Kafa Basha ba ka Bonang Thuso ka Teng

Fa lefatshe le ka bo le itekanetse, batsadi botlhe ba ne ba tla naya bana ba bone kaelo le thapiso ya ka metlha e e lorato. Ba ne ba tla bua le bone, ba ba balela, ba ja le bone le go ba tlhaloganya. Le fa go ntse jalo, batsadi ga ba itekanela. Baebele e bolela sentle jaana: “Botlhe ba leofile e bile ba tlhaela kgalalelo ya Modimo.”—Baroma 3:23.

Fa o le mosha, o ka nna wa akanya gore botshelo jwa lelapa la gaeno ga se jo o ka ratang go nna le jone—mme seo se ka tswa se le boammaaruri. Le fa go ntse jalo, go na le go le gontsi mo o ka go dirang go fokotsa tlhobaelo le go oketsa boitumelo jwa gago. Ela tlhoko ditsela dingwe tse di ka go thusang fa o dirisa melaometheo ya Baebele.

Kakantsho 1

Tsalana le ba Bangwe Go na Le go Itlhaola

“Yo o itlhaolang o tla batla tlhologelelo ya gagwe ya bopelotshetlha; o tla nna kgatlhanong le botlhale jotlhe jo bo mosola.” (Diane 18:1) Basha bangwe ga ba gololesege fa ba le mo gare ga batho mme ba bona go le botoka go lebelela thelebishene kgotsa go tshameka motshameko wa bidio. Ba bangwe ba ditlhong thata, ka jalo ba itlhaola mo bathong. Elizabeth ke mosha mongwe yo o itlhalosang a le mo “seemong se se se kitlang se fetoga sa go nna ditlhong.” A re: “Go nna ditlhong ga me go tshwana le poifo. Go thata gore ke atamele batho mme ke bue le bone.”

Elizabeth o kgonne jang go lepalepana le kgwetlho ya go nna ditlhong? Ke mongwe wa Basupi ba ga Jehofa, mme jaaka karolo ya kobamelo ya gagwe, o nna teng ka metlha mo dipokanong tsa Bokeresete. Elizabeth a re: “Le fa ke le ditlhong, ke go dirile mokgele wa me gore bobotlana ke bue le motho a le mongwe kwa pokanong nngwe le nngwe. Fa ke sa kgone, ke leka gore ke se ka ka kgobega marapo. Go na le moo, ke tlhoma mogopolo mo go se ke se fitlheletseng. Ke lemogile gore ke solegetswe molemo thata ke go itse batho ba bangwe.”

Ke eng o sa kwale maina a batho ba le babedi kgotsa ba le bararo ba o ka ratang go ba itse botoka? Go dire mokgele wa gago gore mo bekeng e e latelang o ithute sengwe se sesha ka mongwe wa bone. Go tswa foo, kwala selo se sentle se o ka se direlang mongwe le mongwe wa batho bano mo kgweding e e tlang mme go tswa foo o bo o go dira.—Ditiro 20:35.

Fa o itlhaola gore o se ka wa lebana le mathata le go itlhaola mo bathong, ga go pelaelo gore o tla tshwenyega thata ka ga gago go sa tlhokege. Kafa letlhakoreng le lengwe, Baebele e re gakolola gore re se ka ra ‘kgatlhegela dilo tse di amang rona fela, mme gape re kgatlhegele le dilo tse di amang ba bangwe.’ (Bafilipi 2:4) Fa o dirisa molaomotheo oo, fa o dirisana le ba lelapa la gaeno le ba bangwe ba ba go dikologileng, o tla kgona go nna le pono e e siameng ka mathata a gago e bile o tla kgona go a rarabolola botoka.

Kakantsho 2

Tshaba Boitsholo Jo bo Sa Siamang Jwa Tlhakanelodikobo

“Tshabang boitsholo jo bo sa siamang jwa tlhakanelodikobo. Boleo jotlhe jo bongwe jo motho a bo dirang bo ka kwa ntle ga mmele wa gagwe, mme yo o dirang boleo jwa go tlhakaneladikobo o leofela mmele wa gagwe.” (1 Bakorintha 6:18, New International Version) O ka dira jang gore o se ka wa gatelelwa gore o dire boitsholo jo bo sa siamang jwa tlhakanelodikobo, fa basha ba le bantsi jaana ba go dira?

