Puerto Rico—Dikhumo mo Letsatsing

KA November 19, 1493, Christopher Columbus, yo o neng a tsamaya ka setlhopha sa dikepe tsa kwa Spain, o ne a fitlha mo boemakepeng jwa setlhaketlhake se sentle sa Caribbean. Fa a ntse a le koo, o ne a bitsa setlhaketlhake seo a re ke San Juan Bautista (St. John the Baptist). Morago ga go nna nakwana koo gore a bone dilwana tse a neng a di tlhoka, o ne a tsamaya mme a tswelela ka loeto lwa gagwe lwa bobedi lwa go ribolola dilo.

Dintshi tsa lewatle tse di neng di na le ditlhare tsa mokolane tse di mmala wa gauta le dijalo tse di godileng sentle tsa boboatsatsi ga di a ka tsa kgatlha moribolodi yono. Columbus o ne a batla ditlhaketlhake tse dikgolwane le dikhumo tse a neng a ikemiseditse go di bona.

Ponce de León, Mo-Spain mongwe yo bangwe ba bolelang gore o ne a tsamaya le Columbus mo loetong loo, o ne a ikaeletse gore o tla boela kwa setlhaketlhakeng seo, se baagi ba sone ba neng ba se bitsa Borinquén. E re ka a ne a utlwile gore baagi ba koo ba ne ba na le mekgabiso ya gouta, o ne a dumela gore dithabana tsa setlhaketlhake seo di na le gouta. Dingwaga di le 15 moragonyana o ne a boa go ya go tsaya se a neng a akanya gore ke di tsa gagwe. Ka 1521 Ba-Spain ba ne ba tlhoma bothibelelo jwa bone jwa konokono kwa bokone jwa losi lwa setlhaketlhake seo. Ponce de León o ne a bitsa toropo e ntšha eno Puerto Rico, e e kayang “Boemakepe jo bo Humileng,” e re ka a ne a lebeletse go bona khumo gone.a

Go nna le tsholofelo ga ga Ponce de León go ne ga itshupa e le ga lefela. Gouta e nnye e e neng ya fitlhelwa kwa Puerto Rico e ne ya fela ka bonako mme mathata a dipolotiki a ne a oketsega. Kgabagare, Ponce de León o ne a ya kwa lefelong le gompieno le itsegeng e le Florida, kwa U.S.A.

Le fa gone setlhaketlhake seno se ne se se na letlotlo le legolo la ditswammung, Ba-Spain ba ne ba lemoga ka bonako gore boemakepe jo bogolo jwa Puerto Rico bo ne bo le mosola thata. Mo lekgolong la bo16 la dingwaga, ba ne ba fetola motsemogolo wa setlhaketlhake seno go nna boemakepe jo bo babalesegileng jo bo neng bo tla sireletsa mofuta wa dikepe tsa bone tse di bidiwang di-galleon tse di neng di rwala ditena tsa gauta kgotsa tsa selefera go tswa kwa dinageng tsa Amerika di di isa kwa Spain. Go ise go ye kae, San Juan e ne ya itsege e le “lefelo le Ba-Spain ba neng ba le dirisa thata fa ba ya kwa Amerika.”

Mabota a a thata, a bogodimo jwa dimetara di le 13 mme a le bokima jwa dimetara di le thataro—mmogo le dikago tse pedi tse di boitshegang tsa phemelo—ke bosupi jo bo bontshang maiteko a magolo a batho ba kwa San Juan ba ileng ba a dira go sireletsa toropo ya bone. Gompieno, San Juan e sa ntse e le bongwe jwa maemakepe a a rategang a Caribbean a batho ba ratang go ya kwa go one. Baeti ba ka kgona go bona ka leitlho la mogopolo gore botshelo bo tshwanetse jwa bo bo ne bo ntse jang ka nako ya fa naga eno e ne e dirilwe dikolone fa ba ntse ba ralala mabota a toropo eno ba bona dikago tsa bogologolo.

