lotso, go ya ka maemo a bone mo setšhabeng kgotsa maemo a bone a itsholelo, o tshwanetse go dira eng? Rapela Jehofa ka tlhoafalo gore a go thuse gore o baakanye boikutlo joo, gore o se ka wa nna le tlhaolele fela jaaka ene.—Math. 7:7; Bakol. 3:10, 11.
Go Ribolola Matlotlo mo Dikwalong
it-2-E 528 ¶5
Ditshupelo
Tshupelo ya senō. Go le gantsi tshupelo ya senō e ne e ntshiwa le ditlhabelo tse dingwe, segolobogolo fa Baiseraele ba sena go tsena kwa Lefatsheng le le Solofeditsweng. (Dip 15:2, 5, 8-10) E ne e ntshiwa ka beine (“bojalwa jo bo tagang”) mme e ne e tshelwa mo sebesong. (Dip 28:7, 14; bapisa Ek 30:9; Dip 15:10) Moaposetoloi Paulo o ile a kwalela Bakeresete ba kwa Filipi a re: “Fa ke tshololelwa jaaka tshupelo ya senō mo setlhabelong se tumelo e lo gogetseng kwa go sone le mo go direleng botlhe, ke itumetse.” Paulo o ile a dira sekai ka tshupelo ya senō go tlhalosa kafa a neng a ikemiseditse ka gone go direla Bakeresetemmogo le ene. (Baf 2:17) Pelenyana a swa, o ile a kwalela Timotheo a re: “Ke setse ke tshololwa jaaka tshupelo ya senō, mme nako e e tshwanetseng ya go gololwa ga me e tloga e goroga.”—2Ti 4:6.
MAY 10-16
MATLOTLO A A MO LEFOKONG
LA MODIMO | DIPALO 30-31
“Diragatsa Se o Se Solofeditseng”
it-2-E 1162
Maikano
A Dirwa ka go Rata, Mme fa Motho a a Dirile, o Tshwanetse go a Diragatsa. Go ne go se na ope yo o patelediwang go dira maikano. Mme gone, fa motho a ne a dirile maikano, molao wa Modimo o ne o re o tshwanetse go a diragatsa. Fa motho a ne a ikana, go ne go twe o ‘bofa moya wa gagwe.’ Seno se raya gore motho o ne a ikana ka botshelo jwa gagwe gore o tla diragatsa se a se solofeditseng. (Dip 30:2; bona gape le Bar 1:31, 32.) Ke gone ka moo Dikwalo di neng di kgothaletsa batho gore ba akanyetse kwa teng pele ba dira maikano. Molao o ne o re: “Fa go direga gore o dire maikano mo go Jehofa . . . Modimo wa gago o tla a batla mo go wena, mme ruri e ka nna boleo mo go wena. Fa go direga gore o tlogele go dira maikano, ga e kitla e nna boleo mo go wena.”—Dut 23:21, 22.
“Se o Se Ikanelang, se Diragatse”
Baebele e tlhalosa gore maikano ke tshwetso e e masisi e o e solofetsang Modimo. Fa o dira maikano, o solofetsa Modimo gore o tla dira sengwe, o tla tsenela tirelo nngwe, o tla ntsha mpho nngwe kgotsa o tla tila go dira dilo dingwe. Motho ke ene a itirelang tshwetso ya go dira maikano, ga a patelediwe ke ope. Le fa go ntse jalo, maikano a boitshepo e bile Modimo o lebeletse gore re a diragatse ka gonne go a dira go tshwana le fa motho a ikana semolao gore o tla dira sengwe kgotsa ga a kitla a se dira. (Gen. 14:22, 23; Baheb. 6:16, 17) Dikwalo di a re go direla Modimo maikano go masisi go le kana kang?
Dintlhakgolo Tsa Buka ya Dipalo
30:6-8—A monna wa Mokeresete a ka dirolola maikano a mosadi wa gagwe? Fa go tla mo maikanong, Jehofa o dirisana le batlhanka ba gagwe motho ka bongwe. Ka sekai, go ineela mo go Jehofa ke maikano ao motho a itirelang one ene ka boene. (Bagalatia 6:5) Monna yo o nyetseng ga a na taolo ya go dirolola kana go fedisa maikano a a ntseng jalo. Le fa go ntse jalo, mosadi o tshwanetse go tila go dira maikano a a thulanang le Lefoko la Modimo kana a a thulanang le maikarabelo a gagwe mo monneng wa gagwe.
Go Ribolola Matlotlo mo Dikwalong
it-2-E 28 ¶1
Jefetha
Batsadi ba ne ba kgona go dira maikano a gore ba tla ntsha bana ba bone gore ba ye go direla Jehofa kwa motlaaganeng. Ka sekai, pele Samuele a tsholwa, mmaagwe e bong Hana o ile a dira maikano a gore o ne a tla ntsha morwa yo a neng a tla mo tshola gore a ye go direla kwa motlaaganeng. Monna wa gagwe e bong Elekana o ile a dumalana le maikano ao. Fela fa Samuele a sena go kgwisiwa, Hana o ile a mo isa kwa motlaaganeng. (1Sa 1:11, 22-28; 2:11) Samesone le ene pele a tsholwa, go ile ga dirwa maikano a gore o tla direla Jehofa e le Monasirite.—Baatl 13:2-5, 11-14; bapisa molao o o amanang le rre le morwadie mo go Dip 30:3-5, 16.
