THUTO 10
Dipokano Tsa Basupi ba ga Jehofa Di ka Go Thusa Jang?
A o kile wa nna gone kwa dipokanong tsa Basupi ba ga Jehofa? Fa e le gore ga o ise o ye, o ka tswa o tshaba go ya teng lekgetlo la ntlha. Gongwe o ipotsa go re: ‘Ke eng se se dirwang kwa dipokanong tseno? Ke eng fa di le botlhokwa? Goreng ke tshwanetse go nna gone kwa go tsone?’ Mo thutong eno, o tla ithuta gore go kopana le ba bangwe go ka go thusa jang gore o atamalane le Modimo le gore go ka go thusa jang mo botshelong.
1. Goreng Basupi ba ga Jehofa ba kopana mmogo?
Bona gore mokwadi mongwe wa Baebele o ne a tlhalosa jang lebaka la botlhokwa thata la go kopana le ba bangwe: “Ke tla baka Jehofa mo phuthegong e kgolo.” (Pesalema 26:12) Ka tsela e e tshwanang, Basupi ba ga Jehofa ba itumelela go kopana mmogo. Mo lefatsheng lotlhe, ba kopana mmogo beke le beke go tla go baka Modimo, go opela le go rapela. Gape mo ngwageng, go na le makgetlo a ba kopanang ka ditlhopha tse dikgolo go tla go obamela Modimo.
2. O tla ithuta eng fa o le kwa dipokanong tsa rona?
Kwa dipokanong, re rutiwa Lefoko la Modimo, mme ‘le tlhalosiwa ka tsela e e utlwalang sentle e bile go dirwa gore le nne le bokao.’ (Bala Nehemia 8:8.) Fa o le kwa dipokanong tsa rona, o tla ithuta ka Jehofa le ka botho jwa gagwe jo bo kgatlhang. Fa o ntse o ithuta mo go oketsegileng ka tsela e a go ratang ka yone, o tla atamalana thata le ene. Gape o tla ithuta gore a ka go thusa jang gore o itumelele botshelo.—Isaia 48:17, 18.
3. Batho ba o tla kopanang le bone kwa dipokanong tsa rona ba ka go thusa jang?
Jehofa o re laela go re ‘re akanyetsane gore re tle re tlhotlheletsane go nna le lorato le go dira ditiro tse di molemo, re sa tlogele go phuthega mmogo.’ (Bahebera 10:24, 25) Fa o le kwa dipokanong tsa rona o tla kopana le batho ba ba ratanang e bile ba kgatlhegela go ithuta ka Modimo fela jaaka wena. O tla itumelela go ba utlwa ba tlhalosa se ba se ithutileng mo Baebeleng. (Bala Baroma 1:11, 12.) Gape o tla kgona go itse batho ba bangwe ba ba itumetseng le fa gone ba na le mathata, ba ka tswa ba le mo lenyalong kgotsa ba se mo lenyalong. Ano ke mabaka mangwe a go bo Jehofa a batla gore re kopane mmogo ka metlha.
ITHUTE MO GO OKETSEGILENG
Ithute gore ke eng se se dirwang kwa dipokanong tsa Basupi ba ga Jehofa le gore ke eng fa go le botlhokwa gore re leke ka natla go nna teng kwa go tsone.
4. Dipokano tsa Basupi ba ga Jehofa
Mo lekgolong la ntlha la dingwaga, Bakeresete ba ne ba kopana ka metlha gore ba obamele Jehofa. (Baroma 16:3-5) Bala Bakolosa 3:16, lo bo lo tlotla ka potso eno:
Bakeresete ba bogologolo ba ne ba obamela Jehofa jang?
Gompieno Basupi ba kopana ka metlha kwa Diholong Tsa Bogosi. Fa o batla go bona gore dipokano tsa bone di ntse jang, tshameka BIDIO eno. Go tswa foo, lebelelang setshwantsho se se fa tlase sa Basupi ba le mo dipokanong lo bo lo tlotla ka dipotso tse di latelang.
Ke dilo dife tse di dirwang kwa Holong ya Bogosi tse di tshwanang le tse o badileng ka tsone mo go Bakolosa 3:16?
Mo bidiong eno kgotsa mo setshwantshong seno, ke eng gape se o se ratileng ka dipokano?
