A Ngwana wa Gago o Dirisa Internet?

MOTSOTSO mongwe le mongwe mo e ka nnang gongwe le gongwe, basha ba le dimilione ba dirisa Internet, e ka tswa e le kwa gae, kwa sekolong, kwa lelapeng la tsala nngwe kgotsa mo sedirisiweng se sennye sa ileketeroniki fa e le gore ba na le sone kgotsa founo ya selula e e nang le Internet. Fa e le gore o motsadi, o lebana le boammaaruri jo o ka se kang wa bo ganetsa: Gongwe bana ba gago ba itse Internet botoka go go gaisa mme ba ka tswa ba itse le gore ba ka dira jang gore o se ka wa tlhaloganya gore ba dira eng mo Internet.

A seno se tshwanetse go go tshwenya? Ee ruri. A go na le tharabololo ya bothata jono? Ee e teng. Gone ke boammaaruri gore fa go tla mo kgannyeng ya Internet, ngwana wa gago a ka tswa a itse sengwe le sengwe mme wena o sa itse sepe. Le fa go ntse jalo, o ka kgona go ithuta dilo tsa botlhokwa ka Internet. Mme e bile ga o tlhoke go nna mankge wa dilo tsa ileketoroniki gore o sireletse ngwana wa gago.

Motseletsele ono wa ditlhogo o tla go thusa ka kitso e e mosola. Le fa go ntse jalo, sa ntlha, mma re sekaseke dikotsi dingwe tse ngwana wa gago a ka lebanang le tsone fa a dirisa Internet.

[Mafoko a a mo go tsebe 3]

Kwa Canada mo e ka nnang halofo ya basha ba ba nang le difouno tsa selula ba kgona go dirisa Internet ka tsone