MAY 17-23
MATLOTLO A A MO LEFOKONG
LA MODIMO | DIPALO 32-33
“Lelekang Banni Botlhe ba Lefatshe”
A o Ne o Itse?
‘Mafelo a a kwa godimo’ a a umakiwang gangwe le gape mo Dikwalong Tsa Sehebera ke eng?
Fa Baiseraele ba ne ba tloga ba tsena kwa Lefatsheng le le Solofeditsweng, Jehofa o ne a ba raya a re ba nyeletse mafelo otlhe a Bakanana ba ba nnang koo ba neng ba obamela kwa go one. Modimo o ne a ba laela jaana: “Lo . . . senye ditshwantsho tsotlhe tsa bone tsa maje, gape lo senye ditshwantsho tsotlhe tsa bone tsa tshipi e e thetsweng, lo bo lo nyeletse mafelo otlhe a bone a a kwa godimo a a boitshepo.” (Dipalo 33:52) Mafelo ao a kobamelo ya maaka e ka tswa e ne e le mafelo a a kwa setlhoeng sa thaba kgotsa a a agilweng kwa mafelong a mangwe jaaka kafa tlase ga ditlhare kgotsa mo metseng. (1 Dikgosi 14:23; 2 Dikgosi 17:29; Esekiele 6:3) A ka ne a na le dibeso, dipilara kgotsa dikota tse di boitshepo, ditshwantsho, ditlhomo tsa maswalo le dilo tse dingwe tse di neng di dirisiwa mo kobamelong.
Ithute mo Diphosong Tsa Baiseraele
Gompieno re lebana le dikgwetlho tse dintsi tse di tshwanang le tse Baiseraele ba neng ba lebana le tsone. Mo nakong ya gompieno, batho ba tsaya dilo dingwe le batho bangwe jaaka e kete ke medimo. Seo se akaretsa madi, batho ba ba tlhageletseng mo go tsa boitlosobodutu, bagaka ba metshameko, ditsamaiso tsa bopolotiki, baeteledipele bangwe ba bodumedi le eleng maloko a lelapa. Go ka direga gore re tsepamise mogopolo thata mo go epe fela ya dilo tseno mo botshelong. Go tsalana thata le batho ba ba sa rateng Jehofa go ka senya kamano ya rona le Modimo.
Tlhakanelodikobo e e sa tshwanelang e ne e le karolo ya konokono ya kobamelo ya ga Baale e e neng ya gogela Baiseraele ba le bantsi le go ba hepisa. Dirai tse di tshwanang le seno di sa ntse di raela bangwe ba batho ba Modimo. Ka sekai, motho yo o swegaswegang kana yo o sa tseyeng tsia a ka kgotlela segakolodi sa gagwe se se siameng ka go tobetsa konopo ya khomputara fela a bo a leba ditshwantsho tse di hepisang mo Internet a le mo ntlong ya gagwe. A bo go ka hutsafatsa jang ne gore Mokeresete a raelwe ke ditshwantsho tse di hepisang tsa Internet!
it-1-E 404 ¶2
Kanana
Joshua o ile a tlhasela Bakanana fela jaaka Jehofa a ne a laetse Moshe. (Jos 11:15) Mme gone, Baiseraele ga ba a ka ba nyeletsa Bakanana mme seno se ile sa ba bakela mathata. E re ka Baiseraele ba ile ba palelwa ke go fedisa Bakanana, seno se ile sa dira gore go nne le dintwa, boitsholo jo bo sa siamang, kobamelo ya medingwana e bile go ile ga swa Baiseraele ba le bantsi. (Dip 33:55, 56; Baatl 2:1-3, 11-23; Pes 106:34-43) Jehofa o ile a tlhagisa Baiseraele gore fa ba ka tswelela ba dirisana le Bakanana, ba nyalalana le bone, ba obamela medingwana ya bone e bile ba dira dilo tse di bosula tse Bakanana ba neng ba di dira, ba tla di gama ba sa di tlhapela. Gape o ile a ba tlhalosetsa gore fa ba ka dira dilo tseno, ba ne ba tla nyelediwa e bile o ne a se kitla a ba utlwela botlhoko.—Ek 23:32, 33; 34:12-17; Lef 18:26-30; Dut 7:2-5, 25, 26.