Sa ntlha, o tlhoka go akanya ka kgang eno ka kelotlhoko pele ga o lebana le kgatelelo kgotsa o raelesega. Seane sengwe se se tshwanelang sa re: “Yo o botlhale o akanyetsa dikgato tsa gagwe.” (Diane 14:15) Mbali, mosetsana mongwe yo o nnang mo Afrika Borwa a re: “Kwa sekolong se segolwane, lekawana lengwe le ke neng ke tsena le lone tlelase e le nngwe le ne le nna le nkopa gore ke ikentshe le lone. Basetsana mo tlelaseng ya me ba ne ba nkgatelela gore ke ikentshe le ene ka gonne e ne e le motho wa maratagolejwa—e ne e le motlelara mme a le mo setlhopheng sa sekolo sa kgwele ya dinao. Ke ne ke akanya gore o montle mme ke ne ke setse ke dirile tshwetso ya gore nka se fetole melao ya boitsholo e ke e dumelang. Balekane ba me ba ne ba akanya gore go tlhakanela dikobo e le go ijesa monate fela go ne go itshiametse fela. Mme ke ne ke itse go farologanya se se siameng le se se sa siamang e bile ke dirile tshwetso ya gore ke tla dira eng pele ke lebana le seemo sa mofuta ono.”

Sa bobedi, rapela Modimo gore a go thuse gore o nne o ikanyege mo melaong ya gagwe ya boitsholo. Maggie, mosha mongwe yo o nnang kwa Engelane a re: “Thapelo e nthusa gore ke nne le nonofo e ke e tlhokang go lebana le kgatelelo ya go tlhakanela dikobo. Ga nke ke akanya gore nka kgona go laola seemo ka bonna. Gape ke bua le batsadi ba me ka kgang eno mme ka dinako tse dingwe ke tlotla ka bothata jono le ditsala tse di godileng.”

Kakantsho 3

Leka go Utlwela Batsadi ba Gago Botlhoko

“Nnang le mogopolo o o tshwanang lotlhe, lo bontshe go utlwela ba bangwe botlhoko, lo na le lorato lwa bokaulengwe, lo le pelotlhomogi ka bonolo.” (1 Petere 3:8) O ka se laole kgang ya gore a batsadi ba gago ba tla kgaogana kgotsa nnyaa kgotsa a ba tla bereka ka bobedi ka nako e e tletseng. Mme ka tsela nngwe o ka kgona go laola gore a o tla letla gore dikgwetlho tseo di senye kamano ya gago le bone. Tsela e nngwe e o ka fokotsang tlhobaelo ya gago ka yone le kafa o ka oketsang boitumelo jwa gago ka teng ke ka go leka go utlwela batsadi ba gago botlhoko, go leka go tlhaloganya dikgwetlho tse ba lebaneng le tsone.

Mosha mongwe yo o bidiwang Amber o ne a dirisa kgakololo eno. O a dumela gore kamano ya gagwe le mmaagwe ka dinako tse dingwe e tletse ka go ngomoga pelo, go sa utlwane le go kgobega marapo. Le fa go ntse jalo, a re: “Mmè o itshoketse dilo tse dintsi mo botshelong jwa gagwe. O re godisitse re le banè a le nosi. Ka metlha o ne a dira gore re nne le mo re nnang teng, re nne le dijo le diaparo. Ruri ke kgatlhiwa ke nonofo e a nang le yone mme ke solofela gore le nna ke tla nna le boikemisetso jo bo ntseng jalo fa ke lebana le mathata.”