Loeto Lwa Kwa Old San Juan

Toropo eno e e ageletsweng ka mabota e bidiwa Old San Juan, fa e bapisiwa le toropokgolo ya segompieno e e tlhanaselang e e e dikologileng. Old San Juan e lebega jaaka sekepe se se kokobetseng mo lewatleng. E re ka tota e dikologilwe ke lewatle, lepawa kgotsa “nko ya sekepe” le tsenelela mo teng ga lewatle la Atlantic. Mo lefelong leno le le nang le popego ya khutlotharo le le agilweng ka botlhale go na le El Morro e leng kago ya phemelo ya Spain e e neng e sireletsa matseno a boemakepe. Ka kwa morago ga El Morro go ne go na le dithako tsa phemelo kafa matlhakoreng oomabedi a naga eno e e tshesane e e di tshwaraganyang, e e bopegileng jaaka nko ya sekepe. Mo e ka nnang kilometara e le nngwe le sephatlho go ya kwa ntlheng ya botlhaba go na le kago e kgolo ya phemelo e e bidiwang San Cristóbal, e e neng e sireletsa “karolo e e kwa morago ya sekepe” kgatlhanong le batho bape ba ba ka tlhaselang go tswa mo lefatsheng. Old San Juan e fa gare ga dikago tseno tse pedi tsa phemelo mme ka 1983, UNESCO e ne ya e dira Lefelo le le Itlhaolang ka Bontle Jwa Lone mo Lefatsheng.

Toropo eno ya bogologolo e ile ya tsosolosiwa ka kelotlhoko. Baagi ba teng ba penta matlo a bone ka mebala e e sa galoleng ba bo ba kgabisa mathudi a bone a tshipi ka malomo a a nang le mebala e e galolang mme ba tlatsa dijarata tsa bone ka dimela tsa boboatsatsi. Matlapana a mmala o o bobududu a a neng a dirisiwa go ala mebila e mesesane ya San Juan a tswa kwa meepong ya tshipi ya Spain. Masalela a tshipi e e nyerolotsweng ya meepo a ne a dirwa gore a nne matlapana mme a ne a dirisediwa go thusa dikepe tsa Spain tse di neng di ya Puerto Rico gore di itsetsepele.

Mo dithakong tsa phemelo tsa San Cristóbal, dikanono tsa bogologolo tsa kwa Spain di sa ntse di eme di lebile kwa boemakepeng. Go na le gore go tle dikepe tsa Spain tse go tweng ke di-galleon di rwele gauta, go na le dikepe tse dikgolo tse di rweleng bajanala tse di nnang di tla mo boemakepeng gangwe le gape. Moya wa boiketlo le wa botsalano o baagi ba setlhaketlhake seno ba nang le one le one o dira gore toropo eno e ratiwe thata ke bajanala. Dikoloi di tshwanetse go letela batsamaakadinao gore ba fete pele, ka gone, gantsi bakgweetsi ba dikoloi ba leta ka bopelotelele fa batho ba ba tsayang ditshwantsho ba tsaya ditshwantsho tsa loeto lwa bone.

Mafelo a le Manè a Tikologo a go Leng Botlhokwa Gore a Sirelediwe

Le fa gone nngwetharong ya baagi e nna mo kgaolong ya San Juan, go na le dilo tse dingwe tse dintsi tse di kgatlhang kwa Puerto Rico. Setlhaketlhake seno se ka tswa se le sennye mme maemo a sone a bosa a a farologaneng le dipopego tse dingwe a dira gore mefuta e mentsi ya dimela le diphologolo e kgone go tshela gone. Fa tlase fano ke dingwe fela tsa di le nnè tsa ditikologo tse di tlhomologileng tse balaodi ba kwa Puerto Rico ba lekang go di sireletsa.