Go Ribolola Matlotlo mo Dikwalong
it-1-E 359 ¶2
Molelwane
Fa bola bo sena go kaya gore lotso lo lo rileng lo ne lo tla nna kae, go ne go lebelelwa gore lo tla newa lefatshe le le kana kang, go ikaegile ka palo ya batho ba lotso loo. “Lo ikgaoganyetse lefatshe ka bola go nna thuo kafa malapeng a lona. Yo o nang le batho ba le bantsi lo mo okeletse boswa, mme wa ba ba seng bantsi lo fokotse boswa jwa gagwe. Koo bola bo tla mo tswelang gone, e tla nna jwa gagwe gone koo.” (Dip 33:54) Fa go ne go setse go bonwe ka bola gore lotso lo lo rileng lo tla nna kae, seo se ne se sa fetolwe, mme gone go ne go kgona go dirwa diphetogo mo kgannyeng ya gore lotso loo lo newa lefatshe le le kana kang. Ka sekai, e re ka lefatshe le le neng le neilwe lotso lwa ga Juda le ne le le legolo thata, karolo nngwe ya lone e ne ya newa lotso lwa ga Simeone.—Jos 19:9.
MAY 24-30
MATLOTLO A A MO LEFOKONG
LA MODIMO | DIPALO 34-36
“Tshabela Kwa go Jehofa”
A Jehofa ke Botshabelo Jwa Gago?
Le fa go ntse jalo, Baiseraele ba ne ba dira eng fa motho a bolaile yo mongwe ka phoso? Le fa gone motho yoo a dirile jalo ka phoso, o ne a sa ntse a na le molato wa go bolaya motho yo mongwe. (Gen. 9:5) Mme gone, o ne a letleletswe gore a tshabele mmusolosi wa madi kwa go nngwe ya metse e merataro ya botshabelo. Fa a le koo, o ne a tla sireletsega. Mo godimo ga moo, o ne a tshwanetse go nna koo go fitlha moperesiti yo mogolo a tlhokafala.—Dipa. 35:15, 28.
A Jehofa ke Botshabelo Jwa Gago?
Fa Moiseraele a sena go bolaya motho ka phoso, o ne a tshwanetse go ya kwa kgorong ya motse wa botshabelo mme “a bue mafoko a gagwe banna ba bagolwane ba motse oo ba utlwa.” Mme banna bao ba bagolwane ba ne ba tshwanetse go mo amogela. (Josh. 20:4) Nakwana morago ga moo, Moiseraele yoo o ne a busediwa kwa banneng ba bagolwane ba kwa motseng o a neng a bolaya motho gone, mme banna bao ba ne ba tshwanetse go atlhola kgang ya gagwe. (Bala Dipalo 35:24, 25.) Mme fa ba swetsa ka gore o bolaile motho ka phoso, ke gone a neng a ka boela kwa motseng wa botshabelo.
A Jehofa ke Botshabelo Jwa Gago?
Motho yo o bolaileng yo mongwe o ne a sireletsegile fa a le kwa motseng wa botshabelo. Jehofa o ne a bua jaana ka metse eo: ‘E tla nna botshabelo jwa lona.’ (Josh. 20:2, 3) Jehofa o ne a sa batle gore mmolai yoo a atlholwe gape, e bile mmusolosi wa madi o ne a sa tshwanela go ya kwa motseng wa botshabelo gore a mmolaye. Ka jalo, mmolai yoo o ne a sa tlhoke go boifa gore o tla bolawa. Fa a le kwa motseng wa botshabelo, Jehofa o ne a mo sireleditse. O ne a se mo kgolegelong. O ne a kgona go dira tiro nngwe, go thusa ba bangwe le go direla Jehofa ka kagiso kwa motseng oo. Eleruri o ne a kgona go kgotsofala le go itumelela botshelo koo!
Go Ribolola Matlotlo mo Dikwalong
Thekololo e e Lekalekanang ya Botlhe
Lefa go ntse jalo, Adame le Efa bone ga ba solegelwe molemo ke thekololo eno. Molao wa ga Moshe o ne o na le molaomotheo ono: “Lo se ka loa amogèla thèkololō kaga botshelō yoa mmolai oa motho eo o molato oa go shwa.” (Dipalō 35:31) Adame o ne a sa tsiediwa, ka jalo boleo jwa gagwe e ne e le jwa ka bomo, o bo dirile a itse. (1 Timotheo 2:14) Bo ne jwa feleletsa ka gore bana ba gagwe ba bolawe, ka gonne jaanong ba ruile bosaitekanelang jwa gagwe, ka go rialo ba le kafa tlase ga kotlhao ya loso. Ka mo go utlwalang, Adame o ne a tshwanelwa ke go swa, ka gonne jaaka motho yo o itekanetseng, o ne a tlhophile go se utlwe molao wa Modimo ka bomo. Fa Jehofa a ne a ka dirisa thekololo ya gagwe mo go Adame seo se ne se tla bo se le kgatlhanong le melaometheo ya gagwe e e siameng. Lefa go ntse jalo, go duela maduo a boleo jwa ga Adame, go koafatsa kotlhao ya loso eo e leng mo godimo ga bana ba ga Adame! (Baroma 5:16) Kafa molaong, maatla a a senyang a boleo a kgaolwa go tloga fela kwa moding wa one. Morekolodi o ‘utlwela motho mongwe le mongwe loso,’ a sikarela bana botlhe ba ga Adame ditlamorago tsa boleo.—Bahebera 2:9; 2 Bakorintha 5:21; 1 Petere 2:24.
