“Dilo Tsa Pele ga di Kitla di . . . Tsoga mo Pelong”

Mmopi wa rona o senotse gore o tla dirang mo bogautshwaneng. A re:

“Bona, ke bopa magodimo a masha le lefatshe le lesha; mme dilo tsa pele ga di kitla di gakologelwa, le fa e le go tsoga mo pelong.”—ISAIA 65:17.

“Dilo tsa pele” tse di se kitlang di “tsoga mo pelong” ke dife? Ditemana tse di dikologileng temana eno di bontsha gore ke tshiamololo, bolwetse, pogo le mathata a mangwe a mantsi a a utlwisang batho botlhoko. Mathata ao a tla fela jang? Karabo ya potso eno e amana le “magodimo a masha” le “lefatshe le lesha” a go boleletsweng pele ka one.

Dipolelwana tseno tse di kgatlhang le bokao jwa tsone di tla tlhalosiwa mo puong ya phatlalatsa ya setlhogo se se reng “Dilo Tsa Pele ga di Kitla di . . . Tsoga mo Pelong.” Puo eno e tla neelwa kwa Dikopanong Tsa Kgaolo Tsa Basupi ba ga Jehofa tsa setlhogo se se reng “Dibela Pelo ya Gago!” tse di tla simololang ka May kwa United States di bo di tswelela go dikologa lefatshe lotlhe.

O lalediwa ka lorato gore o ye kwa kopanong e e gaufi le wena. Fa o batla tshedimosetso e e rileng, tsweetswee ikgolaganye le Basupi ba ga Jehofa ba ba mo lefelong la lona kgotsa o kwalele bakwadi ba makasine ono. Aterese ya Internet ya www.pr418.com e na le lenaane la mafelo a dikopano tsotlhe di tla tshwarelwang kwa go one le matlha a tsone.