Lorato lo lo Nonofileng go Gaisa Kgwanyape!

Fa kgwanyape ya Katrina le ya Rita di ne di itaya Gulf Coast kwa United States ka 2005, di ne tsa baka tshenyo e kgolo thata mme mo mafelong a mangwe di ne tsa bolaya batho ba le bantsi. Mme gareng ga batho ba ba neng ba amiwa ke dikgwanyape tseo e ne e le Basupi ba ga Jehofa.

Ka kaelo ya lekala la Basupi ba ga Jehofa kwa United States dikomiti tsa namolo di ne tsa simolola ka bonako ka tiro ya go thusa batho. Kwa Louisiana, go ne ga tlhomiwa mafelo a namolo a le 13, mafelo a le robongwe a go beelwang dilwana mo go one le mafelo a go tshela lookwane a le manè. Ba ne ba thusa batho ba ba neng ba nna mo kgaolong ya disekwerekilometara di le 80 000. Mo e ka nnang baithaopi ba Basupi ba ba ka nnang 17 000 ba ba neng ba tswa kwa dinageng tse dingwe di le 13 go ralala United States ba ne ba thologela gone go tla go thusa ka namolo le go aga sesha. Matswela a seo a ne a bontsha gore tota lorato lwa Bokeresete lo nonofile go gaisa le maatla a dilo tsa tlholego.—1 Bakorintha 13:1-8.

Baithaopi ba ne ba baakanya matlo a a fetang 5 600 a badumedi ka bone le Diholo tsa Bogosi di le 90 e leng mafelo a Basupi ba ga Jehofa ba kopanelang mo go one. Dipalo tseno ke tsa mo e ka nnang dikago tsotlhe tse di neng di senyegile. Tumalanong le mafoko a a mo go Bagalatia 6:10 a a rotloetsang Bakeresete go ‘dira molemo mo go botlhe,’ Basupi ba ga Jehofa ba ne ba thusa le batho ba bangwe ba e seng badumedi ka bone.

LE FA go ntse jalo, go nna le seabe mo tirong ya namolo go ne go raya go intsha setlhabelo mme melemo ya gone e ne e le mentsi. Ela tlhoko dikakgelo tsa Basupi bangwe ba le supa ba ba neng ba okametse ditiro tse di farologaneng.

“Karolo e e Itumedisang Thata mo Botshelong Jwa Me”

Robert: Go direla mo komiting ya namolo ya dikotsi tsa masetlapelo e nnile karolo e e itumedisang thata mo botshelong jwa me. E re ka ke le dingwaga di le 67, ke nna yo mogolo go gaisa maloko otlhe a komiti. Ke ne ke dira le setlhopha se segolo thata sa baithaopi ba ba akaretsang basha ba Basupi ba ba ratang dilo tsa semoya. A bo go kgothatsa jang ne go bona basha ba bontsha lorato lwa go intsha setlhabelo mo go Jehofa le mo Bakereseteng ka bone!

Mosadi wa me e bong Veronica, e nnile mothusi yo mogolo thata. E le gore re kgone go ka thusa mo tirong ya namolo, o ne a nkema nokeng fa ke ne ke dira tshwetso ya go tlogela tiro e ke neng ke e rata ka dingwaga tse di fetang 40. Gone jaanong re dira bosigo bo le bongwe mo bekeng re phepafatsa diofisi. Re ithutile go tshela ka bonnye jo re nang le jone mme re tshela botshelo jo bo sa raraanang. Go dira le batho ba bangwe ba ba batlang go itumedisa Jehofa go dirile gore re tlhaloganye botoka gore go kaya eng go dira gore Bogosi jwa Modimo bo tle pele mo matshelong a rona. (Mathaio 6:33) Gangwe le gape, re bone gore Jehofa o tlhokomela batho ba gagwe sentle.