MAY 31–JUNE 6
MATLOTLO A A MO LEFOKONG
LA MODIMO | DUTERONOME 1-2
“Modimo ke Ene a Atlholang”
Jehofa—Morati wa Tshiamo le Tshiamiso
Bagolwane ba ba tlhomilweng mo diphuthegong ba tshwanetse go atlhola ditiro tse di phoso. (1 Bakorinthe 5:12, 13) Fa ba ntse ba dira jalo, ba gakologelwa gore Modimo o dira tshiamiso a ntse a supa kutlwelobotlhoko fa go kgonega. Fa go sena mabaka a go e supa—jaaka fa moleofi a sa ikwatlhae—kutlwelobotlhoko ga e kgone go supiwa. Lefa go ntse jalo, bagolwane ga ba kobe motho yo o dirileng phoso yoo mo phuthegong ka go bo ba batla go ipusolosetsa. Ba solofela gore go mo kgaola fela ka bogone go tla dira gore a akanye dilo sentle. (Bapisa Esekiele 18:23.) Bagolwane ba dira tshiamiso ba kaelwa ke Keresete e bile seno se akaretsa gore ba nne “boipoteletso mo phefong.” (Isaia 32:1, 2) Ka gone, ba tshwanetse gore ba supe gore ga ba tlhaole le gore ba dira ka tshiamo.—Duteronome 1:16, 17.
Ikobele Bolaodi Jwa Modimo ka Boikanyegi
Le fa go ntse jalo, go ne go tlhokega go le gontsi go nna moatlhodi go na le go itse Molao fela. E re ka banna bano ba bagolwane ba ne ba sa itekanela, ba ne ba tshwanetse go nna kelotlhoko gore ba se ka ba gatelela tsela ya bone—jaaka boithati, go tlhaola batho le bopelotshetlha—tse di neng di ka sokamisa katlholo ya bone. Moshe o ne a ba bolelela jaana: “Lo se ka lwa tlhaola fa lo atlhola. Lo utlwe yo monnye fela jaaka yo mogolo. Lo se ka lwa tshosiwa ke motho, gonne katlholo ke ya Modimo.” Ee, baatlhodi kwa Iseraele ba ne ba atlhola mo boemong jwa Modimo. A bo eo e ne e le tshiamelo e kgolo jang ne!—Duteronome 1:16, 17.
Go Ribolola Matlotlo mo Dikwalong
Dikgakololo Tsa Ga Jehofa Di A Ikanyega
Fa Baiseraele ba ne ba simolola loeto lo lo neng lwa tsaya dingwaga di le 40 mo ‘nageng e kgolo le e e boitshegang,’ Jehofa ga a ka a ba tlhalosetsa ka botlalo go sa le gale gore o tla ba kaela jang, le go ba sireletsa le go ba tlhokomela. Le fa go ntse jalo, gangwe le gape o ne a ba bontsha gore ba ne ba ka mo ikanya ba bo ba ikanya ditaelo tsa gagwe. Jehofa o ne a dirisa pilara ya leru motshegare le ya molelo bosigo, go gakolola Baiseraele gore o ne a ba ema nokeng fa a ntse a ba eteletse pele mo nageng e e nang le maemo a a sa itumediseng. (Dute. 1:19; Ekes. 40:36-38) Gape o ne a ba tlamela ka se ba neng ba se tlhoka. “Diaparo tsa bone ga di a ka tsa onala, le dinao tsa bone ga di a ka tsa ruruga.” Ruri “ba ne ba sa tlhaele sepe.”—Neh. 9:19-21.
JUNE 7-13
MATLOTLO A A MO LEFOKONG
LA MODIMO | DUTERONOME 3-4
“Melao ya ga Jehofa e Siame e Bile e a Tlhalefisa”
it-2-E 1140 ¶5
Go Tlhaloganya
Fa motho a ithuta Lefoko la Modimo ka kelotlhoko e bile a dirisa se a se ithutang, seno se tla mo thusa gore a nne botlhale go feta barutisi ba gagwe e bile o tla kgona go tlhaloganya dilo go feta batho ba bagolo mo go ene. (Pes 119:99, 100, 130; bapisa Luk 2:46, 47.) Seno ke ka gonne melao yotlhe ya ga Jehofa le ditshwetso tsa gagwe tsa boatlhodi o di dira ka botlhale le ka temogo. Ka jalo, fa Baiseraele ba ne ba ka ikobela melao yotlhe ya ga Jehofa, batho ba ditšhaba tse dingwe ba ne ba tla lemoga gore ke “setšhaba se se botlhale le se se nang le tlhaloganyo.” (Dut 4:5-8; Pes 111:7, 8, 10; bapisa 1 Dik 2:3.) Motho yo o botlhale o lemoga gore ga a tshwanela go tlola melao ya Modimo, e bile o kopa Modimo gore a mo thuse gore a se ka a tlola melao ya gagwe. (Pes 119:169) O akanyetsa kwa teng ka lefoko la Modimo (Mat 13:19-23), o le letla gore le mo ame pelo (Dia 3:3-6; 7:1-4) e bile seno se mo thusa gore a ‘tlhoe tselana nngwe le nngwe ya maaka.’—Pes 119:104.
