Baebele ya Reng

A Modimo o Tshwanetse go Obamelwa ka Ditshwantsho?

“Ke ne ke rutilwe gore ditshwantsho di tla dira gore ke ikutlwe ke le gaufi le Modimo.”—Mack.

“Lelapa la gaetsho le ne le tletse ka ditshwantsho tsa bodumedi. Re ne re akanya gore seno se itumedisa Modimo.”—Herta.

“Re ne re a tle re khubamele ditshwantsho tse di rileng. Re ne re sa akanye le gore Modimo o ikutlwa jang ka seno.”—Sandra.

O IKUTLWA jang ka dipolelo tseo? Batho ba le bantsi ba dumela gore ditshwantsho tsa bodumedi di ba thusa go obamela Modimo. A go siame go akanya jalo? Se se botlhokwa le go feta, Modimo o ikutlwa jang ka kgang eno? Ela tlhoko se Lefoko la gagwe le le kwadilweng e leng Baebele e e Boitshepo le se bolelang.

Kafa Modimo a Lebang Ditshwantsho Tsa Bodumedi ka Teng

Ditshwantsho tsa bodumedi le medingwana di emela, kgotsa ke matshwao a sengwe le sengwe se se dirisediwang boineelo kgotsa tlotlo. Di akaretsa difapaano, difikantswe, ditshwantsho kgotsa sengwe le sengwe se se tshwantshetsang dilo tse di kwa legodimong kgotsa mo lefatsheng.a Difolaga le tsone e ka nna dilo tse di obamelwang.

Go dirisa dilo tse di ntseng jalo mo kobamelong go sa le go simologa dingwaga di le diketekete tse di fetileng. Ka jalo, ka 1513 B.C.E., fa Modimo a ne a neela setšhaba se se neng se sa tswa go tlhomiwa sa Iseraele Melao e e Lesome, o ne a tlhalosa maikutlo a gagwe sentle malebana le ditshwantsho tsa bodumedi. O ne a re: “O se ka wa itirela setshwantsho se se setilweng kgotsa popego e e tshwanang le epe fela e e kwa magodimong kwa godimo kgotsa e e mo lefatsheng fa tlase kgotsa e e mo metsing kafa tlase ga lefatshe. O se ka wa di ikobela le fa e le go tlhotlhelediwa go di direla, ka gonne nna Jehofa Modimo wa gago ke Modimo yo o batlang boineelo jo bo feletseng.”—Ekesodo 20:4, 5.

Ela tlhoko dilo tse pedi tse Modimo a neng a ba iletsa go di dira: Sa ntlha, batho ba gagwe ba ne ba sa tshwanela go dira ditshwantsho tse di obamelwang, sa bobedi, ba ne ba sa tshwanela go di “ikobela” kgotsa go di direla. Ke ka ntlha yang fa Mmopi wa rona a iletsa go dirwa ga ditshwantsho? Lebaka le lengwe la go bo go sa tshwanela go dirwa ditshwantsho tsa Modimo ke ka go bo “ga go na motho ope yo o kileng a bona Modimo ka nako epe.” Jehofa ga a na popego ya nama mme ke moya e bile o nna mo lefelong la moya. (Johane 1:18; 4:24) Lebaka la go bo go sa tshwanelwa go dirwa ditshwantsho tsa sepe ke ka go bo Modimo o batla “boineelo jo bo feletseng.” A re: “Ga nkitla ke naya ope o sele kgalalelo ya me, le fa e le ditshwantsho tse di betlilweng pako ya me.” (Isaia 42:8) Ka ntlha ya lebaka leno, ga go a siama gape le go dira setshwantsho se se ka go thusang mo kobamelong. Fa moeteledipele mongwe wa Moiseraele e bong Arone a ne a dira jalo, Jehofa o ne a kgopisega thata.—Ekesodo 32:4-10.

Ke ka Ntlha Yang re sa Tshwanela go di Ikobela?

Baebele e bolela jaana malebana le medingwana: “E na le molomo, mme ga e kgone go bua; e na le matlho, mme ga e kgone go bona; e na le ditsebe, mme ga e kgone go utlwa.” Morago ga foo e neela tlhagiso eno e e masisi: “Ba ba e dirang ba tla tshwana fela le yone”—ba sa tshele!—Pesalema 115:4-8.