El Yunque National Forest ke lengwe la mafelo a mo go one go sirelediwang sengwe sa dikgwa tsa dipula tsa boboatsatsi tse di setseng kwa Caribbean. Diphororo tsa teng di kgabisa mekgogolosa ya tsone. Dithunya tsa bromeliad tsa mmala wa namune di kgabisa dijalo tsa sekgwa sa sone se se letobo mme ditlhare tse dileele tsa patadikgagane di gola gaufiufi le ditlhare tsa lianas le tsa mokolane. Le fa gone papalagae ya kwa Puerto Rico e le mo kotsing ya go nyelela, e leka go tswelela e tshela mo lefelong le lentle leno mme coquí—segwagwa se sennye sa setlhare sa kwa Puerto Rico—se dira gore go nne le moribo mo sekgweng ka go opa mokgosi o o molotsana.

Fa o le kgakalanyana, go lebega e kete mekgokolosa ya El Yunque e tsentse lesire la mmala wa selefera. Mmala oo o tswa mo matlhareng a setlhare sa yagrumo mofuta mongwe wa setlhare o o neng wa nna teng morago ga tshenyo e e neng e bakilwe ke kgwanyape e e bidiwang Hugo e e neng ya nna teng dingwaga di le mmalwa tse di fetileng. Kgolo e ntšha eno e supa gore go na le tsholofelo. Moitsethutotshelo mongwe o ne a tlhalosa jaana: “Sekgwa se kgona go tlhoga gape morago ga masetlapelo a tlholego se sa thusiwe thata. Kotsi ya mmatota ke go tshwenyana ga batho le sone.” Paraka eno e na le mefuta e e ka nnang 225 ya ditlhare, mefuta ya ditlhare tsa patadikgagane di le 100 le mofuta wa malomo a di-orchid e le 50. E re ka e na le mefuta e mentsi jaana ya dimela, e ne ya tlhophiwa go nna United Nations Biosphere Reserve.

Lefelo la Tlhokomelo ya Ditshedi la Guánica. Go ka direga gore mo lefatsheng go setse fela mo e ka nnang peresente e le nngwe ya dikgwa tsa boboatsatsi tse di omileng. Le fa go ntse jalo go na le sekai se segolo sa tsone, mo e ka nnang motsamao wa diura di le mmalwa fela go tswa kwa El Yunque. Baithutadimela bangwe ba tlhalosa Guánica “gongwe e le sekao se se molemo thata mo lefatsheng sa dijalo tsa dikgwa tsa boboatsatsi tse di omileng.” Ke legae la dinonyane tse dintsi tsa mo Puerto Rico, mefuta e le 750 ya dimela tse mo go tsone diperesente di le 7 di leng mo kotsing ya go ka nyelela. Malomo a a sa tlwaelegang ano a ngoka di-hummingbird mme gape ke legae la dirurubele. Mo molelwaneng wa sekgwa seno se se omileng go na le losi lo lo sa nneng ope moo dikhudu tse ditala le tsa di leatherback di tlang go beela mae teng.

Di-Mangrove le Dithotana tsa Dikorale. Lefelo la go tlhokomela ditshedi la Guánica gape le akaretsa dikgwa tsa di-mangrove tse di bapileng le lobopo. Mongwe wa batlhokomedi ba lefelo leno o ne a tlhalosa jaana: “Lefelo leno la rona la tshireletso le boloka di-mangrove di itekanetse e re ka go se na madirelo kgotsa batho ba ba senyang tikologo. Mme di-mangrove e nna lefelo le le siameng gore ditlhapi tse dintsi tse di nnang mo dikoraleng di beele mae.” Lefelo le lengwe gape le le ngokang bajanala le le ikaegileng ka tikologo eno ya di-mangrove ke dikgogometso di le mmalwa tse di phatsimang tse di ka fitlhelwang kwa Puerto Rico. Bona lebokoso le le fa tlase

Dithotana tsa dikorale tse di leng mo lewatleng di sireleditswe gore go se ka ga tshwarwa ditlhapi mo go tsone mme di fetotswe go nna mafelo a tshireletso ya ditshedi. Ditshingwana tseno tse di kafa tlase ga metsi di kgatlha thata batho ba ba thumang kafa tlase ga metsi ba ba kgonang go kopana le dikhudu, di-manatee le mefutafuta ya ditlhapi tsa mebalabala.