Fa Bopelotshweu bo le Bogolo
E re ka kgosigadi e ne e gakgametse ka se e neng e se utlwa le go se bona, e ne ya araba jaana ka boikokobetso: “Go sego batlhanka ba ba gago ba ba tlholang ba eme fa pele ga gago, ba utlwa botlhale jwa gago.” (1 Dikgosi 10:4-8) O ne a sa bolele gore batlhanka ba ga Solomone ba sego ka go bo ba potapotilwe ke dikhumo—le mororo go ne go ntse jalo. Go na le moo, batlhanka ba ga Solomone ba ne ba segofetse ka go bo ba ne ba tlhola ba reetsa botlhale jwa ga Solomone jo a bo filweng ke Modimo. A bo kgosigadi ya Sheba e le sekao se se molemo jang ne mo bathong ba ga Jehofa gompieno, ba ba itumelelang botlhale jwa Mmopi ka boene le jwa Morwawe, Jesu Keresete!
Selo se sengwe gape se se botlhokwa ke kakgelo e nngwe ya kgosigadi go Solomone: “A go bakwe Jehofa Modimo wa gago.” (1 Dikgosi 10:9) Kwantle ga pelaelo, o ne a bona gore Jehofa ke ene a thusang Solomone go nna botlhale le go atlega. Se se tsamaisana le se Jehofa a neng a se solofeditse Iseraele pelenyana ga foo. ‘Fa lo tshegetsa ditao tsa me,’ a rialo, “mo ke botlhale jwa lona, le tlhaloganyo ya lona, mo ponong ya ditšhaba, tse di tlaa utlwang ditao tse, mme di re: ‘Ruri morafe o mogolo o, ya bo e le tšhaba e e tlhalefileng, e e tlhaloganyang.’”—Duteronome 4:5-7.
A o ‘Humile Malebana le Modimo’?
Fa Jehofa a segofatsa batho ba gagwe, ka metlha o ba naya se se molemolemo. (Jakobe 1:17) Ka sekai, fa Jehofa a ne a naya Baiseraele naga, e ne e le ‘lefatshe le le elang mashi le tswina ya dinotshe.’ Le fa naga ya Egepeto le yone e ne e ile ya tlhalosiwa jalo, lefatshe le Jehofa a neng a le naya Baiseraele le ne le farologane ka sengwe sa botlhokwa. Moshe o ne a raya Baiseraele a re e ne e le “lefatshe le Jehofa Modimo wa gago a le tlhokomelang.” Ka mafoko a mangwe, ba ne ba tla atlega ka gonne Jehofa o ne a tla bo a ba tlhokometse. Fa fela Baiseraele ba ne ba nna ba ikanyega mo go Jehofa, o ne a ba segofatsa thata mme ba ne ba tshela ka tsela e go neng go bonala sentle gore e botoka go feta ya ditšhaba tsotlhe tse di gaufi le bone. Ee, tshegofatso ya ga Jehofa ke yone e e “humisang”!—Dipalo 16:13; Duteronome 4:5-8; 11:8-15.
Go Ribolola Matlotlo mo Dikwalong
Dintlhakgolo Tsa Buka ya Duteronome
4:15-20, 23, 24—A thibelo ya gore go se ka ga dirwa ditshwantsho tse di setilweng e kaya gore go phoso go dira ditshwantsho tse di kgabisang? Nnyaa. Thibelo eno e ne e le kgatlhanong le gore motho a dire setshwantsho gore a se obamele—gore ‘a ikobele medingwana le go e direla.’ Dikwalo ga di thibele motho go gaba leje kgotsa go taka ditshwantsho tsa go kgabisa.—1 Dikgosi 7:18, 25.
