Nka Tokafatsa Jang Dithapelo Tsa Me?

“RAPELANG lo sa kgaotse.” (1 Bathesalonika 5:17) “Nnelang ruri mo thapelong.” (Baroma 12:12) “A dikopo tsa lona di itsisiwe Modimo.” (Bafilipi 4:6) Fa e le gore o Mokeresete, o ka tswa o itse ditemana tseo sentle. Gongwe o ka tswa o lemogile gore thapelo ke tsela e e gakgamatsang go di gaisa ya puisano. A o ko o akanye fela—ka nako nngwe le nngwe motshegare kgotsa bosigo, o ka kgona go bua le Modimo Mothatayotlhe! Mme Baebele ya re: “O a re utlwa.”a—1 Johane 5:14.

Le fa go ntse jalo, jaaka mosha yo o umakilweng kwa tshimologong, o ka nna wa fitlhela gore go rapela ke kgwetlho. Fa e le gore go ntse jalo, o ka dira eng ka gone? Setlhogo seno se tla go thusa go (1) lemoga bothata, (2) go itlhomela mokgele malebana le dithapelo tsa gago le go (3) lotlolola “lebati” gore o tle o fitlhelele mokgele wa gago.

Sa ntlha, mma re bone gore bothata ke eng. Ke karolo efe ya thapelo e e leng kgwetlho mo go wena?

Kgato ya gago e e latelang ke go itlhomela mokgele. Fa tlase fano, tshwaya mokgele o wena o ka ratang go o fitlhelela, kgotsa kwala o le mongwe mo moleng o o bapileng le “Tse dingwe.”

• Nka rata gore ke rapela gangwe le gape go feta pele.

• Nka rata gore ke se ka ka boaboeletsa dilo di le dingwe mo dithapelong tsa me..

• Nka rata gore dithapelo tsa me e nne tse di tswang pelong le e leng go feta.

• Tse dingwe ․․․․․

Go Lotlolola “Lebati”

Thapelo e tshwana le lebati le o ka le bulang nako nngwe le nngwe. Le fa go ntse jalo, basha ba le bantsi ba ka nna ba bolela gore ga ba bule lebati leo gantsi kgotsa ka kgololesego e ba neng ba ka rata go le bula ka yone. Fa e le gore go ntse jalo le ka wena, o se ka wa itlhoboga! O setse o bone gore bothata ke eng e bile o itlhometse mokgele. Jaanong, o tlhoka fela selotlolo go lotlolola lebati. Akanya ka dikgoreletsi dingwe tse o ka lebanang le tsone, le dikakantsho tsa kafa o ka di fenyang ka teng.

Lloko: GO ITLHOKOMOLOSA.

“Ka dinako tse dingwe, e re ka ke na le dilo tse dintsi tse ke tshwanetseng go di dira, ke kgaphela thapelo kwa thoko.”—Preeti, 20, Boritane.

Senotlolo: “Nnang lo tlhokometse ka kelotlhoko e kgolo gore kafa lo tsamayang ka gone ga se jaaka batho ba ba seng botlhale mme ke jaaka ba ba botlhale, lo ithekela nako e e lo siametseng, ka gonne malatsi a bosula.”—Baefeso 5:15, 16.

Kakantsho: Tlhopha nako e e ka go siamelang e sa le gale, e o ka rapelang ka yone letsatsi le letsatsi. O ka nna wa ba wa kwala seo mo pampiring, fela jaaka o ka kwala sengwe se se tla go gakololang ka nako e o e beetseng go dira sengwe. Yoshiko wa dingwaga di le 18 wa kwa Japane a re: “Fa ke sa ipeele nako e e rileng ya go rapela, ke tshwarega ka dilo tse dingwe.”

Lloko: GO ITEEGA TSEBE.

“Ga ke kgone go tlhoma mogopolo mo thapelong, mme go bonala ke akanya ka sengwe le sengwe kwantle ga se ke se buang.”—Pamela, 17, Mexico.

Senotlolo: “Molomo o bua se se tletseng mo pelong.”—Mathaio 12:34.

Kakantsho: Fa o sa ntse o eta mogopolo, leka go rapela dithapelo tse di khutshwane—bobotlana go fitlhela tsela e o tlhomang mogopolo mo dilong ka yone e tokafala. Kakantsho e nngwe: Rapela ka dilo tse o amegileng thata ka tsone. Marina wa dingwaga di le 14 wa kwa Russia a re: “Fa ke simolola dingwaga tsa me tsa bolesome, ke ne ka simolola go tlhatlhanya ka kgang ya gore thapelo tota ke go buisana le Modimo. Seno se ne sa ntlhotlheletsa gore ke mmulele mafatlha fa ke mo rapela.”

Lloko: TLWAELO.

“Fa ke rapela, ke iphitlhela ke boaboeletsa mafoko.”—Dupe, 17, Benin.

Senotlolo: “Ke tla tlhatlhanya ka tiro yotlhe ya gago, ke tla akanya ka ditiro tsa gago.”—Pesalema 77:12.