Mme gape go obamela medingwana ke go dira tshiamololo. Ipotse gore, ‘Nka ikutlwa jang fa e le gore ke naya ngwanake mpho e e turang mme a bo a ya go leboga motho o sele fela kgotsa le e leng selo se se sa tsheleng?’ Seo se ka go thusa gore o tlhaloganye gore Mmopi wa rona le Moneibotshelo wa rona o ikutlwa jang fa ba bangwe—go akaretsa medingwana e e sa tsheleng—e fiwa pako le kobamelo e e tshwanetseng go newa ene.—Tshenolo 4:11.

Akanya gape le tsela e go nyenyefatsang motho—yo o dirilweng mo setshwanong sa Modimo ka gone—go tlotlomatsa selo se se sa tsheleng! (Genesise 1:27) Malebana le batho ba ba ileng ba dira jalo, moporofeti Isaia o ne a kwala jaana: “Tiro ya diatla tsa motho, e leng se se dirilweng ke menwana ya motho. Motho wa mo lefatsheng o a obega, mme motho o a kokobediwa, e bile [Jehofa Modimo a ka se ka a] kgona go ba itshwarela.”—Isaia 2:8, 9.

Selo se se dirang gore kobamelo ya maaka e kgopise Modimo le go feta ke gore, totatota ke kobamelo ya madimona—baba ba Modimo. Fa Baiseraele ba ne ba tlogela Jehofa go ya go obamela medingwana, Deteronome 32:17 ya re “ba ne ba ntshetsa madimona ditlhabelo, e seng Modimo.”

A balatedi ba bogologolo ba ga Jesu Keresete ba ne ba tlotlomatsa ditshwantsho kgotsa go di dirisa gore di ba thuse mo kobamelong? Le e seng! Moaposetoloi wa ga Jesu e bong Johane o ne a re: “Bana ba bannye, itiseng mo medingwaneng.” (1 Johane 5:21) Buka ya Early Church History to the Death of Constantine e bolela jaana: “Ga go na sepe se barutwa ba bogologolo ba neng ba ka tswa ba se tlhoile jaaka kobamelo ya ditshwantsho.”

Mofuta o o Siameng wa Kobamelo

Jesu o ne a re: “Baobamedi ba boammaaruri ba tla [obamela] Rara ka moya le boammaaruri, gonne, eleruri, Rara o batla ba ba ntseng jalo go mo obamela.” (Johane 4:23) Ee, Modimo o batla gore re mo itse jaaka motho—gore o rata eng le gore ke eng se a sa se rateng, melao ya gagwe ke eng le gore boikaelelo jwa gagwe ke eng ka rona. (Johane 17:3) Tota e bile, ke ka lebaka leo a ileng a dira gore Baebele e kwalwe. (2 Timotheo 3:16) Mme gape, e re ka Modimo “a se kgakala thata le mongwe le mongwe wa rona,” re ka mo rapela nako nngwe le nngwe, gongwe le gongwe mme re sa tlhoke thuso ya ditshwantsho tsa bodumedi.—Ditiro 17:27.

Sandra yo o umakilweng kwa pelenyana a re: “Fa ke ne ke tsena mo Holong ya Bogosi ya Basupi ba ga Jehofa, ga ke a ka ka bona ditshwantsho dipe tse di obamelwang. Basupi ba ne ba dirisa Baebele go mpontsha dinonofo tsa Modimo le gore o batla gore re dire eng. Ka jalo, ke ne ka ithuta gore ke tshwanetse go rapela Modimo gore a nkutlwe. Gone jaanong ke akanya gore ke tlhaloganya Mmopi sentle e bile ke na le kamano e e gaufi le ene.” Ee, Sandra o ne a ithuta kafa boammaaruri jwa Baebele bo lapolosang ka teng le kafa bo gololang motho ka teng tota. (Johane 8:32) Le wena o ka ikutlwa jalo.

[Ntlha e e kwa tlase]

A O KILE WA IPOTSA GORE. . .

◼ Ke ka ntlha yang fa re tshwanetse go tila mefuta yotlhe ya ditshwantsho mo kobamelong?—Pesalema 115:4-8; 1 Johane 5:21.

◼ Modimo wa boammaaruri o tshwanetse go obamelwa jang?—Johane 4:24.

◼ O ka ithuta jang boammaaruri ka Modimo e bile o ka solegelwa molemo jang?—Johane 8:32; 17:3.