Frank: Ke molebedi wa lephata la tirelo ya dijo kwa lefelong la namolo kwa Baton Rouge. Kwa tshimologong, go dira tiro ya go tlamela baithaopi ka dijo go ne go raya go bereka diura tse di magareng ga di le 10 le 12, le malatsi a le supa mo bekeng. Le fa go ntse jalo, masego a teng a ne a le mantsi thata go akaretsa go iponela ka matlho maatla a lorato lwa Bokeresete.

Baithaopi ba le bantsi ba ba neng ba thusa beke kgotsa go feta mo lephateng la dijo ba ne ba kopa go boa gape, mme ba bangwe ba ne ba bontsha kanaanelo e e tswang pelong ka go re kwalela diposokarata le ka go re leletsa mogala ba leboga tshiamelo e ba nnileng le yone ya go thusa. Nna le mosadi wa me Veronica re amilwe tota ke moya wa bone wa go intsha setlhabelo.

O ne A Nna le Bana ba Phefo mo Matsogong

Gregory: Nna le mosadi wa me e bong Kathy, re ne ra rekisa ntlo ya rona kwa Las Vegas, Nevada, mme ra reka bene le tereilara e e neng ya nna legae la rona. Go tlhofofatsa botshelo jwa rona go ne ga dira gore re kgone go nna le seabe mo tirong ya namolo kwa Louisiana ka dingwaga tse di fetang di le pedi. Go gaisa le fa e le leng pele mo botshelong jwa rona re kgona go bona boammaaruri jwa mafoko ano a Malaki 3:10 a a reng: “‘Ntekang, tsweetswee, . . . ’ go buile Jehofa wa masomosomo, ‘[mme lo bone] gore a ga nkitla ke lo bulela dikgoro tsa morwalela tsa magodimo ke bo ke lo tshololela lesego go fitlha lo sa tlhole lo tlhoka sepe.’”

Gantsi go dira gore re nyenye fa batho ba re raya ba re “Abo e le go intsha setlhabelo jang ne!” Dingwaga tse 30 tse di fetileng nna le Kathy re ne re batla go direla kwa ofising ya lekala ya Basupi ba ga Jehofa ya kwa United States, mme le fa go ntse jalo, re ne re na le bana ba re neng re tshwanetse go ba godisa. Tiro ya namolo e kgotsofaditse keletso ya rona ya go dira mo go oketsegileng mo tirelong ya Modimo. Tshiamelo e nngwe gape e nnile go bereka gaufi le Basupi ba bangwe, ba bangwe ba bone ba nang le bokgoni jo bogolo. Ka sekai, mongwe wa baapei ba rona o ne a apaya kwa resetšhurenteng nngwe ya maemo a a kwa godimo, mme yo mongwe o ne a apeela boporesidente ba babedi ba kwa United States.

Mo baithaoping ba le bantsi go bereka mo tirong ya namolo go fetotse matshelo a bone thata. Motho mongwe wa dingwaga di le 57 o ne a nna le bana ba phefo fa a ne a tlhalosa tiro e a neng a e direla batho ba ba amilweng ke kgwanyape. Tota le Basupi bangwe ba ba paletsweng ke go tla ba re kgothaditse thata. Ka sekai, baithaopi ba le babedi ba ba tlosang mouta mo meagong ba ne ba re naya folaga e e dirilweng le go saeniwa ke mongwe le mongwe—go akaretsa le bana—kwa diphuthegong di le tharo kwa nageng ya bone kwa Nebraska.