Le fa Puerto Rico e ne ya se ka ya kgatlha Columbus mme gape e ne ya swabisa batho ba ba neng ba batla dikhumo, e kgatlha bajanala ba motlha wa gompieno. Mo go bone, Puerto Rico e phophoma ka dikhumo tsa tlhago.

[Ntlha e e kwa tlase]

[Lebokoso/Setshwantsho mo go tsebe 16]

LEFELO LA BOBOGELO LE LE TLHOMOLOGILENG

Arecibo Observatory, e e leng dikilometara tse di ka nnang 80 kwa bophirima jwa San Juan ke lengwe la mafelo a motho a ka ratang go a etela. Le na le thelesekoupo ya radio e kgolo go gaisa tsotlhe mo lefatsheng e e ka nnang bophara jwa dimetara di le 305. Bogolo jwa thelesekoupo eno bo letla baithutadinaledi gore ba keleke dilo tse di ka se kgoneng go bonwa ka dithelesekoupo tse dingwe.

[Motswedi wa Setshwantsho]

Courtesy Arecibo Observatory/​David Parker/​Science Photo Library

[Lebokoso/Setshwantsho mo go tsebe 17]

“GO TLHAPA MO DINALEDING”

Kwantle fela ga lotshitshi lwa Puerto Rico—mo setlhaketlhakeng sa Vieques—go na le kgogometso e nnye e e itsegeng jaaka Bioluminescent Bay. Kgogometso eno e bidiwa jalo ka gonne go bolelwa gore e na le ditshedi tse dintsi tsa mo metsing tse di phatsimang go gaisa mo lefatsheng. Fa ditshedinyana tseno tse dinnye tse di itsegeng e le dinoflagellates—di tshwenngwa, di ntsha mmala o o phatsimang o o bobududu jo bo batlang bo nna botala. Ka go dira jalo ditshedinyana tseno di dira gore go nne le bontle jo bo sa tlwaelegang jwa tlhago.

Baeti ba ba etelang letshana leno bosigo sa ntlha ba lemoga go phatsima go ditlhapi tseno di go dirang fa di thumela kgakala le mokoro wa bone. Mogatla wa ditlhapi tseno o a tshuba bosigo mo metsing go nne jaaka e kete ke dinaledi tsa motshotshonono. Fa batho ba thuma mo metsing ano, motsamao mongwe le mongwe o ba o dirang o kgona go bonala sentle mo lefifing. Fa ba tsholetsa matsogo a bone mo metsing, marothodi a a tswang mo matsogong a nna jaaka e kete ke dinaledi tse di phatsimang. Mojanala mongwe o ne a re: “Go ntse jaaka e kete motho o tlhapa mo dinaleding!”

[Setshwantsho mo go tsebe 15]

El Morro

[Setshwantsho mo go tsebe 15]

Tebego ya motse wa bogologolo wa San Cristóbal

[Setshwantsho mo go tsebe 15]

Old San Juan

[Setshwantsho mo go tsebe 16]

Setlhare sa patadikgagane kwa sekgweng sa pula sa El Yunque

[Setshwantsho mo go tsebe 16, 17]

Losi lwa kwa Guánica

[Motswedi wa Setshwantsho]

© Heeb Christian/age fotostock

[Setshwantsho mo go tsebe 17

Dipapagae tsa kwa Puerto Rico

[Setshwantsho mo go tsebe 17]

Dithotana tsa dikorale

[Motswedi wa Setshwantsho mo go tsebe 14]

Passport Stock/age fotostock

[Motswedi wa Setshwantsho mo go tsebe 15]

All photos: Passport Stock/age fotostock

[Metswedi ya Ditshwantsho mo go tsebe 17]

Parrots: U.S. Geological Survey/Photo by James W. Wiley; reef: © Stuart Westmorland 2005; swimmer: Steve Simonsen