Kakantsho: Fa e le gore dithapelo tsa gago ke seomodiro fela, letsatsi le letsatsi kwala tshegofatso e le nngwe e e kgethegileng e o ileng wa segofadiwa ka yone mo botshelong jwa gago. Go tswa foo lebogela Jehofa tshegofatso eo. Dira seno ka sebaka sa beke mme o tla bo o setse o rapetse ka dilo di le supa tse disha kwantle ga go di boaboeletsa. Dira se se tshwanang ka dilo tse di diragalang letsatsi le letsatsi. Bruno wa dingwaga di le 21 wa kwa Brazil a re: “Fa ke rapela, ke leka go tlhoma mogopolo mo dilong tse di diragetseng ka letsatsi leo.” Samantha wa dingwaga di le 18 wa kwa United States le ene o dira se se tshwanang. A re: “Ke leka go gakologelwa sengwe le sengwe se se diragetseng gompieno se se neng se farologane le malatsi a mangwe mme ke bo ke rapelela dilo tseo. Seo se nthusa gore ke se ka ka boaboeletsa mafoko a a tshwanang.”b

Lloko: GO BELAELA.

“Nako nngwe fa ke ne ke rapelela bothata bongwe kwa sekolong, ga bo a ka jwa fela. Tota e bile, go ne ga tlhaga mathata a a oketsegileng. Ke ne ka akanya gore, ‘Ke eng fa ke tshwanetse go tswelela ke rapela? Tota e bile Jehofa ga a reetse!’”—Minori, 15, Japane.

Senotlolo: “Mmogo le thaelo gape [Jehofa Modimo] o tla dira tsela ya go tswa gore lo kgone go e itshokela.”—1 Bakorintha 10:13.

Kakantsho: Re ka tlhomamisega ka selo se le sengwe: Jehofa ke “Moutlwi wa thapelo.” (Pesalema 65:2) Ka jalo, morago ga go rapela ka kgang eno, leka go tlhaloganya seemo botoka. Go na le gore o letele karabo e o e lebeletseng, batla e e ka tswang e setse e le teng. Lebaka la go bo o sa ntse o itshokile jaaka Mokeresete le kaya gore go ka direga gore Jehofa o setse a arabile thapelo ya gago—e seng ka go tlosa bothata mme ka go go naya maatla a go bo itshokela.—Bafilipi 4:13.

Lloko: GO TLHABIWA KE DITLHONG.

“Fa ke akanya gore bana ba ke tsenang sekolo le bone ba tla reng fa ba mpona ke rapela pele ga dijo tsa motshegare, ke tlhabiwa ke ditlhong.”—Hikaru, 17, Japane.

Senotlolo: “Go na le . . . nako e e siametseng sengwe le sengwe se re batlang go se dira.”—Moreri 3:1, Beck.

Kakantsho: Le fa gone thapelo e o e rapelang mo pelong e ka nna ya dira gore batho ba kgatlhegele se o se dirang, ga o tlhoke go dira gore mongwe le mongwe a go bone o rapela. Ka sekai, ga go pelaelo gore thapelo e khutshwane e Nehemia yo o ikanyegang a ileng a e rapela fa pele ga Kgosi Aretaserese e ne e le e a e rapelelang mo pelong, mme ga go na sepe se se bontshang gore kgosi e ne e itse gore Nehemia o a rapela. (Nehemia 2:1-5) Le wena o ka rapela Jehofa mo pelong o sa dire gore batho ba go bone.—Bafilipi 4:5.

Lloko: BOIKUTLO JWA GO SA TSHWANELEGE.

“Jehofa o setse a itse mathata a me. Mme fa ke lapile ka one, ke akanya gore le ene o tshwanetse a bo a lapisitswe ke one! Ka dinako tse dingwe ke ikutlwa fela ke sa tshwanelege go bua le ene.”—Elisabeth, 20, Ireland.

Senotlolo: “Latlhela tlhobaelo yotlhe ya lona mo [Modimong], ka gonne o a lo kgathalela.”—1 Petere 5:7.

Kakantsho: E le thulaganyo ya go ithuta o le esi, dira dipatlisiso mme o tlhatlhanye ka ditemana tse di latelang: Luke 12:6, 7; Johane 6:44; Bahebera 4:16; 6:10; 2 Petere 3:9. Ditemana tseno di tla go thusa go lemoga gore Jehofa o batla go utlwa se o batlang go se bua le gore ga o tlhoke go nna mokaloba mongwe wa semoya gore a go utlwe. Mopesalema Dafide—yo le ene a neng a tlhobaela e bile a ngomogile pelo—o ne a bontsha gore o tshepa gore “Jehofa o gaufi le ba ba pelo e phatlogileng; mme o boloka ba ba moya o pitlaganeng.”c—Pesalema 34:18.

Lebaka la go bo Jehofa ka boene a utlwa dithapelo tsa gago go supa kafa a go kgatlhegelang ka gone. Nicole wa dingwaga di le 17 wa kwa Italy a re: “Jehofa ga a naya baengele tiro ya gore ba reetse dithapelo tsa rona. Ga go na pelaelo gore e re ka a reetsa dithapelo tsa rona ka boene, o tshwanetse a bo a di tsaya di le botlhokwa.”