‘Re Bone Kafa Modimo a Tlhokomelang Batho ba ba Bogang ka Teng’

Wendell: Letsatsi morago ga go re kgwanyape ya Katrina e tlhasele, ke ne ka amogela taletso go tswa kwa lekaleng la United States gore ke ye go tlhatlhoba tshenyego e e neng e le mo Diholong tsa Bogosi le mo matlong a Basupi ba ga Jehofa kwa Louisiana le kwa Mississippi. Ka jalo, ke ne ka simolola loeto lo karolo ya lone e neng e le kabelo ya me mme mo gongwe ke ithuta sengwe. E re ka re nnile dingwaga di le 32 kwa lefelong le go nang le tlhokego e ntsi ya baboledi ba Bogosi, nna le mosadi wa me Janine re ne ra bona sentle kafa Jehofa a tlhokomelang batho ba gagwe ka teng. Le fa go ntse jalo, gone jaanong re bone tlhokomelo ya Modimo ka selekanyo se segolwane.

Ke na le tshiamelo ya go nna modulasetulo wa komiti ya namolo kwa Baton Rouge. Le fa tiro eno e le kgwetlho, e dirile gore ke kgotsofale thata. Eleruri, ka makgetlho a mantsi a tiro ya namolo, komiti ya rona e bone kafa Modimo a kgonang go rarabolola mathata ka teng, kafa a kgonang go dira gore go nne le ditshono ka teng, le kafa a kgonang go tlhokomela batho ba gagwe ba ba bogang ka teng, ka ditsela tse Rre yo o lorato, yo e leng Mothatayotlhe e leng ene fela a ka kgonang go dira jalo ka tsone.

Batho ba le bantsi ba ne ba botsa gore “Wena le mosadi wa gago lo kgona jang gore lo bo lo tsweletse mo tirong ya namolo morago ga dingwaga tse di fetang tse pedi?” Go ne go se motlhofo ka metlha. Re ne ra tshwanelwa ke go dira diphetogo di le mmalwa mo matshelong a rona. Mme sengwe se se itumedisang ke gore, re bone melemo ya go nna ‘le leitlho le le sa raraanang.’—Mathaio 6:22.

Fa ka lekgetlho la ntlha re ne re ya go batla bafalodi le go ba thusa kwa New Orleans, re ne re se na nako e ntsi ya go ikhutsa. E le go raraanya dilo le go feta, toropo e ne e tlhokometswe ke masole ka gonne go ne go na le tlhakatlhakano mme e bile go ne go na le bosetlhogo gongwe le gongwe. Go ne go le motlhofo go fekeediwa ke bogolo jwa tiro e e neng e larile kwa pele.

Re ne ra kopana le diketekete tsa Basupi ba ba neng ba latlhegetswe. Re ne ra rapela le bone mme ra leka go ba gomotsa. Mme ka thuso ya ga Jehofa re ne ra tswelela ka tiro ya rona. Ka dinako dingwe, ke ikutlwa e kete ke nnile le matshelo a mabedi mo dingwageng tse pedi tse ke nnileng le tsone fano.

Gangwe le gape, fa fela ke akanya gore ga ke kgone go tswelela ka go bo ke lapile thata mo mmeleng le mo maikutlong, go ne go goroga setlhopha se sesha sa baithaopi—bangwe ba bone ba tla go nna dikgwedi di le mmalwa mme bangwe ba tla go nna nako e telele. Go bona batho ba bantsi ba ba itumetseng jalo le ba ba ikemiseditseng go thusa, go akaretsa le basha ba bantsi, go dirile gore re nne le maatla a go tswelela.

Gantsi, Jehofa o ne a re tlhaga thuso. Ka sekai, fa re goroga re ne ra fitlhela ditlhare di wetse mo godimo ga matlo a a fetang 1 000 a bakaulengwe ba rona. E re ka re ne re se na dithulusu le batho ba ba tla dirang tiro e e kotsi eno ya go tlosa ditlhare tseo, komiti ya rona e ne ya rapela ka kgang eno. Letsatsi fela le le latelang, mokaulengwe mongwe o ne a tla ka teraka le yone thulusu e re neng re e tlhoka mme a ithaopela go re thusa. Ka lekgetlho le lengwe, thapelo ya rona e ne ya arabiwa mo metsotsong e le 15 fela, mme mo lekgetlhong le lengwe, sediriswa se re neng re se rapelela se ne se le mo tseleng le pele re ka re amen! Ee, tota Jehofa o ne a itshupa e le “Moutlwi wa thapelo.”—Pesalema 65:2.

