Morutabana wa Gagwe O ne A e Buelela
◼ Basha ba ka bona kae kaelo le kgakololo e ba ka e ikanyang? Cheren wa dingwaga di le 13 wa kwa Italy, o ne a itumelela go bala buka ya Dipotso Tse Basha Ba Di Botsang—Dikarabo Tse Di Nang le Tharabololo. Bosheng jaana o ne a nna le tshono ya go bua ka yone ka tlhagafalo le bana ba a nang le bone mo tlelaseng.
O tlhalosa jaana: “Ke mo mophatong wa borobedi mme re ne re tlotla ka mathata a bana ba ba simololang dingwaga tsa bosha ba lebanang le one. Ka letsatsi lengwe morutabana o ne a bua le nna, mme a nthaya a re o utlwile gore dikgatiso tsa rona di thusa basha. O ne a nkopa gore ke mo tlele tshedimosetso malebana le seo. Ke ne ka mo naya buka ya Dipotso Tse Basha Ba Di Botsang.
“Malatsi a se kae morago ga foo o ne a dirisa buka eo, a theile puisano ya mo tlelaseng mo kgaolong ya lesome e e nang le setlhogo se se reng ‘Tebego e Botlhokwa go le Kana Kang?’ E bile o ne a re naya tiro e re tshwanetseng go e dira kwa gae e e theilweng mo setlhogong se se reng ‘Dipotso tsa Puisano’ tse di kwa bofelong jwa kgaolo. O ne a re, ‘Buka eno e kwadilwe bontle thata, mme ke maswabi go bo lo se na khopi ya yone lotlhe.’
“Ke ne ka mmolelela gore ke tla tlela mongwe le mongwe yo o kgatlhegang khopi mme bana ba le 16 ba ke nang le bone mo tlelaseng ba ne ba kopa dikhopi. Fa ke tla le dibuka tseo, tota le baithuti ba pele ba neng ba re ba ga di batle ba ne ba fetola megopolo ya bone mme le bone jaanong ba di batla!”
Gape buka ya Dipotso Tse Basha Ba Di Botsang e na le le dikgaolo tse di nang le ditlhogo tse di reng “Ke ka Ntlha Yang fa Pelo ya Me e Nna Botlhoko mo go Kana Kana?” “Ke Ka Itse Jang Fa E Le Lorato lwa Mmatota?” “Ke Ka Ntlhayang Fa Ke Tshwanetse go Gana Diokobatsi?” le “Ke Ka Kgona Jang go Laola Tsela E Ke Lebelelang TV ka Yone?” O ka nna wa kopa go romelelwa khopi ya gago ya buka eno ka go tlatsa setlankana se se fa tlase fano mme o bo o se romela kwa atereseng e e bontshitsweng kgotsa kwa atereseng e e tshwanelang e e mo lenaaneng le le mo tsebeng ya 5 ya makasine ono.
□ Kwantle ga go ipofa ke kopa khopi ya buka e e bontshitsweng fano.
□ Tsweetswee ikgolaganyeng le nna malebana le thuto ya mahala ya legae ya Baebele.