“Fa Go Nna Bosigo go le Motshegare”

KA MOKWADI WA TSOGANG! KWA BENIN

“IJA! Dimilione Tsa Batho di Gakgamaditswe Thata ke Phifalo ya Letsatsi,” go ne ga bega jalo setlhogo sa lokwalodikgang lwa kwa Ghana lwa Daily Graphic letsatsi morago ga phifalo e e feletseng ya letsatsi ka March 29, 2006. Phifalo eno e e neng ya simolola go bonwa kwa botlhaba jwa Brazil e ne e kgabaganya Atlantic ka lobelo kwa dikilometara di le 1 600 ka ura, e bo e fitlha kwa dinageng tsa Ghana, Togo, le Benin mo e ka nnang ka 8:00 a.m. Dinaga tsa Afrika Bophirima di ka solofela phifalo e e ntseng jang?

Phifalo ya bofelo e e feletseng ya letsatsi kwa Ghana e diragetse ka 1947. Theodore yo ka nako eo a neng a na le dingwaga di le 27 o gakologelwa jaana: “Batho ba le bantsi ka nako eo ba ne ba ise ba ko ba bone phifalo ya letsatsi, ka jalo ba ne ba sa itse gore tota go diragala eng. Ka ntlha ya seo batho ba ne ba bitsa tiragalo eo ba re ke ‘fa motshegare o fetoga bosigo.’”

Matsholo a go Tsibosa Batho

Balaodi ba ne ba simolola matsholo a a tseneletseng a go tsibosa batho ka dikotsi tsa go lebelela letsatsi ka nako ya phifalo. Kwa Togo dipampiri tsa phasalatso tse dintle di ne di lemotsha batho jaana: “Tlhokomela matlho a gago! O mo kotsing ya go foufala!”

Badiredipuso ba ne ba gatelela dintlha tse pedi tse batho ba ka di tlhophang. Ya ntlha, o ka nna mo ntlong o lebeletse tiragalo eno e e itumedisang mo thelebisheneng. Ya bobedi, fa o le kwa ntle, rwala diborele tse di sireletsang matlho a gago. Dimilione tsa batho di ne di lebeletse dithelebishene le dikhomputara go bona tiragalo eno e e gakgamatsang. Le fa go ntse jalo, dikirini di ne di ka se kgone go bontsha maemo a a neng a le gone a boitumelo a a neng a dirwa ke go swegaswega pelo le modumo wa boitumelo o o neng o dirwa ke batho pele ga phifalo le ka nako ya yone. A re ke re akanye ka maemo a a neng a le gone.

Tebelelo e a Gola

Go ne go lebega e kete ke moso mongwe fela o o tlwaelegileng kwa Afrika Bophirima, letsatsi le ne le phatsima le loapi le ne le apogile. A phifalo e ne e tlile go direga tota? Fa nako e ntse e atamela ya gore phifalo ya ntlha e diragale, babogedi ba ba neng ba le kwa ntle ba ne ba rwala diborele tsa bone ba bo ba lebelela kwa godimo. Ba bangwe bone ba ne ba bua le batho ba ba ba tlwaetseng kwa dikarolong tse dingwe ka diselula ba ba botsa gore ba bona eng.

Dikilometara tse di fetang 350 000 kwa godimo ga babogedi bano, le fa ngwedi o ne o sa bonale kwa tshimologong o ne o tsamaya ka iketlo go ya go sira letsatsi. Ka tshoganyetso fela, o ne wa bonala jaaka karolwana e ntsho, e e neng ya simolola go sira letsatsi. Boitumelo bo ne jwa ya magoletsa fa babogedi ba ntse ba bona tiragalo eno.

Mo ureng ya ntlha, babogedi ba ne ba sa lemoge diphetogo dipe tse di neng di diragala go ba dikologa. Le fa go ntse jalo, fa ngwedi o tsweletse pele go sira letsatsi, loapi lo ne lwa fetoga. Loapi lo lo pududu lo ne lwa ntshofala. Dithemperetšha di ne tsa fokotsega. Dipone tsa mo mebileng le dipone tsa mo matlong di ne tsa simolola go tshuba fa moso o fifala. Mebila e ne ya nna lolea. Mabenkele a ne a tswalwa. Dinonyane di ne tsa emisa go tswirinya, le diphologolo di ne tsa batla fa di ka lalang gone. Go ne ga fifala gotlhe. Go ne ga nna le phifalo ya letsatsi e e feletseng, e bile ga nna setu.

