Go a Kgonega go Nna le Lelapa le le Itumetseng!

MOSADI mongwe wa kwa motseng wa Maladzyechna, kwa Belarus, o ne a kwalela ofisi ya lekala ya Basupi ba ga Jehofa kwa Russia. O ne a tlhalosa gore o na le monna le bana ba le babedi. O ne a kwala jaana: “Nna le monna wa me re a ratana. Mme gone, ka ntlha ya go fetsa nako re nna mmogo re ne re na le go galefelana le go ngangisana kwantle ga mabaka. Dikgwedi di se kae tse di fetileng, motho mongwe yo ke sa mo itseng o ne a nkemisa mo mmileng mme a mpha pampitshana ya setlhogo se se reng Itumelele Botshelo Jwa Lelapa. Selo sa ntlha se se neng sa nkgatlha mo go yone ke setshwantsho se sentle sa lelapa le le itumetseng. Ke ne ka bala pampitshana eno mme morago ka e neela monna wa me gore a e bale.

“Tota nkare, botshelo jwa lelapa la rona bo fetogile gotlhelele e bile bo tokafetse fela thata. Jaanong re a lemoga gore ga go thata go nna le lelapa le le itumetseng. Se se tlhokegang fela ke gore motho a tlhoafale, a bontshe lorato le go nna pelotshweu. Go botlhokwa gore re tshele ka melao ya Modimo, re rate Modimo le batho ba bangwe, go akaretsa le ba malapa a rona le batho ba re sa ba itseng.”

O ne a konela ka go re: “Jaanong botshelo jwa rona ga bo na dingalo e bile bo a itumedisa. Re batla go tswelela ka go ithuta Baebele le go ruta bana ba rona.”

Re akanya gore le wena o ka solegelwa molemo ke pampitshana eno ya Itumelele Botshelo Jwa Lelapa. Re tla itumelela go go romelela le buka ya ditsebe tse 192 ya setlhogo se se reng Sephiri sa Boitumelo mo Lelapeng. Fa e le gore o rata gore re go romelele pampitshana le buka eno, tsweetswee tlatsa setlankana se se fa tlase mme o se romele kwa atereseng e e mo go sone kana kwa atereseng e e tshwanetseng mo go tse di thathamisitsweng mo tsebeng ya 5 ya makasine ono.

□ Ke kopa gore lo ntlisetse pampitshana ya Itumelele Botshelo Jwa Lelapa le buka ya Sephiri sa Boitumelo mo Lelapeng.

□ Tsweetswee ikgolaganyeng le nna malebana le thuto ya mahala ya Baebele.