“Ke Motlotlo go Nna Mongwe wa Basupi ba ga Jehofa”

Matthew: Letsatsi morago ga gore kgwanyape ya Katrina e tlhasele, ke ne ka kgona go thusa go rulaganya gore go romelwe ditone di le 15 tsa dijo, metsi, le dilo tse dingwe tse di neng di abilwe tse di neng di tlhokega kwa lefelong leo le le neng le sentswe. Ruri batho ba ga Jehofa ba supile bopelotshweu jwa bone!

E le gore maiteko a rona a ka nna le matswela, nna le mosadi wa me e bong Darline, re ne ra fudugela kwa lefelong le le neng le le diura di le pedi fela go tswa mo lefelong le le neng le amilwe ke kgwanyape. Mosupi mongwe wa lefelo leo o ne a re naya tiro ya boitshediso e e seng ya malatsi otlhe gore re kgone go dirisa nako e ntsi ya rona mo tirong ya namolo. Mosupi yo mongwe o ne a re naya folete. Go nna karolo ya bokaulengwe jo bo lorato jaana go dira gore ke nne le kanaanelo e kgolo mme e bile go dira gore ke nne motlotlo go nna mongwe wa Basupi ba ga Jehofa.

Ted: Ka bonako fela morago ga kgwanyape ya Katrina, nna le mosadi wa me e bong Debbie, re ne ra ithaopela go thusa mo tirong ya namolo. Mo malatsing a le mmalwa fela, ke ne ka bona tereilara ya dimetara di le robongwe e e neng e se boima gore bene ya rona e ka kgona go e goga mme e bile e le e e neng e rekisiwa ka sephatlho sa madi a e neng e ka a ja—e ne e rekisiwa ka madi a re neng re na le one e bile e le karabo ya dithapelo tsa rona. Tereilara eno e ntse e le legae la rona go feta dingwaga di le pedi.

Ka nako ya fa re ne re tsere malatsi a boikhutso kwa tirong ya namolo, re ne ra rekisa ntlo ya rona le bontsi jwa dilo tse re neng re na le tsone gore re kgone go gololesega go dira tiro e e oketsegileng kwa New Orleans, kwa ke neng ke le mookamedi wa porojeke gone. Selo sa botlhokwa thata mo maitemogelong ano e ne e le go bona kafa Jehofa a neng a itshupa e le “Modimo wa kgomotso yotlhe” mo baobameding ba gagwe ka teng. Batho ba le bantsi ga ba a latlhegelwa ke matlo a bone le Diholo tsa Bogosi fela mme gape e re ka ba ne ba fudusitswe ba ne ba latlhegelwa le ke diphuthego tsa bone le tshimo e ba neng ba rera dikgang tse di molemo mo go yone.—2 Bakorintha 1:3.

‘Tumelo ya Bone E ne Ya Ama Dipelo Tsa Rona’

Justin: Ka October 2005, go ne ga dirwa kopo ya gore go romelwe baithaopi ba ba tla yang go thusa ka tiro ya namolo kwa Gulf Coast. Nna le mosadi wa me Tiffany, re ne ra romela dikopo tsa rona ka bonako mme ka February 2006, re ne ra lalediwa gore re tle go thusa setlhopha sa go rulela se se neng se le kwa lefelong la namolo kwa Kenner gaufi le New Orleans.

Letsatsi lengwe le lengwe re ne re bereka mo ntlong nngwe mme re ne ra kopana le Basupi ba lefelo leo, ba tumelo ya bone le go ikaega ga bone ka Modimo go neng go ama dipelo tsa rona. Mme letsatsi le letsatsi re ne ra bona bosupi jo bo nonofileng jwa gore ke boeleele go ikanya dikhumo. Ga re na mafoko a go tlhalosa boitumelo jo re nnileng le jone jwa go bona se Jehofa a se dirileng gore batho ba gagwe ba kgone go se fitlhelela le go thusa Bakeresete ka bone.