Fa o ka leka go ipaya mo seemong sa batsadi ba gago le go tlhaloganya kafa ba ikutlwang ka teng, go ka go thusa gore o lebe mathata a o lebaneng le one ka tsela e e siameng. Go dira jalo go ka go thusa gape gore o lemoge le go etsa dinonofo tse di molemo tse batsadi ba gago ba nang le tsone.

Motswedi wa Kgakololo E e Ka Ikanngwang

Dikakantsho tse di fa godimo ke dikai fela tsa botlhale jo bo mosola jo bo mo Lefokong la Modimo e leng Baebele. Fa o ntse o ithuta mo go oketsegileng ka buka eno, o tla lemoga botlhokwa jwa kgakololo e e ka ikanngwang e e mo go yone.a

Tsela e nngwe e o ka ithutang mo gontsi ka Baebele ka yone ke ka go kopanela le Basupi ba ga Jehofa le go ithuta Baebele le bone. Mo gare ga batho bano o tla fitlhela ditsala tsa mmatota tse di tla go tshegetsang ka dinako tse di thata le go go thusa go dirisa kgakololo e e botlhale ya Baebele mo botshelong jwa gago. Tota ga go motlhofo go tshela ka melaometheo ya Baebele. Mme fa o tlhopha tsela eno ya botshelo, o tla itsholegela molemo go ya go ile.—Isaia 48:17, 18.

[Ntlha e e kwa tlase]

[Lebokoso/Ditshwantsho mo go tsebe 8, 9]

Se Basha ba se Tlhokang mo Batsading

Go Nna le Nako le Bone: Jehofa Modimo o ne a bolelela batsadi kwa Iseraele gore ba tshwanetse go bua le bana ba bone ka metlha—‘fa ba ntse mo matlong a bone le fa ba tsamaya mo tseleng.’ (Duteronome 6:6, 7) Seno se raya gore batsadi ba tshwanetse go ipha nako le bana ba bone. Go bonala Jesu a ne a akanya gore bana ba tlhoka nako ya gagwe. Ka sekai, fa “batho ba simolola go mo tlisetsa bana ba babotlana gore a ba ame,” Jesu o ne a dira eng? “[O ne] a tsaya bana ka mabogo mme a simolola go ba segofatsa.” (Mareko 10:13, 16) A bo e le sekao se sentle jang ne mo batsading!

Go Buisana ka Kgololesego: Baebele ya re: “Go na le go kgoreletsega ga dithulaganyo kwa go se nang puo ya sephiri teng.” (Diane 15:22) Go ne go tlhokega gore o nne le puo ya sephiri le bana ba gago fa ba ne ba sa ntse ba le babotlana. Mme go botlhokwa le go feta fa ba le mo dingwageng tsa bone tsa bolesome, fa gantsi basha ba dirisa nako e nnye ba le kwa gae mme ba bo ba dirisa nako e ntsi ba na le ditsala tsa bone kwa sekolong kgotsa le batho ba bangwe. Fa go se na puo ya sephiri—batsadi le bana ba sa buisane ka kgololesego—basha ba ka nna e kete ke batho ba sele mo lelapeng.

Kotlhao e e Tshwanelang: Lefoko kotlhao le na le kgopolo ya go kgalemela le go thapisa. Diane 15:5 ya re: “Ope fela yo o seeleele ga a tlotle kotlhao ya ga rraagwe, mme ope fela yo o tlhokomelang kgalemelo o botlhale.” Mosha a ka se ka a ‘tlhokomela kgalemelo’ fa a sa e newe. Gone ke boammaaruri gore fa basha ba fiwa kotlhao, batsadi ba tshwanetse go nna tekatekano. Ba tshwanetse go tila go gagamatsa letsogo thata mo e leng gore ba kgoba bana ba bone marapo, gongwe le e leng go dira gore ba se ka ba tlhola ba itshepa. (Bakolosa 3:21) Le fa go ntse jalo, batsadi ga ba batle go tlogelela dilo thata mme ba bo ba palelwa ke go naya bana ba bone thapiso e ba e tlhokang. Go tlogelela dilo go ka nna le ditlamorago tse di kotsi.b

[Ntlha e e kwa tlase]