JUNE 14-20
MATLOTLO A A MO LEFOKONG LA MODIMO | DUTERONOME 5–6
“Ruta Bana ba Gago go Rata Jehofa”
Batsadi, Tlamelang ba Malapa a Lona
Gongwe mo kgannyeng eno ga go na mafoko ape a a nopolwang gantsi mo Dikwalong go feta a a mo go Duteronome 6:5-7. Tsweetswee bula Baebele ya gago o bale ditemana tseo. Ela tlhoko gore sa ntlha batsadi ba bolelelwa gore ba age bomoya jwa bone, ba rate Jehofa ba bo ba ise mafoko a gagwe pelong. Ee, o tshwanetse go nna moithuti yo o tlhoafetseng wa Lefoko la Modimo, o bala Baebele ka metlha e bile o tlhatlhanya ka yone gore o kgone go tlhaloganya ka botlalo ditsela tsa ga Jehofa, melao le melaometheo ya gagwe o bo o e rate. Seo se tla felela ka gore pelo ya gago e tlale ka dithuto tse di kgatlhang tsa boammaaruri jwa Baebele tse di tla go tlhotlheletsang gore o ikutlwe o ipela ka Jehofa, o mo tlotla e bile o mo rata. O tla nna le dilo tse dintsi tse o ka di abelang bana ba gago.—Luke 6:45.
Nka Thusa Jang Bongwanake Gore ba Rutege ka Tsela ya Mmatota?
Dilo tse o di eletsang, dikgopolo tsa gago le mekgwa e mentle, di bonala mo go se o se buang mmogo le mo go se o se dirang. (Baroma 2:21, 22) Bana ba ithuta go tloga boseeng ka go ela batsadi ba bone tlhoko. Bana ba lemoga se se leng botlhokwa mo batsading ba bone mme dilo tseno ke tsone tse gantsi di nnang botlhokwa mo baneng. Fa o rata Jehofa tota, bana ba gago ba tla lemoga seo. Ka sekai, ba tla bona gore go bala Baebele le go ithuta di botlhokwa mo go wena. Ba tla lemoga gore o baya dilo tse di direlwang Bogosi kwa pele mo botshelong. (Mathaio 6:33) Go nna teng ga gago ka metlha kwa dipokanong tsa Bokeresete le go nna le seabe mo tirong ya go rera ka Bogosi di tla ba bontsha gore go direla Jehofa tirelo e e boitshepo go botlhokwa fela thata mo go wena.—Mathaio 28:19, 20; Bahebera 10:24, 25.
Batsadi, Tlamelang ba Malapa a Lona
Jaaka Duteronome 6:7 e bontsha, go na le dinako tse dintsi tse lona batsadi lo ka tlotlang dilo tsa semoya le bana ba lona ka tsone. Le fa lo ka tswa lo le mo mosepeleng mmogo, lo dira ditiro tsa mo gae mmogo, kgotsa lo iketlile mmogo, lo ka bona dinako tsa go tlamela bana ba lona ka dilo tse ba di tlhokang semoyeng. Ee gone, ga go tlhokege gore lo tlhole lo ba emeletse ka dithuto tsa Baebele. Go na le moo, lekang gore motlotlo wa lelapa e nne o o agang, wa dilo tsa semoya. Ka sekai, makasine wa Tsogang! o na le ditlhogo di le dintsi tse di tlotlang ka dilo tse di farologaneng. Ditlhogo tse di ntseng jalo di ka dirisiwa go tlotla ka diphologolo tse Jehofa a di bopileng, mafelo a mantle a tlholego go dikologa lefatshe le kafa dingwao tsa batho le mekgwa ya bone ya botshelo e farologaneng bontle ka teng. Metlotlo e e ntseng jalo e ka tlhotlheletsa bana gore ba tlwaele go bala dibuka tse re di newang ke setlhopha sa motlhanka yo o boikanyego le yo o botlhale.—Mathaio 24:45-47.
Go Ribolola Matlotlo mo Dikwalong
Lorato le Tshiamiso Kwa Iseraele wa Bogologolo
Se re se ithutang: Jehofa ga a bone ponalo fela, go na le moo, o bona se tota re leng sone kafa teng, se se mo dipelong tsa rona. (1 Sam. 16:7) Ga re ka ke ra kgona go mo fitlhela sepe. Gone ke boammaaruri gore Jehofa o tlhoma mogopolo mo dinonofong le mo ditirong tsa rona tse di molemo. Le fa go ntse jalo, o batla gore re laole dikakanyo tse di sa siamang gore re se ka ra feleletsa re dirile dilo tse di bosula.—2 Ditir. 16:9; Math. 5:27-30.
JUNE 21-27
MATLOTLO A A MO LEFOKONG LA MODIMO | DUTERONOME 7-8
“O se Ka wa Dira Kgolagano Epe ya Lenyalo le Bone”
Ke ka Ntlha Yang fa Modimo A ne A Batla Gore Baobamedi Ba Gagwe ba Nyale Fela Badumedi ka Bone?
Jehofa o ne a itse gore Satane o batla go dira gore batho ba gagwe botlhe ba tlole molao wa gagwe ka go obamela medimo ya maaka. Ka jalo, Modimo o ne a tswelela ka go tlhagisa gore batho ba ba neng ba sa dumele mo Modimong wa boammaaruri ba “tla faposa morwao mo go ntshaleng morago, mme ba tla direla medimo e mengwe.” Seno se ne se tla ba ama ka tsela e e masisi. Fa setšhaba sa Iseraele se ne se ka direla medimo e mengwe, Modimo o ne a ka se tlhole a ba amogela le go ba sireletsa mme ba ne ba tla tlhaselwa motlhofo ke baba ba bone. Ka jalo Mesia yo o solofeditsweng o ne a tla tlhaga jang mo setšhabeng seno? Go bonala sentle gore Satane o ne a na le lebaka la go raela Baiseraele gore ba nyale batho ba ba sa dumeleng mo Modimong wa boammaaruri.