[Lebokoso/Setshwantsho mo go tsebe 18]

Kafa Letsatsi le Tsamayang ka Teng Kwa Lefelong la Namolo

Mo setlhopheng se se berekang mo boapeelong kwa lefelong la thuso ya namolo, tiro e simologa mo e ka nnang ka 4:30 a.m. Ka 7:00 a.m. lelapa lotlhe la babereki le kopana mo lefelong le go jelwang mo go lone ka metsotso e le lesome go sekaseka temana ya Baebele pele ga sefitlholo. Modulasetulo a ka nna a dirisa nako eno gape go amogela batho ba ba sa tswang go goroga le go ba tlotlela ka maitemogelo a masha a a kgothatsang.

Morago ga thapelo ya tebogo, botlhe ba tla itumelela sefitlholo se se monate mme ba bo ba ya kwa dikabelong tsa bone. Bangwe ba nna mo lefelong la namolo, gongwe e le go bereka mo diofising, kwa botlhatswetsong kgotsa kwa boapeelong. Baapei ba apaaya dijo tse moragonyana di tla tsewang ke moemedi mongwe wa setlhopha sengwe le sengwe se se sa berekeng mo lefelong la namolo.

Maitseboa mangwe le mangwe a Mantaga, “lelapa” le a kopana go nna le thuto ya Baebele e e theilweng mo setlhogong sengwe sa mo makasineng wa Tora ya Tebelo, e e gatisitsweng ke Basupi ba ga Jehofa. Dithuto tse di ntseng jalo di thusa botlhe gore ba nne ba nonofile semoyeng e leng tsela e e ba thusang go itshoka ka boitumelo le go nna le boikutlo jo bo siameng ka tiro e motho a e dirang.—Mathaio 4:4; 5:3.

[Lebokoso mo go tsebe 19]

“Ke ne Ke na Le Boikutlo Jo bo Sa Siamang ka Lona”

Mosadi mongwe wa kwa New Orleans o ne a beile letshwao mo lebating la gagwe le le neng le re: “Basupi ba ga Jehofa—Lo se Ka Lwa Kokota.” Mme ka letsatsi lengwe setlhopha sa baithaopi se ne sa simolola go baakanya ntlo e e neng e sentswe ke kgwanyape ka kwa ga tsela go tswa mo ntlong ya gagwe. Letsatsi le letsatsi o ne a etse tlhoko botsalano jo bo lorato jwa babereki. Go ise go ye kae, go batla go itse go ne ga dira gore a se ka a tlhola a kgona go itshwara, mme o ne a ya go ba botsa gore ba dira eng. Fa a sena go utlwa gore baithaopi bao ke Basupi ba ga Jehofa, o ne a bolela gore ga go na ope go tswa kwa kerekeng ya gagwe yo o mo leleditseng mogala fa e sa le go nna le kgwanyape. O ne a re: “Ga go pelaelo gore ke ne ke na le boikutlo jo bo sa siamang ka lona.” Ditlamorago e nnile eng? O ne a ntsha letshwao mo lebating la gagwe mme a kopa Basupi gore ba mo etele.

[Setshwantsho mo go tsebe 16, 17]

Robert le Veronica

[Setshwantsho mo go tsebe 16, 17]

Frank le Veronica

[Setshwantsho mo go tsebe 17]

Gregory le Kathy

[Setshwantsho mo go tsebe 17]

Wendell le Janine

[Setshwantsho mo go tsebe 18]

Matthew le Darline

[Setshwantsho mo go tsebe 18]

Ted le Debbie

[Setshwantsho mo go tsebe 18]

Justin le Tiffany