Tiragalo E e Sa Lebalesegeng ya Phifalo

Dinaledi di ne tsa simolola go phatsima. Corona (karolo e e ka kwa ntle ya moo letsatsi le leng gone) e ne e lebega jaaka sediko sa lesedi se se bosweu jwa perela se se dikologileng ngwedi o montsho. Phatsimo ya lesedi, e e bidiwang Baily’s Beads,a e ne e phatsima kafa ntle ga ngwedi fa letsatsi le ntse le phatsima mo mekgatšheng le mo boalong jwa ngwedi. Phifalo eno e ne e lebega jaaka sediko se e keteng ke palamonwana ya teemane e e phatsimang. Bontle jwa mebala e pinki le mebala ya dirouse e ne e phatsima mo go chromosphere (e leng boalo jo bo kafa tlase ga corona). Mongwe wa babogedi o ne a re: “E ne e le nngwe ya ditiragalo tse di gakgamatsang thata tse nkileng ka di bona—bontle jo bo gakgamatsang.”

Phifalo eno e ne ya tsaya mo e ka nnang metsotso e le meraro. Letsatsi le ne la simolola go tlhaba gape. Babogedi ba le bantsi ba ne ba goeletsa ka boitumelo. Loapi lo ne lwa apoga, mme dinaledi di ne tsa nyelela. Phifalo e e neng e le gone e ne ya nyelela jaaka mouwane wa mo mosong.

Ngwedi ke “mosupi yo o ikanyegang mo loaping.” Ka jalo, go ka kgonega gore phifalo e bonelwe pele makgolokgolo a dingwaga pele e direga. (Pesalema 89:37) Dinaga tsa Afrika Bophirima di ne tsa tshwanelwa ke go leta mo e batlang e le dingwaga tse 60 gore di bone phifalo eno. Phifalo e e latelang kwa Afrika Bophirima e tla diragala ka 2081. Gongwe le wena o tla kgona go nna le tshono ya go bona tiragalo eno e e sa lebalesegeng ya phifalo mo kgaolong ya gago.

[Ntlha e e kwa tlase]

[Lebokoso/Setshwantsho mo go tsebe 29]

A e Ne e Le Phifalo ya Letsatsi ka Nako ya Loso Lwa ga Jesu?

Mareko 15:33 e tlhalosa jaana: “E rile e nna ura ya borataro ga nna lefifi mo lefatsheng leo lotlhe go fitlha ka ura ya borobongwe.” Lefifi leno la diura di le tharo, le le simolotseng ka sethoboloko go ya go 3:00 p.m., e ne e le la kgakgamatso. E ne e ka se ka ya bo e ne e le phifalo ya letsatsi. Sa ntlha, phifalo ya letsatsi e e tsereng nako e telele e e kileng ya rekotiwa mo lefatsheng e tsere metsotso e le supa le halofo. Sa bobedi, Jesu o sule ka letsatsi la bo14 la kgwedi ya modikologo otlhe wa ngwedi ka Nisane. Letsatsi la ntlha la Nisane le bonwa ka go tlhagelela ga ngwedi o mosha, ka nako eo, ngwedi o fa gare ga lefatshe le letsatsi, mme o ka baka phifalo. Fa letsatsi la bo14 la Nisane le goroga, ngwedi o a bo o setse o feditse halofo ya modikologo wa yone. Ka nako eo lefatshe le a bo le le fa gare ga letsatsi le ngwedi, go na le gore ngwedi o thibe letsatsi, o phatsima ka lesedi le le tswang mo lone. Ka jalo, re bona ngwedi yo o tletseng e leng maemo a a siametseng go gopola Segopotso sa loso lwa ga Jesu.

[Setshwantsho]

Nisane 14 ka metlha e nna ka nako ya fa ngwedi o tletse kgotsa fa o le gaufi le go tlala

[Setshwantsho se se radilweng/Mmapa mo go tsebe 28, 29]

(Go bona mokwalo o o feletseng bona kgatiso)

Tsela e phifalo e e latetseng

●

⇧

●

⇧

●

⇧ AFRIKA

BENIN ●

⇧

TOGO ●

⇧

GHANA ●

⇧

●

⇧

●

⇧

●

⇧

●

⇧

●

[Motswedi wa Setshwantsho]

Map: Based on NASA/​Visible Earth imagery

[Setshwantsho mo go tsebe 28]

Phifalo e e feletseng ya letsatsi e e neng ya tlhagelela ka March 29, 2006

[Setshwantsho mo go tsebe 28]

Diborele tse di kgethegileng di kgontsha babogedi go bona phifalo sentle