Go Nyalwa “mo Moreneng Fela” A go Sa Ntse go Thusa?
Le fa go ntse jalo, Jehofa o sa ntse a re laela gore re nyale fela mo Moreneng. Ka ntlha yang? Ka gonne o itse se re se tlhokang e bile o batla go re sireletsa. Ga a batle gore re dire ditshwetso tse di tla re utlwisang botlhoko kgotsa tse di tla re bakelang mahutsana. Mo motlheng wa ga Nehemia, Bajuda ba le bantsi ba ne ba nyala basadi ba ba sa direleng Modimo. Ke ka moo Nehemia a neng a umaka sekao se se sa siamang sa ga Solomone. A re, Solomone “o ne a ratiwa ke Modimo wa gagwe, mo Modimo a neng a mo dira kgosi ya Iseraele yotlhe. Le ene basadi ba sele ba ne ba mo dira gore a leofe.” (Nehemia 13:23-26) Jehofa o a itse gore melao ya gagwe e tla re thusa, ke ka moo a re laelang gore re nyale fela mo Moreneng. (Pesalema 19:7-10; Isaia 48:17, 18) Re leboga thata go bo a re naya kgakololo e re ka ikanyang le e e bontshang gore o a re rata. Fa re tsaya Jehofa e le Mmusi wa rona e bile re mo ikobela, re tlhaloganya gore o na le tshwanelo ya go re bolelela gore re dire eng.—Diane 1:5.
Ela Tlhoko Batho ba o Itsalanyang le Bone mo Metlheng Eno ya Bofelo
Bakeresete ba ba batlang go tsena mo lenyalong ba tshwanetse go nna kelotlhoko gore ba itsalanya le bomang. Lefoko la Modimo le re tlhagisa jaana: “Lo se ka lwa pataganela jokwe le ba ba sa dumeleng e le mo go sa lekalekaneng. Gonne tshiamo le go tlhoka molao di na le bolekane bofe? Kgotsa lesedi le na le kabalano efe le lefifi?” (2 Bakorintha 6:14) Baebele e laela batlhanka ba Modimo gore ba nyale “mo Moreneng fela,” ke gore ba nyale mongwe yo o ineetseng yo o kolobeditsweng e bile a tshela ka melao ya ga Jehofa. (1 Bakorintha 7:39) Fa o nyala motho yo o ratang Jehofa, o tla go thusa gore o tswelele o ikanyega mo Modimong.
Go Ribolola Matlotlo mo Dikwalong
Jehofa o re Tlamela ka Dilo Tsa Letsatsi le Letsatsi Tse re di Tlhokang
Go rapelela ga rona senkgwe sa letsatsi le letsatsi go tshwanetse ga re gakolola le gore re tlhoka dijo tsa semoya letsatsi le letsatsi. Le mororo Jesu a ne a bolailwe ke tlala morago ga go fetsa lobaka lo loleele a itima dijo, o ne a gana go ineelela thaelo ya ga Satane ya gore a fetole maje senkgwe, ka go re: “Go kwadilwe ga twe, ‘Motho o tshwanetse go tshela, e seng ka senkgwe se le sosi, fa e se ka lefoko lengwe le lengwe le le tswang ka molomo wa ga Jehofa.’” (Mathaio 4:4) Jesu fano o ne a nopola mafoko a ga moporofeti Moshe, yo o neng a raya Baiseraele a re: “[Jehofa] o ne a go kokobetsa a ba a dira gore o tshwarwe ke tlala mme a go fepa ka mana, a o neng o sa a itse le fa e le borrago ba neng ba sa a itse; go dira gore o itse gore motho ga a tshele ka senkgwe se le sosi mme o tshela ka lefoko lengwe le lengwe la molomo wa ga Jehofa.” (Duteronome 8:3) Tsela e Jehofa a neng a tlamela Baiseraele ka mana ka yone e ne e sa ba fepe fela ka dijo tsa nama mme gape e ne e ba ruta dithuto tsa semoya. Nngwe ya dithuto tseo ke gore, mongwe le mongwe wa bone o ne a tshwanelwa ke go “itshelela selekanyo sa gagwe sa letsatsi leo.” Fa ba ne ba ka sela selekanyo se sentsi thata, dijo tse di setseng di ne di simolola go nkga le go nyeuma diboko. (Ekesodo 16:4, 20) Le fa go ntse jalo, go ne go sa nne jalo mo letsatsing la borataro le mo go lone ba neng ba tshwanelwa ke go itshelela selekanyo sa letsatsi se se gabedi se se neng se tla ba lekana go fitlha ka Sabata. (Ekesodo 16:5, 23, 24) Ka gone, mana a ne a gatelela mo mogopolong wa bone gore ba ne ba tshwanetse go nna kutlo le gore botshelo jwa bone bo ne bo sa ikaega fela ka senkgwe go na le moo bo ne bo ikaegile le ka go reetsa “lefoko lengwe le lengwe la molomo wa ga Jehofa.”