Bala 2 Bakorintha 9:7, lo bo lo tlotla ka potso eno:
Goreng Basupi ba ga Jehofa ba sa kope dikoleke kwa dipokanong tsa bone?
Wena le motho yo o go rutang Baebele, tlotlang ka dintlha tse di tla ithutiwang kwa pokanong e e latelang.
Ke karolo efe ya dipokano e o akanyang gore e tla go kgatlha thata kgotsa e tla go solegela molemo?
A o ne o itse?
Mo jw.org, o ka kgona go bona gore dipokano tsa rona di tshwarelwa kae le gore di tshwarwa leng mo lefatsheng lotlhe.
Kwa dipokanong tsa rona go na le dipuo, dipontsho le dibidio. Dipokano di simololwa le go konelwa ka pina le thapelo
Mo dikarolong tse dingwe tsa thulaganyo, bareetsi ba kgona go araba
Go amogelwa batho botlhe—malapa, ba ba seng mo lenyalong, ba ba godileng le bana
Go tsenwa mahala kwa dipokanong tsa rona. Basupi ba ga Jehofa ga ba kope dikoleke
5. Motho o tlhoka go tsaya matsapa gore a nne gone kwa dipokanong
Bona sekai sa lelapa la gaabo Jesu. Ngwaga le ngwaga, ba ne ba tshwanetse go tsamaya dikilometara di le 100 ba raletse kgaolo e e dithaba ba tswa kwa Nasaretha ba ya Jerusalema kwa tempeleng. Bala Luke 2:39-42, lo bo lo tlotla ka dipotso tseno:
A o akanya gore loeto lono lwa go ya Jerusalema lo ne lo tlhoka gore motho a tseye matsapa?
Goreng o tshwanetse go tsaya matsapa gore o nne gone kwa dipokanong?
A o akanya gore go botlhokwa gore o nne gone kwa dipokanong le fa go le thata? Goreng o akanya jalo?
Baebele e a re go kopana mmogo gore re obamele Jehofa go botlhokwa thata. Bala Bahebera 10:24, 25, lo bo lo tlotla ka potso eno:
Ke eng fa re tshwanetse go nna gone kwa dipokanong ka metlha?
BATHO BANGWE BA RE: “Ga o tlhoke go kopana mmogo le batho ba bangwe. O ka kgona go ipalela Baebele o le nosi kwa gae.”
Ke temana efe kgotsa ke sekai sefe se se mo Baebeleng se se bontshang se Jehofa a se batlang?
O ITHUTILE ENG?
Go nna gone kwa dipokanong go tla go thusa gore o itse mo go oketsegileng ka Jehofa, o nonotshe botsala jwa gago le ene le gore o mo obamele o na le ba bangwe.
Poeletso
Ke eng fa Jehofa a re kgothaletsa go kopana mmogo?
O tla ithuta eng kwa dipokanong tsa Basupi ba ga Jehofa?
A o akanya gore dipokano di ka go thusa ka tsela nngwe gape?
DINTLHA TSE DINGWE
A o a tshoga fa o akanya ka kgang ya go nna gone kwa dipokanong tsa Basupi ba ga Jehofa? Bona gore monna mongwe yo o neng a ikutlwa jalo o thusitswe ke eng gore a rate dipokano.
Re ka Se Lebale Tsela e ba Ileng ba re Amogela ka Yone (4:16)
Bona gore lekawana lengwe le ile la itumelela dipokano tsa Basupi ba ga Jehofa jang le gore ke eng se a neng a se dira gore a nne teng kwa go tsone ka metlha.
Utlwa gore batho ba bangwe ba ikutlwa jang ka go nna gone kwa dipokanong tsa Basupi ba ga Jehofa.
“Goreng ke Tlhoka go ya Kwa Holong ya Bogosi?” (Setlhogo se se mo website)
Bona gore monna mongwe yo e neng e le leloko la setlhopha sengwe sa dikebekwa o ne a fetola botshelo jwa gagwe jang fa a sena go nna gone kwa dipokanong tsa Basupi ba ga Jehofa.
“Ke ne Ke Tshwara Tlhobolo Gongwe le Gongwe Kwa ke Yang Teng” (Tora ya Tebelo, July 1, 2014)