JUNE 28–JULY 4
MATLOTLO A A MO LEFOKONG LA MODIMO | DUTERONOME 9–10
“Ke Eng se Jehofa Modimo a se Kopang mo go Wena?”
Jehofa o Kopa Eng mo go Rona?
Ke eng se se ka re tlhotlheletsang go ikobela Modimo ka go rata? Moshe o tlhalosa sengwe sa dilo tse di ka re thusang go dira jalo: “Boifa Jehofa Modimo wa gago.” (Temana 12) Fa re boifa Modimo re tla batla go tila go mo utlwisa botlhoko.
Selo sa botlhokwa se se tshwanetseng go re tlhotlheletsa go ikobela Modimo ke eng? Moshe o ne a bolela jaana: “Rata [Jehofa] le go direla Jehofa Modimo wa gago ka pelo yotlhe ya gago le ka moya otlhe wa gago.” (Temana 12) Go rata Modimo go akaretsa se se fetang kafa motho a ikutlwang ka gone. Buka nngwe ya ditshupiso e tlhalosa jaana: “Madiri a Sehebera a a tlhalosang kafa motho a ikutlwang ka teng ka dinako tse dingwe a kaya le ditiro tse di tlhotlhelediwang ke tsela e motho a ikutlwang ka yone.” Buka eno ya re go rata Modimo go kaya go mo “direla ka lorato.” Ka mafoko a mangwe, fa re rata Modimo ka tsela ya mmatota, re tla itshwara ka ditsela tse re itseng gore di a mo itumedisa.—Diane 27:11.
Jehofa o Kopa Eng mo go Rona?
Go ikobela Modimo ka go rata go tla re tlisetsa masego. Moshe o ne a kwala jaana: “Boloka ditaelo . . . tse ke go di laolelang gompieno, gore o solegelwe molemo.” (Temana 13) Ee, ditaelo tsotlhe tsa ga Jehofa—sengwe le sengwe se a re kopang go se dira—di solegela rona molemo. A go ka direga gore di se ka tsa re solegela molemo? Baebele ya re: “Modimo ke lorato.” (1 Johane 4:8) Ka gone, o re neile ditaelo tseno gore re solegelwe molemo go ya go ile. (Isaia 48:17) Go dira sotlhe se Jehofa a se re kopang go ka re sireletsa mo mathateng a mantsi gompieno le go dira gore re bone masego a mantsi mo isagweng mo Bogosing jwa gagwe.
A Ruri o ka ‘Atamalana le Modimo’?
Aborahame wa bogologolo o ne a na le botsala jo bo ntseng jalo. Jehofa o ne a bua ka tlhogo eo ya lotso a re ke “tsala ya me.” (Isaia 41:8) Ee, Jehofa o ne a tsaya Aborahame e le tsala ya gagwe e kgolo. Aborahame o ne a nna le botsala joo jo bogolo ka gonne “o ne a dumela mo go Jehofa.” (Jakobe 2:23) Le gompieno Jehofa o senka ditshono tsa go “ikgolaganya” le batho ba ba mo direlang ka go bo ba mo rata. (Duteronome 10:15) Lefoko la gagwe le kgothatsa jaana: “Atamelang Modimo, mme o tla lo atamela.” (Jakobe 4:8) Mafoko ano a a re laletsa e bile a a re solofetsa.
Go Ribolola Matlotlo mo Dikwalong
it-1-E 103
Baanake
Setlhopha sa batho ba ba neng ba goletse kwa godimo ba ba neng ba nna mo kgaolong e e dithaba ya Kanana. Nako nngwe banna ba bararo ba ba itsegeng ba Baanake e bong Ahimane, Sheshai le Talemai ba ne ba nna kwa Heberone. (Dip 13:22) Ke gone kwa ditlhola di le 12 tsa Baiseraele di ileng tsa simolola go bona Baanake gone. Ditlhola di le 10 di ile tsa tla ka pego e e tshosang. Ba ne ba re Baanake ke ditlogolwana tsa Banefilime le gore Baiseraele ba tshwana le ditsiakgope fa ba bapisiwa le bone. (Dip 13:28-33; Dut 1:28) Tota le batho ba ba telele thata jaaka Baemime le Barefaime ba ne ba tshwantshiwa le Baanake. Baanake ba ne ba nonofile thata mo e leng gore go ne ga nna le seane se se reng: “Ke mang yo o ka emang a nitame fa pele ga bomorwa Anake?”—Dut 2:10, 11, 20, 21; 9:1-3.